ဖေဖော်ဝါရီ ၆၊ ၂၀၁၉
M-Media
– မြန်မာ့တပ်မတော်ရဲ့ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဟာ ကချင်ခေါင်းဆောင်တွေနဲ့ အင်္ဂါနေ့မှာ တွေ့ဆုံခဲ့ပြီး စစ်ရှောင်ပြည်သူတွေ နေရပ်ပြန်ရေး၊ ငြိမ်းချမ်းရေးနဲ့ မြစ်ဆုံဆည်ကိစ္စတွေကို ဆွေးနွေးခဲ့တယ်လို့ သိရပါတယ်။
စစ်တပ်ရဲ့ မြောက်ပိုင်းတိုင်း စစ်ဌာနချုပ်အဆောက်အဦးမှာ ပြုလုပ်ခဲ့တဲ့ အဲဒီဆွေးနွေးမှုကို ကချင်နှစ်ခြင်းအသင်းတော် (KBC) ကိုယ်စားလှယ်တွေ၊ ကချင်ကက်သလစ်လူ့အဖွဲ့အစည်းက ခေါင်းဆောင်တွေ တက်ရောက်ခဲ့ပါတယ်။
ဗိုလ်ချုပ်မှူးကြီးက ကချင်စစ်ရှောင်တွေ နေရပ်ပြန်ရေးကိစ္စ၊ ကချင်လက်နက်ကိုင်အဖွဲ့တွေနဲ့ ငြိမ်းချမ်းရေးဆွေးနွေးမှုကိစ္စတွေကို လျင်လျင်မြန်မြန်နဲ့ တိုးတက်မှုရှိအောင် ဆောင်ရွက်ချင်ကြောင်း၊ မြစ်ဆုံကိစ္စဟာ ပြည်သူ့ဆန္ဒနဲ့ လွှတ်တော်ရဲ့ အဆုံးအဖြတ်အပေါ်မှာ မူတည်နေကြောင်း ပြောကြားခဲ့ပါတယ်။
KBC က ရေရှည်ငြိမ်းချမ်းရေးကို ရည်ရွယ်တဲ့ လုပ်ငန်းစဉ်မျိုးကို ပွင့်လင်းမြင်သာမှုရှိရှိ ဆောင်ရွက်ဖို့၊ ဘာသာရေးအဖွဲ့၊ လူထုအခြေပြု အဖွဲ့တွေနဲ့ ပူးပေါင်းကာ နေရပ်ပြန်စစ်ရှောင်ပြည်သူတွေ လုံခြုံရေး ဆောင်ရွက်ပေးဖို့ ဆွေးနွေးခဲ့ပါတယ်။
“(ဒီကိစ္စကို) ကျွန်တော်တို့နဲ့သာ မဆွေးနွေးဘူးဆိုရင် တစ်ခုခုမှားသွားတာနဲ့ ပြည်သူလူထုက နောက်ဆက်တွဲဆိုးကျိုးကို ခံစားရမှာ ဖြစ်ပါတယ်” လို့ KBC ဒုတိယဥက္ကဌ Tu Mai က ပြောကြားခဲ့ပါတယ်။
KBC ဟာ လူသားချင်း စာနာမှုဆိုင်ရာအဖွဲ့ Kachin Humanitarian Concern Committee ကို ဖွဲ့စည်းကာ စစ်ရှောင်ပြည်သူတွေအတွက် ဆောင်ရွက်ပေးနေပါတယ်။ Tu Mai က စစ်တပ်အနေနဲ့ ကချင်လွတ်မြောက်ရေးအဖွဲ့ KIO အပါအ၀င် အဖွဲ့အစည်းအားလုံးနဲ့ ပွင့်ပွင့်လင်းလင်း ဆွေနွေးဖို့ လိုအပ်တယ်လို့ ပြောကြားခဲ့ပါတယ်။
အစိုးရစစ်တပ်ဟာ ကချင်စစ်ရှောင်ပြည်သူ ၁၀၀ ကျော်ကို ၀ိုင်းမော်မြို့နယ်က သူတို့ရဲ့နေအိမ်တွေမှာ မကြာသေးခင်ကပဲ နေရာ ချထားပေးခဲ့ပါတယ်။
မြစ်ကြီးနား ကက်သလစ်သာသနာ့နယ်မြေရဲ့ လူမှူဖူလှုံရေးကိစ္စကို တာဝန်ယူဆောင်ရွက်နေတဲ့ ဖာသာ Noel Naw Lat က ကချင်ပြည်နယ်မှာ မြေမြှုပ်မိုင်းဖယ်ရှားရေး၊ စစ်ရှောင်စခန်းတွေနဲ့ ပတ်သက်တဲ့ကိစ္စတွေ ဆောင်ရွက်ရေး ကူညီပေးသွားမယ်လို့ ဗိုလ်ချုပ်မှူးကြီးက ကတိပေးခဲ့ကြောင်း ပြောကြားခဲ့ပါတယ်။
မြစ်ဆုံကိစ္စကို ကချင်ပြည်သူလူထုတစ်ရပ်လုံးက ကန့်ကွက်ကြောင်း ရေးသားထားတဲ့ ပေးစာတစ်စောင်ကို ကချင်ဘာသာရေး ခေါင်းဆောင်တွေက ဗိုလ်ချုပ်မှူးကြီးထံ ပေးအပ်ခဲ့ပါတယ်။
ဖာသာ Noel Naw Lat က မြစ်ဆုံစီမံကိန်းကို ပြင်းပြင်းထန်ထန် ကန့်ကွက်ကြောင်း အစည်းအဝေးမှာ တင်ပြခဲ့တယ်လို့ ပြောကြားခဲ့ပါတယ်။
“သူ (ဗိုလ်ချုပ်မှူးကြီး) က ပြည်သူ့ဆန္ဒကို မျက်ကွယ်ပြုဖို့ ခက်ခဲတယ်လို့ ပြောကြားခဲ့ပြီး တပ်မတော်ဖက်က တတ်နိုင်သလောက် လုပ်ဆောင်ပေးမယ်လို့လည်း ကတိပြုခဲ့ပါတယ်။ ဒါပေမယ့် နောက်ဆုံး ဆုံးဖြတ်ချက်ကို လွှတ်တော်က လုပ်ဆောင်ရမှာပါ”
ကာကွယ်ရေးဦးစီးချုပ်က ကချင်ပြည်နယ်အတွင်း ငြိမ်းချမ်းရေးဆွေးနွေးမှုမှာ တိုးတက်မှုကို မြင်ချင်ပြီး ကချင်လက်နက်ကိုင်အဖွဲ့နဲ့ ငြိမ်းချမ်းရေးဆွေးနွေးမှု ဆက်လက်လုပ်ဆောင်သွားမယ်လို့ အစည်းအဝေးမှာ ပြောကြားခဲ့ပါတယ်။
ဗိုလ်ချုပ်မှူးကြီးရဲ့ ကချင်ပြည်နယ်ခရီးစဉ်ကို အင်္ဂါနေ့ညနေပိုင်းအထိ တပ်မတော်ဖက်က သတင်းမထုတ်ပြန်ပါဘူး။
Ref: Irrawaddy
(ဧရာဝတီသတင်းဌာန အင်္ဂလိပ်ပိုင်းမှသတင်းကို ကောက်နှုတ်ပြန်ဆိုပါသည်)
