ဒီဇင်ဘာ ၅၊ ၂၀၂၀
M-Media
-နိုင်ငံတစ်နိုင်ငံက ကျောထောက်နောက်ခံပြုထားတဲ့ ဟက်ကာတွေဟာ အအေပေးစနစ်နဲ့ ကာကွယ်ဆေးသိုလှောင်ရေး ဝန်ဆောင်မှုပေးနေတဲ့ ကုမ္ပဏီတွေကို တိုက်ခိုက်ဖို့ ကြိုးစားနေတယ်လို့ အမေရိကန်အစိုးရရဲ့ ပြည်တွင်းလုံခြုံရေး အေဂျင်စီ (DHS) က ကြာသာပတေးနေ့မှာ သတိပေးချက် ထုတ်ပြန်လိုက်ပါတယ်။
အအေးပေးစနစ်ဟာ ကာကွယ်ဆေးကို သိုလှောင်သိမ်းဆည်းရေး၊ ဖြန့်ဖြူးရေးအတွက် အရေးပါတဲ့ စနစ်တစ်ခု ဖြစ်ပါတယ်။ ၉၅ ရာခိုင်နှုန်း ထိရောက်မှုရှိတယ်ဆိုတဲ့ အမေရိကန်ကုမ္ပဏီ Pfizer ထုတ် ကိုဗစ်ကာကွယ်ဆေးဟာ အနုတ် ၇၀ ဒီဂရီဆဲလ်စီးယက်စ်မှာ သိုလှောင်သိမ်းဆည်းထားဖို့ လိုအပ်တာပါ။
ကိုဗစ်ကာကွယ်ဆေးထုတ်လုပ်ဖို့ စတင်ကြိုပမ်းကတည်းက ဟက်ကာတွေဟာ သုတေသနအဖွဲ့တွေကို ပစ်မှတ်ထား တိုက်ခိုက်ခဲ့ပြီး၊ အခုအချိန်မှာတော့ ကာကွယ်ဆေးဖြန့်မယ့်အဖွဲ့တွေ၊ အအေးပေးစနစ် ဝန်ဆောင်မှုပေးတဲ့ ကုမ္ပဏီတွေကို ပစ်မှတ်ထားလာပါတယ်။
အမေရိကန် ပြည်တွင်းလုံခြုံရေးအေဂျင်စီ DHS က ဆိုက်ဘာလုံခြုံရေးဌာန CISA ရဲ့ ကြာသာပတေးနေ့ ထုတ်ပြန်ချက်မှာ ကိုဗစ်ကာကွယ်ဆေး သိမ်းဆည်းရေးနဲ့ ပို့ဆောင်ရေး ဝန်ဆောင်မှုပေးနေတဲ့ ကုမ္ပဏီတွေအနေနဲ့ အအေးပေးစနစ်မှာ ဆိုက်ဘာကာကွယ်ရေး တိုးမြှင့်လုပ်ဆောင်ဖို့၊ ဖြစ်လာနိုင်တဲ့ တိုက်ခိုက်မှုတွေအတွက် မျက်စိဖွင့် နားစွင့်ထားကြဖို့ တိုက်တွန်းထားပါတယ်။
IBM ကုမ္ပဏီက သုတေသနပညာရှင်တွေကလည်း ဟက်ကာတွေဟာ တရုတ်ကုမ္ပဏီ Haier ရဲ့ အရာရှိတစ်ဦးဟန်ဆောင်ကာ ဆိုက်ဘာ phishing တိုက်ခိုက်မှုတွေ လုပ်ဆောင်နေတယ်လို့ မကြာသေးမီက ထုတ်ပြန်ထားပါတယ်။ Haier ဟာ ဆေးဝါးတွေအတွက် အအေးပေးစနစ် ဝန်ဆောင်မှုပေးတဲ့ ကုမ္ပဏီဖြစ်ပါတယ်။
ဥရောပကော်မရှင်က ကုန်သွယ်ရေးနဲ့ နယ်စပ်ဖြတ်ကျော်ရေး ဥပဒေတွေ ပြဌာန်းထုတ်ပြန်နေတဲ့ အဖွဲ့၊ နေရောင်ခြစွမ်းအင်သုံးဓာတ်အား ဝန်ဆောင်မှုပေးတဲ့ ကုမ္ပဏီတွေဟာ အခုတစ်ကြိမ်တိုက်ခိုက်ခံရမှုမှာ ပါဝင်လာပါတယ်။ ကာကွယ်ဆေးကို သိုလှောင်ထားတဲ့ အအေးခန်းတွေကို နေရောင်ခြည်စွမ်းအင်သုံးပြီး ဓာတ်အားပေးတာမျိုးတွေလည်း ရှိပါတယ်။
ဟက်ကာတွေရဲ့တိုက်ခိုက်မှု အောင်မြင်ခဲ့လားဆိုတာ တိတိကျကျ မသိရပါဘူး။ အရင်က ကာကွယ်ဆေးဖော်တဲ့ အသင်းအဖွဲ့တွေ၊ ကုမ္ပဏီတွေဟာ ဆိုက်ဘာတိုက်ခိုက်မှုဒဏ်ကို အမြောက်အများခံခဲ့ရပေမယ့် ထိခိုက်မှု မရှိခဲ့ပါဘူး။
ဒီတိုက်ခိုက်မှုတွေကို ရုရှား၊ တရုတ်နဲ့ မြောက်ကိုရီးယားတို့က လုပ်တာလို့ တိုက်ခိုက်မှုအချက်အလက်တွေကို ကြည့်ပြီး ပညာရှင်တွေက သုံးသပ်ခဲ့ပါတယ်။ အခု သိုလှောင်သိမ်းဆည်း၊ ဖြန့်ဖြူးတဲ့ ကုမ္ပဏီတွေကို တိုက်ခိုက်မှုကလည်း နိုင်ငံတစ်နိုင်ငံက ကျောထောက်နောက်ခံပြုထားတဲ့ ဟက်ကာတွေ လုပ်တာလို့ IBM က သုံးသပ်ပြီး ဘယ်နိုင်ငံလည်းဆိုတာ ထုတ်မပြောခဲ့ပါဘူး။
ဥရောပကော်မရှင်က သူတို့ဟာ phishing တိုက်ခိုက်မှုတွေ ခံခဲ့ရကြောင်း အတည်ပြုပါတယ်။
ကိုဗစ်ကာကွယ်ဆေး ဖြန့်ဖြူးဖို့ ရည်ရွယ်ဖွဲ့စည်းထားတဲ့ အမေရိကန်အစိုးရရဲ့ Operation Warp Speed အစီအစဉ်မှာ ပါဝင်နေတဲ့ ကုမ္ပဏီတွေအနေနဲ့ IBM က သတိပေးထားတဲ့ phishing တိုက်ခိုက်မှုတွေကိုပါ သတိထားဖို့ DHS က တိုက်တွန်းခဲ့ပါတယ်။
နိုင်ငံတကာရဲတပ်ဖွဲ့ Interpol ကလည်း ရာဇဝတ်မှုကျူးလွန်တဲ့ အဖွဲ့တွေဟာ ကိုဗစ်ကာကွယ်ဆေးကို ခိုးယူတာ၊ ဒါမှမဟုတ် ဖျက်ဆီးတာမျိုးတွေ လုပ်ဆောင်လာနိုင်တယ်လို့ အခုတစ်ပတ်အစောပိုင်းမှာ သတိပေးခဲ့ပါတယ်။
လက်ရှိမှာ အမေရိကန် Pfizer ကုမ္ပဏီက ထုတ်လုပ်တဲ့ ကာကွယ်ဆေးအပါအဝင် ၉၀ ရာခိုင်နှုန်းနဲ့အထက် ထိရောက်မှုရှိတဲ့ ကာကွယ်ဆေးအနည်းဆုံး ၂ မျိုးအထိ ထွက်လာပြီး Pfizer ဆေးကို ယူကေက လာမယ့်တစ်မှာ ပြည်သူတွေကို ထိုးပေးတော့မှာ ဖြစ်ပါတယ်။
Ref: Forbes
