Author: Ko Lay

ဇန်နဝါရီ ၃၊ ၂၀၂၀
M-Media

-အီရန်တော်လှန်ရေးအစောင့်တပ်ဖွဲ့က ထိပ်တန်းဗိုလ်ချုပ် ကာစင် ဆိုလိုင်မာနီကို အမေရိကန်က အီရတ်မှာ လုပ်ကြံခဲ့ပြီး အဓိပတိ အယာတိုလာ အလီခါမေနီက ပြင်းပြင်းထန်ထန် လက်တုန့်ပြန်သွားမယ်လို့ ပြောကြားလိုက်ပါတယ်။

ဆိုလိုင်မာနီနဲ့ အခြားတာဝန်ရှိသူတွေ လိုက်ပါလာတဲ့ ကားနှစ်စီးဟာ ဒီကနေ့မနက် အစောပိုင်းက ဘဂ္ဂဒတ်မြို့နိုင်ငံတကာလေဆိပ်ကို မောင်းနှင်နေစဉ် အမေရိကန်က လေကြောင်းကနေ ပစ်ခတ်တိုက်ခိုက်ခဲ့တာ ဖြစ်ပါတယ်။ တိုက်ခိုက်မှုအတွင်း အီရန်က PMF လက်နက်ကိုင်အဖွဲ့ရဲ့ တပ်မှူး အဘူ မဟ်ဒီ အလ်-မူဟန်ဒစ်နဲ့ အခြား လူ ၃ ဦးလည်း သေဆုံးခဲ့ပါတယ်။

အိမ်ဖြူတော်နဲ့ အမေရိကန်စစ်ဌာနချုပ် ပင်တဂွန်တို့က တိုက်ခိုက်မှုကို သမ္မတထရမ့်ရဲ့ ညွှန်ကြားချက်နဲ့ လုပ်ဆောင်တာဖြစ်ပြီး အနာဂတ်မှာ အမေရိကန်အပေါ် တိုက်ခိုက်လာနိုင်ချေကို တားဆီးဖို့ ဖြစ်တယ်လို့ ထုတ်ပြန်ခဲ့ပါတယ်။

ဆိုလိုင်မာနီသေဆုံးမှုအတွက် ၃ ရက်တာ အောက်မေ့ဖွယ်နေ့အဖြစ် သတ်မှတ်ကြောင်း အီရန်က ကြေငြာခဲ့ပါတယ်။

အီရန်အဓိပတိ အယာတိုလာ အလီ ခါမေနီက ဆိုလိုင်မာနီကို အာဇာနည်အဖြစ် သမုတ်ခဲ့ပြီး ရာဇဝတ်ကောင်တွေကို ပြင်းပြင်းထန်ထန် လက်စားချေမယ်လို့ ပြောကြားခဲ့ပါတယ်။

သမ္မတ ဟာဆန်ရူဟာနီကလည်း ခါမေနီရဲ့စကားကို ထောက်ခံခဲ့ပြီး နိုင်ငံခြားရေးဝန်ကြီး ဂျာဗဒ်ဇာရစ်ဖ်က အမေရိကန်ရဲ့ ဒီလုပ်ရပ်ဟာ နိုင်ငံတကာ အကြမ်းဖက်လုပ်ရပ်ဖြစ်ကြောင်း၊ နောက်ဆက်တွဲ ဖြစ်မယ့် ကိစ္စတွေကို အမေရိကန်က တာဝန်ယူရမှာဖြစ်ကြောင်း ဆိုရှယ်မီဒီယာမှာ ရေးသားခဲ့ပါတယ်။

အီရန်တော်လှန်ရေးအစောင့်တပ် (IRGC) က အထူးတပ်ဖွဲ့ Quds Force ကို ဦးဆောင်တဲ့ ကာစင် ဆိုလိုင်မာနီဟာ အရှေ့အလယ်ပိုင်းဒေသအတွင်း အီရန်ရဲ့ဩဇာ ဖြန့်ကျက်မှုမှာ အဓိကအရေးပါတဲ့ ပုဂ္ဂိုလ်လည်း ဖြစ်ပါတယ်။

Ref: Aljazeera

ဇန်နဝါရီ ၂၊ ၂၀၂၀
M-Media

-အီရတ်နဲ့ ဆီးရီးယားတို့က ရှီအာပြည်သူ့စစ်အဖွဲ့ Hashd al-Sha’abi ကို အမေရိကန်က တိုက်ခိုက်ခဲ့တာဟာ ဒီအဖွဲ့က IS အပေါ် ချေမှုန်းလိုက်တာကို မကျေနပ်လို့ လက်တုန့်ပြန်တာသာဖြစ်တယ်လို့ အီရန်အဓိပတိ အယာတိုလာ ဆယဒ် အလီခါမေနီက ပြောကြားလိုက်ပါတယ်။

အမေရိကန်ဟာ တနင်္ဂနွေနေ့က Hashd al-Sha’abi အဖွဲ့ရဲ့ အီရတ်နဲ့ ဆီးရီးယားတို့က ပစ်မှတ်တွေကို လေကြောင်းကနေ တိုက်ခိုက်မှု ပြုလုပ်ခဲ့ပြီး လက်နက်ကိုင်အဖွဲ့ဝင် ၃၁ ဦး သေဆုံးခဲ့ပါတယ်။

Hashd al-Sha’abi အဖွဲ့ဟာ အင်အားတောင့်တင်းတဲ့ လက်နက်ကိုင်အဖွဲ့တစ်ခုဖြစ်ပြီး အီရတ်နဲ့ ဆီးရီးယားက IS အကြမ်းဖက်အဖွဲ့တိုက်ဖျက်ရေးမှာ အဓိကအခန်းကဏ္ဍကနေ ပါဝင်ခဲ့တာ ဖြစ်ပါတယ်။ အမေရိကန်ရဲ့ ဒီတိုက်ခိုက်မှုကို မကျေနဲ့တဲ့အတွက် အီရတ်နိုင်ငံ ဘဂ္ဂဒတ်မြို့က အမေရိကန်သံရုံးရှေ့မှာ အင်္ဂါနေ့က ‌ပြည်သူတွေ အကြီးအကျယ် ဆန္ဒပြခဲ့ပြီး သံရုံးကို ဖျက်ဆီးမှုတွေလည်း ပြုလုပ်ခဲ့ပါတယ်။

အီရန်အဓိပတိ အယာတိုလာ ဆယဒ် အလီခါမေနီက အမေရိကန်ရဲ့ ဒီတိုက်ခိုက်မှုကို ရှုတ်ချခဲ့ပြီး Hashd al-Sha’abi ရဲ့ IS ကို ချေမှုန်းမှုကို မကျေနပ်လို့ လက်တုန့်ပြန်တာသာဖြစ်တယ်လို့ ပြောကြားခဲ့ပါတယ်။

“အီရတ်နဲ့ ဆီးရီးယားမှာ အမေရိကန်က ဘာတွေလုပ်ဆောင်နေလဲဆိုတာ ခင်ဗျားတို့ မြင်နေရတယ်။ Hashd al-Sha’abi က IS အဖွဲ့ကို ‌ချေမှုန်းမှုအပေါ် လက်စားချေတာပါ။ IS ဟာ အမေရိကန်က ဖန်တီးပြီး မြေတောင်မြှောက်ပေးထားတဲ့ အဖွဲ့ပါ”

စစ်အခြေစိုက်စခန်းတစ်ခုကို ဒုံးကျည်နဲ့ပစ်ခတ်တာကို လက်တုန့်ပြန်တာဖြစ်တယ်လို့ အမေရိကန်က ထုတ်ပြန်ထားပါတယ်။

အီရတ်က သံရုံးကို ပြည်သူတွေက စီနင်းမှုအတွက် အီရန်မှာ လုံး၀ တာဝန်ရှိတယ်လို့ အမေရိကန်သမ္မတ ဒေါ်နယ်ထရမ့်ရဲ့ ပြောကြားမှုကိုလည်း ခါမေနီက ဝေဖန်ခဲ့ပြီး ဒေသတွင်းမှာ ကျူးလွန်ထားတဲ့ ရာဇဝတ်မှုတွေကြောင့် အီရတ်၊ ဆီးရီးယားနဲ့ အာဖဂန်ပြည်သူတွေက ဘယ်လောက်အထိ မုန်းတီးနေလဲဆိုတာကို အမေရိကန်အနေနဲ့ နားလည်သင့်တယ်လို့ ထည့်သွင်း ပြောဆိုခဲ့ပါတယ်။

အီရန်ဟာ ဘယ်လိုအခြေအနေမျိုးကိုမဆို သတိဝိရိယရှိရှိ၊ သတ္တိရှိရှိ ရင်ဆိုင်သွားဖို့ အသင့်ရှိနေတယ်လို့လည်း ခါမေနီက ဆိုပါတယ်။

Ref: Press TV