Tag: WuhanVirus

ဒီဇင်ဘာ ၂၁၊ ၂၀၂၁
M-Media

-ပုံပြောင်းကိုဗစ် Omicron (အိုမီခရွန်) ဟာ အရင်က Delta ထက် ပိုမိုကူးစက်မြန်ပြီး ကာကွယ်ဆေး ထိုးထားသူတွေ၊ အရင်ကိုဗစ်ကူးထားသူတွေမှာပါ ပိုမိုကူးစက်ကြောင်း တွေ့ရတဲ့အတွက် စိုးရိမ်စရာကောင်းတယ်လို့ ကမ္ဘာ့ကျန်းမာရေးအဖွဲ့ WHO က တနင်္လာနေ့မှာ သတိပေးလိုက်ပါတယ်။

ကနဦးတွေ့ရှိချက်​တွေကို အခြေခံပြီး Delta ထက် ပိုပျော့တယ်လို့ ကောက်ချက်ချခဲ့တာမျိုးဟာ အသိနည်းရာကျတယ်လို့ WHO ထိပ်တန်းသိပ္ပံပညာရှင် ဆွမ်ယာ ဆွာမီနာသန်က မနေ့က သတင်းစာရှင်းလင်းပွဲမှာ ပြောပါတယ်။ ကူးစက်မှုတွေ မြင့်လာတာကြောင့် ကျန်းမာရေးစောင့်ရှောက်မှုစနစ်တွေလည်း ထိခိုက်လာတယ် သူမက ဆိုပါတယ်။

အိုမီခရွန်ဟာ ကိုဗစ်ကာကွယ်နိုင်တဲ့ ကိုယ်ခံစွမ်းအားကို ကျော်လွှားနိုင်တဲ့အတွက် နိုင်ငံတော်တော်များများမှာ လုပ်ဆောင်နေတဲ့ တတိယအကြိမ် ကာကွယ်ဆေးထိုးမှု Booster ဟာ ကိုယ်ခံအားနည်းသူတွေကို အဓိက ပစ်မှတ်ထားသင့်တယ်လို့ ​ဆွာမီနာသန်က ထည့်သွင်းပြောဆိုခဲ့ပါတယ်။

ကမ္ဘာတစ်ဝှမ်း အိုမီခရွန်ကူးစက်ပြန့်နှံ့မှု မြင့်တက်လာခဲ့ပြီး ဥရောပနိုင်ငံတစ်ချို့မှာ လော့ဒေါင်းပြန်ချတာတွေ၊ ကိုဗစ်စည်းကမ်း ပိုမိုတင်းကြပ်တာတွေ၊ ခရီးသွားလာမှု ပိတ်ပင်တာတွေ ပြန်လည်လုပ်ဆောင်လာပါတယ်။

WHO အကြီးအကဲ Tedros Adhanom Ghebreyesus က အိုမီခရွန်ဟာ Delta ထက် ပိုမြန်မြန် ပြန့်နှံ့နေပြီး ကာကွယ်ဆေးထိုးပြီးသားသူတွေ၊ ကိုဗစ်ကူးစက်ပြီးသားသူတွေမှာ ပိုမိုကူးစက်နိုင်ချေ ရှိတယ်လို့ ပြောပါတယ်။

အိုမီခရွန်နဲ့ပတ်သက်တဲ့ နောက်ဆုံး သုတေသနရလဒ်ကို လန်ဒန်အခြေစိုက် Imperial ကောလိပ်က ပြီးခဲ့တဲ့တစ်ပတ်မှာ ထုတ်ပြန်ခဲ့ပါတယ်။ အိုမီခရွန်ဟာ Delta ထက်ပျော့တယ်ဆိုတဲ့ အထောက်အထားမျိုးကို မတွေ့ရဘဲ ပြန်လည်ကူးစက်နိုင်ချေကလည်း ၅ ဆ ပိုမြင့်မားတယ်လို့ ထုတ်ပြန်ချက်မှာ ဖော်ပြထားပါတယ်။

Ref: Reuters

ဒီဇင်ဘာ ၁၈၊ ၂၀၂၁
M-Media

-အခုလက်ရှိ ပြန့်နှံ့နေတဲ့ ပုံပြောင်းကိုဗစ် Omicron ဟာ သူအရင်က ​ပြန့်ခဲ့တဲ့ Delta လောက် မပြင်းဘူးဆိုတဲ့ အထောက်အထားမျိုး မတွေ့ရဘဲ၊ ပြန်လည်ကူးစက်နိုင်မှုကလည်း ၅ ဆ ပိုမြင့်တယ်လို့ လေ့လာမှုအသစ်တစ်ခုမှာ တွေ့ရပါတယ်။

ယူ​ကေမှာ နိုဝင်ဘာ ၂၉ ရက်နေ့ကနေ ဒီဇင်ဘာ ၁၁ ရက်နေ့အထိ Omicron ကူးစက်ခဲ့တဲ့ လူနာတွေရဲ့ အချက်အလက်တွေကို အခြေခံပြီး လန်ဒန်​မြို့ Imperial ကောလိပ်က ဒီသုတေသနကို လုပ်ဆောင်တာပါ။

“အိုမီခရွန်ကြောင့် ဆေးရုံတက်ရနိုင်တဲ့အန္တရာယ်၊ ရောဂါလက္ခဏာတွေဟာ Delta လောက် မမြင့်မားဘူး၊ မဆိုးရွားဘူးဆိုတဲ့ အထောက်အထားမျိုး ကျွန်တော်တို့ မတွေ့ပါဘူး​” လို့ လေ့လာမှု အစီရင်ခံစာမှာ ဖော်ပြထားပါတယ်။

ကာကွယ်ဆေးတွေရဲ့ထိရောက်မှု၊ အမျိုးသား၊ အမျိုးသမီး၊ လူမျိုး၊ ဒေသ စတာတွေကို အခြေခံပြီး တွက်ချက်ရာမှာ အိုမီခရွန် ပြန်လည်ကူးစက်နိုင်မှုဟာ Delta နဲ့နှိုင်းယှဉ်ရင် ၅.၄ ဆလောက် မြင့်တာကိုလည်း လေ့လာမှုမှာ တွေ့ခဲ့ရပါတယ်။

အရင်က ကိုဗစ်ပိုး ကူးစက်ထားသူတွေဟာ အိုမီခရွန်ကူးစက်နိုင်မှုအန္တရာယ် ၈၁ ရာခိုင်နှုန်းလောက် ရှိနေပြီး၊ AstraZeneca နဲ့ Pfizer ကာကွယ်ဆေးထိုးထားသူတွေမှာ ကူးစက်နိုင်မှုဟာလည်း Delta ထက် ပိုမိုမြင့်မားပါတယ်။

ကာကွယ်ဆေးနှစ်ကြိမ်ထိုးထားရင် အိုမီခရွန်ကို ကာကွယ်နိုင်စွမ်း ၀ ရာခိုင်နှုန်းကနေ ၂၀ ရာခိုင်နှုန်းသာ ရှိပြီး၊ တတိယအကြိမ် Booster ထိုးထားမယ်ဆိုရင် ၅၅ ရာခိုင်နှုန်းကနေ ၈၀ ရာခိုင်နှုန်း ကာကွယ်နိုင်မှာ ဖြစ်ပါတယ်။

“ကာကွယ်ဆေးကရတဲ့ ကိုယ်ခံအားကို အိုမီခရွန်က ကျော်နိုင်တယ်ဆိုတာဟာ ပြည်သူ့ကျန်းမာရေးအတွက် အဓိကခြိမ်းခြောက်မှုကြီး ဖြစ်ပါတယ်” လို့ လေ့လာမှု အစီရင်ခံစာမှာ ဖော်ပြထားပါတယ်။

Ref: Reuters

ဒီဇင်ဘာ ၈၊ ၂၀၂၁
M-Media

-မိမိတို့ထုတ်ထားတဲ့ ကာကွယ်ဆေး ၃ ကြိမ်ထိုးရင် မျိုးကွဲသစ် အိုမီခရွန် (Omicron) ကို တိုက်ဖျက်နိုင်တဲ့ ကိုယ်ခံစွမ်းအား ရရှိတာကို တွေ့ရကြောင်း ထိပ်တန်း ကိုဗစ်ကာကွယ်ဆေးကုမ္ပဏီ BioNTech and Pfizer က ဒီကနေ့မှာ ကြေငြာချက် ထုတ်ပြန်ပါတယ်။

ကာကွယ်ဆေးထိုးထားတဲ့သူရဲ့သွေးကို ယူပြီး ဓာတ်ခွဲခန်းစမ်းသပ်မှုမှာ ဒီရလဒ်ထွက်ပေါ်လာတာပါ။ လိုအပ်ရင် အိုမီခရွန်အတွက်ကာကွယ်ဆေးကို ၂၀၂၂ ခုနှစ် မတ်လလောက်မှာ ထုတ်လုပ်ဖြန့်ဖြူးနိုင်လိမ့်မယ်လို့လည်း ဆိုပါတယ်။

Pfizer ကုမ္ပဏီအကြီးအကဲ အဲလ်ဘတ်ဘူလာက လူတွေကို ကာကွယ်ဆေး ၂ ကြိမ် ထိုးပေးနိုင်အောင် ဆောင်ရွက်ရမှာဖြစ်ပြီး၊ အဲဒီနောက် တတိယတစ်ကြိမ် Booster ထိုးခြင်းက ကိုဗစ်ကပ်ရောဂါကို ကာကွယ်ဖို့ အကောင်းဆုံးနည်းလမ်းဖြစ်တယ်လို့ ပြောကြားခဲ့ပါတယ်။

ကိုဗစ်မျိုးကွဲသစ် အိုမီခရွန် ကူးစက်နေကြောင်း တောင်အာဖရိကနိုင်ငံက နိုဝင်ဘာ ၂၅ ရက်နေ့မှာ ထုတ်ပြန်ခဲ့တာပါ။ အဲဒီနောက် ကမ္ဘာ့နိုင်ငံတစ်ချို့မှာ ဒီမျိုးကွဲသစ် ကူးစက်မှုတွေ တွေ့ရလာပေမယ့် အခုအချိန်အထိ အိုမီခရွန်ကြောင့် သေဆုံးမှု မရှိသေးပါဘူး။

အိုမီခရွန်အတွက် သီးသန့်ကာကွယ်ဆေးထုတ်ဖို့ လိုအပ်လားဆိုတာ အတိအကျ မသိသေးပေမယ့် BioNTech and Pfizer က ထုတ်လုပ်ဖြန့်ဖြူးသွားမယ်လို့ ထည့်သွင်းပြောဆိုခဲ့ပါတယ်။

တောင်အာဖရိက သိပ္ပံပညာရှင်တွေက အိုမီခရွန်ဟာ Pfizer နှစ်ကြိမ်ထိုးမှုကနေ ထွက်လာတဲ့ ကိုယ်ခံစွမ်းအားကို ကျော်လွှားနိုင်မယ့်အနေအထား ရှိပေမယ့် ၃ ကြိမ်ထိုးထားရင် ကာကွယ်နိုင်ဖွယ်ရှိတယ်လို့ ကနဦးလေ့လာဆန်းစစ်မှု​တွေကို ကိုးကားပြီး မနေ့က ထုတ်ပြန်ခဲ့ပါတယ်။

Ref: CNA