Author: Ko Lay

M-Media

ဂါဇာပြည်သူများ ထမင်းတစ်နပ်သာ စားနေရ
————–
ဂါဇာမှာ လိုအပ်နေတဲ့ စားနပ်ရိက္ခာအကူအညီတွေရဲ့ ၈၃ ရာခိုင်နှုန်းကို အစ္စရေးက ၀င်ရောက်ခွင့်မပေးတာကြောင့် ဂါဇာပြည်သူတွေဟာ တစ်နေ့ ထမင်းတစ်နပ်သာ စားရတယ်လို့ နိုင်ငံတကာ အကူအညီပေးရေးအဖွဲ့အစည်း ၁၅ ခုက ပူးတွဲထုတ်ပြန်တဲ့ ကြေငြာချက်မှာ ဖော်ပြထားပါတယ်။ ၁ နှစ်နီးပါး ရှိလာပြီဖြစ်တဲ့ အစ္စရေးရဲ့ ဂါဇာလူသတ်ပွဲအတွင်း အသတ်ခံရသူ အရေအတွက်ဟာ ၄၂၀၀၀ နီးပါး ရှိလာပြီ ဖြစ်ပါတယ်။

ပါလက်စတိုင်းကျောင်းသား တစ်သောင်းကျော် အသတ်ခံထားရ
—————–
၂၀၂၃ ခုနှစ် အောက်တိုဘာ ၇ ရက်နေ့နောက်ပိုင်း ပါလက်စတိုင်းပိုင်နက်တွေဖြစ်တဲ့ ဂါဇာကမ်းမြှောင်နဲ့ အနောက်ဖက်ကမ်းတို့မှာ အစ္စရေးက သတ်ဖြတ်ထားတဲ့ ကျောင်းသားအရေတွက်ဟာ ၁၁၀၀ ဦးရှိတယ်လို့ ပါလက်စတိုင်း ပညာရေး၀န်ကြီးဌာနက ထုတ်ပြန်ပါတယ်။ ဒဏ်ရာရသူအရေအတွက်က ၁၇၇၇၂ ဦး ရှိပါတယ်။ ဂါဇာမှာ အသတ်ခံရသူ ကျောင်းသား ၁၀၈၈၈ ဦးရှိပြီး၊ ဒဏ်ရာရသူ ၁၇၂၂၄ ဦး၊ အနောက်ဖက်ကမ်းမှာ အသတ်ခံရသူ ၁၁၃ ဦးနဲ့ ဒဏ်ရာရသူ ၅၄၈ ဦး ဖြစ်ပါတယ်။

အစ္စရေး၏ကျူးကျော်သိမ်းပိုက်မှု ရပ်တန့်ရေး ကုလတွင် ဆွေးနွေးမည်
—————–
၁၉၄၈ ခုနှစ်က ကုလနဲ့ နိုင်ငံတကာအသိုင်းအ၀ိုင်းက အသိအမှတ်ပြုထားတဲ့ ပါလက်စတိုင်းပိုင်နက်တွေကို အစ္စရေးက ကျူးကျော်သိမ်းပိုက်ထားမှု အဆုံးသတ်ရေး၊ အစ္စရေးတပ်တွေ အဲဒီပိုင်နက်ကနေ ထွက်ခွာရေး ကုလအထွေထွေညီလာခံမှာ မကြာခင် ဆွေးနွေးဖို့ ရှိနေပါတယ်။ အစ္စရေးရဲ့ ဒီကျူးကျော်မှုကို အမေရိကန်အပါအ၀င် ကမ္ဘာတစ်၀ှမ်းက တစ်စိုက်မတ်မတ် ရှုတ်ချခဲ့ပေမယ့် တပ်တွေဆုတ်ခွာပြီး လွတ်လပ်တဲ့ ပါလက်စတိုင်းနိုင်ငံ ပေါ်ပေါက်လာရေးအတွက် နိုင်ငံတကာအသိုင်းအ၀ိုင်းက ထိထိရောက်ရောက် ကြိုးပမ်းအားထုတ်ခြင်း မရှိပါဘူး။

Ref: Aljazeera

M-Media

ပိုလီယို ကာကွယ်ဆေးထိုးနှံရေး အပစ်ရပ်ရန် ကုလတောင်းဆို
————–
ဂါဇာကမ်းမြှောင်မှာ နောက်ထပ်တစ်ကြိမ် ပိုလီယိုကာကွယ်ဆေး ထိုးနှံနိုင်ရေး ခဏဝာာအပစ်ရပ်ဖို့အတွက် ကုလအဖွဲ့အစည်းတွေက တောင်းဆိုလိုက်ပါတယ်။ စက်တင်ဘာ ၁ ရက်နေ့က ၁၂ ရက်နေ့အထိ ပထမအကျော့မှာ အသက် ၁၀ နှစ်အောက် ကလေးငယ်ပေါင်း ၅၅၈၉၆၃ ဦးကို ပိုလီယိုကာကွယ်ဆေး ထိုးနှံပေးခဲ့ပြီး နောက်ထပ် ၄ ပတ်အတွင်း ဒုတိယအကြိမ် ထိုးနှံပေးဖို့ လိုအပ်မှာ ဖြစ်ပါတယ်။

၂ နှစ်နိုင်ငံတည်ရှိရေးကို ထောက်ခံကြောင်း ဥရောပထုတ်ပြန်
————–
ပါလက်စတိုင်းနိုင်ငံ ပေါ်ပေါက်လာရေးနဲ့ နှစ်နိုင်ငံတည်ရှိရေးအဖြေကိုသာ ထောက်ခံကြောင်း ဥရောပနဲ့ အာရပ် နိုင်ငံခြားရေး၀န်ကြီးတွေက စက်တင်ဘာ ၁၃ ရက်နေ့မှာ ပူးတွဲထုတ်ပြန်ပါတယ်။ ဂါဇာမှာ ချက်ခြင်း အပစ်ရပ်ပြီး အစ္စရေးတပ်တွေ ဆုတ်ခွာဖို့၊ ပါလက်စတိုင်းတွေ အိုးမဲ့အိမ်မဲ့ထပ်ဖြစ်တာမျိုး မလုပ်ဆောင်ဖို့ကိုလည်း ၀န်ကြီးတွေက တိုက်တွန်းခဲ့ပါတယ်။

ဂါဇာတွင် အသတ်ခံရသူ ၄၁၀၀၀ ကျော်လာပြီ
————
ပြီးခဲ့တဲ့နှစ် အောက်တိုဘာက စတင်တဲ့ ဂါဇာက အစ္စရေးရဲ့ လူသတ်ပွဲအတွင်း အသတ်ခံရသူအရေအတွက်ဟာ ၄၁၁၁၈ ဦး ရှိလာပါပြီ။ အဲဒီအထဲက ၁၆၅၀၀ ဟာ ကလေးငယ်တွေ ဖြစ်ပါတယ်။ ပျောက်ဆုံးနေသူက တစ်သောင်းကျော် ရှိပါတယ်။ ပြီးခဲ့တဲ့ သီတင်းနှစ်ပတ်အတွင်း အစ္စရေးဟာ ကိုယ်တိုင် သတ်မှတ်ပေးထားတဲ့ စစ်ရှောင်ဇုန်တွေကို ပစ်မှတ်ထား တိုက်ခိုက်ခဲ့ပြီး စစ်ဘေးရှောင် ဒါဇင်နဲ့ချီ သေဆုံးခဲ့ပါတယ်။