Tag: Myanmar Military

နိုဝင်ဘာ ၁၊ ၂၀၂၁
M-Media

-အမေရိကန်သံအမတ်ဟောင်းဖြစ်ပြီး နယူးမက္ကဆီကိုပြည်နယ်ရဲ့ အုပ်ချုပ်ရေးမှူးဟောင်းလည်းဖြစ်တဲ့ ဘီလ် ရစ်ချက်ဆန်ဟာ မြန်မာနိုင်ငံကို လာရောက်မှာဖြစ်ပြီး ကိုဗစ်ကပ်ရောဂါ တိုက်ဖျက်ရေး အကူအညီပေးမယ့် လူသားချင်း စာနာထောက်ထားမှုဆိုင်ရာ ခရီးစဉ်ဖြစ်တယ်လို့ သူ့ရဲ့ ပြောရေးဆိုခွင့်ရှိသူက မနေ့က ထုတ်ပြန်ပါတယ်။

ဖေဖော်ဝါရီ ၁ ရက်နေ့မှာ အာဏာသိမ်းပြီး နောက်ပိုင်း​ ပြည်သူလူထုအပေါ် အကြမ်းဖက်မှုအတွက် စစ်​ကောင်စီကို အမေရိကန်က ပြင်းပြင်းထန်ထန် ဝေဖန်ထားပြီး စစ်ခေါင်းဆောင်တွေအပေါ် ပိတ်ဆို့အရေးယူမှုတွေကိုလည်း ထပ်တိုးပြုလုပ်ထားပါတယ်။

ရစ်ချက်ဆန်က သူ့ရဲ့အဖွဲ့ဟာ မြန်မာပြည်သူတွေကို ကူညီထောက်ပံ့ပေးတဲ့ သမိုင်းကြောင်းမျိုး ရှိခဲ့တယ်လို့ ခရီးစဉ်နဲ့ ပတ်သက်တဲ့ ထုတ်ပြန်ချက်မှာ ပြောကြားခဲ့ပါတယ်။ မြန်မာနိုင်ငံက အာဏာသိမ်းမှု အကြောင်း၊ သူ့ရဲ့ ခရီးစဉ် ဘယ်လောက်ကြာမယ်၊ ဘယ်သူတွေနဲ့ တွေ့ဆုံမယ်ဆိုတဲ့ အကြောင်းကိုတော့ ဖော်ပြထားခြင်း မရှိပါဘူး။

“မြန်မာနိုင်ငံ ခရီးစဉ်မှာ နိုင်ငံအတွင်းက ကျွန်တော်တို့ အဆက်အသွယ်တွေနဲ့ ပူးပေါင်းပြီး ကိုဗစ်ကာကွယ်ဆေးနဲ့ ဆေးဝါးပစ္စည်း ဖြန့်ဖြူးပေးဖို့၊ အခြား ပြည်သူ့ကျန်းမာရေး လိုအပ်ချက်တွေ ဖြည့်ဆည်းပေးဖို့ နည်းလမ်းတွေကို ဆွေးနွေး အကောင်အထည်ဖော်သွားမှာပါ”

ရစ်ချက်ဆန်ရဲ့ ပြောရေးဆိုခွင့်ရှိသူ မယ်ဒီလင်း မဟိုနီက ဒီခရီးစဉ်ကို ကုလအတွင်းရေးမှူးချုပ် အန်တိုနီယို ဂူတာရက်စ်လည်း သိရှိတယ်လို့ ဆိုပါတယ်။ အမေရိကန်အစိုးရကတော့ ဒီကိစ္စနဲ့ပတ်သက်ပြီး ဘာမှ မထုတ်ပြန်သေးပါဘူး။

မေလ ၂၄ ရက်နေ့ကတည်းက ဖမ်းဆီးခံထားရတဲ့ Frontier Myanmar အယ်ဒီတာ၊ အမေရိကန်သတင်းထောက် ဒန်နီ ဖန်စတာ ပြန်လည်လွတ်မြောက်ရေး ရစ်ချက်ဆန်က ဆောင်ရွက်ဖို့ရှိလားဆိုတဲ့ သတင်းထောက်တွေရဲ့မေးခွန်းကို မဟိုနီက ဖြေကြားဖို့ ငြင်းဆိုပါတယ်။

ဘီလ်ရစ်ချက်ဆန် မြန်မာနိုင်ငံကို နောက်ဆုံးရောက်ရှိခဲ့တာဟာ ၂၀၁၈ ခုနှစ်မှာဖြစ်ပြီး ရိုဟင်ဂျာတွေအပေါ် စစ်တပ်က အကြမ်းဖက်မှုကျူးလွန်တဲ့ ကိစ္စကို ဖြေရှင်းရေး အကြံဉာဏ်ပေးဖို့အတွက် NLD အစိုးရက ဖွဲ့စည်းတဲ့ အကြံပေးအဖွဲ့မှာ ပါဝင်ဖို့ ဖြစ်ပါတယ်။ ဒါပေမယ့် ဒီအဖွဲ့ဟာ စစ်တပ်ရဲ့ ကျူးလွန်မှုတွေကို ကာကွယ်ပေးဖို့ဖြစ်တယ်လို့ စွပ်စွဲကာ နောက်ပိုင်းမှာ ရစ်ချက်ဆန်တစ်ယောက် အဖွဲ့ကနေ နှုတ်ထွက်သွားခဲ့ပါတယ်။

Ref: VOA

အောက်တိုဘာ ၃၀၊ ၂၀၂၁
M-Media

-မြန်မာအာဏာသိမ်းစစ်ကောင်စီဟာ ဖမ်းဆီးထားတဲ့သူတွေကို အကြီးအကျယ် နှိပ်စက်ညှင်းပမ်းတယ်လို့ သတင်းတွေထွက်လာပြီးတဲ့နောက် ဒီကိစ္စကို စုံစမ်းစစ်ဆေးဖို့ အမေရိကန်အစိုးရက လွှတ်တော်ကို တိုက်တွန်းလိုက်ပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း စစ်ကောင်စီတပ်တွေရဲ့ အကြမ်းဖက်မှုကြောင့် နိုင်ငံတစ်ဝှမ်း လူပေါင်း ၁၂၀၀ နီးပါး သေဆုံးခဲ့ပြီး ထောင်နဲ့ချီ ဖမ်းဆီးခံထားရပါတယ်။ ဖမ်းဆီးထားသူတွေကို စစ်ကောင်စီတပ်တွေက အကြီးအကျယ် ညှင်းပမ်းနှိပ်စက်မှု လုပ်နေတာကို AP သတင်းဌာနက အခုတစ်ပတ် အစောပိုင်းမှာ ရေးသားဖော်ထုတ်ခဲ့ပါတယ်။

အမေရိကန်အစိုးရက ထုတ်ပြန်တဲ့ ကြေငြာချက်မှာ ဒီသတင်းအတွက် အလွန်စိတ်ပျက်ဒေါသထွက်ရတယ်လို့ ဖော်ပြထားပြီး ကျူးလွန်သူတွေကို အရေးယူရမယ်လို့ ဆိုပါတယ်။

“မြန်မာနိုင်ငံက ညှင်းပမ်းနှိပ်စက်မှု သတင်းတွေကို တိတိကျကျ စုံစမ်းစစ်ဆေးကာ ကျူးလွန်သူတွေကို အရေးယူ အပြစ်ပေးရမှာ ဖြစ်ပါတယ်”

AP သတင်းဌာနဟာ ဓာတ်ပုံနဲ့စာ အထောက်အထား၊ ကိုယ်တွေ့ကြုံတွေခဲ့ရသူတွေနဲ့ စစ်တပ်ဖက်က ဘက်ပြောင်းလာတဲ့ အရာရှိ ၃ ဦးရဲ့ ပြောကြားမှုတွေကို ကိုးကားပြီး အာဏာသိမ်းစစ်တပ်က ဖမ်းဆီးခံထားရသူတွေကို အသက်သေဆုံးတဲ့အထိ ညှင်းဆဲနှိပ်စက်တာ၊ သက်သေအထောက်အထား ဖျောက်ပစ်တာ၊ ​ဆေးစာ လိမ်ထုတ်ခိုင်းတာ၊ အလောင်းဖျောက်ဖျက်တာ စတာတွေကို ရေးသားဖော်ထုတ်ခဲ့တာ ဖြစ်ပါတယ်။

“AP သတင်းဌာနရဲ့ စုံစမ်းဖော်ထုတ်မှုဟာ စစ်တပ်က ရာဇတ်မှုမြောက်တဲ့ ညှင်းဆဲရေး စီမံကိန်းကို စနစ်တကျနဲ့ ပီပီပြင်ပြင် လုပ်ဆောင်မှုအကြောင်း မီးမောင်းထိုးပြလိုက်တာပါ။ ဖမ်းဆီးခံထားရသူတွေ သေတဲ့အထိ နှိပ်စက်ခံရတာကို မျက်မြင်တွေ့ခဲ့ရတဲ့ စစ်သားတွေ၊ AP က ဖော်ထုတ်လိုက်တဲ့ ညှင်းပမ်းစစ်ကြောတဲ့ စခန်းတွေဟာ အရေးယူအပြစ်ပေးတဲ့ လုပ်ငန်းစဉ်မှာ အရေးပါလာမှာ ဖြစ်ပါတယ်” လို့ ကုလသမဂ္ဂရဲ့ မြန်မာနိုင်ငံဆိုင်ရာ အထူးကိုယ်စားလှယ် တွမ်အန်ဒရူးက ပြောပါတယ်။

စစ်ကောင်စီတပ်က ​ဖျောက်ဖျက်ဖုံးကွယ်မှုတွေ လုပ်တဲ့ အနေအထားကြောင့် AP ရဲ့ အခုဖော်ထုတ်မှုဟာ တစ်စိတ်တစ်ပိုင်းလောက်သာဖြစ်ပြီး နောက်ထပ် အများကြီး ကျန်နိုင်သေးတယ်လို့လည်း သူက ဆိုပါတယ်။

အမေရိကန်လွှတ်တော် နိုင်ငံခြားရေးကော်မတီက ထိပ်တန်း ရီပက်ဘလစ်ကန်အမတ် မိုက်ကယ် မက်ကောလ်က လွှတ်တော်အနေနဲ့ စစ်ကောင်စီတပ်ကို အရေးယူနိုင်မယ့် ဥပဒေတစ်ခု ထပ်မံပြဌာန်းကာ အရေးယူဖို့ တိုက်တွန်းခဲ့ပါတယ်။

“AP သတင်းဌာနက စုံစမ်းဖော်ထုတ်လိုက်တဲ့ မြန်မာစစ်တပ်ရဲ့ ရက်ရက်စက်စက် ညှင်းပမ်းနှိပ်စက်မှုတွေ၊ ကြောက်စရာ အကြမ်းဖက်မှုတွေဟာ ရိုဟင်ဂျာတွေအပေါ် လူမျိုးတုန်းသတ်ဖြတ်တာအပါအဝင် အဆက်မ​ပြတ်လုပ်လာတဲ့ ရက်စက်ကြမ်းကြုတ်မှုတွေထဲက တစ်ခုဆိုတာ ဝမ်းနည်းဖွယ် တွေ့ရပါတယ် ”

လွှတ်တော် နိုင်ငံခြားရေးကော်မတီရဲ့ ဒီမိုကရက်အဖွဲ့ ဥက္ကဌ လွှတ်တော်အမတ် ဂရီဂိုရီမိက မြန်မာစစ်တပ်ရဲ့ ဒီလိုလုပ်ရပ်တွေကို ရှုတ်ချကြောင်း ပြောကြားခဲ့ပါတယ်၊ လွှတ်တော်အနေနဲ့ စစ်တပ်ကို ထပ်အရေးယူနိုင်မယ့် ဥပဒေတစ်ခု ပြဌာန်းဖို့လည်း တိုက်တွန်းခဲ့ပါတယ်။

အာဏာသိမ်းပြီးနောက်ပိုင်း ပြည်သူလူထုအပေါ် အကြမ်းဖက်မှုတွေအတွက် မြန်မာစစ်ခေါင်းဆောင်တွေ၊ သူတို့ရဲ့ စီးပွားရေးလုပ်ငန်းတွေကို အမေရိကန်၊ ဥရောသမဂ္ဂတို့ဦးဆောင်တဲ့ အအနောက်နိုင်ငံတွေက ထပ်တိုးပိတ်ဆို့မှုတွေ လုပ်ဆောင်ထားတာ ဖြစ်ပါတယ်။

Ref: Independent

အောက်တိုဘာ ၂၉၊ ၂၀၂၁
M-Media

-မြန်မာနိုင်ငံကို အာဆီယံအဖွဲ့ကနေ ထုတ်ပယ်ခြင်း မပြုပေမယ့် တိုင်းပြည်မတည်ငြိမ်မှုကိစ္စတွေမှာ အတိုက်အခံ အဖွဲ့အစည်းတွေနဲ့ တွေ့ဆုံဆွေးနွေးရေး ဖိအားပေးသွားမယ်လို့ အာဆီယံခေါင်းဆောင်တွေက ထိပ်သီးအစည်းအဝေးအပြီးမှာ ပြောကြားလိုက်ပါတယ်။

ထိပ်သီးအစည်းအဝေးကို အင်္ဂါနေ့က ကြာသာပတေးနေ့အထိ ကျင်းပပြုလုပ်ခဲ့တာဖြစ်ပြီး မြန်မာအာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို အာဆီယံအဖွဲ့က တက်ခွင့်မပြုပါဘူး။ ဖေဖော်ဝါရီ ၁ ရက် အာဏာသိမ်းပြီးနောက် ဖြစ်ပေါ်လာတဲ့ မတည်ငြိမ်မှုတွေ ဖြေရှင်းရေး အဖွဲ့ရဲ့ ကြိုးပမ်းမှုတွေမှာ ပူးပေါင်းဆောင်ရွက်မှု မရှိတဲ့အတွက် ဖြစ်ပါတယ်။

လာမယ့်နှစ်အတွက် အာဆီယံဥက္ကဌအဖြစ် တာဝန်ယူမယ့် ကမ္ဘောဒီးယားက အတိုက်အခံတွေနဲ့ တွေ့ဆုံဆွေးနွေးရေး မြန်မာအာဏာသိမ်းစစ်ခေါင်းဆောင်တွေကို ဖိအားပေးသွားမယ်လို့ ပြောပါတယ်။

ကမ္ဘောဒီးယား နိုင်ငံခြားရေးဝန်ကြီး ပရက် ဆွတ်ခွန်က မြန်မာနိုင်ငံဟာ ပြည်တွင်းစစ်နှုတ်ခမ်း၀ကို ရောက်နေပြီး ဒီပြဿနာကို ဖြေရှင်းနိုင်ဖို့အတွက် လာမယ့်နှစ်ဆန်းမှာ အထူးကိုယ်စားလှယ်တစ်ဦးကို ခန့်အပ်သွားမယ်လို့ မနေ့က ထုတ်ပြန်ပါတယ်။

လက်ရှိ မြန်မာနိုင်ငံဆိုင်ရာ အာဆီယံအထူးကိုယ်စားလှယ်ဟာ ဘရူနိုင်း ဒုတိယနိုင်ငံခြား​ရေးဝန်ကြီး အရီဝမ် ယူစွဖ်ဖြစ်ပြီး မြန်မာနိုင်ငံကိုသွားရောက်ကာ ဒေါ်အောင်ဆန်းစုကြည်အပါအ၀င် နိုင်ငံရေးနယ်ပယ်က သက်ဆိုင်သူအားလုံးနဲ့ တွေ့ဆုံဆွေးနွေးဖို့ တောင်းဆိုပေမယ့် စစ်ကောင်စီက ခွင့်မပြုပါဘူး။

“အဖွဲ့ဝင်နိုင်ငံတွေရဲ့ ပြည်တွင်းရေးကို ဝင်မစွက်ရဆိုတဲ့ စည်းမျဉ်းကို ကျွန်တော်တို့အားလုံး လေးစားသလို၊ မြန်မာနိုင်ငံကအခြေအနေကလည်း တော်တော်လေး စိုးရိမ်စရာကောင်းတဲ့ ကိစ္စ ဖြစ်နေပါတယ်။ ဒီပြဿနာဟာ ဒေသတွင်း၊ အာဆီယံအဖွဲ့အပေါ် ယုံကြည်စိတ်ချရမှုနဲ့ မြန်မာနိုင်ငံက ကျွန်တော်တို့ရဲ့ ညီအစ်ကို မောင်နှမတွေအပေါ်မှာ ထိခိုက်လာနိုင်ပါတယ်” လို့ ဆွတ်ခွန်က ပြောပါတယ်။

အခုတစ်ပတ် ထိပ်သီးအစည်းအဝေးမှာ စစ်ကောင်ဆီကို ဖယ်ထုတ်ခဲ့ပေမယ့် အာဆီယံရဲ့ လာမယ့် အခမ်းအနားတွေမှာ ဒီလိုဆက်လုပ်မယ်ဆိုတာမျိုးဟာ မပြောသင့်တဲ့ကိစ္စဖြစ်ကြောင်း၊ ဒီကိစ္စဟာ မြန်မာနိုင်ငံအပေါ်မှာလည်း မူတည်နေကြောင်း ကမ္ဘောဒီးယား နိုင်ငံခြားရေးဝန်ကြီးက ထည့်သွင်းပြောဆိုခဲ့ပါတယ်။

အမည်မဖော်လိုတဲ့ အာဆီယံသံတမန်နှစ်ဦးက အခု ထိပ်သီးအစည်းအဝေးမှာ ဗိုလ်ချုပ်မှူးကြီး မင်းအောင်လှိုင်ကို တက်ခွင့်ပိတ်ပင်တာဟာ အာဆီယံကိုယ်စားလှယ်ရဲ့ တောင်းဆိုမှုတွေကို လိုက်လျောရေးအတွက် ရည်ရွယ်တယ်လို့ ပြောပါတယ်။

အာဆီယံအဖွဲ့ရဲ့ နောက်ထပ်အစည်းအဝေးဟာ နောက်လမှာလုပ်မယ့် အာဆီယံ-တရုတ် အစည်းအဝေးဖြစ်ပြီး၊ အခုနှစ်နှောင်းပိုင်းမှာ အာဆီယံ-အီးယူ အစည်းအဝေး ကျင်းပဖို့ ရှိနေပါတယ်။

အာဆီယံက မထုတ်

လက်ရှိ အာဆီယံဥက္ကဌဖြစ်တဲ့ ဘရူနိုင်းနိုင်ငံက မြန်မာဟာ အာဆီယံမိသားစုရဲ့ အစိတ်အပိုင်း ဖြစ်နေသေးတယ်လို့ ပြောပါတယ်။

ဘရူနိုင်းဘုရင် ဟာဆန်နယ် ဘိုလ်ကိုင်းယားက အာဆီယံအဖွဲ့ကနေ မြန်မာကို မထုတ်ဘူးလို့ ဆိုပါတယ်။

“မြန်မာဟာ အာဆီယံမိသားစုရဲ့ အရေးပါတဲ့ အစိတ်အပိုင်းတစ်ခုပါ။ မြန်မာနိုင်ငံရဲ့ အဖွဲ့ဝင်ဖြစ်မှုကို မေးခွန်းထုတ်စရာကို မလိုပါဘူး။ မြန်မာနိုင်ငံအတွက် အာဆီယံဟာ အဆင်သင့်ရှိနေမှာဖြစ်ပြီး ၅ ချက်ပါ သဘောတူညီချက်ကို အကောင်အထည်ဖော်ပြီး အကူအညီတွေ ဆက်ပေးသွားမှာ ဖြစ်ပါတယ်”

ပြီးခဲ့တဲ့ ဧပြီလ မြန်မာ့အရေး အာဆီယံ ထိပ်သီးအစည်းအဝေးမှာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် တက်ရောက် သဘောတူခဲ့တဲ့ အဲဒီ သဘောတူညီချက် ၅ ချက်မှာ နိုင်ငံရေးနယ်ပယ်က လူအားလုံးနဲ့ တွေ့ဆုံဆွေးနွေးရေး၊ အကြမ်းဖက်မှု ရပ်ဆိုင်းရေး၊ အာဆီယံရဲ့ လူသားချင်း စာနာထောက်ထားမှုဆိုင်ရာ အကူအညီတွေကို ခွင့်ပြုရေး စတာတွေ ပါဝင်ပါတယ်။

မလေးရှားနိုင်ငံခြားရေးဝန်ကြီး ဆိုက်ဖူဒင် အဘ်ဒူလာက ထိပ်သီးအစည်းအဝေးမှာ မြန်မာနိုင်ငံ မပါဝင်တာဟာ အာဏာသိမ်းစစ်ကောင်စီရဲ့ ရွေးချယ်မှုသာ ဖြစ်တယ်လို့ ပြောကြားခဲ့ပါတယ်။

Ref: CNA

အောက်တိုဘာ ၂၇၊ ၂၀၂၁
M-Media

-အိန္ဒိယက ထိပ်တန်းဆိပ်ကမ်းလုပ်ငန်းတစ်ခုဖြစ်တဲ့ Adani Ports က သူတို့ရဲ့လုပ်ငန်းတွေကို ၂၀၂၂ ခုနှစ် ဇွန်လ နောက်ဆုံးထားပိတ်သိမ်းကာ မြန်မာနိုင်ငံကနေ ထွက်ခွာတော့မယ်လို့ ဒီကနေ့မှာ ထုတ်ပြန်ကြေငြာလိုက်ပါတယ်။

ရန်ကုန်က နိုင်ငံတကာဆိပ်ကမ်းတစ်ခုကို ၂၀၂၀ ခုနှစ်မှာ လုပ်ကိုင်ခွင့်ရခဲ့တဲ့ Adani Ports ဟာ မြေငှားရမ်းမှုနဲ့ အခြားကိစ္စတွေမှာ စစ်တပ်ပိုင် စီးပွားရေးလုပ်ငန်း ၂ ခုထဲက တစ်ခုဖြစ်တဲ့ မြန်မာ့စီးပွားရေး ကော်ပိုရေးရှင်း (MEC) နဲ့ ပတ်သက်ဆက်နွယ်မှုရှိတယ်လို့ လူ့အခွင့်အရေးအဖွဲ့တွေက ထုတ်ပြန်ပါတယ်။

ဒီအတွက် ဝေဖန်ခံခဲ့ရပြီး အမေရိကန်နဲ့ အနောက်နိုင်ငံတွေက အာဏာသိမ်းစစ်တပ်ပိုင် စီးပွားရေးလုပ်ငန်းတွေအပေါ် ပိတ်ဆို့မှုတွေ ပြုလုပ်ပြီးနောက်ပိုင်း Adani Ports လည်း မြန်မာနိုင်ငံမှာ စီးပွားရေး ဆက်မလုပ်ဖို့ နိုင်ငံတကာအသိုင်းအ၀ိုင်းရဲ့ ဖိအားပေးမှုကို ခံခဲ့ရပါတယ်။

မေလက ထုတ်ပြန်ချက်မှာ အမေရိကန်ရဲ့ စီးပွားရေးပိတ်ဆို့မှုတွေကို ချိုးဖောက်တာမျိုး ဖြစ်​နေရင် မြန်မာနိုင်ငံက လုပ်ငန်းတွေကို ရပ်ဆိုင်းမယ်လို့ Adani Ports က ပြောခဲ့ပါတယ်။

ဒီကနေ့ ထုတ်ပြန်ချက်မှာတော့ အန္တရာယ်ဆန်းစစ်မှု ကော်မတီက အခြေအနေတွေကို သုံးသပ်မှု လုပ်ပြီးတဲ့နောက်မှာ မြန်မာနိုင်ငံအတွင်း စီးပွားရေးအခွင့်အလမ်းရှာဖွေတာ၊ ရင်းနှီးမြှုပ်နှံထားတာတွေအားလုံး ရုပ်သိမ်းဖို့ ဆုံးဖြတ်ခဲ့တယ်လို့ ဖော်ပြထားပါတယ်။

ဘာ့ကြောင့် ဒီလို ဆုံးဖြတ်ရလဲဆိုတာ ထုတ်ဖော်ပြောဆိုခြင်း မရှိပါဘူး။ မြန်မာနိုင်ငံက ထွက်ခွာရေးလုပ်ငန်းတွေကို လာမယ့်နှစ် မတ်လကနေ ဇွန်လအတွင်း အပြီးသတ်နိုင်မယ်လို့ မျှော်လင့်ကြောင်းလည်း ကုမ္ပဏီက ပြောကြားခဲ့ပါတယ်။

Ref: Reuters