Author: Ko Lay

အောက်တိုဘာ ၃၁၊ ၂၀၁၇
M-Media

– မြောက်ကိုရီးယားမှာ ကမ္ဘာကြီးအတွက် ခြိမ်းခြောက်မှုတစ်ခုဖြစ်သည်ဟု ဂျပန်သို့ရောက်ရှိနေသည့် နေတိုးအဖွဲ့ အကြီးအကဲ ဂျန် စတိုလ်တန်ဘာ့ဂ်က ပြောကြားလိုက်ပြီး မြောက်ကိုရီးယားအပေါ် ပိုမိုတင်းကြပ်သည့် ပိတ်ဆို့မှုများအား ထောက်ခံသည်ဟု ဆိုသည်။

တိုကျိုသို့ ယမန်နေ့က ရောက်ရှိလာသည့် စတိုလ်တန်ဘာ့ဂ်မှာ ဂျပန်ဝန်ကြီးချုပ် ရှင်ဇိုအာဘေး၊ ကာကွယ်ရေးဝန်ကြီးအပါအ၀င် အကြီးတန်းတာဝန်ရှိသူများနှင့် တွေ့ဆုံခဲ့သည်။

“မြောက်ကိုရီးယားရဲ့ ရန်စမှု၊ နမော်နမဲ့ပြုမှုကို ခင်ဗျားတို့စိုးရိမ်သလို ကျွန်တော်တို့လည်း စိုးရိမ်ပါတယ်။ ဒါဟာ တကယ့်ကို အန္တရာယ်ရှိပြီး ဂျပန်အပါအ၀င် ဒေသတွင်း တိုင်းပြည်တွေအတွက် တိုက်ရိုက်ခြိမ်းခြောက်မှုသာမက ကမ္ဘာလုံးဆိုင်ရာ ခြိမ်းခြောက်မှုလည်း ဖြစ်ပါတယ်”

ပြီးခဲ့တဲ့လအနည်းငယ်အတွင်း မြောက်ကိုရီးယားသည် ခြောက်ကြိမ်မြောက် နျူကလီးယားဒုံကျည်နှင့် အမေရိကန်ပြည်အထိ ရောက်ရှိနိုင်သည့် တာဝေးပစ်ဒုံးကျည်များကို ပစ်ခတ်စမ်းသပ်ခဲ့ပြီးနောက် ကမ္ဘာကြီးက စိုးရိမ်လာခဲ့ပြီး၊ အမေရိကန်သမ္မတ ဒေါ်နယ်ထရမ့်နှင့် မြောက်ကိုရီးယားခေါင်းဆောင် ကင်မ်ဂျုံအန်တို့ကလည်း စစ်မက်ပြုရေးနှင့် ပုဂ္ဂိုလ်ရေးစော်ကားမှုတို့ကို အပြန်အလှန် ပြုလုပ်ခဲ့သည်။

ပြီးခဲ့သည့်တစ်လအတွင်း ဂျပန်နိုင်ငံမြောက်ပိုင်းသို့ မြောက်ကိုရီးယားက ဒုံးကျည်နှစ်စင်းပစ်လွှတ်ခဲ့ပြီး ဂျပန်ဝန်ကြီးချုပ် ရှင်ဇိုအာဘေးက မြောက်ကိုရီးယားအပေါ် ပိုမိုတင်းကြပ်သည့် အရေးယူမှုပြုလုပ်ရန် ဆော်သြခဲ့သည်။

ထရမ့်က သံတမန်ရေးကြိုးပမ်းမှုများမှာ မအောင်မြင်ဟု ပြောကြားခဲ့ပြီးနောက် နေတိုးအဖွဲ့ အကြီးအကဲက မြောက်ကိုရီးယားအပေါ် စစ်ရေးဖြင့် အရေးယူလျှင် နောက်ဆက်တွဲဆိုးကျိုးများမည်ဟု သတိပေးခဲ့သည်။

ဝါရှင်တန်အနေဖြင့် မိမိကိုယ်နှင့် မဟာမိတ်များကို ခုခံကာကွယ်ပိုင်ခွင့် ရှိသော်လည်း ပိုမိုထိရောက်သည့် သံတမန်ရေးကြိုးပမ်းမှုများ ပြုလုပ်ရန် စတိုလ်တန်ဘာ့ဂ်က တိုက်တွန်းခဲ့သည်။

”စစ်အင်အားသုံးစရာမလိုပါဘူး။ ကျွန်တော်တို့ရဲ့ ရည်ရွယ်ချက်က ငြိမ်းချမ်းတဲ့အဖြေတစ်ခုထွက်ဖို့ ဖြစ်ပါတယ်”

Ref : CNA