နိုဝင်ဘာ ၁၆၊ ၂၀၁၅
M-Media
– ပြင်သစ် အကြမ်းဖက်တိုက်ခိုက်မှု နောက်ပိုင်း မွတ်စလင်များအပေါ် စော်ကားသည့် သဘောထားများကို ဆိုရှယ်စာမျက်နှာ၌ ရေးသားဖော်ပြခဲ့သော ဗျူတီဆလွန်းပိုင်ရှင် တစ်ဦးကို ဗြိတိန်ရဲတပ်ဖွဲ့က ယမန်နေ့တွင် ဖမ်းဆီးလိုက်သည်ဟု သိရသည်။
ဖမ်းဆီးခံခဲ့ရသည့် ထိုအမျိုးသမီးမှာ အေပရယ် မေဂျာဆိုသူ ဖြစ်ပြီး အောက်စဖို့ဒ်ရှိုင်းယား ဒေသတွင် Blinks of Bicester အမည်ဖြင့် အလှပြင်ဆိုင် ဖွင့်ထားသူတစ်ဦးလည်း ဖြစ်သည်။
သိမ်းဗာလီ ရဲတပ်ဖွဲ့ကမူ အသက် ၄၃ နှစ်အရွယ်ရှိ သူမအား ပြည်သူ့လုံခြုံရေး အက်ဥပဒေ ပုဒ်မ ၁၉ ဖြင့် ဖမ်းဆီးခဲ့ခြင်းဖြစ်သည်ဟု ပြောကြားခဲ့သည်။ အဆိုပါ ပုဒ်မမှာ “လူမျိုးရေ အမုန်းတရား ဖြစ်လာစေရန် ရည်ရွယ်၍ ခြိမ်းခြောက်ခြင်း၊ ရိုင်းစိုင်းစွာ ပြောဆိုခြင်း၊ သို့မဟုတ် စော်ကားခြင်း စသည့်ပုံစံမျိုးဖြင့် ရေးသားဖော်ပြခြင်း၊ ရန်ညှိုးထားသည့် ပြောဆိုဆက်ဆံမှု ပြုလုပ်ခြင်း” စသည်တို့နှင့် ဆက်စပ်နေသည်။
မေဂျာမှာ သူမ၏ Faecebook စာမျက်နှာတွင် “ယူကေက လက်ခံတဲ့ နိုင်ငံကူးလက်မှတ် ရှိသည်ဖြစ်စေ၊ မရှိသည်ဖြစ်စေ Blinks of Bicester ဟာ အစ္စလာမ်ဘာသာဝင် ဘယ်သူ့ကိုမှ ဘိုကင်လုပ်ခွင့် မပြုတော့ပါဘူး” ဟု ရေးသားခဲ့ပြီး၊ အခြားပို့စ်တစ်ခုတွင်လည်း “ငါ့ရဲ့ တိုင်းပြည်ကို ဦးစားပေးဖို့အချိန်ရောက်ပြီ” ဟု ရေးသားခဲ့သည်။
ထိုမှတ်ချက်များကြောင့် ဝေဖန်မှုများ ခံရပြီးနောက်တွင် မေဂျာက “ဘယ်မွတ်စလင်မှ ဒါမှမဟုတ် ဘယ်အစ္စလာမ်ဘာသာဝင်ကိုမှ ဘိုကင် လုပ်မပေးဘူးဆိုတဲ့ ပြောကြားမှုနဲ့ပတ်သက်ပြီး မက်ဆေ့ခ်ျတွေ အများကြီး ရပါတယ်။ ငါကတော့ ယူကေနိုင်ငံသားတစ်ယောက်အနေနဲ့ အဲဒီအပေါ်မှာပဲ လုံးဝ ရပ်တည်ပါတယ်” ဟု ရေးသားခဲ့ကာ “ရှင်တို့မိသားစုတွေ IS ရဲ့ ဗုံးခွဲမှုကို ခံရဖို့ ငါ မျှော်လင့်တယ်” ဟု မက်ဆေ့ခ်ျပို့သူများကို ရည်ညွှန်း၍လည်း သူမက ရေးသားခဲ့သည်။ နောက်ပိုင်းတွင် အဆိုပါ ပို့စ်များအားလုံးကို ဖျက်ပစ်ခဲ့သည်။
လက်ရှိအချိန်တွင် ၎င်းအား တရားစွဲဆိုမှုများ မပြုလုပ်ရသေးဘဲ ရဲတပ်ဖွဲ့ကမူ စုံစမ်းစစ်ဆေးမှုများကို အသေအချာ ပြုလုပ်သွားမည်ဟု ထည့်သွင်းပြောကြားခဲ့သည်။
Ref: Mirror
Leave a Reply
You must be logged in to post a comment.