အောက်တိုဘာ ၂၅ ၊ ၂၀၁၄
M-Media
– မန်ယူနည်းပြ လူးဝစ်ဗန်ဂါးလ်က ချယ်ဆီးနည်းပြ မော်ရင်ဟိုအား ချီးကျူးလိုက်ပြီး မိမိအသင်းကို ချယ်ဆီးကဲ့သို့ ကစားစေချင်သည်ဟု ပြောကြားလိုက်သည်။
မော်ရင်ဟိုမှာ ၁၉၉၀ ပြည့်နှစ်များက ဘာစီလိုနာတွင် ဗန်ဂါး၏ လက်အောက်၌ နည်းပြအဖြစ် အလုပ်လုပ်ခဲ့ဖူးပြီး၊ မော်ရင်ဟိုကလည်း ၎င်း၏ နည်းပြဘ၀ အစောပိုင်းကာလတွင် ဗန်ဂါးလ်၏ ကူညီမှုအတွက် ကျေးဇူးတင်ကြောင်း ပြောကြားခဲ့ဖူးသည်။
ဗန်ဂါးလ်ကမူ မိမိမှာ မော်ရင်ဟို၏ အလားအလာကို သတိပြုမိခဲ့ပြီး ထို့ကြောင့် ဘာစီလိုနာ၌ ရှိစဉ် Catalunya Cup ပွဲများအတွက် မော်ရင်ဟိုအား ကိုင်တွယ်ခွင့်ပေးခဲ့ခြင်းဖြစ်သည်ဟု ဆိုသည်။
မန်ယူနှင့် ချယ်ဆီးတို့မှာ ပရီးမီးယားလိဂ်ပွဲစဉ် ၉ အဖြစ် ယနေ့ညတွင် ကစားရမည့်ဖြစ်ပြီး ဗန်ဂါးလ်က
“ကျွန်တော့်အသင်းမှာ ကစားစေချင်တဲ့အတိုင်း မော်ရင်ဟိုရဲ့အသင်းက ကစားနေတာမို့ ကျွန်တော်တို့ပွဲဟာ နည်းစနစ်ပိုင်းဆိုင်ရာ ပြိုင်ပွဲမျိုး ဖြစ်လာမှာမဟုတ်ပါဘူး။ ဒါ့ကြောင့် လျှို့ဝှက်ချက်ဆိုတာလည်း ရှိမှာမဟုတ်ပါဘူး” ဟု ဗန်ဂါးလ်က ယမန်နေ့တွင် ပြုလုပ်ခဲ့သော သတင်းစာရှင်းလင်းပွဲတွင် ပြောကြားခဲ့သည်။
ထို့ပြင် မော်ရင်ဟိုနှင့်ပတ်သက်၍ မည်သည့်အရာအား အထင်ကြီးသနည်းဟု မေးမြန်းခဲ့ရာ ဗန်ဂါးလ်က မော်ရင်ဟိုမှာ သာမန်လူတစ်ယောက်ကဲ့သို့ဖြစ်ပြီး ကမ္ဘာ့အကောင်းဆုံး နည်းပြများထဲမှ တစ်ဦးဖြစ်သည်ဟု ဖြေကြားခဲ့သည်။
Leave a Reply
You must be logged in to post a comment.