Tag: WuhanVirus

နိုဝင်ဘာ ၂၆၊ ၂၀၂၁
M-Media

-တောင်အာဖရိကမှာ ပြန့်နှံ့နေတဲ့ ကိုဗစ်မျိုးကွဲသစ်ဟာ အလွန်စိုးရိမ်စရာကောင်းပြီး လက်ရှိအသုံးပြုနေတဲ့ ကိုဗစ်ကာကွယ်ဆေးတွေ မတိုးတဲ့ ထူးထူးခြားခြား မျိုးကွဲမျိုးဖြစ်နိုင်တယ်လို့ ဗြိတိန်က ဒီကနေ့မှာ ထုတ်ပြန်ပါတယ်။

B.1.1.529 လို့အမည်ပေးထားတဲ့ အဲဒီမျိုးကွဲသစ်ဟာ တောင်အာဖရိကနဲ့ ဘော့စ်ဝါနာတို့မှာ ပြန့်နှံ့နေပြီး ဟောင်ကောင်မှာလည်း ဒီကနေ့အထိ ၂ ဦး တွေ့ရှိထားပါတယ်။ ဗိုင်းရပ်စ်က ကိုယ်ခံအားကို တိုက်ခိုက်နိုင်တဲ့ ပရိုတိန်းအချွန် (spike protein) ပုံပြောင်းမှုဟာ အကြိမ် ၃၀ ကျော်ရှိပြီး မူရင်း ကိုဗစ်ဗိုင်းရပ်စ်နဲ့ လုံး၀ ကွဲပြားခြားနားသွားပြီ ဖြစ်ပါတယ်။

ဗြိတိန်ကျန်းမာရေးဝန်ကြီး ဆာဂျစ် ဂျာဗစ်က အခုမျိုးကွဲသစ်ကို နိုင်ငံတကာအသိုင်းအဝိုင်းက အကြီးအကျယ် စိုးရိမ်နေတယ်လို့ ဒီကနေ့ လွှတ်တော်အစည်းအဝေးမှာ ပြောကြားခဲ့ပါတယ်။ မျိုးကွဲသစ်အကြောင်း စောစောစီးစီး ထုတ်ဖော်ပြောဆိုခဲ့တဲ့ တောင်အာဖရိက သိပ္ပံပညာရှင်တွေကို ကျေးဇူးတင်တယ်လို့လည်း ဂျာဗစ်က ဆိုပါတယ်။

B.1.1.529 အကြောင်းကို များများစားစား မသိရသေးပေမယ့် လတ်တလောသိရှိထားမှုအရ ဒီမျိုးကွဲသစ်ဟာ ပိုမိုပြန့်နှံ့လွယ်ပြီး ကာကွယ်ဆေးမတိုးတာမျိုးအထိ ဖြစ်နိုင်တယ်လို့ ယူဆရကြောင်း ဗြိတိန်ကျန်းမာရေးဝန်ကြီးက ထည့်သွင်းပြောဆိုခဲ့ပါတယ်။

ကမ္ဘာ့ကျန်းမာရေးအဖွဲ့ WHO က ကိုဗစ်မျိုးကွဲသစ် ဘယ်လောက်အထိ ​ပြန့်နှံ့လွယ်သလဲဆိုတာ သိရဖို့ သီတင်းပတ်အနည်းငယ်လောက် စောင့်ကြည့်ရအုံးမယ်လို့ ပြောကြားခဲ့ပါတယ်။

ယူကေ၊ စင်ကာပူတို့အပါအဝင် ကမ္ဘာ့နိုင်ငံတစ်ချို့ဟာ တောင်အာဖရိကကနေ ခရီးသွားတွေဝင်ရောက်မှုကို ပိတ်ပင်ထားပြီး အခြားနိုင်ငံတွေကလည်း ဒီလိုကန့်သတ်မှုတွေ လုပ်ဆောင်ဖို့ စီစဉ်နေပါတယ်။

Ref: Reuters

နိုဝင်ဘာ ၂၆၊ ၂၀၂၁
M-Media

-ကိုဗစ်မျိုးကွဲသစ်တစ်မျိုးကို ထပ်မံတွေ့ရှိခဲ့ပြီး၊ နိုင်ငံတစ်၀ှမ်း ကူးစက်မှုတွေ မြန်မြန်ဆန်ဆန် မြင့်တက်လာတာဟာ ဒီမျိုးကွဲကြောင့် ဖြစ်တယ်လို့ တောင်အာဖရိက မနေ့မှာ ထုတ်ပြန်ကြေငြာလိုက်ပါတယ်။

ကျန်းမာရေးဝန်ကြီး ဂျိုးဖာလာက ကူးစက်မှုအသစ်တွေဟာ ပုံမှန်အတိုင်း ဖြစ်တယ်လို့ အစောပိုင်းမှာ ထင်ခဲ့ပေမယ့် သိပ္ပံပညာရှင်တွေရဲ့ စုံစမ်းဖော်ထုတ်မှုအရ ကိုဗစ်မျိုးကွဲသစ်တစ်ခုကြောင့် ဖြစ်လာတာကို အောက်တိုဘာ ၂၅ ရက်နေ့က စတင်သိရှိခဲ့ကြောင်း ပြောကြားခဲ့ပါတယ်။

လက်ရှိ အဲဒီကိုဗစ်မျိုးကွဲသစ်ကို တောင်အာဖရိက၊ ဘော့စ်ဝါနာနဲ့ ဟောင်ဟောင်က တောင်အာဖရိက ခရီးသွားတစ်ဦးမှာ တွေ့ရှိထားပါတယ်။

အခုမျိုးကွဲသစ်ဟာ အကြိမ်ပေါင်း ၃၀ ကျော် ပုံပြောင်းပြီးဖြစ်တယ်လို့ မနေ့က သတင်းစာရှင်းလင်းပွဲမှာ တောင်အာဖရိက သိပ္ပံပညာရှင်တွေက ပြောပါတယ်။

ပရောဖက်ဆာ တူလီယို ဒီ အိုလီဗီယာရာက ပညာရှင်တွေမျှော်လင့်ထားတာထက် ပိုမို ပုံပြောင်းခဲ့ကာ ကူးစက်မှုလည်း အလွန်မြန်ဆန်သလို ဒီဒဏ်ကို လာမယ့် ရက်အနည်းငယ် ဒါမှမဟုတ် သီတင်းပတ်အနည်းငယ်အတွင်း မြင်လာရဖွယ်ရှိတယ်လို့ ပြောကြားခဲ့ပါတယ်။

အကြီးအကျယ် ကူးစက်စေနိုင်တဲ့ လူစုလူဝေးပြုလုပ်တာတွေကို ရှောင်ရှားဖို့လည်း သူက တိုက်တွန်းခဲ့ပါတယ်။

တောင်အာဖရိက အခု ကိုဗစ်မျိုးကွဲသစ်ဟာ ပုံပြောင်းမှုများလွန်းတာကြောင့် ကူးစက်မှုအလွန်မြန်ဆန်ပြီး လက်ရှိအသုံးပြုနေတဲ့ ကာကွယ်ဆေးတွေ မတိုးမှာကို ပညာရှင်တွေက စိုးရိမ်နေပါတယ်။ ဒါပေမယ့် လက်ရှိအနေအထားအရ ဘာကိုမှ အတိအကျ မပြောနိုင်သေးဘဲ လေ့လာမှုတွေ ဆက်လုပ်ရမယ်လို့ ပညာရှင်တွေက ထည့်သွင်းပြောဆိုခဲ့ပါတယ်။

ဒီသတင်းထွက်ပေါ်လာပြီးနောက်ပိုင်း ယူကေအစိုးရက တောင်အာဖရိကအပါအဝင် အာဖရိကနိုင်ငံတစ်ချို့ကို ပြည်ဝင်ခွင့်မပေးတဲ့ ‘အနီရောင်စာရင်း’ ထဲ ထည့်သွင်းခဲ့ပါတယ်။

ကိုဗစ်ကပ်ရောဂါ စတင်ဖြစ်ပွားကတည်းက အခုအချိန်အထိ ကူးစက်မှုအမြန်ဆုံးနဲ့ အသေအပျောက်အများဆုံးက Delta မျိုးကွဲဖြစ်ပါတယ်။

Ref: CNN

နိုဝင်ဘာ ၈၊ ၂၀၂၁
M-Media

-Pfizer ကုမ္ပဏီက ထုတ်လုပ်တဲ့ ကိုဗစ်သောက်ဆေးဟာ ဝေဒနာ အပြင်းအထန်ခံစားရမှု၊ သေဆုံးမှုတွေကို ၈၉ ရာခိုင်နှုန်းအထိ လျော့ချပေးနိုင်တယ်ဆိုတာ စမ်းသပ်သုံးစွဲမှုမှာ တွေ့ရပါတယ်။

ဆေးကို Paxlovid လို့ အမည်ပေးထားပြီး ရလဒ်တွေက အလွန်ကောင်းနေတဲ့အတွက် ကနဦးစမ်းသပ်မှုကို ရပ်ဆိုင်းကာ အများပြည်သူထံ အမြန်ဆုံးဖြန့်ချီဖို့ စီစဉ်နေတယ်လို့ Pfizer စီအီးအိုက ပြောပါတယ်။

ကိုဗစ်တိုက်ဖျက်ရေးမှာ ကာကွယ်ဆေးတွေကိုသာ အဓိက အားထားနေရပြီး အခုအချိန်မှာတော့ အလားအလာကောင်းတဲ့ ကိုဗစ်သောက်ဆေး ၂ မျိုးအထိ ရှိလာပြီ ဖြစ်ပါတယ်။ Pfizer ရဲ့ Paxlovid အပြင် နောက်တစ်မျိုးက အမေရိကန်ကုမ္ပဏီတွေဖြစ်တဲ့ Merck Sharp နဲ့ Dohme တို့ ပူးပေါင်း ထုတ်လုပ်တဲ့ Molnupiravir ဆေး ဖြစ်ပါတယ်။

Molnupiravir ဆေးဟာ ဝေဒနာ အပြင်းအထန် ခံစားရမှု၊ သေဆုံးမှုတို့ကို ၅၀ ရာခိုင်နှုန်း လျော့ချနိုင်ပြီး ယူကေ အစိုးရက အသိအမှတ်ပြုလိုင်စင်ထုတ်ပေးကာ မကြာခင် ဖြန့်ချီတော့မှာ ဖြစ်ပါတယ်။

အမေရိကန်အစိုးရရဲ့ အသိအမှတ်ပြုမှုကို Paxlovid ဆေးက အခုနှစ်ကုန်ပိုင်းမှာ ရနိုင်ဖွယ်ရှိနေပြီး၊ ယူကေကလည်း ဆေးရဲ့အန္တရာယ်ကင်းမှု၊ ထိရောက်မှုတွေတွေကို ​လေ့လာဆန်းစစ်နေပါတယ်။

အမေရိကန်သမ္မတ ဂျိုးဘိုင်ဒန်က Paxlovid ဆေးကို သန်းချီ ဝယ်ယူထားတယ်လို့ ပြောကြားခဲ့ပါတယ်။ လက်ရှိမှာ ဒီဆေးကို ဖြန့်ချီနိုင်ဖို့အတွက် နိုင်ငံပေါင်း ၉၀ ကျော်နဲ့ ဆွေးနွေးနေပြီး လူတွေရဲ့လက်ထဲ အမြန်ဆုံးရောက်အောင် စီစဉ်နေတယ်လို့ Pfizer စီအီးအို အဲဘတ် ဘူလာက ပြောပါတယ်။

Ref: Reuters