Category: က်န္းမာေရးႏွင့္ေဆးပညာ

ကိုဗစ်ကာကွယ်ဆေးထုတ်ပြီး ကမ္ဘာကိုရောင်းရန် တရုတ်စီစဉ်နေ

အောက်တိုဘာ ၂၂၊ ၂၀၂၀
M-Media

-တရုတ်နိုင်ငံဟာ ကိုဗစ်ကာကွယ်ဆေးသစ်တစ်မျိုး ထုတ်လုပ်မှုကို အရှိန်မြှင့်လုပ်ဆောင်နေပြီး ကမ္ဘာကို ဖြန့်ချီဖို့ စီစဉ်နေတယ်လို့ တရုတ်နိုင်ငံပိုင်သတင်းဌာန CCTV က ဖော်ပြခဲ့ပါတယ်။

အင်္ဂလန်နိုင်ငံ အောက်စဖို့ဒ်တက္ကသိုလ်က စမ်းသပ်ထုတ်လုပ်နေပြီး အလားအလာကောင်းတယ်လို့ ယူဆထားတဲ့ ကာကွယ်ဆေးနည်းလမ်းအတိုင်း တရုတ်က ကာကွယ်ဆေးအသစ်ကို ထုတ်လုပ်နေတာပါ။

ခန္တာကိုယ်ကို မထိခိုက်စေဘဲ၊ ထိရောက်တဲ့ ကိုယ်ခံစွမ်းအားကို ထုတ်ပေးနိုင်မယ့် အဲဒီကာကွယ်ဆေးဟာ ၂ ကြိမ်ထိုးလိုက်တာနဲ့ နှစ်အတော်ကြာ ကိုဗစ်ကူးစက်မှု ကာကွယ်နိုင်မယ်လို့ တရုတ်သိပ္ပံပညာရှင်တွေက ပြောပါတယ်။

ပွင့်လင်းမြင်သာမှု မရှိတာကြောင့် အနောက်နိုင်ငံတွေက တရုတ်ကာကွယ်ဆေးတွေနဲ့ပတ်သက်ပြီး သံသယရှိနေပါတယ်။

တရုတ်အာဏာပိုင်တွေရဲ့ ကနဦးပြောကြားမှုတွေကိုကြည့်ရင် ကာကွယ်ဆေးကို နိုင်ငံအတွင်း တစ်လုံး ဒေါ်လာ ၉၀၊ နိုင်ငံခြားမှာ ၄ ဒေါ်လာလောက်နဲ့ ရောင်းဖို့ စီစဉ်ထားတာကိုတွေ့ရပြီး ကိုဗစ်ကာကွယ်ဆေးကို ကမ္ဘာကိုလွှမ်းမိုးနိုင်မယ့် ‘မမြင်ရတဲ့အင်အား’ (soft power) တစ်ခုအဖြစ် အသုံးပြုဖို့ မျှော်လင့်နေတာ ဖြစ်ပါတယ်။

တရုတ် အမျိုးသားကျန်းမာရေးကော်မရှင်က အခုနှစ် နှစ်ကုန်ပိုင်းလောက်မှာ ထိုးဆေးအလုံးရေ သန်း ၆၁၀ လောက်ထုတ်လုပ်နိုင်မယ်လို့ ပြောကြားထားပါတယ်။

တရုတ် ကူးစက်ရောဂါ ထိန်းချုပ်ရေးနှင့် တားဆီးကာကွယ်ရေးဌာနရဲ့ ဇီ၀လုံခြုံရေးအကြီးအကဲ ဝူဂွေကျန်းက ကာကွယ်ဆေးထုတ်လုပ်မှုတိုင်းမှာ အားနည်းချက်တွေ ကြုံတွေ့ရလေ့ရှိပေမယ့် အခု အသစ်စမ်းသပ်နေတဲ့ ကာကွယ်ဆေးမှာ ဆိုးဆိုးရွားရွား အားနည်းချက်မျိုး မကြုံတွေ့ရဘူးလို့ ပြောကြားခဲ့ပါတယ်။

Ref: Asia Times

October 22, 2020
တစ်ပတ်အတွင်း ကျန်းမာရေးနှင့် ဆေးပညာသတင်းများ

အောက်တိုဘာ ၁၅၊ ၂၀၂၀
M-Media

ဒုတိယအကြိမ် ကိုဗစ်ကူးစက်မှုက ပို၍ အန္တရာယ်ရှိ

Covid-19 ဒုတိယအကြိမ်ကူးစက်မှုဟာ ပထမတစ်ကြိမ်ထက် ပိုပြီး အန္တရာယ်ရှိတယ်လို့ အမေရိကန် ဆရာဝန်တွေက ဆေးပညာဂျာနယ် Lancet Infectious Diseases မှာ ရေးသားခဲ့ပါတယ်။

ကျန်းမာရေးကောင်းမွန်တဲ့ အသက် ၂၅ နှစ်အရွယ် အမျိုးသားတစ်ဦး ၂ ကြိမ်မြောက် ကိုဗစ်ကူးစက်မှုကို လေ့လာကာ ဒီလို ထုတ်ပြန်ခဲ့တာပါ။

၂ ခါပြန်ကူးစက်မှုဟာ အဖြစ်နည်းပေမယ့် ပထမအကြိမ်ကူးစက်ပြီးရတဲ့ ကိုယ်ခံအားက နောက်တစ်ကြိမ်မကူးအောင် မကာကွယ်နိုင်ကြောင်း၊ ဒါ့ကြောင့် ကူးစက်ပြီးသားလူတွေအနေနဲ့ ကိုဗစ်ဆိုင်ရာ ကျန်းမာရေးလမ်းညွှန်မှုတွေကို လိုက်နာဖို့လိုကြောင်း ပညာရှင်တွေက တိုက်တွန်းခဲ့ပါတယ်။

Covid-19 ကူးစက်မှု၊ ကိုယ်ခံစွမ်းအား၊ ရောဂါလက္ခဏာ စတာတွေနဲ့ပတ်သက်ပြီး ပညာရှင်တွေ မဖြေရှင်းနိုင်တဲ့ ပြဿနာ အမြောက်အများ ရှိနေပြီး ဒါဟာ ကာကွယ်ဆေးထုတ်လုပ်မှု၊ ရောဂါတိုက်ဖျက်ရေး ရေရှည်အစီအမံတွေပေါ်မှာ သက်ရောက်မှု ရှိမှာဖြစ်ပါတယ်။

ကိုဗစ်ကိစ္စနှင့်ဆက်စပ်၍ ပြင်သစ်ဝန်ကြီးများ၏အိမ်ကို ရဲတပ်ဖွဲ့က ဝင်ရှာ

နိုင်ငံအတွင်း ကိုဗစ်တိုက်ဖျက်ရေးလုပ်ငန်း ကိုင်တွယ်မှုနဲ့ပတ်သက်ပြီး ပြည်သူက ဝေဖန်တဲ့အတွက် ပြင်သစ်အစိုးရ ထိပ်တန်းပုဂ္ဂိုလ်တွရဲ့နေအိမ်ကို ရဲတွေက ဒီနေ့မှာ ဝင်ရောက်စီးနင်း ရှာဖွေခဲ့ပါတယ်။

ဆေးပစ္စည်းတွေ ပြတ်လပ်မှု၊ တုန့်ပြန်မှု နှေးကွေးတာတွေကြောင့် ပြင်သစ်အစိုးရဟာ ဝေဖန်ခံနေရပြီး တရားရေးက အခုနှစ်အစောပိုင်းကစတင်ကာ စုံစမ်းစစ်ဆေးမှု လုပ်ခဲ့ပါတယ်။

နေအိမ် စီးနင်းရှာဖွေခံရတဲ့ အစိုးရထိပ်တန်း အရာရှိတွေထဲမှာ ကျန်းမာရေးဝန်ကြီး အိုလီဗာ ဗီရန်၊ ညွှန်ချုပ် ဂျယ်ရိုမီ ဆိုလာမွန်တို့လည်း ပါဝင်ပါတယ်။ လက်ရှိဝန်ကြီးချုပ် ဂျီယန် ကက်စ်တက်နဲ့ အရင်ဝန်ကြီးချုပ်ဟောင်းတွေလည်း ဒီကိစ္စမှာ စုံစမ်းစစ်ဆေးခံနေရပါတယ်။

အမေရိကန်ဆေးကုမ္ပဏီက ကိုဗစ်ကာကွယ်ဆေး စမ်းသပ်မှုကို ရပ်ဆိုင်း

အစမ်းသပ်ခံ စေတနာ့ဝန်ထမ်းတစ်ဦး ရုတ်တရက် နေမကောင်းဖြစ်လာတဲ့အတွက် ကိုဗစ်ကာကွယ်ဆေး စမ်းသပ်မှုကို ရပ်ဆိုင်းလိုက်တယ်လို့ အမေရိကန် ဆေးကုမ္ပဏီ Johnson & Johnson က ပြောကြားလိုက်ပါတယ်။

အခုရပ်ဆိုင်းလိုက်တဲ့ဆေးဟာ အလားအလာကောင်းတယ်လို့ သတ်မှတ်ခံထားရပြီး အမေရိကန်၊ တောင်အမေရိကနဲ့ တောင်အာဖရိက လူသောင်းချီပါဝင်တဲ့ စမ်းသပ်မှု တတိယအဆင့်ကို ရောက်ရှိနေတာဖြစ်ပါတယ်။

ကိုဗစ်ကာကွယ်ဆေးအတွက် အလားအလာကောင်းတယ်လို့ သတ်မှတ်ခံထားရတဲ့ အောက်စဖို့ဒ်တက္ကသိုလ်ထုတ် ဆေးတစ်ခုကို ဩဂုတ်လမှာ စမ်းသပ်မှု ခေတ္တရပ်ဆိုင်းခဲ့ရပြီး နောက်ပိုင်းမှာ ပြန်လည်စမ်းသပ်ခဲ့ပါတယ်။

လက်ရှိ ကမ္ဘာတစ်ဝှမ်း ကိုဗစ်ကုနိုင်ဖွယ်ရှိတဲ့ ကာကွယ်ဆေး ၁၈၀ လောက်ကို စမ်းသပ်နေပမယ့် တစ်ခုမှ အဆင့် ၃ ဆင့်ရှိတဲ့ စမ်းသပ်မှုလုပ်ငန်းစဉ်ကို အောင်မြင်စွာ မကျော်ဖြတ်နိုင်သေးပါဘူး။

Ref: BBC

mmHelthNews

October 15, 2020
ပိုက်ဆံတွင် ၂၈ ရက်အထိ ကိုဗစ်ပိုးရှင်သန်နိုင်ကြောင်း သုတေသနတစ်ခုတွင် တွေ့ရှိ

အောက်တိုဘာ ၁၂၊ ၂၀၂၀
M-Media

-Covid-19 ဗိုင်းရပ်စ်ဟာ ပိုက်ဆံနဲ့ ဖုန်းတို့လို မျက်နှာပြင်ပေါ်မှာ ၂၈ ရက်အထိ ရှင်သန်နိုင်တယ်လို့ ဩစတေးလျ သုတေသနအဖွဲ့က ပြောကြားလိုက်ပြီး ဒါဟာ အရင်ကသိထားတဲ့ ရှင်သန်နိုင်ချိန်ထက် ပိုမိုများပြားနေတာ ဖြစ်ပါတယ်။

ကိုရိုနာဗိုင်းရပ်စ်ဟာ ချောင်းဆိုတာ၊ နှာချေတာ၊ စကားပြောဆိုတာတွေက ထွက်လာတဲ့ အရည်စက်၊ အမှုန်စက်လေးတွေကို ထိတွေ့ရာကနေ ကူးစက်နိုင်ပြီး၊ လေထဲကနေတစ်ဆင့်ပါ ကူးစက်နိုင်တယ်ဆိုတဲ့ အထောက်အထားတစ်ချို့လည်း ရှိပါတယ်။

အရင်ကလေ့လာမှုအရ ကိုဗစ်ပိုးဟာ မှန်၊ ငွေစက္ကူ၊ ပလက်စတစ်နဲ့ စတီးမျက်နှာပြင်ပေါ်မှာ ၂ ရက်နေ ၃ ရက်အထိသာ ရှင်သန်နိုင်တယ်လို့ သိထားတာပါ။

ဩစတေးလျသုတေသနအေဂျင်စီ CSRIO က အခန်းအပူချိန်နဲ့ အမှောင်ထဲမှာ ထပ်မံလေ့လာခဲ့ရာမှာ ကိုဗစ်ပိုးဟာ ပြောင်ချောတဲ့ မျက်နှာပြင်တွေပေါ်မှာ ၂၈ ရက်အထိ ရှင်သန်နိုင်တယ်ဆိုတာကို တွေ့ခဲ့ရပါတယ်။ သာမန်တုပ်ကွေးပိုးကတော့ ၁၇ ရက်အထိသာ အသက်ရှင်နိုင်ပါတယ်။

ပူပြင်းတဲ့အခြေအနေအောက်မှာ ပိုးမြန်မြန်သေတတ်ပြီး ပိတ်စလို မျက်နှာပြင်မျိုးမှာတော့ ၁၄ ရက်ထပ်ကျော်ရင် ကူးစက်နိုင်ခြေ မရှိဘူးဆိုလို့လည်း သုတေသနပညာရှင်တွေက ဆိုပါတယ်။

CSRIO ရဲ့ အခုထုတ်ပြန်ချက်ကို ဆေးပညာရှင်တစ်ချို့က ဝေဖန်နေကြပါတယ်။

အင်္ဂလန်နိုင်ငံ ကာဒစ်ဖ်တက္ကသိုလ်က ပရော်ဖက်ဆာ ရွန်အက္ကလက်စ်က ဒီထုတ်ပြန်ချက်ဟာ လူထုကြားထဲမှာ ထိတ်လန့်မှုကိုသာ ဖြစ်ပေါ်စေပြီး၊ ခန္ဓာကိုယ်ကထွက်တဲ့ အရည်စက်တွေမှာ ပါလာတဲ့ ဗိုင်းရပ်စ်ဟာ ပြင်ပမှာ နာရီပိုင်းလောက်သာ ရှင်သန်နိုင်တယ်လို့ မိမိယူဆကြောင်း ပြောကြားခဲ့ပါတယ်။

စတီးမျက်နှာပြင်ပေါ်မှာ ကိုဗစ်ဗိုင်းရပ်စ် အချိန်တော်တော်ကြာ ရှင်သန်နိုင်တယ်ဆိုတဲ့ တွေ့ရှိချက်ဟာ အသားထုတ်စက်ရုံတွေက ထောင်နဲ့ချီတဲ့ အလုပ်သမားတွေ ကိုဗစ်ကူးစက်မှု အကြောင်းအရင်းကို ဖြေရှင်းနိုင်လိမ့်မယ်လို့ CSRIO ရဲ့ သိပ္ပံပညာရှင်တွေက ပြောကြားခဲ့ပါတယ်။

Ref: BBC

October 12, 2020
၂၀၂၀ ခုနှစ် ဆေးဘက်ဆိုင်ရာ နိုဘယ်ဆုကို အသည်းကင်ဆာပိုး ဖော်ထုတ်နိုင်သူများ ဆွတ်ခူး

အောက်တိုဘာ ၆၊ ၂၀၂၀
M-Media

ဆေးဘက်ဆို်င်ရာနိုဘယ်ဆုရရှိခဲ့သည့် ပညာရှင် ၃ ဦး

-၂၀၂၀ ခုနှစ်အတွက် ဆေးဘက်ဆိုင်ရာ နိုဘယ်ဆုကို Hepatitis C ဗိုင်းရပ်စ်ကို ဖော်ထုတ်နိုင်ခဲ့တဲ့ ဆရာ၀န် ၃ ဦးက ရရှိသွားပါတယ်။

Hepatitis C ဗိုင်းရပ်စ်ဟာ အသည်းကြွပ်ရောဂါနဲ့ အသင်းကင်ဆာရောဂါတို့ကို ဖြစ်ပွားစေတဲ့ပိုးဖြစ်ပြီး အမေရိကန် သိပ္ပံပညာရှင်တွေဖြစ်တဲ့ ဟာဗေး ဂျေ အလ်တာနဲ့ မိုက်ကယ် ဟူတန်၊ ဗြိတိန် သိပ္ပံပညာရှင်ဖြစ်တဲ့ ချားလ်စ် အမ် ရိုက်စ်တို့က ရှာဖွေ ဖော်ထုတ်နိုင်ခဲ့တာပါ။

အရင်က Hepatitis A နဲ့ Hepatitis B ဗိုင်းရပ်စ်တွေကို တွေ့ရှိခဲ့တာဟာ ဆေးပညာမှာ အရေးပါတဲ့ တိုးတက်မှုတစ်ခုဖြစ်ခဲ့ပြီး Hepatitis C ကို တွေ့ရှိမှုကြောင့် အသည်းရောဂါနဲ့ပတ်သက်တဲ့ ကျန်ရှိနေတဲ့ ပဟေဠိကို ဖော်ထုတ်နိုင်ခဲ့ကာ ရောဂါစစ်ဆေးမှု၊ ကုသမှု နည်းလမ်းအသစ်တွေ ပေါ်လာပြီး ကမ္ဘာတစ်၀ှမ်းက သန်းပေါင်းများစွာသောလူတွေရဲ့ အသက်ကို ကယ်တင်နိုင်ခဲ့တယ်လို့ နိုဘယ်ဆုချီးမြှင့်ရေးကော်မတီက ထုတ်ပြန်တဲ့ကြေငြာချက်မှာ ဖော်ပြထားပါတယ်။

“သမိုင်းမှာ ပထမဆုံးအဖြစ် ဒီရောဂါကို ကုသနိုင်လာပြီး Hepatitis C ဗိုင်းရပ်စ်ကို ကမ္ဘာပေါ်ကနေ ပပျောက်အောင် လုပ်နိုင်လိမ့်မယ်ဆိုတဲ့ မျှော်လင့်ချက်တွေလည်း မြင့်တက်လာပါတယ်”

နိုဘယ်ဆုကို တည်ထောင်ခဲ့သူ ဆွီဒင်သိပ္ပံပညာရှင် အဲလ်ဖရဒ် နိုဘယ် ကွယ်လွန်တဲ့ ဒီဇင်ဘာ ၁၀ ရက်နေ့မှာ ဆုချီးမြှင့်ပွဲအခမ်းနားကို ပုံမှန် ကျင်းပလေ့ရှိပေမယ့် ဒီနှစ်မှာတော့ ကိုရိုနာကပ်ရောဂါကြောင့် ကျင်းပနိုင်ခြင်း မရှိပါဘူး။

သိပ္ပံပညာရှင် ၃ ဦးဟာ ဆုကြေး ဆွီဒင်ခရောင်း ၁၀ သန်း (ဒေါ်လာ ၁.၁ သန်း) ရရှိမှာ ဖြစ်ပါတယ်။

ပြီးခဲ့တဲ့နှစ် ဆေးဘက်ဆိုင်ရာ နိုဘယ်ဆုကို လူ့ခန္ဓာကိုယ်က ဆဲလ်တွေရဲ့ တုန့်ပြန်မှုအကြောင်း ဖော်ထုတ်ခဲ့သူ သိပ္ပံပညာရှင်တွေက ရရှိခဲ့ပါတယ်။

ရူပဗေဒ၊ ဓာတုဗေဒ၊ စာပေနဲ့ ငြိမ်းချမ်းရေး နိုဘယ်ဆုတွေကို အခုတစ်ပတ်အတွင်း ထုတ်ပြန်ကြေငြာသွားမှာ ဖြစ်ပါတယ်။

Ref: Aljazeera

October 6, 2020
ကမ္ဘာပေါ်တွင် လူ သန်း ၇၀၀ ကျော် ကိုဗစ်ကူးစက်ခံထားရသည်ဟု WHO သုံးသပ်

အောက်တိုဘာ ၆၊ ၂၀၂၀
M-Media

-သန်းပေါင်း ၇၈၀၀ လောက်ရှိတဲ့ ကမ္ဘာ့လူဦးရေရဲ့ ၁၀ ရာခိုင်နှုန်းဟာ Covid-19 ရောဂါ ကူးစက်ခံထားရနိုင်တယ်လို့ လေ့လာမှုမှာ တွေ့ရှိခဲ့ကြောင်း ကမ္ဘာ့ကျန်းမာရေးအဖွဲ့ WHO က မနေ့မှာ ပြောကြားလိုက်ပါတယ်။

လက်ရှိ မှတ်တမ်းတွေအရ ကမ္ဘာတစ်၀ှမ်း လူပေါင်း ၃၅.၂ သန်း ရောဂါကူးစက်ခံခဲ့ရပြီး သေဆုံးသူကတော့ ၁ သန်းကျော် ရှိလာပါတယ်။

WHO ရဲ့ မနေ့ကအစည်းအဝေးမှာ အဖွဲ့ရဲ့ အရေးပေါ် ဆိုင်ရာ အကြီးအကဲ မိုက် ရိုင်ယန်က ဥရောပ၊ အရှေ့တောင်အာရှ၊ အာဖရိကနဲ့ ပစိဖိတ်အနောက်ခြမ်းတို့မှာ ကူးစက်မှု၊ သေဆုံးမှု များလာတာတွေကို ထောက်ပြခဲ့ပြီး ကိုဗစ်ဟာ ကမ္ဘာ့လူသားထုအတွက် အန္တရာယ်ရှိနေတုန်းပဲလို့ သတိပေးခဲ့ပါတယ်။

“ကျွန်တော်တို့ရဲ့ လက်ရှိ တွက်ချက်မှုအရဆိုရင် ကမ္ဘာ့လူဦးရေရဲ့ ၁၀ ရာခိုင်နှုန်းလောက် ဒီဗိုင်းရပ်စ်ကူးထားတယ်ဆိုတာ တွေ့ခဲ့ရပါတယ်”

ကူးစက်မှုဟာ ထပ်မံမြင့်တက်လာဖို့ရှိနေပေမယ့် ကမ္ဘာကြီးမှာ ဒီကူးစက်မှုကို နှိမ်နှင်းမယ့် နည်လမ်းတွေရှိနေကြောင်း၊ အားလုံးပူးပေါင်းပြီး ဒီနည်းလမ်းတွေကို ဘယ်လို မြှင့်တင်အသုံးပြုနိုင်မလဲဆိုတာနဲ့ တစ်ခြားသူတွေကို ဘယ်လိုမျှ၀ေရမလဲဆိုတဲ့အပေါ်မှာ မူတည်ကြောင်း ရိုင်ယန်က ထည့်သွင်းပြောဆိုခဲ့ပါတယ်။

မနေ့က WHO အစည်းအဝေးမှာ ကိုဗစ်နဲ့ပတ်သက်တဲ့ အချက်အလက်တွေ မျှ၀ေခြင်းမပြုတဲ့ တရုတ်ရဲ့လုပ်ရပ်ကို အမေရိကန်က ၀ေဖန်ခဲ့ပြီး တရုတ်ကတော့ မိမိတို့ဟာ ကမ္ဘာကြီးနဲ့ ပွင့်လင်းမြင်သာမှုရှိစွာ ပူးပေါင်းဆောင်ရွက်ခဲ့တယ်လို့ ပြောကြားခဲ့ပါတယ်။

Ref : Aljazeera

October 6, 2020