ဖေဖော်ဝါရီ ၂၇၊ ၂၀၁၇
M-Media
– မိုဘိုင်းဖုန်းလောကမှာ တစ်ချိန်က ဘုရင်တစ်ဆူဖြစ်ခဲ့တဲ့ Nokia ရဲ့ နာမည်ကျော် 3310 မော်ဒယ် ဗားရှင်းအသစ်နဲ့အတူ အန်ဒရွိုက်ဖုန်း အသစ်တွေကို မနေ့မှာ ထုတ်ပြန်လိုက်ပါတယ်။
အရင်နဲ့ မတူတာက 3310 ဟာ ပိုမိုကျစ်လစ် ခိုင်ခဲ့ပြီး ပိုပြီးပါးလွှာ၊ ပေါ့ပါးလာသလို၊ အင်တာနက် အသုံးပြုလို့ရအောင် ဖန်တီးတားတာ ဖြစ်ပါတယ်။ အရင်ဖုန်းမှာ ပါဝင်ပြီး လူကြိုက်များခဲ့တဲ့ Snake ဂိမ်းနဲ့ ringtone လည်း ပြန်ပါလာခဲ့ပါတယ်။
“ဒီတယ်လီဖုန်းက ၂၂ နာရီလောက် စကားပြောနိုင်မှာဖြစ်ပြီး မူလဖုန်းထက် ၁၀ ဆလောက် ပိုကြာမှာဖြစ်ပါတယ်” လို့ Nokia ကုမ္ပဏီကို ၀ယ်ယူခဲ့တဲ့ ဖင်လန်နိုင်ငံက HMD Global ကုမ္ပဏီ အကြီးအကဲ အာရ်တို နူမီလာက ယမန်နေ့ ဘာစီလိုနာမှာ ပြုလုပ်ခဲ့တဲ့ ကမ္ဘာ့ကြီးဆုံး ဖုန်းပြပွဲပြီးမှာ သူ့ဖုန်းတွေကို မိတ်ဆက်ရင်း ပြောကြားခဲ့ပါတယ်။
၂၀၀၀ ခုနှစ်မှာ ထုတ်လုပ်ခဲ့တဲ့ Nokia ရဲ့ 3310 ဟာ ကမ္ဘာတစ်ဝှမ်းမှာ အလုံးရေ သန်းပေါင်း ၁၂၀ လောက် ရောင်းချခဲ့ရပြီး ကမ္ဘာ့မိုဘိုင်းဖုန်းလောကမှာ ရောင်းအားအကောင်းဆုံး ဖုန်းတွေထဲက တစ်ခုအဖြစ် မှတ်တမ်းဝင်ခဲ့ပါတယ်။
မနေ့ကပွဲမှာ 3310 အပြင် Nokia 3၊ Nokia 5 နဲ့ Nokia 6 ဆိုတဲ့ အန်ဒရွိုက်အခြေပြု စမတ်ဖုန်းတွေကိုလည်း ပြသခဲ့ပြီး စောစောပိုင်းက တရုတ်နိုင်ငံမှာသာ ရရှိနိုင်တဲ့ Nokia 6 ဟာ ကမ္ဘာတစ်ဝှမ်းမှာ ရရှိနိုင်တော့မှာဖြစ်ပါတယ်။
လေ့လာသူတွေကတော့ Nokia ဟာ ၂၀၁၉ ခုနှစ်ရောက်တဲ့အခါမှာ ကမ္ဘာ့ စမတ်ဖုန်းဈေးကွက်ရဲ့ ၅ ရာခိုင်နှုန်းလောက် ရရှိမယ်လို့ ခန့်မှန်းထားပါတယ်။
၁၉၉၈ ခုနှစ်ကနေ ၂၀၁၁ ခုနှစ်လောက်အထိ ကမ္ဘာ့အကြီးဆုံး မိုဘိုင်းဖုန်းထုတ်လုပ်သူဖြစ်ခဲ့တဲ့ Nokia ဟာ စမတ်ဖုန်းတွေ ခေတ်စားတဲ့အချိန်မှာ နောက်ကောက်ကျခဲ့ပြီး လက်ပြောင်းလက်လွှဲတွေလည်းဖြစ်ခဲ့ကာ နောက်ဆုံးမှာ ဖင်လန်က တက်သစ်စ ကုမ္ပဏီ HMD Global ရဲ့လက်ထဲကို ရောက်ရှိခဲ့ပါတယ်။
Ref: CNA