အောက်တိုဘာ ၂၈ ၊ ၂၀၁၄
M-Media
ကျွန်တော် Aseel Zaher ပါ။ အစ္စလာမ်အပေါ် တစ်ဖက်သတ်ရွံကြောက်ရောဂါ ၀င်ရောက်နေသူတစ်ဦးအပေါ် ဘယ်လိုပြန်လည်ဆက်ဆံရမလဲဆိုတဲ့ သင်ခန်းစာတစ်ရပ်ကို တိုကျို စာသင်ခန်းတစ်ခုမှာ ကျွန်တော် ကြုံဆုံလိုက်ရပါတယ်။
ဒီနေ့ဟာ ကျွန်တော် ဂျပန်နိုင်ငံကို ယာယီနေထိုင်ခွင့်နဲ့ ရောက်ရှိလာတဲ့ ၉ နှစ်မြောက်နေ့ပေါ့။ ဂျပန်တွေရဲ့ ဘ၀နေနည်းစနစ်၊ အပြုအမူ၊ ယဉ်ကျေးမှု စတာတွေအပေါ် အသားကျနေပြီဖြစ်ပေမယ့် ထူးခြားတဲ့ အတွေ့အကြုံတွေကို ရနေဆဲပါ။ ကျွန်တော့်ရဲ့ ဘာသာဗေဒစာသင်ခန်းတစ်ခုမှာ စာသင်ကြားနေချိန် ကျွန်တော်တို့ရဲ့ဆရာက ဂျပန့်ယဉ်ကျေးမှုနဲ့ ကမ္ဘာကိုဂျပန်တွေကောင်းကျိုးဆောင်ခြင်းဖက် စကားလမ်းကြောင်း ပြောင်းသွားပါတယ်။ အဲ့ဒီမှာ တစ်ဦးသောသူက (ဂဏန်းနံပါတ်တွေကို ဂျပန့်ယဉ်ကျေးမှုက စတင်မိတ်ဆက်ပေးတဲ့အကြောင်း) မှားယွင်းစွာ ပြောဆိုညွှန်ပြတဲ့အပေါ် ဆရာဖြစ်သူက ချက်ခြင်းပဲ “ မဟုတ်ဘူး၊ အဲ့ဒါတွေကို စတင်မိတ်ဆက်ပေးလိုက်တဲ့ဘာသာစကားဟာ အာရပ်စာပေ ဖြစ်တယ်” လို့ ဖြေကြားလိုက်ပါတယ်။
တိုကျိုမှာနေထိုင်တဲ့ အာရပ်မွတ်စ်လင်မ်တစ်ဦးအဖို့ ဂျပန်လူမျိုးတွေနဲ့ နေ့တဓူဝ ထိတွေ့ဆက်ဆံမှု ပြုလုပ်လာနိုင်သော်လည်း အသိအမှတ်ပြုလက်ခံမှု နည်းပါးနေသေးတယ်လို့ ခံစားရပါတယ်။
ခင်ဗျားတို့ သိကြတဲ့အတိုင်း ဂျပန်တွေဟာ သူတို့ရဲ့သက်ဆိုင်ရာ မျိုးနွယ်စုအသီးသီးရဲ့အကြောင်းကို သိသော်လည်း မွတ်စ်လင်မ်လောကအကြောင်း မဆိုစလောက်မျှသာ သိရှိကြပါတယ် (ကမ္ဘာပေါ်ကလူများစုလည်း အလားတူပဲ ဖြစ်လိမ့်မယ်လို့ တပ်အပ်ပြောရဲပါတယ်)။ ဂျပန်နိုင်ငံဟာ မိမိတို့ရဲ့ ကိုယ်ပိုင်ယဉ်ကျေးမှုထဲကနေ ကမ္ဘာ့အကြီးမားဆုံး စီးပွားရေးကဏ္ဍများအကြား လှေကားထောင် တက်လှမ်းလာနိုင်တဲ့ ယနေ့ခေတ်နည်းပညာရှေ့ဆောင်နိုင်ငံတစ်ခုပါ။
ဒါကြောင့် ဂဏန်းနံပါတ်သတ်မှတ်နည်းစနစ်ကို ရာစုနှစ်များစွာအလျင် မွတ်စ်လင်မ်တွေက စတင်မိတ်ဆက်ပေးခဲ့တဲ့အကြောင်း ဖော်ပြနိုင်သူ ဂျပန်ဆရာ အတန်အသင့် ရှိကြပါတယ်။ ဒါပေမယ့် ကျွန်တော့်ရင်ထဲ ဆို့နင့်နေရပါတယ်။ ကျွန်တော့်ခံစားချက် ပွင့်ထွက်မှုအပေါ် နားလည်ပေးကြပါ။ မည်သို့ပင်ဆိုစေ ဂျပန်နိုင်ငံရဲ့သမိုင်းကြောင်းကို ထဲထဲဝင်ဝင် လေ့လာသုံးသပ်ပြီး တစ်ပြိုင်နက်တည်းမှာပဲ ယနေ့လက်တွေ့ရလဒ်တွေကို စူးစမ်းကြည့်မယ်ဆိုရင် (အတိတ်ခေတ်မွတ်စ်လင်မ်တွေရဲ့ အခြေအနေနဲ့ ) သိပ်ကွာဟမှု မရှိလှတာကို တွေ့ရပါမယ်။
ဂျပန်နိုင်ငံက ဒုတိယကမ္ဘာစစ်ပြီးကာလမှာ အတော်အတန်ဆိုးတဲ့ ငတ်မွတ်ခေါင်းပါးခြင်းဒဏ်ကို ခံစားရတယ်။ နိုင်ငံ့အခြေခံအဆောက်အဦတွေ ပျက်စီးကုန်တယ်။ လူ့အဖွဲ့အစည်းဖရိုဖရဲဖြစ်ခဲ့တဲ့အပြင် လက်ဆုပ်လက်ကိုင်စီးပွားရေးဆိုတာ မရှိတော့ဘူး။ ဒီကနေ့မှာတော့ အာရှနိုင်ငံအားလုံးနီးပါးစုစုပေါင်းထက်များတဲ့ ပျမ်းမျှဝင်ငွေ၊ မြင့်မားတဲ့ လူနေမှုစနစ်နဲ့ ပညာရေးစနစ်၊ နိုင်ငံသားတွေအတွက် ကောင်းမွန်ပြေပြစ်နည်းလမ်းကျနသော အခွင့်အလမ်းတွေ ၀န်ဆောင်မှုတွေနဲ့တစ်ကွ ဦးဆောင်နေပြီဖြစ်တယ်။ (ကျွန်တော် မဖော်ပြလိုတဲ့ အချို့ အာရပ်တိုင်းပြည်များလို) တခမ်းတနားဇိမ်ခံနေထိုင်တဲ့ တိုင်းပြည်ရယ်လို့ ဆိုလိုတာ မဟုတ်ပါဘူး။ သူတို့ဟာ သူတို့လူ့အဖွဲ့အစည်း၊ တိုင်းပြည့်ဖွံ့ဖြိုးတိုးတက်ရေးအတွက် အကျိုးဆောင်ပေးဆပ်နိုင်သော နည်းလမ်းများနဲ့အညီ (အခြားသူတွေ၊ ဒေသတွေ အပေါ်မှာလည်း) နေထိုင်ရှင်သန်ကြတယ်။ ဂျပန်နည်း ပညာကနေ အကျိုးမခံစား ရတဲ့နေရာဒေသ၊ သံတမန်ရေးရာဖြစ်စေ စီးပွားရေး ကဏ္ဍမှာဖြစ်စေ ဂျပန်နဲ့ ဆက်သွယ်ထူထောင်မှု မပြုလိုတဲ့ တိုင်းပြည်ဆိုတာ ကမ္ဘာမြေပေါ်မှာ မရှိသလောက်ပါပဲ။
ဂျပန်စာနဲ့ ဂျပန်ယဉ်ကျေးမှုကို လေ့လာသင်ယူဖို့ ဥရောပ၊ အာရှ၊ အာဖရိက၊ အမေရိကန်က လာရောက်ကြတဲ့ နိုင်ငံခြားသားတွေကို နေ့စဉ်နဲ့အမျှ တွေ့ဆုံရတယ်။ ဘာသာစကား သို့မဟုတ် ယဉ်ကျေးမှု စနစ်နှစ်ရပ် စလုံးမှာ အလုပ်အကိုင် အခွင့်အလမ်းရဖို့ မျှော်လင့်တာမျိုးလည်း ဖြစ်ချင်ဖြစ်မယ်(ရည်ရွယ်ချက်အမျိုးမျိုးနဲ့ပေါ့)။ သူတို့ရဲ့ ပေးဆပ်ကောင်း ကျိုးပြုချက်တွေအားဖြင့် ဂျပန်လူမျိုးများဟာ နိုင်ငံ အများအပြားဆီက လေးစားမှုနဲ့ အသာပေးမှုကို ရရှိထားကြတယ်။
ဒီနေရာမှာ မေးခွန်းတစ်ခု မေးခွင့်ပြုပါ။ ဒီနေ့ခေတ်မှာ ကျွန်တော်တို့မွတ်စ်လင်မ်တွေ ကမ္ဘာကို ဘာတွေကောင်းကျိုးပြုပေးဆပ်နေတာ ရှိပါသလဲ ? အလယ်ခေတ်က ရှာဖွေတွေ့ရှိမှုတွေ၊ သုတေသနပြုမှုတွေဆီ ကျွန်တော်တို့ လမ်းဆက်လျှောက်နေကြပါသလား သို့တည်းမဟုတ် ကျွန်တော်တို့ရဲ့ ခေတ်သစ်မတိုင်မီက ကွယ်လွန်ခဲ့ပြီးသူတွေရဲ့ အောင်မြင်မှုတွေအပေါ်မှာပဲ ရင်ကော့ ခေါင်းမော့မာန်တက်နေဆဲလား ?
လက်ရှိအနေအထားဟာ ကျွန်တော်တို့ အပေါ် မလုံခြုံမှု၊ မလိုမုန်းထားမှု၊ ခွဲခြားဖယ်ကြဉ်မှုတွေ ဖြစ်အောင် ဖန်တီးထားကြောင်း ကျွန်တော် နားလည်ပါတယ်။ လတ်တလော သြစတေးလျက အကြောက်တရား သွတ်သွင်းမှုဟာ ထင်ထင်ရှားရှား ပေါ်လွင်လာပါတယ်။ ဒီအထိန်းအကွပ်မဲ့ဖြစ်စဉ်က မွတ်စ်လင်မ်ဟုတ်ဟုတ် မဟုတ်ဟုတ် ဘယ်သူ့အပေါ်မှာမှ ကောင်းကျိုး မဖြစ်စေပါဘူး။ တိုက်ခိုက်မှုတွေ၊ စော်ကားမှုတွေ ခံနေရတဲ့အခြေအနေအကြား ကျွန်တော်တို့အဖို့ အခုလုပ်နိုင်တာကတော့ ကျွန်တော်တို့ ကျင်လည်နေထိုင်တဲ့ဝန်းကျင်/နယ်ပယ်များမှာ မိမိစွမ်းသလောက် အကောင်းဆုံး ဆောင်ရွက်နေထိုင်ကြဖို့ပါပဲ။
သီးခြားဆန်ဆန် မနေထိုင်ကြပါနဲ့။ လမ်းပေါ်က မျက်နှာပေးတွေ၊ ၀စီကံမြောက် သွားပုပ်လေလွင့်ပြောဆိုချက်စတဲ့ အပေါ်ယံသွင်ပြင်တွေကို မေ့ဖျောက်လိုက်ပါ။ ခင်ဗျားအနေနဲ့ မိမိအပေါ်မှာသာ ကိုယ်တိုင်တာဝန်ရှိပါတယ်။ ခင်ဗျားဟာ မိခင်၊ ဖခင်၊ သမီး၊ သား၊ အိမ်နီးချင်း၊ လုပ်ငန်းကျွမ်းကျင်သူ၊ အနုပညာရှင်၊ ဆရာ၊ သိပ္ပံပညာရှင်၊ ကျောင်းသား၊ ဈေးဆိုင်ပိုင်ရှင် ….. ဘယ်လိုလူစားဖြစ်နေပါစေ အကောင်းဆုံးစံပြပုဂ္ဂိုလ်တစ်ဦး ဖြစ်အောင် တတ်နိုင်သမျှ ကျင့်ကြံနေထိုင်ပေးဆပ်သွား ဖို့သာလျှင် လိုအပ်ပါတယ်။
“အသင်တို့သည် လူသားထုတစ်ရပ်လုံးအတွက် (စံနမူနာအဖြစ်) ထုတ်ဖော်ခြင်းခံရသော အကောင်းဆုံး လူစုဖြစ်သည်။ အသင်တို့သည် ကောင်းရာညွှန်၍ မကောင်းရာကိုတားမြစ်သည်။ ထို့ပြင် အလ္လာဟ်အရှင်မြတ်အပေါ် သက်ဝင်ယုံကြည်ကြသည်။ ထို့ပြင် အကယ်၍ ကျမ်းရသူများမှ သက်ဝင်ယုံကြည်မှု ရှိလာလျှင် ထိုသူတို့အဖို့ အကောင်းဆုံးဖြစ်ပေလိမ့်မည်။ ၎င်းတို့အနက် သက်ဝင်ယုံကြည်သူများ ရှိသော်လည်း အများစုမှာကား မောက်မာပလွှားမှုဖြင့် ဖီဆန်တတ်သူများဖြစ်ကြ၏။ ထိုသူတို့သည် အသင်တို့အား မခံချိမခံသာ နားခါးသည့်ဒဏ်ကို ပေးနိုင်သည်မှအပ အသင်တို့အား ဆုံးရှုံးနစ်နာအောင် မည်သည့်အခါမျှ ပြုလုပ်နိုင်လိမ့်မည် မဟုတ်ချေ။ …………………” စူရဟ် အားလိအင်မ်ရာန်(၃း၁၁၀-၁၁၁)
xxxxxxxxxxxxxxxxxxx
What Japan taught me about overcoming the ills of Islamophobia ဆောင်းပါးကို သြရသ ရေချမ်းမှ ဆီလျော်အောင် မြန်မာပြန်ဆိုသည်။
