News @ M-Media

Author: KO LAY

  • တူရကီ၏ လက်နက်ထုတ်လုပ်ရေးကဏ္ဍ အကြီးအကျယ် တိုးတက်လာ

    မတ် ၂၃၊ ၂၀၂၅
    M-Media


    တူရကီရဲ့ ကာကွယ်ရေးပစ္စည်းထုတ်လုပ်မှုလုပ်ငန်းဟာ ပြီးခဲ့တဲ့ ဆယ်စုနှစ်တွေတွင်း သိသိသာသာ တိုးတက်လာခဲ့ပြီး ကမ္ဘာ့ထိပ်တန်း လက်နက်ထုတ်လုပ်ရောင်းချတဲ့နိုင်ငံ ဖြစ်လာပါတယ်။ ၂၀၂၄ ခုနှစ်မှာ စစ်လက်နက်ပစ္စည်းတင်ပို့မှုဟာ ဒေါ်လာ ၇.၁ ဘီလီယံကို ရောက်ရှိလာပြီး၊ ဆယ်စုနှစ်တစ်ခု အရင်က ဒေါ်လာ ၁.၉ ဘီလီယံရှိရာကနေ တဖြည်းဖြည်းမြင့်တက်လာတာပါ။
    တူရကီဟာ ကာကွယ်ရေးလုပ်ငန်း ဖွံ့ဖြိုးတိုးတက်မှုဌာန SAGEB ကို ၁၉၈၅ ခုနှစ်မှာ တည်ထောင်ခဲ့ပြီး လက်နက်ထုတ်လုပ်မှုမှာ ပြည်ပနိုင်ငံတွေကို မှီခိုမှုကင်းလွတ်ရေး ကြိုးပမ်းလာခဲ့တာဖြစ်ပါတယ်။
    လက်ရှိမှာတော့ တူရကီဟာ ကမ္ဘာ့ ၁၁ နိုင်ငံမြောက် အကြီးဆုံး လက်နက်တင်ပို့တဲ့နိုင်ငံ ဖြစ်လာပြီး အဓိက၀ယ်ယူသူတွေက အရှေ့အလယ်ပိုင်းနဲ့ အာရှနိုင်ငံတွေ ဖြစ်ပါတယ်။
    စိတ်၀င်စားစရာအချက်များ
    ———–
    -တူရကီဟာ ၁၉၈၀ ပြည့်နှစ်တွေကတည်းက နိုင်ငံခြားတိုင်းပြည်တွေကနေ လက်နက်ဝယ်ယူမှုက ဖယ်ခွာပြီး ကိုယ်တိုင်ထုတ်လုပ်မှုကို အလေးထားလာခဲ့ပါတယ်။

    • Bayraktar TB2 ဒရုန်းဟာ တူရကီရဲ့ ထင်ရှားတဲ့ ပို့ကုန်ဖြစ်ပြီး ၂၀၁၄ ခုနှစ်မှစတင်ကာ ကမ္ဘာ့နိုင် ငံအသီးသီးက မှာယူအသုံးပြုလာပါတယ်။
      -Steel Dome လေကြောင်းကာကွယ်ရေးစနစ်နဲ့၊ KAAN ပဉ္စမမျိုးဆက်တိုက်လေယာဉ်တွေကို ဖန်တီးပြီး လေတပ်ခေတ်မီရေး လုပ်ဆောင်နေပါတယ်။
      -Altay ဆိုတဲ့အမည်နဲ့ တင့်ကားတွေကို ထုတ်လုပ်နေပြီး ဂျာမနီရဲ့ Leopard တင့်ကား၊ အမေရိကန်ရဲ့ Abrams တင့်ကားတွေကို ယှဥ်ပြိုင်နိုင်ဖို့ လုပ်ဆောင်နေပါတယ်။
      -ရေတပ်ခေတ်မီရေးအတွက် MILGEM စီမံကိန်း ဖော်ဆောင်ကာ နိုင်ငံရဲ့ အကြီးဆုံး ခေတ်မီတိုက်သင်္ဘော TCG Anadolu တွေကို ထုတ်လုပ်လာနိုင်ပါတယ်။
      -အနောက်နိုင်ငံရဲ့ လက်နက်၀ယ်ယူမှု ပိတ်ဆို့တာတွေကို ကျော်လွှားနိုင်ဖို့အတွက် ကိုယ်တိုင် လက်နက်ထုတ်လုပ်ဖို့ ကြိုးပမ်းအားထုတ်လာတဲ့ တူရကီမှာ ကာကွယ်ရေးပစ္စည်း ထုတ်လုပ်မှုလုပ်ငန်း ၃,၀၀၀ လောက်အထိ ရှိလာပါပြီ။
      -တူရကီရဲ့ လက်နက်တင်ပို့မှုဟာ ကမ္ဘာ့လက်နက်ဈေးကွက်ရဲ့ ၁.၇% ရှိလာပြီး UAE, ပါကစ္စတန်နဲ့ ကာတာ တို့က အဓိက ၀ယ်ယူသူတွေ ဖြစ်လာပါတယ်။
      Ref: Aljazeera
  • ပါလက်စတိုင်း တိုက်ခိုက်ခံရမှု နောက်ဆုံးရသတင်းများ (မတ် ၂၃)

    M-Media

    ဂါဇာရှိ ကင်ဆာဆေးရုံကို အစ္စရေးက ဖောက်ခွဲဖျက်ဆီး
    ——————–
    ဂါဇာက တစ်ခုတည်းသော ကင်ဆာအထူးကုဆေးရုံဖြစ်တဲ့ တူရကီ-ပါလက်စတိုင်း ချစ်ကြည်ရေးဆေးရုံကို အစ္စရေးက မတ်လ ၂၂ ရက်နေ့မှာ ဖောက်ခွဲဖျက်ဆီးလိုက်ပါတယ်။ ပါလက်စတိုင်း ကျန်းမာရေးဝန်ကြီးဌာနက ဒါဟာ “ရက်စက်ယုတ်မာတဲ့ ရာဇဝတ်မှု” လို့ ရှုတ်ချခဲ့ပြီး ကင်ဆာလူနာထောင်ပေါင်းများစွာ ကုသမှုမရတော့ဘူးလို့ ထုတ်ပြန်ခဲ့ပါတယ်။ အစ္စရေးက ဒီဆေးရုံဟာ ဟားမတ်စ်ရဲ့ အမိန့်ပေးစင်တာလို့ ဆိုပေမယ့် သက်သေမပြနိုင်ပါဘူး။ ဒီတိုက်ခိုက်မှုဟာ လူသားချင်းစာနာမှုဆိုင်ရာ ဥပဒေကို ချိုးဖောက်တယ်တာဖြစ်တယ်လို့ နိုင်ငံတကာက ဝေဖန်နေပါတယ်။

    အစ္စရေးက တိုက်ခိုက်သတ်ဖြတ်မှု ဆက်လုပ်
    ———————-
    ဂါဇာမှာ အစ္စရေးက တိုက်ခိုက်သတ်ဖြတ်မှုတွေ ဆက်လက်လုပ်ဆောင်နေပါတယ်။ မြောက်ပိုင်းမှာ လေကြောင်းတိုက်ခိုက်မှုကြောင့် ကလေးငါးဦး သေဆုံးခဲ့ပါတယ်။ စစ်ဘေးရှောင်တွေ ခိုလှုံနေတဲ့နေရာကို ပစ်မှတ်ထားတိုက်ခိုက်တာပါ။ မတ်လ ၂၂ ရက် မနက်ပိုင်းကစပြီး အစ္စရေးရဲ့တိုက်ခိုက်မှုကြောင့် ပါလက်စတိုင်း ၂၉ ဦးထက်မနည်း သေဆုံးခဲ့ပါတယ်။ ဒီအပတ်အတွင်းမှာပဲ အစ္စရေးက ဂါဇာမှာ ကလေး ၂၀၀ ကျော်နဲ့ အမျိုးသမီး ၁၁၀ ကျော်ကို သတ်ဖြတ်ခဲ့ပါတယ်။

    ကျန်းမာရေးအကျပ်အတည်းတွေရှိနေ
    ————–
    ကင်ဆာဆေးရုံ ကိုအစ္စရေးက ဖောက်ခွဲဖျက်ဆီးလိုက်မှုဟာ ဂါဇာက ပြိုလဲနေတဲ့ ကျန်းမာရေးစနစ်ကို ပိုမိုဆိုးရွားစေပါတယ်။ ကုလနဲ့ ကမ္ဘာ့နိုင်ငံတွေက ဆေးရုံတိုက်ခိုက်မှုနဲ့ ဆက်လက်ဖြစ်ပွားနေတဲ့ အကြမ်းဖက်မှုတွေကို ရှုတ်ချခဲ့ပါတယ်။

    Ref: Aljazeera

  • မတ်လ ၁၈ ရက်နေ့ နိုင်ငံတကာ သတင်းများ

    ဂါဇာမြင်ကွင်း

    M-Media

    ဂါဇာတွင် အကြီးအကျယ်သတ်ဖြတ်မှုများ အစ္စရေးက ပြန်လည်ပြုလုပ်

    အစ္စရေးဟာ ဂါဇာကမ်းမြှောင်တစ်၀ှမ်းမှာရှိတဲ့ ဒုက္ခသည်စခန်းတွေကို ဒီကနေ့မနက်အစောပိုင်းက လေကြောင်းကနေ တိုက်ခိုက်မှု အကြီးအကျယ် ပြုလုပ်ခဲ့ပြီး အနည်းဆုံး ပါလက်စတိုင်းပြည်သူ ၃၀ သေဆုံးခဲ့တယ်လို့ သိရပါတယ်။ ပါလက်စတိုင်းလွတ်မြောက်ရေးအဖွဲ့ ဟားမက်စ်က အစ္စရေးဟာ အပစ်ရပ်ရေးသဘောတူညီချက်ကို တတ်ဖတ်သတ်အဆုံးသတ်လိုက်တာဖြစ်တယ်လို့ ထုတ်ပြန်ပါတယ်။
    အစ္စရေးနဲ့ ဟားမက်စ်တို့ဟာ ဇန်န၀ါရီလ ၁၉ ရက်နေ့က စပြီး အပစ်ရပ်ရေးသဘောတူညီချက် ရရှိခဲ့တာ ဖြစ်ပါတယ်။ အပစ်ရပ်ရေး ကာလအတွင်းမှာလည်း အစ္စရေးဟာ တိုက်ခိုက်သတ်ဖြတ်မှုတွေ ဆက်လက်လုပ်ဆောင်ခဲ့ပြီး အနည်းဆုံး လူ ၁၀၀ နီးပါး သေးဆုံးခဲ့ပါတယ်။ ၂၀၂၃ ခုနှစ် အောက်တိုဘာလက စတင်ပြီး ဂါဇာမှာ အစ္စရေးရဲ့ သတ်ဖြတ်မှုကြောင့် ပါလက်စတိုင်းပြည်သူ ၄၉၀၀၀ နီးပါး သေဆုံးထားပါတယ်။

    ဆီးရီးယား ပြန်လည်တည်ဆောက်ရေး ဥရောပနိုင်ငံများ ကူညီမည်

    ၁၄ နှစ်ကြာ ပြည်တွင်းစစ်ဒဏ်ကို ခံစားခဲ့ရတဲ့ ဆီးရီးယားနိုင်ငံ ပြန်လည်တည်ဆောက်ရေးအတွက် ကန်ဒေါ်လာ ၆ ဘီလီယံကျော် ကူညီဖို့ ဥပရောပနိုင်ငံတွေက ကတိပြုလိုက်ပါတယ်။ မနေ့က ဘလ်ဂျီယံနိုင်ငံမှာ ဥရောပသမဂ္ဂက ဆီးရီးယားအရေး ဆွေးနွေးခဲ့ကြပြီး ဆီးရီးယားကြားဖြတ်အစိုးရရဲ့ နိုင်ငံခြားရေး၀န်ကြီး အာဆတ် ဟာဆန် အလ်-ရှိုင်ဘာနီ တက်ရောက်ခဲ့ပါတယ်။ ဆီးရီးယားနိုင်ငံအတွင်း ငြိမ်းချမ်းစွာ အသွင်ကူးပြောင်းရေး လုပ်ဆောင်ဖို့လည်း ဥရောပနိုင်ငံတွေက တိုက်တွန်းခဲ့ပါတယ်။

    ဂါဇာတွင် သေဆုံးသူအရေအတွက် မြင့်တက်လာ

    ဒီကနေ့မနက် အစောပိုင်း ဂါဇာမှာ အစ္စရေးရဲ့ လေကြောင်းကနေ တိုက်ခိုက်သတ်ဖြတ်မှုကြောင့် သေဆုံးသူ အရေအတွက်ဟာ ၃၀၀ ကျော်လာခဲ့ပြီး အမျိုးသမီးနဲ့ ကလေးငယ်အမြောက်အများ ပါ၀င်ပါတယ်။ တိုက်ခိုက်မှုဟာ ဒုက္ခသည်စခန်းတွေကို ပစ်မှတ်ထား ပြုလုပ်တာဖြစ်ပါတယ်။ ဟားမက်စ်က တိုက်ခိုက်ဖို့ စီစဥ်နေတဲ့အတွက် ကြိုတင်လက်ဦးမှု ရယူတာလို့ အစ္စရေးက ထုတ်ပြန်ထားပြီး ဟားမက်စ်က ဒီပြောဆိုချက်ဟာ အကြောင်းပြချက်တစ်ခုသာဖြစ်တယ်လို့ တုန့်ပြန်ပါတယ်။

    အစ္စရေးမီဒီယာတွေက တိုက်ခိုက်မှုလုပ်ဖို့ဆုံးဖြတ်ချက်ကို ပြီးခဲ့တဲ့တစ်ပတ်က ချမှတ်ခဲ့တာဖြစ်တယ်လို့ အစ္စရေးအစိုးရသတင်းရင်းမြစ်တွေကို ကိုးကားပြီး ဖော်ပြပါတယ်။ ဟားမက်စ်ဖမ်းဆီးထားတဲ့ ဓားစာခံတွေရဲ့ မိသားစု၀င်တွေက ၀န်ကြီးချုပ် နေတန်ယာဟုဟာ ဓားစာခံတွေကို ကယ်တင်ဖို့ ရည်ရွယ်မရှိဘူးလို့ ၀ေဖန်ခဲ့ပြီး ဂျေရုစလင်မှာ လူထုဆန္ဒပြပွဲတွေလုပ်ဖို့ တောင်းဆိုထားပါတယ်။

    Ref: Aljazeera

  • ပါလက်စတိုင်း တိုက်ခိုက်ခံရမှု သတင်းများ(မတ်လ ၁၇ ရက်)

    မတ် ၁၇၊ ၂၀၂၅

    M-Media

    ဘိုက်လာဟီယာရပ်ကွက်မှ မြင်ကွင်းတစ်ခု

    ဂျေရုစလင်တွင် ပါလက်စတိုင်းများ တိုက်ခိုက်ခံရ

    ပါလက်စတိုင်းနိုင်ငံ အရှေ့ဂျေရုစလင်က ရပ်ကွက်တော်တော်များများမှာ တရားမ၀င် ဂျူးအခြေချနေထိုင်သူတွေက ပါလက်စတိုင်းတွေအပေါ် တိုက်ခိုက်မှုအမြောက်များကို မနေ့က ပြုလုပ်ခဲ့ပါတယ်။ ဂျူးအခြေချသူတွေဟာ အစ္စရေးလုံခြုံရေးတပ်ဖွဲ့တွေရဲ့ အကူအညီကို ရယူတိုက်ခိုက်ခဲ့တာ ဖြစ်ပါတယ်။ ဟီဘရွန်မြို့ဟောင်းဘက်မှာလည်း ဒီလိုတိုက်ခိုက်မှုတွေ ရှိခဲ့ပြီး အနည်းဆုံး ပါလက်စတိုင်း အဘိုးအိုတစ်ဦး ဒဏ်ရာရခဲ့ပါတယ်။ ပါလက်စတိုင်းတွေရဲ့ ပိုင်ဆိုင်မှုတွေကို ခိုးယူတာ၊ ကောက်ပဲသီးနှံတွေကို ဖျက်ဆီးတာတွေလည်း လုပ်ဆောင်ခဲ့ပါတယ်။

    အကူအညီပေးရေး ၀န်ထမ်းများကို အစ္စရေးက အစုလိုက်သတ်ဖြတ်

    ဂါဇာမြောက်ပိုင်း ဘိုက်လာဟီယာရပ်ကွက်မှာ မတ်လ ၁၅ ရက်နေ့က အစ္စရေးရဲ့ ဒရုန်းတိုက်ခိုက်မှုအတွင်း အနည်းဆုံး လူ ၉ ဦး သေဆုံးခဲ့ပြီး ၈ ဦးက အကူအညီပေးရေး၀န်ထမ်းတွေ ဖြစ်ပါတယ်။ ယူကေအခြေစိုက် ပရဟိတအဖွဲ့ Al Khair က သေဆုံးသွားသူတွေဟာ သူတို့၀န်ထမ်းတွေဖြစ်ပြီး၊ ဒါဟာ အပစ်ရပ်ရေး သဘောတူညီချက်ကို ချိုးဖောက်တိုက်ခိုက်တာဖြစ်ကြောင်း ထုတ်ပြန်ခဲ့ပါတယ်။ အစ္စရေးဟာ မတ်လ ၂ ရက်နေ့က စတင်ပြီး ဂါဇာကမ်းမြှောင်ကို နိုင်ငံတကာ အကူအညီတွေ ၀င်ရောက်ခွင့်မရအောင် တားဆီးပိတ်ပင်ထားပါတယ်။

    အမေရိကန်၏ ခြိမ်းခြောက်မှုကို အီရန် တုန့်ပြန်

    မိမိတို့ဟာ စစ်ပွဲကို မလိုချင်ပေမယ့်လည်း တိုက်ခိုက်ခံလာရမယ်ဆိုရင် ပြတ်ပြတ်သားသား ပြန်လည်တုန့်ပြန်သွားမယ်လို့ အီရန် တော်လှန်ရေး အစောင့်တပ်ဖွဲ့အကြီးအကဲက ထုတ်ပြန်ပါတယ်။ တနင်္ဂနွေနေ့က ယီမင်ကို အမေရိကန်က လေကြောင်းတိုက်ခိုက်မှုပေါင်း ၄၀ ကျော် ပြုလုပ်ခဲ့ပြီး သမ္မတ ထရမ့်ကလည်း အီရန်ကို ဆိုရှယ်မီဒီယာကနေတစ်ဆင့် သတိပေးခဲ့ပါတယ်။ ယီမင်ကို ထိန်းချုပ်ထားတဲ့ ဟူသီလက်နက်ကိုင်အဖွဲ့ဟာ အီရန်ကျောထောက်နောက်ခံပြုတဲ့အဖွဲ့ ဖြစ်ပါတယ်။ အမေရိကန်ရဲ့ ယီမင်ကို တိုက်ခိုက်မှုအတွင်း လူ ၃၀ ကျော် သေဆုံးခဲ့ပြီး အများစုက အရပ်သားတွေ ဖြစ်ပါတယ်။

    Ref: Aljazeera

  • ဘူတူဘီလာ (သို့) ဒူဘိုင်းက ရမ်ဇာန်နိဗ္ဗာန်ဆော်

    မတ် ၁၆၊ ၂၀၂၅
    M-Media

    (ဓာတ်ပုံ – အဘ်ဒူလာ ဖာဟီဒီ)

    အစ္စလာမ်ဘာသာ၀င်တွေရဲ့ ရမ်ဇာန်ဥပုသ်လမှာ ညဦးပိုင်း ၀တ်ပြုဆုတောင်းဖို့၊ အာရုံမတက်ခင် ၀ါထမင်းစားဖို့ လိုက်လံနှိုးဆော်ပေးတဲ့ ဓလေ့ထုံးတမ်းတစ်ခု ရှိပါတယ်။

    ဥပုသ်လရဲ့ ထွဋ်မြတ်မှုအကြောင်း၊ အလ္လာဟ်အရှင်မြတ်ရဲ့ ကြီးကျယ်မှုအကြောင်းတွေ သီကုံးထားတဲ့ ကဗျာလင်္ကာတွေကို ဒေသအလိုက်၊ နိုင်ငံအလိုက် ထင်ရှားတဲ့ တူရိယာပစ္စည်းတွေနဲ့ ပေါင်းစပ်ကာ စည်းချက်ညီညီ ရွတ်ဆိုပြီး တစ်လမ်း၀င်တစ်လမ်းထွက် နိဗ္ဗာန်ဆော်ရတာ ဖြစ်ပါတယ်။

    ယူအေအီးနိုင်ငံ ဒူဘိုင်းမှာ ဒီ နိဗ္ဗာန်ဆော်ကို ‘ဘူတူဘီလာ’ (ဗုံကြီးနဲ့လူ) လို့ ခေါ်တွင်ပါတယ်။

    အမွေဆက်ခံ
    ————–
    အဘ်ဒူလာ ဖာဟီဒီဟာ အာရပ်စော်ဘွားများပြည်ထောင်စု (ယူအေအီး) နိုင်ငံ ဒူဘိုင်းမြို့က နိဗ္ဗာန်ဆော်တစ်ဦးပါ။ ရမ်ဇာန်ဥပုသ်လရဲ့ အရသာကို ပြည်သူတွေ အပြည့်အ၀ ခံစားနိုင်ဖို့အတွက် ‘ဘူတူဘီလာ’ ဓလေ့ကို မြတ်မြတ်နိုးနိုး ထိန်းသိမ်းနေသူတစ်ယောက်လည်း ဖြစ်ပါတယ်။

    ၁၉၆၀ ပြည့်နှစ်တွေက အဘိုးဖြစ်သူစတင်ခဲ့တဲ့ မိသားစုအမွေကို သူက ဆက်ခံထားတာပါ။

    လက်ရှိ အသက် ၃၅ နှစ်ရှိပြီဖြစ်တဲ့ အဘ်ဒူလာဟာ ၂၀၀၅ ခုနှစ်ကစပြီး ရမ်ဇာန်နိဗ္ဗာန်ဆော်အလုပ်ကို စတင်လုပ်ဆောင်ခဲ့တာဖြစ်ပါတယ်။

    “ဟိုးအရင်တုန်းက ဒီနိဗ္ဗာန်ဆော်အလုပ်ဟာ ရမ်ဇာန်မှာ အသက်မွေး၀မ်းကြောင်းတစ်ခုလို ဖြစ်ခဲ့ပါတယ်။ ဒီနေ့မှာတော့ ဓလေ့ထုံးတမ်းတစ်ခုကို ထိန်းသိမ်းတဲ့ ပုံစံမျိုး ဖြစ်သွားပါပြီ”

    သတိရကြ
    ———-
    ဘူတူဘီလာ သီဆိုတဲ့ ကဗျာလင်္ကာတွေဟာ အလ္လာဟ်အရှင်မြတ်ကို သတိရဖို့၊ အချိန်မီ ၀ါထမင်းထစားဖို့ တိုက်တွန်းတာမျိုး ဖြစ်ပါတယ်။

    “အိပ်နေသော အို-လူသား၊ နိုးထပါလော့။ အရှင်မြတ်ကို ချီးမွမ်းလော့၊ အရှင်မြတ်ကို သတိရ တသလော့။ ဘူတူဘီလာလာပြီ၊ ညတိုင်း ပြည်သူတွေကို နှိုးဆော်ပေးနေပါပြီ”

    အဘ်ဒူလာရဲ့ နိဗ္ဗာန်ဆော်မှုမှာ လူငယ်တွေ၊ ကလေးတွေ အမြောက်အများ ပူးပေါင်းပါ၀င်တာမျိုးလည်း ရှိပါတယ်။

    ပျောက်ကွယ်မည်မဟုတ်
    ————————
    လူငယ်လူရွယ်တွေက နှစ်သက် စိတ်၀င်စားမှုတွေ ရှိနေပြီး အစိုးရကလည်း ယဥ်ကျေးမှု ထိန်းသိမ်းတာမျိုးတွေကို ပံ့ပိုးကူညီပေးနေတဲ့အတွက် ဘူတူဘီလာ ဓလေ့ထုံးတမ်းဟာ လတ်တလောမှာ ပျောက်ကွယ်မသွားနိုင်သေးဘူးလို့ အဘ်ဒူလာက ယုံကြည်နေပါတယ်။

    “ကျွန်တော့်နောက်ကိုလိုက်ပြီး သင်ယူချင်တဲ့သူတွေ၊ ကူညီပေးချင်သူတွေ အမြဲတမ်းရှိနေပါတယ်။ ၂၅ နှစ်အရွယ်၊ ၂၁ နှစ်အရွယ် လူငယ်တွေနဲ့ တစ်ချို့ဆို ၁၃ နှစ်လောက်ပဲ ရှိပါတယ်”

    Ref: Khaleej Times