Tag: EPL

ဇန်န၀ါရီ ၁၂၊ ၂၀၁၅
M-Media

– မိမိတို့အသင်းအနေဖြင့် ယခုလက်ရှိတွင် အနေအထားကောင်း၌ ရှိနေပြီး ဒုတိယရာသီဝက်အတွင်း အမှတ်ပေးဇယား၌ ပိုမိုကောင်းမွန်သော အဆင့်ကို ပြန်လည် တက်လှမ်းလာနိုင်မည်ဟု ခံစားရကြောင်း လီဗာပူးလ်နည်းပြ ဘရန်ဒန်ရော်ဂျာက
ပြောကြားလိုက်သည်။

စနေနေ့က ကစားခဲ့သည့် ဆန်းဒါးလန်းနှင့်ပွဲတွင် လီဗာပူးလ်မှာ ကစားပုံကောင်းခဲ့ပြီး တစ်ယောက်လျော့ ဆန်းဒါးလန်းအား ၁ ဂိုး ဂိုးမရှိဖြင့် အနိုင်ရရှိခဲ့သည်။ ထို့ပြင် အသင်းရှိ အားထားရသည့် ကွင်းလယ်ကစားသမား စတာလင်မှာ လာမည့်တစ်ပတ်
အက်စတွန်ဗီလာနှင့်ပွဲတွင် ပါဝင်နိုင်မည်ဖြစ်ပြီး တိုက်စစ်မှူး စတားရစ်ခ်ျမှာလည်း ယခုလအတွင်း ဒဏ်ရာမှ ပြန်ကစားနိုင်မည်ဖြစ်သည်။

ဒဏ်ရာရနေသည့် အဒမ်လာလနာကလည်း မကြာမီ ပြန်ကစားနိုင်တော့မည် ဖြစ်သောကြောင့် ရော်ဂျာက အသင်း၏ စွမ်းဆောင်ရည်နှင့်ပတ်သက်၍ ယုံကြည်မှုအပြည့် ရှိနေသည်။

`စိတ်လှုပ်ရှားစရာကောင်းတဲ့အချက်ကတော့ ကျွန်တော်တို့ဟာ အလုပ်ရဲ့ အဆုံးပိုင်းဖြစ်တဲ့ ဒုတိယရာသီဝက်မှာ အမြဲတမ်း ပိုကောင်းပါတယ်။ စတာလင် လန်းလန်းဆန်းဆန်း ပြန်လာမယ်။ အဒမ် လာလနာကလည်း ပြန်ကစားနိုင်မယ်။ ဒါ့ကြောင့် ကျွန်တော်တို့ ပိုကောင်းမယ်လို့ မျှော်လင့်ပါတယ်´ ဟု ရော်ဂျာက ပြောကြားခဲ့သည်။

လီဗာပူးမှာ အလက်ရှိအချိန်တွင် ရမှတ် ၃၂ မှတ်ဖြင့် အဆင့် ၈ နေရာတွင်ရှိနေပြီး အဆင့် ၄ မှ မန်ယူနှင့် ၅ မှတ်ကွာဟနေသည်။

Ref: goal

မန်စီးတီးကို ၂ မှတ်ဖြတ်နိုင်ခဲ့တဲ့ ချယ်ဆီး၊ အာဆင်နယ်၊ လီဗာပူးလ်တို့ အနိုင်ရခဲ့ပြီး၊ မန်ယူ လက်စားချေခံလိုက်ရတဲ့ ပရီးမီးယားလိဂ် ပွဲစဉ် ၂၁
=======================
ဇန်န၀ါရီ ၁၂၊ ၂၀၁၅
M-Media

– ဒီတစ်ပတ် စနေ၊ တနင်္ဂနွေမှာ ကစားခဲ့တဲ့ ပရီးမီးယားလိဂ်ပွဲတွေမှာတော့ ထိပ်ဆုံးကချယ်ဆီး အနိုင်ရခဲ့ပြီး အမှီလိုက်နေတဲ့ မန်စီးတီးကတော့ သရေကျခဲ့ပါတယ်။ ရော်ဂျာရဲ့လီဗာပူးလ် အနိုင် ၃ မှတ်သေချာခဲ့ပြီး အာဆင်နယ်ကလည်း အိမ်ကွင်းမှာ အနိုင်ရခဲ့ပါတယ်။ မန်ယူကတော့ အိမ်ကွင်းမှာပဲ အရေးနိမ့်ခဲ့ပါတယ်။

ပြီးခဲ့တဲ့ ၂ ပွဲဆက်တိုက် နိုင်ပွဲမရခဲ့တဲ့ ချယ်ဆီးတို့ စတမ်းဖို့ဒ်ဘရစ်ခ်ျမှာ အမှားအယွင်း မရှိခဲ့ပါဘူး။ အိမ်ကွင်းမှာ အနိုင်ကစားခဲ့တဲ့ နယူးကာဆယ်တို့ ဒီပွဲမှာလည်း ချယ်ဆီးကို ကောင်းကောင်း ဒုက္ခပေးနိုင်ခဲ့ပေမယ့် ချယ်ဆီးက အကောင်းဆုံး ကျော်ဖြတ်နိုင်ခဲ့ပါတယ်။ အနိုင်ဂိုးတွေကို ၄၃ မိနစ်မှာ အော်စကာနဲ့၊ ၅၉ မိနစ်မှာ ဒီယေဂိုကော်စတာတို့က သွင်းယူပေးခဲ့တာဖြစ်ပါတယ်။ ဒီအပွဲအနိုင်ကြောင့် ချယ်ဆီးတို့ မန်စီးတီးကို ၂ မှတ်ဖြတ်နိုင်ခဲ့ပါတယ်။

စနေနေ့က အစောဆုံးကစားခဲ့တဲ့ပွဲမှာ ဝေဖန်ခံနေရတဲ့ လီဗာပူးလ် ဆန်းဒါးလန်းကို အနိုင်ကစားနိုင်ခဲ့ပါတယ်။ လီဗာပူးလ်တို့ ကစားပုံလည်းကောင်းခဲ့ပြီး ပထမပိုင်း ၈ မိနစ်မှာပဲ မာကိုဗစ်က တစ်လုံတည်းသော အနိုင်ဂိုးကို သွင်းယူပေးခဲ့တာပါ။ နောက်ပိုင်းမှာ ဂိုးသွင်းခွင့်အချို့ ရခဲ့ပါပေမယ့် လီဗာပူးလ်တို့ အသုံးမချနိုင်ခဲ့ပါဘူး။ ဒုတိယပိုင်းအစောပိုင်းမှာ ဆန်းဒါးလန်းက လီယမ် ဘရစ်ကတ် အထုတ်ခံလိုက်ရတာက လီဗာပူးလ်အတွက် ပိုပြီးအသာရစေခဲ့ပြီး အနိုင်ကို ထိန်းကစားသွားနိုင်ခဲ့ပါတယ်။

ချယ်ဆီးကို အမှီလိုက်နေတဲ့ မန်စီးတီးတို့ ဒီပွဲ အဲဗာတန်ကို သရေကျခဲ့တာကတော့ စိတ်ပျက်စရာပါ။ ဒါပေမယ့် လက်ရှိချန်ပီယံ မန်စီးတို့အတွက် အကောင်းဆုံးရလဒ်ဖြစ်ခဲ့ပြီး အဲဗာတန်တိုက်စစ်မှူး လူကာကူရဲ့ အပိုင်ဂိုးသွင်းခွင့် ၂ ကြိမ်ကို ဂိုးသမား ဂျိုးဟတ် အကောင်းဆုံး ကာကွယ်နိုင်ခဲ့တာကြောင့်သာ အရှုံးမပေးခဲ့ရတာ ဖြစ်ပါတယ်။ ၇၄ မိနစ်မှာ ဖာနန်ဒင်ဟိုက မန်စီးတီးအတွက် အဖွင့်ဂိုး သွင်းပေးနိုင်ခဲ့ပေမယ့် အိမ်ကွင်းပရိတ်သတ်အားနဲ့ ဖိအားပေးနိုင်ခဲ့တဲ့ အဲဗာတန်ရဲ့ နိုင်စမစ်က ၄ မိနစ်အကြာမှာပဲ ချေပဂိုး သွင်းပေးနိုင်ခဲ့ပါတယ်။

ဗန်ဂါးလ်ရဲ့ မန်ယူကတော့ အိမ်ကွင်းမှာ ခြေစွမ်းပြနိုင်ခဲ့ပေမယ့် အနိုင် ၃ မှတ်တော့ ရယူနိုင်ခြင်း မရှိခဲ့ပါဘူး။ ပထမပိုင်းမှာ ဗန်ပါစီ၊ ဒီမာရီယာတုိ့ရဲ့ အပိုင်ကန်သွင်းချက်တွေ ဂိုးမရခဲ့တာကတော့ စိတ်ပျက်စရာပါပဲ။ ဒုတိယပိုင်းမှာ ဆောက်သက်တမ်တို့က ပိုကောင်းခဲ့ပြီး ၆၉ မိနစ်မှာ ဒူဆန် တာဒစ်က တစ်လုံးတည်းသော အနိုင်ဂိုးကို သွင်းပေးခဲ့ပါတယ်။ ဆောက်သက်တမ်ရဲ့ ဒီပွဲအနိုင်ဟာ ပထမအကျော့ အိမ်ကွင်း ရှုံးကြွေးကို ပြန်ဆပ်နိုင်ခဲ့တာလည်း ဖြစ်ပါတယ်။

အာဆင်နယ်ကတော့ ဂိုးသွင်းစက် ဆန်းချက်ဇ်ရဲ့ သွင်းဂိုး ၂ ဂိုး၊ ကွန်စီယဲလ်နီရဲ့ သွင်းဂိုး ၁ ဂိုးနဲ့ စတုတ်စီးတီးကို ဂိုးပြတ်ခြေပြတ် အနိုင်ရခဲ့ပါတယ်။

နယူးကာဆယ်နည်းပြဟောင်း ပါဂျူးက အသင်းသစ် ခရစ္စတယ်ပဲလေ့စ်နဲ့ ပထမဆုံး ပရီးမီးယားလိဂ်ပွဲမှာ စပါးအသင်းကို အနိုင်ရအောင် စွမ်းဆောင်ပေးနိုင်ခဲ့ပါတယ်။ ဇယားအောက်ခြေက ဟားလ်စီးတီး ရှုံးနိမ့်ခဲ့ပြီး ဘန်လေနဲ့ လက်စတာတို့က အနိုင်ရပါတယ်။

ပရီးမီးယားလိဂ် ပွဲစဉ် ၂၁ ရလဒ်များကတော့ အောက်ပါအတိုင်း ဖြစ်ပါတယ်။

ဆန်းဒါးလန်း ၀-၁ လီဗာပူးလ်
ဘန်လေ ၂-၁ ကျူပီအာရ်
ချယ်ဆီး ၂-၀ နယူးကာဆယ်
အဲဗာတန် ၁-၁ မန်စီးတီး
လက်စတာ ၁-၀ အက်စတွန်ဗီလာ
ဆွမ်ဆီး ၁-၁ ၀က်စ်ဟမ်း
ဝက်စ်ဘရွန်း ၁-၀ ဟားလ်စီးတီး
ခရစ္စတယ်ပဲလေ့စ် ၂-၁ စပါး
အာဆင်နယ် ၂-၀ စတုတ်စီးတီး
မန်ယူ ၀-၁ ဆောက်သက်တမ်

ဇန်န၀ါရီ ၉၊ ၂၀၁၅
M-Media

– စတီဗင်ဂျရတ်အား ရာသီကုန်တွင် စွန့်လွှတ်ရတော့မည့် မိမိတို့အသင်းအနေဖြင့် နာမည်ကြီးကစားသမားများ ခေါ်ယူရန်ခက်ခဲသည်ဟု လီဗာပူးလ်နည်းပြ ဘရန်ဒန်ရော်ဂျာက ၀န်ခံပြောကြားလိုက်သည်။

ပြီးခဲ့သည့်နှစ်က တိုက်စစ်မှူး လူးဝစ်ဆွာရက်ဇ်ကို လက်လွှတ်ခဲ့ရသည့် လီဗာပူးလ်မှာ ဆွာရက်ဇ်၏ နေရာအတွက် သင့်လျော်သည့် ကစားသမားဖြင့် အစားထိုးနိုင်ခြင်း မရှိခဲ့ဘဲ ယခုနှစ်ကုန်တွင်လည်း အသင်း၏ အဓိကမောင်းနှင်အားဖြစ်သည့် ဂျရတ်ကို
ဆုံးရှုံးရတော့မည်ဖြစ်သည်။

ရော်ဂျာကမူ မိမိတို့အသင်းမှာ ကစားသမားကောင်းများကို ခေါ်ယူရန် ခက်ခဲနေပြီး၊ ပြီးခဲ့သည့် နွေရာသီက ဆန်းချက်ဇ်နှင့် ရှာကီရီတိုအား မခေါ်ယူနိုင်ခြင်းကို နောင်တရမိကြောင်း ပြောကြားခဲ့သည်။

လီဗာပူးလ်မှာ ဘာလော့တယ်လီ၊ လာလနာ၊ မာကိုဗစ်တို့ အပါအ၀င် ယူရို ၁၂၈ သန်းအထိ အကုန်အကျခံကာ ကစားသမားများကို ၀ယ်ယူခဲ့သော်လည်း အသင်းမှာ ပိုမိုကောင်းမွန်လာခြင်း မရှိဘဲ ရော်ဂျာကမူ အသင်းအား ထပ်မံတောင့်တင်းအောင် ဆောင်ရွက်ရမည်ဟု ၀န်ခံခဲ့သည်။

ထို့ပြင် အသင်းရှိ စီနီယာကစားသမားများနှင့် လူငယ်ကစားသမားများအကြား ညီတူညီမျှဖြစ်အောင် ဆောင်ရွက်ရခြင်းကို နှစ်သက်ကြောင်း၊ မိမိတို့အသင်းမှာ ကမ္ဘာ့အကောင်းဆုံးအသင်းဖြစ်ရန် ရှေ့ဆက်နေကြောင်း ရော်ဂျာက
ထပ်လောင်းပြောကြားခဲ့သည်။

Ref:goal

ဇန်န၀ါရီ ၉၊ ၂၀၁၅

M-Media

– မိမိအနေဖြင့် မန်ယူအသင်းသို့ ရောက်ရှိလာခြင်းမှာ ဒေးဗစ်ဂီယာအား ကူညီပေးရန်အတွက်သာ ဖြစ်သည်ဟု ဂိုးသမားသစ် ဗစ်တာဗားလ်ဒက်စ်က ပြောကြားလိုက်သည်။

ဘာစီလိုနာအသင်း၏ ဂိုးသမားဟောင်းဖြစ်သူ ဗားလ်ဒက်စ်အား ယမန်နေ့က ၁၈ လစာချုပ် ချုပ်ဆိုခဲ့သည်ဟု မန်ယူအသင်းက အတည်ပြုခဲ့သည်။ ထို့ကြောင့် မန်ယူတွင် ပုံစံကောင်းများ ပြသနေသည့် နံပါတ် ၁ ဂိုးသမား ဒီဂီယာမှာ အသင်းမှ ထွက်ခွာရတော့မည်ဟု သတင်းများ ထွက်ပေါ်လာခဲ့သည်။

သို့သော်လည်း ဗားလ်ဒက်စ်က မိမိမှာ ဒေးဗစ်ဒီဂီယာ၏ နေရာအား ခြိမ်းခြောက်ရန်မဟုတ်ဘဲ ၎င်းအား ကူညီရန်သာဖြစ်သည်ဟု ပြောကြားခဲ့သည်။

`အခုလောလောဆယ်မှာတော့ ဒီဂီယာဟာ ကမ္ဘာ့အကောင်းဆုံး ဂိုးသမားတစ်ယောက်ပါပဲ။ နေ့တိုင်း၊ ပွဲတိုင်းမှာ ပြသတဲ့ သူ့စွမ်းဆောင်ရည်ဟာ သူ့ရဲ့အဆင့် မြင့်မားတယ်ဆိုတာ ပြသနေတာပါပဲ။ ပြီးခဲ့တဲ့နှစ်ကလည်း သူဟာ ကောင်းမွန်ခဲ့ပြီး အခုအချိန်မှာလည်း သူဟာ ကမ္ဘာ့အကောင်းဆုံးဂိုးသမား ဖြစ်တယ်လို့ ကျွန်တော်ထင်ပါတယ်။ ကျွန်တော်ဒီရောက်လာတာဟာ အားလုံးကို ကူညီဖို့ပါ´ ဟု ဗားလ်ဒက်စ်က ပြောကြားခဲ့သည်။

ထို့ပြင် မိမိမှာ အသင်း၏ အစိတ်အပိုင်းတစ်ခုသာဖြစ်ချင်ကြောင်း၊ ပွဲကစားသည့်အခါ အကောင်းဆုံးကစားရန်၊ အသင်းဖော်များအား ကူညီရန်နှင့် အသင်းအနိုင်ရရှိရန်သာ စဉ်းစားကြောင်း ၎င်းက ထပ်လောင်းပြောကြားခဲ့သည်။

Ref: goal.com

ဇန်န၀ါရီ ၇၊ ၂၀၁၅
M-Media

– မန်ယူအသင်း၏ အားထားရသည့် နောက်ခံလူတစ်ဦးဖြစ်သူ မားကို့စ်ရိုဂျိုမှာ ကိုလံဘီယာ မူးယစ်ရာဇာတစ်ဦး၏ ဓာတ်ပုံကို ဆိုရှယ်မီဒီယာတွင် လွှင့်တင်မှုကြောင့် ဝေဖန်မှုများ ခံနေရသည်ဟု သိရသည်။

အသက် ၂၄ နှစ်အရွယ်ရှိ အာဂျင်တိုင်းသား ရိုဂျိုမှာ ၁၉၈၀နှင့် ၁၉၉၀ ပြည့်နှစ်များအတွင်းက ကိုလံဘီယာတွင် ဖြစ်ပွားခဲ့သော ပြည်သူရာပေါင်းများစွာ သေဆုံးမှုနှင့် ဆက်စပ်ပတ်သက်နေသည့် မူးယစ်ရာဇာ ပါဘလို အက်စ်ကိုဘာ၏ ပုံကို ၎င်း၏ Twitter
စာမျက်နှာတွင် ပြီးခဲ့သည့် ရပ်ပိုင်းအတွင်းက လွှင့်တင်ခဲ့သည်။

အဆိုပါ ဓာတ်ပုံတွင် `ဘ၀အချိုးအကွေ့တစ်ခုမှာ အဆိုးတွေနဲ့ ကြုံတွေ့ရတုန်း ကျွန်တော်နဲ့အတူ အငတ်ခံခဲ့တဲ့သူတွေ၊ ကျွန်တော့်ဘေးနားမှာ ရှိခဲ့တဲ့သူတွေသာလျှင် ကျွန်တော့်ရဲ့စားပွဲဝိုင်းမှာ ထိုင်ရမှာပါ´ ဟု အဓိပ္ပါယ်ရသည့် စာတန်းကိုလည်း ရေးသားခဲ့သည်။

လူပေါင်းများစွာကို သတ်ဖြတ်ခဲ့သည့် မူးယစ်ရာဇာတစ်ဦးအား အမွှမ်းတင်သော ရိုဂျို၏ ထိုလုပ်ရပ်ကြောင့် ကိုလံဘီယာပြည်သူများက ပြင်းပြင်းထန်ထန် ဝေဖန်ခဲ့ကြသည်။

ဂျာမီ အော်တီဂါအမည်ရှိ Twitter သုံးစွဲသူတစ်ဦးကမူ `အသုံးမကျတဲ့ အာဂျင်တိုင်းကောင်။ အက်စ်ကိုဘာကို သူတို့က အမွှမ်းတင်မှာပေါ့။ ငါတို့တိုင်းပြည်မှာ ခံစားခဲ့ရတဲ့ နာကျင်မှုမျိုးတွေကို သူတို့မှ မခံစားဘူးတာ။ ကိုလံဘီယာမှာထက် အာဂျင်တီးနားမှာ အဲဒီကောင်တွေကို
ရှိစေချင်လိုက်တာ´ ဟု ရေးသားခဲ့သည်။

အက်စ်ကိုဘာမှာ ဘိန်းလုပ်ငန်းဖြင့် ပေါင် ၂၀ ဘီလီယံခန့် ရှာဖွေခဲ့ပြီးနောက် ၁၉၉၃ ခုနှစ်တွင် ကိုလံဘီယာရှိ မီဒယ်လင်မြို့၌ ရဲတပ်ဖွဲ့၏ ပစ်သက်မှုကို ခံခဲ့ရသည်။ ရိုဂျိုကမူ ၎င်း၏ ထိုလုပ်ရပ်အတွက် မည်သည့်ပြောဆိုမှုမျိုးကိုမှ ယခုအချိန်အထိ မပြုလုပ်သေးပေ။

Ref: dailymail