Category: ကမာၻ႔မြတ္စလင္ သတင္းမ်ား

သြဂုတ် ၂၇၊ ၂၀၂၃

M-Media 

-အိန္ဒိယနိုင်ငံမြောက်ပိုင်း အူတာပရာဒက်ရှ်ပြည်နယ်က ပုဂ္ဂလိက ကျောင်းတစ်ကျောင်းမှာ မွတ်စလင်ကလေးငယ်တစ်ဦးကို အတန်းပိုင်ဆရာမ ကိုယ်တိုင်က ဘာသာရေးအကြမ်းဖက်မှု ကျူးလွန်ခဲ့ပါတယ်။ 

တရက်တာ တယာဂီလို့ အမည်ရတဲ့ ဆရာမဟာ အသက် ၇ နှစ်အရွယ် မွတ်စလင်ကျောင်းသား မိုဟာမက် အလ်တာမက်ရှ်ကို အတန်းရှေ့ထွက်ရပ်ခိုင်းကာ ဟိန္ဒူကျောင်းသား တစ်ဦးစီ ခေါ်ပြီး ပါးရိုက်ခိုင်းခဲ့တာပါ။ 

မွတ်စလင်မုန်းတီးရေးစကားတွေကိုလည်း တယာဂီက ပြောကြားခဲ့ပြီး ရိုက်တာ အားမပါရင် ခပ်ပြင်းပြင်းရိုက်ဖို့လည်း ကျောင်းသားတွေကို တိုက်တွန်းခဲ့ပါတယ်။ 

တယာဂီဟာ Neha ပုဂ္ဂလိကကျောင်းရဲ့ ကျောက်အုပ်ဆရာမလည်း ဖြစ်ပါတယ်။ 

အလ်တာက်ရှ်ဟာ ၂ နာရီလောက် မတ်တတ်ရပ်ပြီး ပါးရိုက်ခံခဲ့ရပါတယ်။

သြဂုတ်လ ၂၄ ရက်နေ့က ဖြစ်ပွားခဲ့တဲ့ ဒီအဖြစ်အပျက် ဗီဒီယိုဟာ အွန်လိုင်းစာမျက်နှာမှာ ပြန့်နှံ့သွားပြီး နိုင်ငံတစ်၀ှမ်းက ၀ေဖန်မှုတွေလည်း ရှိလာပါတယ်။ 

မွတ်စလင်တွေကို ကျောင်းပေးမတက်သင့်ကြောင်း ဆရာမက ပြောဆိုခဲ့ပြီး ကျောင်းတာ၀န်ရှိသူလို့ ယူဆရတဲ့ အမျိုးသားတစ်ဦးကလည်း ဒီစကားကို ထောင်းခံကြောင်း ပြောကြားတာကို ဗီဒီယိုမှာ ကြားရပါတယ်။ 

“မနေ့က ကျွန်မသားလေး ငိုပြီး ပြန်လာတယ်။ သူစိတ်ဒဏ်ရာ ရသွားပြီ။ ကလေးတွေကို ဒီလိုလုပ်တာမျိုးက မကောင်းပါဘူး” လို့ မိခင် ရူဘီနာက ပြောပါတယ်။ 

ဖခင် မိုဟာမက် အီရ်ရှက်ကလည်း အတန်းပိုင်ဆရာမဟာ ကျောင်းသားတစ်ဦးချင်းဆီကို ခေါ်ပြီး သူ့ကို ပါးရိုက်ခိုင်းတယ်လို့ သားဖြစ်သူက ပြောကြားကြောင်း ဖြေကြားခဲ့ပါတယ်။ 

“စာကျက်ခိုင်းတာ မရလို့ဆိုပြီး ဒီလိုလုပ်တယ်လို့ ဆရာမက ပြောတယ်။ ကျွန်တော့်သားက လူတော်ပါ။ ကျူရှင်လည်းတက်တယ်။ ဆရာမက ဘာ့ကြောင့် ဒီလိုလုပ်လဲဆိုတာ ကျွန်တော် နားမလည်နိုင်ဘူး။ အမုန်းတရားတွေ ဖုံးမနိုင် ဖိမရဖြစ်နေပြီ”

နိုင်ငံတစ်၀ှမ်း အလွန်အမင်းပြန့်နှံ့နေတဲ့ မွတ်စလင် မုန်းတီးရေး လှုပ်ရှားမှု ရလဒ်ဖြစ်တယ်လို့လည်း အီရ်ရှက်က ပြောပါတယ်။ 

ဆရာမ တယာဂီဟာ အရင်ကလည်း မွတ်စလင်ကျောင်းသားတွေကို ဒီလိုလုပ်လေ့ရှိတယ်လို့ ရူဘီနာက ပြောပါတယ်။ အလ်တာမက်ရှ်မတိုင်ခင် ရက်ပိုင်းအရင်ကလည်း ရူဘီနာတို့ အမျိုး ကျောင်းသားတစ်ဦးလည်း ဒီလိုအကြမ်းဖက်မှုနဲ့ ကြုံတွေ့ခဲ့ရပါတယ်။ 

နောင်တမရ 

ဆိုရှယ်မီဒီယာမှာ အကြီးအကျယ် ၀ေဖန်မှုတွေ ရှိလာခဲ့ပြီးတဲ့နောက် တယာဂီဟာ တောင်းပန်စကား ပြောခဲ့ပါတယ်။ 

ဒါပေမယ့် ဒီလုပ်ရပ်အတွက် မရှက်ဘူးလို့ သူမက ဆိုပါတယ်။ 

“ရှက်စရာမလိုဘူးလေ။ တစ်ရွာလုံးကို စာသင်ပေးနေတဲ့ ဆရာမပဲ။ တစ်ရွာလုံး ငါ့ဘက်မှာ ရှိတယ်” 

ကလေးတွေကို ထိန်းကြောင်းနိုင်ဖို့အတွက် ဒီလိုလုပ်တာဖြစ်တယ်လို့လည်း သူမက ထည့်သွင်းပြောဆိုခဲ့ပါတယ်။ 

ကျောင်းတည်ရှိရာ မူဇာဖာရ်နာဂါမြို့ ရဲတပ်ဖွဲ့က ဖခင်ရဲ့ တိုင်ကြားမှုကြောင့် လက်ရှိမှာ အမှုဖွင့်ထားပြီး အရေးယူဆောင်ရွက်သွားမယ်လို့ ပြောကြားခဲ့ပါတယ်။ 

Ref: NDTV, Aljazeera 

သြဂုတ် ၁၄၊ ၂၀၂၃

M-Media

-အိန္ဒိယနိုင်ငံမြောက်ပိုင်း ဟာရ်ယာနာပြည်နယ်မှာ မွတ်စလင်တွေကို သပိတ်မှောက်ဖို့နဲ့ မောင်းထုတ်ဖို့ ဟိန္ဒူအစွန်းရောက်အဖွဲ့တွေက ဆော်သြလာပါတယ်။ 

ဇူလိုင်လ ၃၁ ရက်နေ့ ဟိန္ဒူဘုရားပွဲ လှည့်လည်မှုအတွင်း ဟိန္ဒူလူအုပ်က မွတ်စလင်ရပ်ကွက်တွေကို ၀င်ရောက် တိုက်ခိုက်ဖျက်ဆီးမှု ဖြစ်ပွားပြီးနောက်ပိုင်း ဒီလို လှုပ်ရှားမှုတွေ ပေါ်ပေါက်လာတာပါ။ 

တိုက်ခိုက်မှုအတွင်း လုံခြုံရေးတပ်ဖွဲ့၀င် ၂ ဦး၊ ဗလီဆရာတစ်ဦး အပါအ၀င် ၆ ဦးသေဆုံးခဲ့ကာ ဗလီ၀တ်ကျောင်းတော်တစ်လုံး မီးရှို့ဖျက်ဆီးခံခဲ့ရပါတယ်။ 

ပြည်နယ်ရဲတပ်ဖွဲ့က တိုက်ခိုက်မှုနဲ့ပတ်သက်သူ ၃၁၂ ဦးကို ဖမ်းဆီးထားတယ်လို့ သတင်းထုတ်ပြန်ပါတယ်။ 

အဲဒီနောက်ပိုင်း ဟိန္ဒူအစွန်းရောက် အဖွဲ့အစည်းတွေက ဆန္ဒပြမှုတွေ လုပ်ဆောင်ကာ မွတ်စလင်တွေကို မောင်းထုတ်ဖို့၊ သပိတ်မှောက်ဖို့ ဆော်သြလာကြပါတယ်။ 

ဟန်စီမြို့မှာ သြဂုတ်လ ၂ ရက်နေ့က ပြုလုပ်တဲ့ ဟိန္ဒူအစွန်းရောက်အဖွဲ့ Bajrang Dal ရဲ့ ဆန္ဒပြမှုမှာ ခေါင်းဆောင် ကရစ်ရှ်နား ဂွါဂျာက ဟိန္ဒူစီးပွားရေး လုပ်ငန်းရှင်တွေအနေနဲ့ မွတ်စလင်အလုပ်သမားတွေကို အလုပ်ထုတ်ပစ်ဖို့ တိုက်တွန်းခဲ့ပါတယ်။ 

“မွတ်စလင်အလုပ်သမားတွေကို ခန့်ထားတဲ့ ဆိုင်တွေရဲ့ရှေ့မှာ အဲဒီဆိုင်ကို သပိတ်မှောက်ကြောင်း ငါတို့ ပိုစတာလာကပ်မယ်။ ဟိန္ဒူသစ္စာဖောက်တွေအဖြစ် ကြေငြာသွားမယ်” 

မွတ်စလင်စျေးဆိုင်တွေ ထွက်သွားဖို့လည်း ကရစ်ရှ်နားက သတိပေးခဲ့ပါတယ်။ 

“ဒီမှာ ဟိန္ဒူစျေးဆိုင်တွေပဲရှိရမယ်။ ၂ ရက်အတွင်း မွတ်စလင်စျေးဆိုင်တွေ ရှိနေသေးရင် ဖြစ်လာသမျှနောက်ဆက်တွဲဟာ ဖွင့်တဲ့လူရဲ့တာ၀န်သာ ဖြစ်လိမ့်မယ်” 

ရိုဟင်ဂျာတွေလို အပြင်ကရောက်လာတဲ့ မွတ်စလင်တွေကိုသာ ဖယ်ရှားပစ်ဖို့ ပြောတာလို့ အလ်ဂျာဇီးရားသတင်းဌာနက မေးမြန်းမှုကို ကရစ်ရှ်နားက ဖြေကြားခဲ့ပါတယ်။ 

ဟန်ဆီမြို့က မွတ်စလင်တွေအားလုံးကို မောင်းထုတ်ဖို့ ရည်ရွယ်လားလို့ မေးမြန်းရာမှာ

“Bajrang Dal အဖွဲ့ဟာ ဘယ်သူကိုမှ ခြိမ်းခြောက်နေတာ မဟုတ်ပါဘူး။ ငါတို့ကိုယ်တိုင်က ကြောက်နေမှာမဟုတ်သလို ဟိန္ဒူလူ့အဖွဲ့အစည်းအပေါ် ခြိမ်းခြောက်တာမျိုးကိုလည်း လက်ခံမှာ မဟုတ်ပါဘူး” 

မွတ်စလင်တွေရဲ့ စီးပွားရေးကို သပိတ်မှောက်ဖို့ တိုက်တွန်းဆော်သြလာတာဟာ လူအဖွဲ့အစည်းတစ်ခုလုံးကို ပိုမို ဖိနှိပ်အကြမ်းဖက်ဖို့ အစီအစဥ်ရဲ့ တစ်စိတ်တစ်ပိုင်းဖြစ်ကြောင်း အမုန်းစကားကိစ္စ တိုင်ကြားမှုတွေမှာ ပါ၀င်ဆောင်ရွက်ပေးနေတဲ့ ရှေ့နေ ရှာရွတ်ခ် အလမ်က ပြောပါတယ်။ 

“ဒီတိုင်းပြည်မှာ မွတ်စလင်တွေ အခွင့်အရေးမရှိဘူးလို့ သူတို့ ထင်မြင်နေကြောင်း ဒီတောင်းဆိုမှုတွေကနေ သိရပါတယ်။ နောက်ပိုင်းမှာ မြို့တွေ၊ ခရိုင်တွေကနေ မောင်းထုတ်တာအထိ ဖြစ်လာနိုင်ပါတယ်။ နိုင်ငံရဲ့ ညီညွတ်မှုနဲ့ လုံခြုံရေးကို ဒီတောင်းဆိုမှုတွေက ထိပါးနေသလို၊ အခြေခံဥပဒေမှာ အာမခံပေးထားတဲ့ အခြေခံအခွင့်အရေးတွေကို ချိုးဖောက်တာလည်း ဖြစ်ပါတယ်”

ဟိန္ဒူအစွန်းရောက်အဖွဲ့တွေရဲ့ ဆန္ဒပြမှုမှာ ရဲတပ်ဖွဲ့က လိုက်ပါစောင့်ရှောက်ပေးတာတွေကိုလည်း သူမက ထောက်ပြပါတယ်။ 

“အမုန်းဆောင် ဒီချီတက်မှုတွေကို ရဲတပ်ဖွဲ့၀င်တွေ ဘေးကနေ လိုက်ပါ ကာကွယ်ပေးတာတွေကို တစ်ခါတစ်ရံမှာ တွေ့ရပါတယ်။ ဒီကိစ္စကို အရေးယူမှုမရှိတာဟာ တရားရုံးချုပ်ရဲ့ အမိန့်ကို ရဲတပ်ဖွဲ့က ချိုးဖောက်တာလည်း ဖြစ်ပါတယ်” 

အမုန်းစကားပြောဆိုမှုကိစ္စတွေမှာ တိုင်ကြားတာကိုမစောင့်ဘဲ ချက်ခြင်းအရေးယူရမယ်လို့ အိန္ဒိယ တရားရုံးချုပ်က ၂၀၂၃ ခုနှစ် ဧပြီလမှာ အမိန့်ထုတ်ပြန်ထားတာပါ။ 

တီဂရာဆိုတဲ့ ရွာတစ်ခုမှာ ဟိန္ဒူလူအုပ်က သြဂုတ်လ ၆ ရက်နေ့မှာ ဆန္ဒပြပွဲတစ်ခု ပြုလုပ်ခဲ့ပြီး ဂရူဂရမ်ခရိုင် အန်ဂျူမန် ဂျာမေဗလီက ဗလီဆရာတစ်ဦးကို သတ်ဖြတ်မှုအတွက် ဖမ်းဆီးခံထားရတဲ့သူတွေကို လွှတ်ပေးဖို့ တောင်းဆိုခဲ့ပါတယ်။ 

Bajrang Dal အစွန်းရောက်အဖွဲ့က ခေါင်းဆောင်တစ်ဦးဖြစ်တဲ့ ကူဘူရှန် ဘာဒွက်ဂျ်က မွတ်စလင်တွေဟာ ဒေသတွင်း ငြိမ်းချမ်းရေးကို နှောက်ယှက်ဖျက်ဆီးနေသူတွေဖြစ်ကြောင်း၊ မြို့အတွင်းမှာ နေထိုင်တာ၊ အလုပ်လုပ်တာ၊ နေအိမ်ငှားတာတွေကို ခွင့်ပြုမှာမဟုတ်ကြောင်း ဆန္ဒပြမှုမှာ ပြောကြားခဲ့ပါတယ်။ 

ပြည်နယ်အတွင်း ခရိုင် ၃ ခုက ရွာပေါင်း ၅၀ ကျော်မှာ ရွာအုပ်ချုပ်ရေးအဖွဲ့အစည်းတွေက မွတ်စလင်တွေ ရွာအတွင်း မ၀င်ရောက်ရဘူးလို့ စာထုတ်ဟန့်တားခဲ့ပါတယ်။ 

ဒီလိုဟန့်တားမှုကို ၀န်ကြီးချုပ် နရန်ဒရာမိုဒီ ကြည်ညိုတဲ့ ဟိန္ဒူလက်ယာစွန်းရောက် ခေါင်းဆောင်တစ်ဦးက ထောက်ခံကြောင်း Twitter စာမျက်နှာမှာ ရေးသားခဲ့ပါတယ်။ 

Ref: Aljazeera