Author: Ko Lay

နိုဝင်ဘာ ၂၂၊ ၂၀၁၆
M-Media

– အီဂျစ်နိုင်ငံတွင် ဒီမိုကရေစီနည်းကျ ပထမဆုံး ရွေးကောက်တင်မြှောက်ခံရပြီးနောက် စစ်တပ်၏ အာဏာသိမ်းဖြုတ်ချမှုကို ခံခဲ့ရသည့် သမ္မတဟောင်းမော်စီအပေါ် ချမှတ်ထားသည့် တစ်သက်တစ်ကျွန်းပြစ်ဒဏ်အား အီဂျစ်၏ အမြင့်ဆုံးတရားရုံး Court of Cassation က ယနေ့တွင် ပယ်ဖျက်ပေးလိုက်သည်ဟု သိရသည်။

ပါလက်စတိုင်းလွတ်မြောက်ရေးအဖွဲ့ဖြစ်သော ဟားမက်စ်အတွက် သူလျှိုလုပ်သည်ဟူသောစွဲချက်ဖြင့် ထို တစ်သက်တစ်ကျွန်း ပြစ်ဒဏ်ကို ချမှတ်ခံခဲ့ရခြင်းဖြစ်ပြီး တရားရုံးကမူ အမှုကို ပြန်လည်ကြားနာရန်လည်း အမိန့်ပေးခဲ့သည်။ အဆိုပါ တရားရုံးမှာ ပြီးခဲ့သည့်တစ်ပတ်ကလည်း မော်စီအပေါ် ချမှတ်ထားသည့် သေဒဏ်ပြစ်ဒဏ်ကို ရုပ်သိမ်းပေးခဲ့သည်။

တစ်နှစ်သာ တာဝန်ထမ်းဆောင်ခွင့်ရခဲ့သည့် သမ္မတမော်စီကို အီဂျစ်စစ်တပ်က ၂၀၁၃ ခုနှစ်တွင် ဖြုတ်ချခဲ့ပြီး ၎င်း၏ မွတ်စလင်ဘရားသားဟုဒ်ပါတီကိုလည်း တရားမ၀င်အသင်းအဖြစ် ကြေငြာခဲ့သည်။ ထို့ပြင် ထိုပါတီ၏ အဖွဲ့ဝင်များ ထိပ်ပိုင်းခေါင်းဆောင်များ၊ အခြားသောအဖွဲ့များမှ အဖွဲ့ဝင် ထောင်ပေါင်းများစွာကိုလည်း အာဏာသိမ်းစစ်တပ်က ဖမ်းဆီးခဲ့ပြီး အစုလိုက်အပြုံလိုက် တရားစွဲဆိုမှု ပြုလုပ်ခဲ့သည်။

မော်စီ၏ ရှေ့နေဖြစ်သူ အဘ်ဒဲလ် မွန်အင် အဘ်ဒဲလ် မက်ဆူးဒ်က အီရန်နှင့် ဟားမက်စ်တို့အတွက် သူလျှိုလုပ်ပေးသည်ဟူသော စွဲချက်ဖြင့် တရားစွဲဆိုခံထားရသည့် အခြား မွတ်စလင်ဘရားသားဟုဒ် အဖွဲ့ဝင်များ၏ ပြစ်ဒဏ်ကိုလည်း တရားရုံးက ပယ်ဖျက်ပေးခဲ့သည်ဟု ပြောကြားခဲ့သည်။

မော်စီမှာ အမှုပေါင်းများစွာဖြင့် တရားစွဲဆိုခံရပြီး သေဒဏ်၊ တစ်သက်တစ်ကျွန်၊ ထောင်ဒဏ် နှစ် ၂၀ အပါအ၀င် ပြစ်ဒဏ်များစွာ ချမှတ်ခြင်း ခံခဲ့ရသည်။ နိုင်ငံတော်လျှို့ဝှက်ချက်များကို ကာတာအပါအ၀င် နိုင်ငံခြားတိုင်းပြည်များသို့ အသိပေးခဲ့သည်ဟုလည်း စွပ်စွဲခံခဲ့ရပြီး ၎င်း၏ ရှေ့နေကမူ မော်စီမှာ နိုင်ငံတော်အကြီးအကဲတစ်ယောက် စောင့်ထိန်းရမည့်အကန့်အသတ်များအတိုင်း ဆောင်ရွက်ခဲ့သည်ဟု ဆိုသည်။

Ref: Aljazeera