ဒီဇင်ဘာ ၁၃၊ ၂၀၂၅
M-Media
ဒီဇင်ဘာ ၁၀ ရက်နေ့က မြောက်ဦးဆေးရုံကို လေကြောင်းက တိုက်ခိုက်မှုနဲ့ပတ်သက်ပြီး မြန်မာစစ်တပ်က သတင်းထုတ်ပြန်ရာမှာ မမှန်၀ါဒဖြန့် နည်းလမ်း အသုံးပြုခဲ့တာကို တွေ့ရပါတယ်။
တိုက်ခိုက်ခံရတဲ့ မြောက်ဦးဆေးရုံကို ရခိုင်လွတ်မြောက်ရေးအဖွဲ့ AA က စစ်စခန်းအဖြစ် ခိုအောင်အသုံးပြုတဲ့အတွက် တိုက်ခိုက်ခဲ့တာလို့ ဆိုပါတယ်။ ဆေးရုံ တိုက်ခိုက်ခံရမှုအတွင်း AA တပ်ဖွဲ့၀င်တွေ သေဆုံးသွားတယ်ဆိုပြီး တင်ထားတဲ့ Facebook က ပို့စ်တစ်ချို့ကို စစ်တပ်က ထောက်ပြခဲ့ပါတယ်။
ဒါပေမယ့် ဒီပို့စ်တွေမှာ တင်ထားတာတွေဟာ မြေပြင်က တကယ်ထိခိုက်မှုတွေနဲ့ ကိုက်ညီမှုရှိ၊ မရှိ ဆန်းစစ်သုံးသပ်ခဲ့လားဆိုတာ မြန်မာစစ်တပ်ရဲ့ ထုတ်ပြန်ချက်မှာ မတွေ့ရပါဘူး။ AA က မြောက်ဦးဆေးရုံကို စစ်စခန်းအဖြစ် အသုံးပြုနေတယ်ဆိုတဲ့ စွပ်စွဲချက်မျိုးကို မြေပြင်က တိုင်းရင်းသားတွေက သတင်းပေးတယ်လို့သာ ထုတ်ပြန်ချက်မှာဖော်ပြထားပြီး၊ ဒီပြောဆိုချက်တွေနဲ့ ကိုက်ညီတဲ့ ဓာတ်ပုံ၊ ဗီဒီယိုလိုမျိုး ခိုင်မာတဲ့သက်သေတွေ ထုတ်ပြန်တာမျိုးလည်း မရှိပါဘူး။
ဆန့်ကျင်ဖက် လက်နက်ကိုင်အဖွဲ့နဲ့ သက်ဆိုင်တဲ့ အရပ်သားလူ့အဖွဲ့အစည်းကို ပစ်မှတ်ထားတိုက်ခိုက်သတ်ဖြတ်ပြီး၊ လက်နက်ကိုင်အဖွဲ့အပေါ် အပြစ်တင်ပြောဆို ဆင်ခြေပေးတဲ့ မမှန်၀ါဒဖြန့်မျိုးကို လက်ရှိ တွင်တွယ်ကျယ်ကျယ် အသုံးပြုနေတာက အစ္စရေးဖြစ်ပါတယ်။
ပါလက်စတိုင်းနိုင်ငံ ဂါဇာကမ်းမြှောင်မှာရှိတဲ့ ဆေးရုံအားလုံးကို ပြီးခဲ့တဲ့ ၂ နှစ်အတွင်း အစ္စရေးက အကြမ်းဖက်တိုက်ခိုက်မှုတွေပြုလုပ်ခဲ့ပြီး ဆေး၀န်ထမ်းတွေနဲ့ ပါလက်စတိုင်းပြည်သူ အမြောက်အများ သေဆုံးခဲ့ပါတယ်။ ပါလက်စတိုင်း လွတ်မြောက်ရေးအဖွဲ့ ဟားမက်စ်က စစ်စခန်းအဖြစ် အသုံးပြုတဲ့အတွက် ဆေးရုံကို တိုက်ခိုက်တာလို့ အစ္စရေးက နောက်ပိုင်းမှာ မမှန်သတင်းထုတ်ပြန်ခဲ့ပါတယ်။