စက်တင်ဘာ ၆၊ ၂၀၁၈
M-Media
– အာရှရဲ့ ပထမဆုံး ဒေတာစင်တာကို စင်ကာပူနိုင်ငံမှာ ဆောက်လုပ်ရေးအတွက် စင်ကာပူဒေါ်လာ ၁ .၄ ဘီလီယံ သုံးစွဲသွားမယ်လို့ Facebook က ဒီကနေ့မှာ ကြေငြာလိုက်ပါတယ်။
စင်ကာပူနိုင်ငံ အနောက်ပိုင်းက မြေနေရာ ၁၇၀,၀၀၀ စကွဲယားမီတာမှာ ဆောက်လုပ်သွားမှာဖြစ်ပြီး အာရှဒေသတွင်း Facebook တည်ရှိမှု မြှင့်တင်ရေး တစ်စိတ်ပိုင်းဖြစ်တယ်လို့လည်း ဆိုပါတယ်။
Facebook ရဲ့ ဒေတာစင်တာ တည်ဆောက်ရေးဆိုင်ရာ ဒုတိယဥက္ကဌ သောမတ်စ်ဖာလွန်က ဒီအစီအစဉ်ဟာ ရေရှည်လုပ်ဆောင်မယ့် အစီအစဉ်ဖြစ်ပြီး ဆောက်လုပ်ရေးအလုပ်အကိုင် ထောင်ချီ ဖန်တီးပေးနိုင်မှာဖြစ်ကာ၊ Network ထိန်းသိမ်းစောင့်ကြည့်ရေးကနေ၊ ပို့ဆောင်ရေးအထိ ၀န်ထမ်းပေါင်း ရာနှင့်ချီ ခန့်ထားနိုင်လိမ့်မယ်လို့ ဒီကနေ့ပြုလုပ်တဲ့ ဒေတာစင်တာ မိတ်ဆက်ပွဲအခမ်းအနားမှာ ပြောကြားခဲ့ပါတယ်။
၁၁ ထပ်ရှိမယ့် အဲဒီဒေတာစင်တာကို ရေ၊ စွမ်းအင်နဲ့ မြေအသုံးပြုမှု အနည်းဆုံးဖြစ်စေမယ့် နည်းလမ်းနဲ့ ဆောက်လုပ်သွားမှာဖြစ်ပြီး၊ ၂၀၂၂ ခုနှစ်မှာ ပထမအဆင့် စတင်အသုံးပြုနိုင်ဖို့ ရည်ရွယ်ထားပါတယ်။
အခမ်းအနားကို တက်ရောက်ခဲ့တဲ့ စင်ကာပူရဲ့ ကုန်သွယ်ရေးနဲ့ စက်မှုလက်မှု ၀န်ကြီး ချန်ချွန်ဆင်းက Facebook အနေနဲ့ သူတို့ရဲ့ ပထမဆုံး အချက်အလက်စင်တာကို စင်ကာပူနိုင်ငံမှာ လာရောက်တည်ထားခြင်းဟာ တိုင်းပြည်အတွက် သမိုင်းမှတ်တိုင်သစ်တစ်ခုဖြစ်တယ်လို့ ပြောကြားခဲ့ပါတယ်။
Ref: CNA