မေ ၂၄၊ ၂၀၁၈
M-Media
– မိမိရဲ့ ကျန်းမာရေးအခြေအနေဟာ ကောင်းမွန်နေပြီး ပရိတ်သတ်တွေအနေနဲ့ မစိုးရိမ်ကြဖုိ့ ဟောင်ကောင် နာမည်ကျော်မင်းသား ဂျက်လီက ဆိုရှယ်မီဒီယာကနေတစ်ဆင့် ပြောကြားလိုက်ပါတယ်။
ဇရာထောင်းနေတဲ့ ဂျက်လီတစ်ယောက် ကတုံးတုံးထားပြီး အမျိုးသားတစ်ဦးက ဘေးနားကနေ တွဲပေးရတဲ့ ဓာတ်ပုံတစ်ခု ပြီးခဲ့တဲ့ရက်ပိုင်းအတွင်း ပြန့်နှံ့ခဲ့ပြီးတဲ့နောက် သူ့ရဲ့ ကျန်းမာရေးနဲ့ပတ်သက်ပြီး ပရိတ်သတ်တွေကြားထဲမှာ စိုးရိမ်မှုတွေ ရှိခဲ့ပါတယ်။
“ဂျက်လီဟာ hyperthyroidism ရောဂါနဲ့ အာရုံကျောမကြီးဆိုင်ရာ ပြဿနာတွေ ခံစားနေရတယ်ဆိုတာ ထင်ထင်ရှားရှား မြင်နိုင်ပါတယ်။ ဒီဓာတ်ပုံဟာ အခုလက်ရှိဂျက်လီပါ” ဆိုတဲ့ စာသားနဲ့ အဲဒီဓာတ်ပုံ ပြန့်နှံ့ခဲ့တာပါ။
ဂျက်လီက သူနေကောင်းတယ်လို့ ဓာတ်ပုံတစ်ချို့နဲ့အတူ မနေ့က Facebook စာမျက်နှာမှာ ရေးသားခဲ့ပါတယ်။
“ကျွန်တော့်ရဲ့ကျန်းမာရေးနဲ့ပတ်သက်လို့ စိုးရိမ်ကြသူတွေကို ကျေးဇူးတင်ပါတယ်။ ကျွန်တော် နေလို့ထိုင်လို့ ကောင်းပါတယ်။ လတ်တလော ကျွန်တော် ဆောင်ရွက်နေတဲ့ လုပ်ငန်းတွေကို သိပ်မကြာခင်မှာ ချပြရတော့မယ့်အတွက်လည်း စိတ်လှုပ်ရှားနေပါတယ်။ အခုတော့ ခင်ဗျားတို့ရဲ့ စိုးရိမ်မှုတွေအတွက် ကျေးဇူးတင်ကြောင်း ပြောပါရစေ”
ဂျက်လီရဲ့ မန်နေဂျာ စတီဗင် ချက်စ်မန်းက ဂျက်လီဟာ hyperthyroidism ရောဂါကို ခံစားနေရတာ ၁၀ နှစ်လောက်ရှိနေပြီး အသက်အန္တရာယ် မစိုးရိမ်ရကြောင်း၊ လက်ရှိ နေထိုင်ကောင်းကြောင်း Washington Post သတင်းဌာနကို ပြောကြားခဲ့ပါတယ်။
Ref: CNA
