ဒီဇင်ဘာ ၈ ၊ ၂၀၁၃
M-Media
– အသင်းရှိ ဂိုးသမား ဂျိုးဟတ်အား လာမည့်အင်္ဂါနေ့ ဘိုင်ယန်မြူးနစ်အသင်းနှင့် ချန်ပီယံလိဂ်အုပ်စုနောက်ဆုံးပွဲတွင် ထည့်သွင်းအသုံးပြုမည်ဟု မန်စီးတီးအသင်းနည်းပြဖြစ်သူ ပယ်လီဂရီနီကပြောကြားခဲ့သည်။ အင်္ဂလန်လက်ရွေးစင်ဂိုးသမားဖြစ်သူ ဂျိုးဟတ်မှာ တန်ဖိုးကြီးမားသော အမှားအတော်များများ ပြုလုပ်ခဲ့သောကြောင့် ပထမကစားသမားနေရားအားဆုံးရှုံးခဲ့သူဖြစ်သည်။
…………………………………..
– လုံခြုံရေးအရ စိုးရိမ်ရသောကြောင့် ဘင်္ဂလားဒေ့ရ်ှလူငယ် ခရစ်ကတ်အသင်းနှင့် စစ်တကောင်းတွင် ကစားမည့် ခြေစမ်းပွဲအား West Indies အသက် ၁၉ နှစ်အောက်လူငယ်အသင်းက ဖျက်သိမ်းလိုက်သည်ဟု သိရသည်။ West Indies အသင်းတည်းခိုသည့် ဟိုတယ်အနီးတွင် ယမန်နေ့ညက ဗုံးပေါက်ကွဲမှုကြောင့် ထိုကဲ့သို့ ဖျက်သိမ်းခဲ့ခြင်းဖြစ်သည်။ ဘင်္ဂလားဒေ့ရ်ှနိုင်ငံတစ်ဝှမ်းတွင် နိုဝင်ဘာ ၂၆ ရက်နေ့မှစတင်ကာ ဖြစ်ပွားခဲ့သော ဗုံးခွဲတိုက်ခိုက်မှုများအတွင် အနည်းဆုံးလူပေါင်း ၅၀ ခန့်သေဆုံးခဲ့ရသည်။
…………………………………..
– ချန်ပီယံလိဂ်ဝင်ခွင့်ရရှိရေးမှာ အသင်း၏ အဓိက ရည်ရွယ်ချက်အဖြစ်ရှိနေသည်ဟု ဖီအိုရင်တီးနားအသင်း၏ တိုက်စစ်မှူးဖြစ်သူ ဂျီစီပီရော့စီက ပြောကြားခဲ့သည်။ ဖီအိုရင်တီးနားအသင်းမှာ ယခုနှစ်စီးရီးအေတွင် ရလဒ်ကောင်းများရရှိနေသောအသင်းဖြစ်ပြီး အမှတ်ပေးဇယား အဆင့် ၅ တွင်ရှိနေသည်။ ရော့စီမှာလည်း အသင်းနှင့် ပါဝင်ကစားခွင့်ရသည့် ၁၄ ပွဲတွင် စုစုပေါင်း ၁၂ ဂိုး သွင်းယူပေးထားသည်။
…………………………….
– အသင်းရှိအလယ်တန်းကစားသမား ရီဘာရီမှာ မက်ဆီထက်ပို၍ အကောင်းဆုံးဘောလုံးသမား ဆု Ballon d’Or အား ထိုက်တန်သည်ဟု ဘိုင်ယန်မြူးနစ်အသင်း၏ နည်းပြဖြစ်သူ ဂွာဒီယိုလာက ပြောကြားခဲ့သည်။ ဘိုင်ယန်မြူးနှစ်အသင်းမှာ ယမန်နေ့က ကစားခဲ့သောပွဲတွင် ၀ါဒါဘရီမင်အသင်းအား ၇ ဂိုး ဂိုးမရှိဖြင့် အနိုင်ရရှိခဲ့ပြီးနောက် ဘွန်ဒစ်လီဂါတွင် ပွဲ ၄၀ ဆက်တိုက် ရှုံးပွဲမရှိ စံချိန်ရရှိထားသည်။ အဆိုပါပွဲတွင် ဒဏ်ရာမှပြန်လည်သက်သာလာသည့် ရီဘာရီမှာ ခြေစွမ်းပြခဲ့ပြီး အသင်းအတွက် ၂ ဂိုးသွင်းယူပေးခဲ့သည်။
…………………………
– နာပိုလီအသင်းအနေဖြင့် တိုးတက်မှုရှိရမည်ဟု အသင်းနည်းပြ ဘင်နီတက်ဇ်က အူးဒီးနီးအသင်းအား ၃ ဂိုးစီ သရေကျခဲ့သည့်ပွဲအပြီးတွင် ပြောကြားခဲ့သည်။ ထိုပွဲတွင် နာပိုလီအသင်းမှာ ၂ ဂိုးအသာဖြင့် ဦးဆောင်ခဲ့သော်လည်း အနိုင်ကို မထိန်းနိုင်ပဲ ဧည့်သည်အသင်းအား သရေတစ်မှတ်ခွဲပေးခဲ့ရသည်။ ရာသီအစတွင် ရလဒ်ကောင်းများကို ရယူနိုင်ခဲ့သော်လည်း ယခုနောက်ပိုင်းတွင် ရလဒ်များ တစ်ဖြည်းဖြည်း ဆိုးရွာလာသောကြောင့် အသင်း၏ စွမ်းဆောင်ရည်နှင့် ပက်သက်၍ နည်းပြ ဘင်နီတက်ဇ်က မပျော်မရွှင် ဖြစ်နေသည်။
……………………….
– လေးရက်အတွင်း ၂ ပွဲဆက်ရှုံးခဲ့သော်လည်း အသင်းအနေဖြင့် စိတ်ပျက်အားလျော့မှုမရှိဘဲ လာမည့်အင်္ဂါနေ့ ချန်ပီယံလိဂ်ပွဲတွင် ပြန်လာမည်ဟု မန်ယူအသင်းနောက်ခံလူ ဂျွန်အီဗန့်က ပြောကြားခဲ့သည်။ ဗုဒ္ဓဟူးနေ့က အဲဗာတန်နှင့် ကစားခဲ့သည့်ပွဲနှင့် ယမန်နေ့က နယူးကာဆယ်နှင့် ကစားခဲ့သော အိမ်ကွင်း ၂ ပွဲဆက် ရှုံးနိမ့်မှုကြောင့် မန်ယူအသင်းမှာ ထိပ်ဆုံးမှ ဦးဆောင်နေသည့် အာဆင်နယ်အသင်းနှင့် ၁၂ မှတ်ကွာဟနေပြီး နည်းပြဒေးဗစ်မိုယက်စ်မှာ ဖိအားများနှင့် ရင်ဆိုင်နေရသည်။
………………………….
– အစ္စတန်ဘူလ်၌ ဂါလာတာစာရေးနှင့် ကစားရမည်ပွဲမှာ နောက်ဆုံးဗိုလ်လုပွဲကဲ့သို့ ဖြစ်သော်လည်း အသင်းအနေဖြင့် ကြောက်ရွံ့နေမည်မဟုတ်ဟု ဂျူဗင်တပ်စ်အသင်း၏ နောက်ခံလူ ချီလီနီက ပြောကြားလိုက်သည်။ ဂျူဗင်တပ်စ်အသင်းမှာ ချန်ပီယံလိဂ် အုပ်စုနောက်ဆုံးပွဲစဉ်အဖြစ် လာမည့်သီတင်းပါတ်အတွင်း ဂါလာတာစာရေးနှင့်ကစားရမည်ဖြစ်သည်။ ချန်ပီယံလိဂ် ၅ ပွဲကစားပြီး ၆ မှတ်သာရရှိထားသေးသည့် ဂျုဗီမှာ အုပ်စုမှတက်ရန်အတွက် အနည်းဆုံး သရေကစားရမည်ဖြစ်ပြီး ရှုံးနိမ့်၍မရပေ။
