Thant Sin Phyoe
Myanmar ON the World Map
ကချင်ပြည်နယ်က စစ်ပွဲ ၁နှစ်ကျော်ကြာနေတာကို ကြည့်ရင်း ကျနော့စိတ်ထဲ အတွေးတစ်ခုဝင်လာတယ်။ ရခိုင်မြောက်ပိုင်းက ပဋိပက္ခပြီးသွားပြီဆိုပေမဲ့ ဒုက္ခသည်တွေပြန်လည်နေရာချထားရေးအပါအဝင် လူမျိုးရေး/နိုင်ငံသားအရေးတွေလည်း ဖြေရှင်းရတော့မယ်။ ဒီအချိန်မှာ အစိုးရထိပ်တန်းပိုင်းက စကားကို ခုတမျိုးတော်ကြာတစ်မျိုးတွေပြောနေတော့ မြန်မာမုစ်လင်မ်တစ်ယောက်အနေနဲ့ စိုးရိမ်စရာအရိပ်အယောင်တွေတွေ့လာရတယ်။
ကချင်ပြည်နယ်မှာဆင်နွှဲနေတဲ့ ပြည်တွင်းစစ်ဆိုရင်လည်း တော်ကြာနေသမ္မတက ရပ်တန့်ခိုင်းလိုက်ပြီလို့သတင်းထွက်လိုက်၊ ပြီးတော့သိပ်မကြာဘူးစစ်တပ်ကထိုးစစ်ဆင်လိုက်၊ အဲ့ဒီနောက်တော့ ငြိမ်းချမ်းရေးဆွေးနွေးပွဲဆိုပြီးလုပ်လိုက်၊ သိပ်မကြာဘူး KIA နဲ့စစ်တပ်နဲ့တိုက်ပွဲပြန်ဖြစ်လိုက်၊ လူတွေလည်းထွက်ပြေးလိုက်၊ ငြိမ်းချမ်းရေးလည်း ဆွေးနွေးလိုက်၊ သဘောတူညီမှုရသလိုလိုဖြစ်လာလိုက်၊ အရပ်သားတွေဖမ်းတဲ့အဆင့်တွေရောက်သွားလိုက်၊ ဒုက္ခသည်တွေကိုပါ ဖမ်းပြီးစစ်ဆေးမှုတွေဖြစ်လာလိုက်၊ အစိုးရဘက်က စေ့စပ်ဆွေးနွေးရေးလုပ်မယ်ဆိုပြီးအသံထွက်လာလိုက်၊ ငြိမ်းချမ်းရေးဖော်ဆောင်ရေးအဖွဲ့ဖွဲ့လိုက်၊ စစ်တပ်က သွားတိုက်လိုက်၊ အဲ့ဒီလိုနဲ့ စစ်ပွဲလည်း၁နှစ်ကျော်သွားပြီ။ ကချင်လူထုလည်း ဒုက္ခရောက်လိုက်တာမှသောက်သောက်လဲ။
အတိုက်အခံဘက်က ဒေါ်အောင်ဆန်းစုကြည်လည်း ကချင်ပြည်နယ်တစ်ခါသွားပြီးပြီ၊ လွှတ်တော်ပြင်ပ Free activist တွေဖြစ်တဲ့ ၈၈မျိုးဆက်တွေလည်း ကချင်ပြည်နယ်ကိုသွားပြီးပြီ၊ UN ကလည်းဝင်ပြီးပြီ၊ အထောက်အပံ့တွေလည်း ပေးပို့ခွင့်ရနေတုန်း၊ လှူတဲ့လူတွေကလည်း သောင်းသောင်းဖျဖျလှူနေတုန်း၊ တိုက်ပွဲတွေကလည်းဖြစ်နေတုန်း၊ ရပ်တန့်မဲ့အရိပ်အယောင်လည်း ပျောက်ကွယ်နေတုန်း၊ သဘောတူညီမှုတစ်စုံတစ်ရာရဖို့လည်း လမ်းမမြင်ကမ်းမမြင်ဖြစ်နေတုန်း၊ အစိုးရဘက်က ဒီစစ်ပွဲနဲ့ပတ်သက်လို့ ပွင့်ပွင့်လင်းလင်းမှန်မှန်ကန်ကန်ချပြနိုင်တာတစ်ခုမှ မရှိတဲ့အနေအထားနဲ့ဇာတ်မြောနေတုန်းပါပဲ။ နိုင်ငံတကာကလည်း အော်လှပြီ၊ အစိုးရကလည်း လိုက်လျှောမလိုလိုလုပ်ပေါင်းများပြီ။ တကယ့်လက်တွေ့ကတော့ ဘာမှထူးမခြားနားပေါ့။ နောက်ဆုံးမှာတော့ ၁နှစ်ကျော်ကာလအတွင်းမှာ သတင်းဌာနတွေကို သတင်းမပြတ်ပေးနိုင်တဲ့ ပင်ရင်းကြီးတစ်ခုဖြစ်နေတုန်းပဲ။
ရခိုင်မြောက်ပိုင်းက လူမျိုးရေးပဋိပက္ခဆိုရင်လည်း အစိုးရက အခုအထိ ဗလောင်းဗလဲအသံတွေထွက်နေတုန်းပဲ။ တချို့က UNHCR ကိုသမ္မတပြောလိုက်တဲ့ စကားကိုအပိုင်ကိုင်မယ်လို့ယူဆနေတုန်း။ ဒါပေမဲ့ ဘယ်မှာလဲ အစိုးရရဲ့အကောင်အထည်ဖော်မှု? ဒီ stateless ဖြစ်နေတဲ့ လူတွေကို မြန်မာနိုင်ငံအနေနဲ့ ဖြေကိုဖြေရှင်းရတော့မယ်။ ခေတ်အဆက်ဆက်က အစိုးရတိုင်းရဲ့ ဘာလုပ်လို့ဘာကိုင်သွားမှန်းမသိတဲ့ အနေအထားကို ကျနော်တို့ မဖြေရှင်းရင်ဘာဖြစ်မှာလဲ။ ဘင်္ဂလားဒေ့ရ်ှကလည်း သူ့နိုင်ငံမဟုတ်ဘူးအော်တယ် မြန်မာကလည်း ငါ့နိုင်ငံသားမဟုတ်ပါအော်ဆဲ။ တချို့ကလည်း Shoot on sight ဆိုတဲ့ အိန္ဒိယရဲ့ လုပ်နည်းလုပ်ဟန်ကိုအတုယူဖို့ပြောနေတုန်း။ မြန်မာအစိုးရရဲ့ အသံတွေကိုနားထောင်လိုက်ပြန်တော့လည်း ဘင်္ဂလားဒေ့ရ်ှမှာ လက်ခံမယ်လို့ပြောတယ်ဆိုပြီး အသံကြားရတယ်။ တချို့က မြန်မာအစိုးရအနေနဲ့ လက်ခံမဲ့အပိုင်းကို သေသေချာချာ မထုတ်ပြန်သေးတဲ့အချက်အပေါ်မှာ အသေကိုင်ဆွဲထားတုန်းပေါ့။ နောက်ပြီး UNHCR နဲ့တွေ့တော့ ခဏထိန်းသိမ်းပေးပြီး Third Country ကိုပို့ပေးမယ်လို့ ကမ်းလှမ်းတယ်လို့ အစိုးရကြေငြာတယ်။
ဒီနေရာမှာ ပြည်ပခိုးဝင်လာသူဆိုတာနဲ့ အစိုးရဘက်က ဂယ်ပေါက်လေးဖောက်ထားတယ်။ ရိုဟင်ဂျာမြန်မာတိုင်းရင်းသားမဟုတ်ဘူး မရှိဘူးအော်နေတဲ့ လဝကဝန်ကြီးကတော့ ကွင်တာနားရှေ့မှာ မြန်မာနိုင်ငံသား ဘင်္ဂါလီနဲ့ရခိုင်ညီအစ်ကိုတွေရန်ဖြစ်တာလို့ ပြောပြန်ရော။ ရိုဟင်ဂျာမရှိဘူးတွင်တွင်အော်ပြီး ဘင်္ဂါလီဆိုတဲ့အမည်နဲ့လက်ခံမဲ့ပုံစံဖြစ်နေတယ်။ ကွင်တာနားကိုရှင်းလင်းပြသတဲ့ သတင်းစာရှင်းလင်းပွဲမှာ အဓိကရုဏ်းနဲ့ပတ်သက်ပြီး ထုတ်ဖော်ပြောဆိုလာတဲ့ ကိန်းဂဏန်းတွေက ကျနော်တို့ရဲ့အသိနဲ့လွဲသွားတယ်။ ပြည်တွင်းမီဒီယာတွေအနေနဲ့ တစ်လျှောက်လုံး ရခိုင်တိုင်းရင်းသားများသာ အကြမ်းဖက်ခံရတယ်လို့ ပြောကြားပြီး အစိုးရအနေနဲ့တိတိပပမရှင်းလင်းခဲ့ချိန်မှာ အနောက်ပြည်ပမီဒီယာတွေက ဒေသခံမုစ်လင်မ်တွေသာခံရတယ်ဆိုပြီးထုတ်ပြန်နေတယ်။
ကွင်တာနားရှေ့မှာထုတ်ပြလာတဲ့ စာရင်းဇယားတွေအရ ၂ဖက်စလုံးဟာ တစ်ဖက်ဆီမှန်နေကြတယ်။ အရေအတွက်အရ လူများစုဖြစ်တဲ့ မုစ်လင်မ်တွေအများစု ဒုက္ခသည်တွေဖြစ်နေကြတယ်။ အထူးသဖြင့် စစ်တွေမှာ ပြည်တွင်းမီဒီယာတွေအနေနဲ့ ရခိုင်တိုင်းရင်းသားများသာ အကြမ်းဖက်တိုက်ခိုက်ခံနေရကြောင်း သတင်းဓာတ်ပုံတွေဝေဝေဆာဆာပေါ်ထွက်ဖော်ပြခဲ့ပေမဲ့ စစ်တွေမှာ ဒုက္ခသည်အရေအတွက်ရော ဖျက်ဆီးခံရတဲ့ ပိုင်ဆိုင်မှု အရေအတွက်ရော မုစ်လင်မ်တွေဘက်က သိသိသာသာများနေပြန်တယ်။ မောင်းတော ဘူးသီးတောင်ဘက်မှာတော့ ဒုက္ခသည်အရေအတွက်နဲ့ ဖျက်ဆီးခံရတဲ့ပိုင်ဆိုင်မှုအရေတွက်မှာ မုစ်လင်မ်နဲ့ ရခိုင်တွေ အတူတူနီးပါးဖြစ်နေတယ်။ နောက်ဆုံးစာရင်းချုပ်လိုက်တော့ မုစ်လင်မ်ဘက်က တိုက်ခိုက်ခံရမှုပိုများတယ်လို့ ကွင်တာနားကို အစိုးရက ထုတ်ဖော်ပြောဆိုလိုက်တာပဲ။ ဒီတော့ အစိုးရမှန်သလား ပြည်တွင်းမီဒီယာတွေမှန်သလား။ ရခိုင်အရေးအခင်းဖြစ်ကတည်းက တောက်လျှောက်မှာ ပြည်တွင်းမီဒီယာတွေအနေနဲ့ ဓာတ်ပုံသတင်းထောက်တွေလွှတ်ပြီး သတင်းယူခဲ့ကြပေမဲ့ ဒီလောက်အနေအထားလို့ ခန့်မှန်းခြေမဖော်ပြခဲ့ကြပြန်ဘူး။
မြန်မာအစိုးရအနေနဲ့ သမ္မတပြောတဲ့အတိုင်းလုပ်လို့မရဘူးလား ဘာပြဿနာရှိလဲဆိုတာကို ကျနော်စဉ်းစားကြည့်မိပါတယ်။ ခိုးဝင်လာတဲ့လူတွေပါလို့ မြန်မာပြည်ဘက်က ဘယ်လိုအချက်အလက်တွေနဲ့သတ်မှတ်မှာလဲ။ ဒီနေရာမှာစဉ်းစားရမှာက ဘင်္ဂလားဒေ့ရ်ှကလည်း မြန်မာဘက်ကပြေးလာသူတွေပါဆိုပြီး တင်ပြထားတဲ့လူစာရင်းရှိနေပြန်တယ်။ စစ်အစိုးရခေတ်ကလိုမျိုး အာဏာရှင်ခေတ်ကလိုမျိုး လှေထဲထည့်ပြီး ရေထဲမျှောလိုက်ဖို့ဆိုတာ ဒီမိုကရေစီအစိုးရအနေနဲ့ လုပ်ဖို့မဖြစ်နိုင်ဘူး။ နဂါးမင်းလို စစ်ဆင်ရေးတွေဆင်နွှဲပြီး မောင်းထုတ်မယ်ဆိုရင် ကိုယ့်တိုင်းပြည်မျက်နှာကို ကိုယ်ပြန်ပြီး အိုးမဲသုတ်သလိုမျိုးဖြစ်ရပြန်ဦးမယ်။
လက်ရှိအနေအထားက နောက်ကြောင်းပြန်မလှည့်ဘူးဆိုထားလေတော့ နိုင်ငံတကာမှာ မျက်နှာမပျက်ဖို့က အရေးကိစ္စတစ်ခုဖြစ်နေရပြန်တယ်။ International Relation ဆိုတာ သင်ဖူးတဲ့လူတွေပိုသိပါတယ်။ ဥပမာ ၈၈ခေါင်းဆောင် ဦးကိုကိုကြီးတို့လိုပေါ့။ ကိုယ့် Emotional နဲ့ ကိုယ့်စိတ်တိုင်းကျလုပ်လို့မရဘူးလေ။ တိုင်းပြည်ကိုတိုးတက်ချင်တာကိုး။ အရင်ကလိုမျိုး ကျန်တဲ့နိုင်ငံတွေဘယ်လိုပိတ်ပိတ် တရုတ်နဲ့အဆင်ပြေပြေ ဆွေမျိုးပေါက်ဖော်ဆက်ဆံရေးလုပ်ပြီး အစစအရာရာတရုတ်ပြည်ကြီးမှီခိုပြီးနေလာတာ တိုင်းပြည်လည်း ချွတ်ခြုံကျနေပြီဆိုတော့ IR ကအရေးပါလာပြီကိုး။ တကယ်တော့ အရင်အစိုးရအဆက်ဆက်က ပြဿနာကို ကျေကျေလည်လည်မဖြေရှင်းတဲ့အကျိုးဆက်ရယ် ဝန်ထမ်းတွေခြစားခဲ့တဲ့အကျိုးဆက်ရယ်ပေါ့။ ဖြစ်သမျှအကြောင်း ခေါင်ကိုရှာတော့ အစိုးရပဲ။ တိုင်းပြည်အုပ်ချုပ်သူအစိုးရအနေနဲ့ စစ်မှန်တဲ့ နည်းလမ်းကိုရွေးနိုင်မှတော်ရာကျတော့မယ်လေ။ ခုစာကလေးကြော် ခုဆီထမင်းပြောပြောပြီး တကယ်တမ်းလက်တွေ့မဖြေရှင်းပဲနေလို့မရတော့ဘူး။
လူတွေမမြင်ရတဲ့အကျိုးဆက်အနေနဲ့ တိုင်းပြည်ပဲ နာမည်ပျက်ပြီး ထိခိုက်နစ်နာနေမှာ။ ဒီတော့ အစိုးရအနေနဲ့ ဘာလုပ်မှာလဲ သေသေချာချာ ပွင့်လင်းသင့်ပြီလို့ထင်တယ်။ မြန်မာနိုင်ငံမှာ နိုင်ငံသား အသိအမှတ်ပြုစိစစ်ရေးကဒ်ပြားဆိုရင် ကတ်ထူစက္ကူနဲ့ထုတ်ပေးထားတယ်။ အထူးသဖြင့် မြန်မာနိုင်ငံအနေနဲ့ လဝကစနစ်မှာ ကွန်ပြူတာဘေ့စ် fully မဖြစ်သေးဘူး။ အစိုးရအနေနဲ့ ဘယ်လိုပုံစံနဲ့လူတွေကို နိုင်ငံသားခွင့်ပြုမယ်ဆိုတာမျိုး ထုတ်ပြောပေမဲ့ တကယ်တမ်းလုပ်ဆောင်မှုက သုည။ ဒါ့အပြင် အထောက်အထားဆိုတာ အခုနကပြောသလို နိုင်ကဒ်တောင်ကတ်ထူစက္ကူဆိုတော့ အဲ့ဒီအထောက်အထားတွေကရော မပျက်ဆီးနိုင်တာတွေမှ မဟုတ်တာကိုး။ ပြောရရင် တစ်ဖက်ကထောက်ကွက်တွေအများကြီးရယ်။ အစိုးရအနေနဲ့ UN နဲ့သက်ဆိုင်ရာအဖွဲ့အစည်းတွေရှေ့မှာ Working Smart ဖြစ်ဖို့တကယ်လိုသလို လုပ်ကိုင်ဆောင်ရွက်ရာမှာလည်း မှန်မှန်ကန်ကန်လုပ်ဖို့လိုတယ်။
မြန်မာမုစ်လင်မ်တစ်ယောက်အနေနဲ့ ရခိုင်မြောက်ပိုင်း လူမျိုးရေးမှာလုံးဝဝင်မရေးခဲ့ဘူး။ အခုတော့ ဝင်ရေးရတာလည်းအကြောင်းရှိတယ်။ လက်ရှိဖြစ်ပွါးနေတဲ့ အခြေအနေတွေရဲ့ effect ကို မြန်မာမုစ်လင်မ်တွေရှောင်လွှဲလို့မရအောင် ဆွဲထည့်နေကြပြီ။ ဒီအနေအထားမှာ အစိုးရအနေနဲ့ ဘယ်လိုလုပ်သင့်တယ်ဆိုတာကိုပဲပြောချင်တယ်။ တကယ်ဆိုရင် ဘင်္ဂလားဒေ့ရ်ှအစိုးရ မြန်မာအစိုးရ UNHCR လိုမျိုး သုံးပွင့်ဆိုင်ဆွေးနွေးပွဲတစ်ခုလိုကိုလိုအပ်တယ်။ ဒီကိစ္စဖြစ်ပြီးမှ ဘင်္ဂလားဒေ့ရ်ှနဲ့တစ်ကြိမ် UNHCR နဲ့တစ်ကြိမ်အစိုးရဘက်ကတွေ့ဆုံပြီးပြီ ဆိုပေမဲ့ တိကျတဲ့အဖြေတစ်ခုအတွက် ဒီသုံးဖွဲ့အကြေအလည်ဆွေးနွေးသင့်တယ်။ ဘာ့ကြောင့် ဒီလိုပြောသလဲဆိုတော့ ဘင်္ဂလားဒေ့ရ်ှက သူ့ဘက်မှာ ဒုက္ခသည်စခန်းဖွင့်ပြီးလက်ခံထားတဲ့လူတွေကို မြန်မာပြည်ထဲ ပြန်ပို့ချင်နေတယ်။ မြန်မာကလည်း မိမိဘက်မှာအထောက်အထားမပြည့်စုံသူတွေစိစစ်ပြီး ဘင်္ဂလားဒေ့ရ်ှကိုပြန်မောင်းထုတ်ချင်နေတယ်။ UNHCR က ဒီ stateless people တွေကို လူ့အခွင့်အရေးနဲ့အညီ State တစ်ခုခုဖြစ်စေချင်နေတယ်။ ဒီတော့ နည်းမှန်လမ်းမှန်နဲ့ ၃ဖွဲ့စလုံးမျက်နှာချင်းဆိုင်ဆွေးနွေးဖို့ လိုအပ်တယ်။ ဒါမှသာ မြန်မာအစိုးရအနေနဲ့လည်း နည်းမှန်လမ်းမှန်နဲ့ ချဉ်းကပ်ဆွေးနွေးအဖြေရှာတယ်ဆိုပြီး နိုင်ငံတကာမျက်နှာစာမှာ လက်မထောင်နိုင်မယ်။ ဒီအဖြစ်အပျက်မှာကြည့်ရင် နိုင်ငံတကာက မြန်မာကိုပဲဖိအားပေးပြီး ဘင်္ဂလားဒေ့ရ်ှကို ဖိအားမပေးတာကိုက မြန်မာအစိုးရအနေနဲ့ နိုင်ငံတကာနဲ့ဆက်ဆံဆွေးနွေး အဖြေရှာဖို့ လိုအပ်နေတယ်ဆိုတာ ဖော်ပြတယ်။
ကျနော်ပြောချင်တာကတော့ အစိုးရအနေနဲ့ အားလုံးကိုဘူးခံပြီးငြင်းနေလို့လည်းအလုပ်မဖြစ်သလို ဖြစ်သမျှအကြောင်း ခေါင်းခံဖြေရှင်းပေးဖို့ဆိုတာလည်းမဖြစ်နိုင်ဘူး။ ဒီတော့ အဆိုပါလူတွေအတွက် နိုင်ငံတကာမှာ မျက်နှာကောင်းကောင်းနဲ့ ဖြေရှင်းသူအစိုးရဖြစ်ဖို့လိုအပ်တယ်လို့ယူဆတယ်။ ဒီလိုမလုပ်ပဲ ကချင်အရေးမှာလို လက်ရှိ ရိုဟင်ဂျာအရေးမှာ အစိုးရဘက်က အသံထွက်ပြသလို ခုတမျိုးတော်ကြာတမျိုးအသံမျိုးစုံထွက်ပြတာကလွဲလို့ ဘာမှမယ်မယ်ရရအကောင်အထည်မဖော်ရင် တိုင်းပြည်ပဲနစ်နာလို့ပါ။
အကယ်လို့ အစိုးရအနေနဲ့အပေါ်မှာပြောထားတဲ့ပုံစံမျိုးသာ မိမိဘက်က လက်ခံရမဲ့လူအနေအထားစတာတွေသေချာအောင် လုပ်ပြီးပြီဆိုရင်တော့ ပထမဆုံးကိုင်တွယ်ရမှာ Rule of Law ပဲ။ အရေးအခင်းပြီးကတည်းက အရေးအခင်းနဲ့ဆက်သွယ်ဖမ်းဆီးထားသူတွေကို ထိုက်တန်တဲ့ပြစ်ဒါဏ်ချမှတ်သင့်တယ်။ လူမျိုးဘာသာ တစ်ခုမှမကြည့်ပဲ Rule of Law ကိုတိတိကျကျမှန်မှန်ကန်ကန်နဲ့ကိုင်တွယ်ဖို့လိုတယ်။ ပြောမဲ့သာပြောတာ မြန်မာနိုင်ငံရဲ့ တရားစီရင်ရေးက လူထုယုံကြည်မှုသုညနဲ့ နိုင်ငံတကာလက်ခံမှုဇီးရိုးဖြစ်နေတယ်။ အဓိကရုဏ်းဖြစ်ခါစမှာ ဦးမင်းကိုနိုင်ပြောတာလေးကို မှတ်မိကြမယ်ထင်ပါတယ်။ ဒီအဓိကရုဏ်းရဲ့ မူလအခြေခံအရင်းအမြစ်ကိုက တရားစီရင်မှုအပေါ်လူထုအယုံအကြည်ပျက်ယွင်းမှုပဲ။ အခုအထိတောင် တောင်ကုတ်မှာအကြမ်းဖက်တိုက်ခိုက်သတ်ဖြတ်မှုအတွက် အရေးယူမှု တရားဥပဒေအရစီရင်ဆုံးဖြတ်နိုင်မှုမရှိသေးဘူး။
ဒီတော့ ပြည်တွင်းမှာတည်ငြိမ်ဖို့အတွက်ကတော့ ရခိုင်ဒေသရယ်မှမဟုတ်ပဲ တစ်တိုင်းတစ်ပြည်လုံး တရားစီရင်ရေးမှာ မျှမျှတတနဲ့ ပွင့်ပွင့်လင်းလင်းရှိဖို့ လိုအပ်တယ်။ ဒီအချက်ရဲ့အရေးကြီးမှုက ထိပ်ဆုံးပဲ။ တရားစီရင်ရေးနဲ့ တရားဥပဒေစိုးမိုးရေးအပေါ်မှာ လူထုယုံကြည်မှုကိုတော့ အစိုးရနဲ့လွှတ်တော်ကသေသေချာချာတည်ဆောက်သင့်တယ်။ တရားစီရင်ရေးမဏ္ဍိုင်ကိုလည်း အုပ်ချုပ်ရေးမဏ္ဍိုင်အောက်ကနေ အမြန်ဆုံးထုတ်ပစ်ပြီး သူ့ဘာသာသူ သီးသန့် ရပ်တည်တဲ့ နိုင်ငံ့ ဒေါက်တိုင်ကြီးအဖြစ် သေသေချာချာဆောင်ရွက်ရမယ်။ တရားဥပဒေတွေကိုလည်း ပွင့်လင်းမြင်သာမှုရှိအောင် လွှတ်တော်ဘက်ကဆောင်ရွက်ပေးရမယ်။
ကဲ။ နိုင်ငံတကာစာမျက်နှာကိုကြည့်ပြီးရင် ပြည်တွင်းက ရခိုင်ညီအစ်ကိုတွေကိုလည်းကြည့်ရတော့မယ်။ လောလောဆယ်ကမှ ပြဿနာကြီးကြီးမားမားဖြစ်ထားတဲ့ ရခိုင်တွေအနေနဲ့ ဒီလူတွေကို ဘယ်လိုမျိုးထားကြမှာလဲ။ နေ့လယ်ကပဲ ရခိုင်လူမျိုး မိတ်ဆွေတစ်ဦးပို့တဲ့စာမှာ ရခိုင်လူမျိုးတွေအနေနဲ့ ဘယ်လောက်ပဲ လစ်ဘရယ်ကျတယ်ပြောပြော ပြဿနာဖြစ်နိုင်တဲ့ အနေအထားမှာ မနေလိုဘူးဆိုတာမျိုးဖြစ်နေတာကိုတွေ့မိနေတုန်းပဲ။ ဒါ့အပြင် လူဦးရေတိုးပွါးနှုန်းဆိုတာမျိုးကလည်း သူတို့စိတ်ထဲမှာ ကြီးကြီးမားမားနဲ့ တွေဝေစေတဲ့အချက်ပဲ။ ဒီအချက်က ပိုပြီးကိုင်တွယ်ဖြေရှင်းရခက်တယ်။ တကယ်တော့ ဘာသာရေးဆိုင်ရာမတူညီမှုအပေါ်မှာ အမုန်းပွါးမှုတွေများပြားနေတာရယ် ဘာသာရေးအသုံးချသူတွေရယ်အတွက် နိုင်ငံတော်ဘက်က လိုအပ်တဲ့ဆောင်ရွက်မှုတွေလုပ်နိုင်တယ်။ ကျနော့မိတ်ဆွေတစ်ယောက်ကပြောတယ် မုစ်လင်မ်တွေ မိန်းမ၄ယောက်မယူလို့မရဘူးလားတဲ့။ အဲ့ဒီလိုအနေအထားမျိုးတွေအထိဖြစ်နေတာ မြင်ရတော့ စိတ်မကောင်းဘူး။ ကမ္ဘာပေါ်မှာ မိန်းမတစ်ယောက်ထက်ပိုမယူရဆိုပြီး ပြဌာန်းထားတဲ့နိုင်ငံတွေမှာ မုစ်လင်မ်တွေနေနေကြတယ်။ မြန်မာနိုင်ငံအနေနဲ့လည်း မယားပြိုင်ယူခြင်းကို တားဆီးခွင့်ဥပဒေလိုမျိုးထုတ်ပြန်ပြဌာန်းလို့ရတယ်လို့ ကျနော်တော့မြင်တယ်။ မုစ်လင်မ်တစ်ယောက်အနေနဲ့ မယားပြိုင်မယူရလို့ ငရဲကြီးတယ်လို့မှမရှိတာ။
ဒီ case ဟာလုံးဝပြဿနာမဟုတ်ဘူးလို့ မုစ်လင်မ်တစ်ယောက်အနေနဲ့ မြင်တယ်။ ဒါပေမဲ့ မုစ်လင်မ်တွေသာ မယားပြိုင်ယူ ခွင့်မရှိဆိုတဲ့ ဥပဒေမျိုးမဟုတ်ဖို့တော့လိုတယ်။ အလားတူပဲ မွေးဖွားနှုံးထိန်းချုပ်ခြင်းဆိုတဲ့အပေါ်မှာလည်း ဆွေးနွေးဖြစ်တယ်။ လူမျိုးတစ်မျိုး ဘာသာတစ်ခု ဆိုပြီးခွဲခြားပြဌာန်းရင်တော့ ပြဿနာရှိလိမ့်မယ်လို့မြင်မိတယ်။ တစ်နိုင်ငံလုံး မိသားတစ်စု ခလေးဘယ်နှယောက်ဆိုတာမျိုး ပြဌာန်းနိုင်တာပဲ။ အစ္စလာမ်ဘာသာမှာ မွေးဖွားနှုန်းထိန်းချုပ်ခြင်းခွင့်မပြုဆိုတာ ဘယ်သူကစပြောလဲတော့မသိဘူး ဒါပေမဲ့ ခွင့်ပြုတယ်လို့ ကျနော်တော့သိတယ်။ အစ္စလာမ်ဘာသာအရ မွေးဖွားနှုံးထိန်းချုပ်ခြင်းကို ခွင့်ပြုတယ် ဘယ်လိုဘယ်ပုံခွင့်ပြုတယ်ဆိုတာတော့ ဘာသာရေးပညာရှင်တွေက ပိုသေချာမှာမို့လို့ ကျနော်ဒီနေရာမှာ မဆွေးနွေးလိုဘူး။ ယေဘုယျပြောရရင် မွေးဖွားနှုန်းထိန်းချုပ်ရာမှာ မိဘ၂ပါးရဲ့ ကျန်းမာရေးကို မထိခိုက်ဖို့လိုအပ်တယ်လို့ပြောရင် အဆင်ပြေလိမ့်မယ်။
ကချင်ပြည်နယ်ရဲ့ အေးချမ်းမှုမရနိုင်သေးတာကိုကြည့်ရင်း ကျနော်အပေါ်မှာတောက်လျှောက်ရေးတာတွေကိုပြန်ဖတ်ရင်း ကျနော်အရမ်းပဲ စိတ်ကူးယဉ်ဆန်နေပြီလားလို့တော့ တွေးမိပါတယ်။ ဒါပေမဲ့ဗျာ ကျနော်တို့နိုင်ငံ အေးချမ်းသာယာပြီး ဖွင့်ဖြိုးတိုးတက်လာတာကို မြင်ချင်လှပါပြီ။ ဒီတော့အစိုးရအနေနဲ့ လွှတ်တော်အနေနဲ့ ဆောင်ရွက်ပေးစေချင်ပါတယ်။
ကိုသန့်စင်ဖြိုး ရေးသည့် ပိုစ်ကို ခွင်ပြုချက်တောင်းခံပြီး ဖော်ပြခြင်းဖြစ်ပါသည်။
