ဒီဇင်ဘာ ၁၃၊ ၂၀၂၀
M-Media
-အစိုးရကထုတ်ထားတဲ့ ကိုဗစ်စည်းကမ်းတွေ ဖောက်ဖျက်မှုနဲ့ ဖမ်းဆီးမယ်လို့ ရဲတပ်ဖွဲ့က သတိပေးခဲ့ပြီးတဲ့နောက် အင်ဒိုနီးရှားနိုင်ငံရဲ့ သဘောထားတင်းမာတဲ့ အစ္စလာမ်ဘာသာရေးခေါင်းဆောင် ရီဇစ် ရှီဟဘ်ဟာ မနေ့က ဂျကာတာရဲစခန်းမှာ လာရောက်အဖမ်းခံခဲ့ပါတယ်။
ရှီဘဘ်ဟာ မွတ်စလင်မဘသအဖွဲ့တစ်ခုဖြစ်တဲ့ Islamic Defenders Front (FPI) ခေါင်းဆောင်ဖြစ်ပြီး လိင်ဗီဒီယို လက်ဝယ်ထားမှု၊ နိုင်ငံတော်အခြေခံမူတွေကို စော်ကားပြောဆိုမှုနဲ့ တရားစွဲဆိုခံရပြီးတဲ့နောက် ၂၀၁၇ ခုနှစ်ကတည်းက ဆော်ဒီအာရေဗျမှာ တိမ်းရှောင်နေတာပါ။
သက်သေမခိုင်လုံတဲ့အတွက် စွဲချက်တွေအားလုံးကို အစိုးရက ရုပ်သိမ်းပြီးတဲ့နောက် ရှှီဟဘ်ဟာ နိုဝင်ဘာ ၁၀ ရက်နေ့က အင်ဒိုနီးရှားနိုင်ငံကို ပြန်ရောက်လာခဲ့ပါတယ်။ သူပြန်လာတဲ့အချိန် သောင်းနဲ့ချီတဲ့ ထောက်ခံသူတွေက ကိုဗစ်စည်းကမ်းကို ဖောက်ဖျက်ကာ ကြိုဆိုခဲ့သလို၊ ရှီဟဘ်ကိုယ်တိုင်လည်း တမန်တော်နေ့ အထိမ်းအမှတ် အခမ်းအနားတွေ၊ သမီးဖြစ်သူ မင်္ဂလာဆောင်အခမ်းအနားတွေ အပါအဝင် အခမ်းအနားတစ်ချို့ကို ကိုဗစ်စည်းကမ်းဖောက်ဖျက်ကာ ကျင်းပပြုလုပ်ခဲ့ပါတယ်။
ဒီဖောက်ဖျက်မှုတွေအတွက် လာရောက်အဖမ်းခံဖို့ ဂျကာတာရဲတပ်ဖွဲ့က အကြိမ်ကြိမ်ဆင့်ခေါ်မှုကို မျက်ကွယ်ပြုခဲ့ပြီးတဲ့နောက် မနေ့ကမှ အဖမ်းခံလိုက်တာပါ။
“ဥပဒေ၊ စည်းမျဉ်းစည်းကမ်းတွေအရ စုံစမ်းစစ်ဆေးမှုခံယူဖို့ ဂျကာတာရဲစခန်းကို ဘုရားသခင်ရဲ့ ခွင့်ပြုချက်နဲ့ ရောက်ပါပြီ” လို့ အဖမ်းမခံခင်မှာ ရှီဟဘ်က ပြောကြားခဲ့ပါတယ်။
ကိုဗစ်စည်းကမ်းဖောက်ဖျက်မှု၊ တရားဥပဒေစိုးမိုးရေးဆောင်ရွက်ချက်ကို အနှောက်အယှက်ပေးမှုတွေအတွက် အပြစ်ရှိကြောင်းတွေ့ရရင် ရှီဟဘ်ဟာ အမြင့်ဆုံး ထောင်ဒဏ် ၆ နှစ်အထိ ချမှတ်ခံရနိုင်ပါတယ်။
ကိုဗစ်စည်းကမ်းဖောက်ဖျက်မှုအတွက် စုံစမ်းစစ်ဆေး ဖမ်းဆီးမှုတွေ ပြုလုပ်ရာမှာ FPI အဖွဲ့ဝင်တွေနဲ့ ရဲတပ်ဖွဲ့တို့အကြား တနင်္လာနေ့က ပစ်ခတ်မှုတွေဖြစ်ပွားတာကြောင့် FPI အဖွဲ့ဝင် ၆ ဦး သေဆုံးခဲ့ပါတယ်။
အမျိုး၊ ဘာသာ၊ သာသနာ ထိန်းသိမ်းရေး ကြွေးကျော်တဲ့ FPI အဖွဲ့ဟာ နိုက်ကလပ်တွေကို ဖျက်ဆီးတာ၊ အနောက်နိုင်ငံသံရုံးတွေကို ခဲနဲ့ပေါက်တာ၊ ပြိုင်ဘက် ဘာသာရေးအဖွဲ့အစည်းတွေကို တိုက်ခိုက်တာမျိုးတွေလည်း အရင်က လုပ်ဆောင်ခဲ့ဖူးပါတယ်။
Ref: CNA
