Author: Ko Lay

မေ ၃၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးက တိုက်ခိုက်မှုတွေ မရပ်မချင်း ကုန်သွယ်ရေးရပ်ဆိုင်းသွားမယ်လို့ တူရကီက ထုတ်ပြန်ကြေငြာပါတယ်။ 

ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရသူ အရေအတွက်ဟာ ၃၅၀၀၀ နီးပါး ရှိလာပါပြီ။

တိုက်ခိုက်ဖျက်ဆီးမှုတွေကြောင့် အိုးအိမ်စွန့်ခွာထွက်ပြေးရတဲ့ ပါလက်စတိုင်းပြည်သူ ၂ သန်းကျော်ကို နိုင်ငံတကာက ပေးပို့တဲ့ အထောက်အပံ့တွေကိုလည်း မရအောင် အစ္စရေးက တားဆီးဟန့်တားမှုတွေ ပြုလုပ်နေပါတယ်။ 

ဂါဇာမှာ အစ္စရေးက အပြည့်အ၀ အပစ်ရပ်ပြီး လူသားချင်း စာနာထောက်ထားမှုဆိုင်ရာ အကူအညီတွေကို ၀င်ခွင့်ပြုတဲ့အချိန်အထိ နှစ်နိုင်ငံကုန်သွယ်ရေးကို ရပ်ဆိုင်းထားမယ်လို့ တူရကီ ကုန်သွယ်ရေး၀န်ကြီး အိုမာရ် ဘိုလတ်က ပြောပါတယ်။ 

၂၀၂၃ ခုနှစ် စာရင်းတွေအရ တူရကီနဲ့ အစ္စရေးတို့အကြား ကုန်သွယ်ရေးတန်ဖိုးဟာ တစ်နှစ်ကို ကန်ဒေါ်လာ ၆ ဒဿမ ၈ ဘီလီယံဖိုး ရှိပါတယ်။ 

သွင်းကုန်၊ ပို့ကုန်အားလုံးကို ရပ်ဆိုင်းလိုက်တာဖြစ်ပြီး ဒါဟာ ဂါဇာမှာ အစ္စရေးရဲ့ စက်ဆုပ်ဖွယ် အပြုအမူတွေကို တုန့်ပြန်တာလို့လည်း ဘိုလတ်က ထည့်သွင်းပြောဆိုခဲ့ပါတယ်။ 

ဂါဇာက အတိဒုက္ခရောက်နေသူတွေကို လေကြောင်းကနေ အကူအညီတွေ ချပေးရေးမှာ တူရကီပါ၀င်ဖို့ အစ္စရေးက ခွင့်မပြုခဲ့တာကြောင့် ပြီးခဲ့တဲ့လကစပြီး တူရကီက ကုန်သွယ်ရေးဆိုင်ရာ ကန့်သတ်မှုတွေ လုပ်ခဲ့တာ ဖြစ်ပါတယ်။ 

Ref: Reuters

မေ ၂၊ ၂၀၂၄
M-Media

-ဂါဇာမှာ အစ္စရေးရဲ့ လူမျိုးတုန်းသတ်ဖြတ်မှု လုပ်ရပ်တွေကြောင့် အစ္စရေးနဲ့ သံအဆက်အသွယ် ဖြတ်တောက်တော့မယ်လို့ ကိုလံဘီယာ သမ္မတ ဂူစတာဗို ပက်ထရိုက မေလ ၁ ရက်နေ့မှာ ကြေငြာလိုက်ပါတယ်။

“လူမျိုးတုန်းသတ်ဖြတ်တဲ့ အစိုးရနဲ့ သမ္မတရှိနေတဲ့ အစ္စရေးနဲ့ မနက်ဖြန်ကစပြီး သံတမန်အဆက်အသွယ် ဖြတ်တော့မယ်ဆိုတာ အပြောင်းအလဲလိုလားတဲ့ အစိုးရ၊ ပြည်သူ့သမ္မတ ကျွန်တော့်အနေနဲ့ အားလုံးရဲ့အရှေ့မှာ ကြေငြာလိုပါတယ်” လို့ မေလ ၁ ရက်နေ့ ဘိုဂိုတာမြို့က အလုပ်သမားနေ့မိန့်ခွန်းမှာ ပက်ထရိုက ပြောကြားခဲ့ပါတယ်။

၂၀၂၂ ခုနှစ်မှာ အာဏာရလာတဲ့ ပက်ထရိုဟာ ပြီးခဲ့တဲ့နှစ် အောက်တိုဘာလ ဂါဇာမှာ အစ္စရေးရဲ့ တစ်ကျော့ပြန်လူသတ်ပွဲ စတင်ကတည်းက အစ္စရေးကို ပြင်းပြင်းထန်ထန် ကန့်ကွက်လာတာ ဖြစ်ပါတယ်။

လူသတ်ပွဲစပြီး သိပ်မကြာခင် ဂါဇာကလူတွေဟာ ‘လူ့တိရစ္ဆာန်တွေ’ လို့ ပြောကြားခဲ့တဲ့ အစ္စရေး ကာကွယ်ရေး၀န်ကြီး ယိုအဗ် ဂါလန့်ရဲ့စကားကို ကြားပြီး ပက်ထရိုက ‘နာဇီတွေက ဂျူးတွေကိုပြောတဲ့စကားမျိုး’ ဖြစ်တယ်လို့ ၀ေဖန်ခဲ့တဲ့အတွက် အစ္စရေးက ဒေါသထွက်ပြီး ကိုလံဘီယာထံ လက်နက်ရောင်းချမှုကို ရပ်ဆိုင်းခဲ့ပါတယ်။

ဂါဇာက အစ္စရေးရဲ့ တိုက်ခိုက်သတ်ဖြတ်မှုတွေဟာ လူမျိုးတုန်းသတ်ဖြတ်မှုဖြစ်တယ်လို့ ပက်ထရိုက နို၀င်ဘာလမှာ ထပ်မံ ရှုတ်ချခဲ့ပါတယ်။

ဖေဖော်၀ါရီလမှာတော့ ကိုလံဘီယာဟာ အစ္စရေးထံကနေ လက်နက်၀ယ်ယူမှု ရပ်ဆိုင်းကြောင်း ပက်ထရိုက ကြေငြာခဲ့ပြီး ကုလရဲ့အကူအညီ လာယူတဲ့ ပါလက်စတိုင်းတွေအပေါ် အစ္စရေးက ပစ်ခတ်သတ်ဖြတ်မှုကို တုန့်ပြန်တာလို့ ပြောပါတယ်။

ဒီလုပ်ရပ်ဟာ ဟစ်တလာရဲ့ ‘ဂျူးတွေ အစုလိုက်အပြုံလိုက်သတ်ဖြတ်မှု’ မှု ပုံစံအတိုင်း လုပ်ဆောင်တာလို့လည်း ပက်ထရိုက ၀ေဖန်ခဲ့ပါတယ်။

၇ လနီးပါးရှိလာပြီဖြစ်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲအတွင်း ပါလက်စတိုင်းပြည်သူ ၃၅၀၀၀ နီးပါး အသတ်ခံထားရပါတယ်။ အများစုဟာ အမျိုးသမီးနဲ့ ကလေးငယ်တွေ ဖြစ်ပါတယ်။

အစ္စရေးက ဆေးရုံတွေကို ၀င်စီးပြီး လူနာတွေ၊ သက်ကြီးရွယ်အိုတွေကို အစုလိုက်အပြုံလိုက် သတ်ဖြတ်မှုမြှုပ်နှံထားတဲ့ နေရာတွေကိုလည်း ပြီးခဲ့တဲ့ သီတင်းပတ်အနည်းငယ်အတွင်းမှာ တွေ့လာရပါတယ်။

Ref: Aljazeera