ဒီဇင်ဘာ ၃၀၊ ၂၀၁၉
M-Media
-ကချင်ပြည်နယ်၊ ရခိုင်ပြည်နယ်နဲ့ ရှမ်းပြည်နယ်တို့အပါအဝင် နိုင်ငံတစ်ဝှမ်းက လူပေါင်း ၁ သန်းကျော်လောက်ကို စားနပ်ရိက္ခာထောက်ပံ့ရေး မြန်မာနိုင်ငံနဲ့ ကုလသမဂ္ဂ စားနပ်ရိက္ခာအစီအစဉ် (WFP) တို့အကြား သဘောတူညီချက်ကို ထပ်မံ သက်တမ်းတိုးလိုက်ပါတယ်။
သဘောတူညီချက်ကို အခုလအစောပိုင်းက နေပြည်တော်မှာ လက်မှတ်ရေးထိုးခဲ့တာဖြစ်ပြီး WFP က စီမံကိန်းတွေကို ဆက်လက်အကောင်အထည်ဖော်ဖို့ ပြင်ဆင်နေပါတယ်။
နိုင်ငံရပ်ခြား စီးပွားရေးဆိုင်ရာဆက်ဆံမှု ဦးစီးဌာနက ညွှန်ကြားရေးမှူးချုပ် ဦးသန်းအောင်ကျော်က ကုလနဲ့ သဘောတူညီချက် လက်မှတ်ရေးထိုးခြင်းရဲ့ အဓိကဦးစားပေးဟာ မြန်မာနိုင်ငံ အသွင်ကူးပြောင်းမှုရဲ့ လမ်းပြမြေပုံဖြစ်တဲ့ ရေရှည်ဖွံ့ဖြိုးတိုးတက်ရေးစီမံကိန်းကို အထောက်အပံ့ဖြစ်စေဖို့ ဖြစ်တယ်လို့ ပြောကြားခဲ့ပါတယ်။
WFP ရဲ့ မြန်မာနိုင်ငံရဲ့ တာဝန်ရှိသူ စတီဖင်အန်ဒါဆန်က ငတ်မွတ်ခေါင်းပါးမှု၊ အဟာရချို့တဲ့မှုကို တိုက်ဖျက်ရေး အစိုးရက ဆောင်ရွက်လိုစိတ်ရှိတာကို ဒီသဘောတူညီချက်က ပြသနေတယ်လို့ ဆိုပါတယ်။
WFP ဟာ ရခိုင်ပြည်နယ်က ပဋိပက္ခဒဏ်ကို ခံစားနေရတဲ့ လူပေါင်း ၂ သိန်း ၄ သောင်း၊ ကချင်ပြည်နယ်က အိုးအိမ်စွန့်ခွာထွက်ပြေးရသူ ၄၅၀၀၀၊ ရှမ်းပြည်နယ်က လူပေါင်း ၁၄၀၀၀ လောက်ကို အရေးပေါ် စားနပ်ရိက္ခာအကူအညီတွေ ပေးအပ်နေတာ ဖြစ်ပါတယ်။
နိုဝင်ဘာလကစပြီး ချင်းပြည်နယ် ပလက်၀မြို့က လူပေါင်း ၆၀၀ ကျော်ကို WFP က ထပ်တိုး အကူအညီပေးခဲ့ရပါတယ်။ တိုင်းဒေသကြီးနဲ့ ပြည်နယ် ၁၁ ခုက ကလေးငယ်ပေါင်း ၃ သိန်းလောက်ကိုလည်း WFP က အဟာရဓာတ်ကြွယ်၀တဲ့ ဘီစကစ်တွေထောက်ပံ့တာ၊ စာသင်ကျောင်းတွေကနေတစ်ဆင့် ထမင်းဟင်းကျွေးမွေးတာတွေ လုပ်ဆောင်ပေးနေပါတယ်။
ခြောက်သွေ့ဇုန်လို့ သတ်မှတ်ထားတဲ့ မြန်မာနိုင်ငံ အရှေ့တောင်ပိုင်း၊ နာဂဒေသနဲ့ ဝဒေသလို ဝေးလံခေါင်ဖျားတဲ့ဒေသတွေက စားနပ်ရိက္ခာလိုအပ်နေတဲ့ ပြည်သူတွေကိုလည်း WFP က ကူညီထောက်ပံ့မှုတွေ ပြုလုပ်နေပါတယ်။
WFP ရဲ့ အစီအစဉ်တွေထဲမှာ HIV နဲ့ တီဘီရောဂါ ဖြစ်ပွားနေသူကို ထောက်ပံ့မှုလည်း ပါဝင်ပါတယ်။
Ref: mmtimes
