အောက်တိုဘာ ၅၊ ၂၀၁၈
M-Media
ဒန်းနစ် မွတ်ဝီဂီနဲ့ နာဒီယာမူရဒ်
– ၂၀၁၈ ခုနှစ် နိုဘယ်ငြိမ်းချမ်းရေးဆုအတွက် ကွန်ဂိုနိုင်ငံက မီးယပ်ဆရာဝန် ဒန်းနစ် မွတ်ဝီဂီနဲ့ အီရတ်နိုင်ငံက အမျိုးသမီးအရေး တက်ကြွလှုပ်ရှားသူ နာဒီယာမူရဒ် တို့ကို ရွေးချယ်လိုက်ပါတယ်။
ဒေါက်တာ ဒန်းနစ် မွတ်ဝီဂီဟာ ကာလရှည်ဖြစ်ပွားကာ လူပေါင်း ၆ သန်းလောက် သေဆုံးခဲ့တဲ့ ကွန်ဂိုပြည်တွင်းစစ်မှာ လိင်အကြမ်းဖက်ခံရသူတွေကို ဆယ်စုနှစ်နဲ့ချီ ကူညီခဲ့သူ ဖြစ်ပါတယ်။ ယာဇီဒီအမျိုးသမီးဖြစ်တဲ့ မူရဒ်ကတော့ IS အကြမ်းဖက်အဖွဲ့ရဲ့ လိင်ကျွန်အပြုခံရတဲ့ အမျိုးသမီးတွေကို ကူညီ ကယ်ဆယ်နေသူ ဖြစ်ပါတယ်။
နိုဘယ်ဆုရွေးချယ်ရေး ကော်မတီရဲ့ ဥက္ကဌဖြစ်သူ ဘရစ် ရီအစ် အန်ဒါဆန်က ဒီပုဂ္ဂိုနှစ်ဦးဟာ ‘လိင်အကြမ်းဖက်မှုကို စစ်ပွဲ၊ လက်နက်ကိုင် ပဋိပက္ခတွေရဲ့ လက်နက်တစ်ခုအဖြစ် အသုံးပြုမှုကို’ အဆုံးသတ်အောင် ကြိုးပမ်းအားထုတ်မှုအတွက် ဒီလို ချီးမြှင့်လိုက်တာ ဖြစ်တယ်လို့ ပြောကြားခဲ့ပါတယ်။
“ရွေးချယ်ခံရသူ နှစ်ဦးစလုံးဟာ စစ်ရာဇမှုတွေကို လူတွေက အာရုံစိုက်လာအောင်၊ ဒါတွေကို တိုက်ဖျက်နိုင်အောင် အရေးပါတဲ့ အခန်းကဏ္ဍကနေ ပါဝင်ခဲ့ပါတယ်။ ဒန်းနစ် မွတ်ဝီဂီဟာ ထိခိုက်ခံစားရသူတွေကို ကာကွယ်ဖို့ သူ့ရဲ့ဘ၀ကို မြှုပ်နှံထားသူပါတယ်။ နာဒီယာ မူရဒ်ကတော့ သူမနဲ့ အခြားသူတွေအပေါ် ကျူးလွန်မှုတွေကို ဖော်ထုတ်သူတစ်ယောက်ပါ။ သူတို့နှစ်ယောက်စလုံးဟာ ပုံစံတစ်မျိုးစီနဲ့ စစ်ပွဲက လိင်အကြမ်းဖက်မှုကို ပိုမိုမြင်သာထင်ရှားအောင် ဆောင်ရွက်ကာ ကျူးလွန်သူတွေကို အရေးယူနိုင်ရေး ကူညီပေးနေသူတွ ဖြစ်ပါတယ်”
မွတ်ဝီဂီဟာ ၁၉၉၉ ခုနှစ်က နိုင်ငံအရှေ့ပိုင်း ဘူကာဗူမြို့မှာ Panzi ဆိုတဲ့ ဆေးရုံတစ်ခုကို တည်ထောင်ခဲ့ပြီး သူနဲ့ သူ့အဖွဲ့ဟာ လိင်အကြမ်းဖက်မှု သားကောင် ဖြစ်ခဲ့ရသူပေါင်း ၅ သောင်းကျော်ကို ကုသပေးခဲ့ပါတယ်။
စစ်ပွဲတွေနဲ့ လုံးပမ်းခဲ့ရတဲ့ ကွန်ဂိုနိုင်ငံမှာ လိင်အကြမ်းဖက်မှုတွေ ဆိုးဆိုးရွားရွား ဖြစ်ပွားခဲ့ပြီး ကမ္ဘာ့ ‘အဓမ္မမြို့တော်’ လို့တောင် အခေါ်ခံခဲ့ရပါတယ်။
နာဒီယာမူရဒ်ဟာ ၂၀၁၄ ခုနှစ် သြဂုတ်မှာ IS အကြမ်းဖက်အဖွဲ့ရဲ့ ဖမ်းဆီးခြင်းကိုခံရကာ၊ လိင်ကျွန်အဖြစ် ရောင်းစားခံခဲ့ရပါတယ်။ IS လက်ထဲမှာ မူရဒ်တစ်ယောက် အကြိမ်ကြိမ် အဓမ္မကျင့်ခံခဲ့ရပြီး၊ အစ္စလာမ်ကို ဘာသာမပြောင်းရင် အသတ်ခံရမယ်လို့ ခြိမ်းခြောက်ခံခဲ့ရပါတယ်။
လူဦးရေ ၄ သိန်းလောက်ရှိတဲ့ ယာဇီဒီလူမျိုးတွေဟာ အီရတ်မြောက်ပိုင်းမှာ နေထိုင်ကြတဲ့ လူနည်းစုတွေ ဖြစ်ပြီး အရှေ့အလယ်ပိုင်းမှာ အရင်ကတည်းက ရှိခဲ့တဲ့ အယူဝါဒတွေကို လက်ခံကျင့်သုံးပါတယ်။
နိုဘယ်ဆုရွေးချယ်ရေးအဖွဲ့ ဥက္ကဌ အန်ဒါဆန်က မူရဒ်ကိုဟာ ‘သူမတူတဲ့သတ္တိခဲ’ အမျိုးသမီးဖြစ်ပြီး ကိုယ့်ရဲ့အတွေ့အကြံနဲ့ အခြားသူတွေရဲ့ အတွေ့အကြုံတွေကို မကြောက်မရွံ့ ထုတ်ဖော်သူဖြစ်တယ်လို့ ချီးကျူးခဲ့ပါတယ်။
၂၀၁၈ ခုနှစ်အတွက် နိုဘယ်ငြိမ်းချမ်းရေးဆုကို လူပေါင်း ၃၃၁ ယောက်ထဲကနေ ရွေးချယ်တာဖြစ်ပါတယ်။
Ref : Aljazeera
