News @ M-Media

Category: အာရွ-ပဖိဖိတ္

  • အောက်တိုဘာ ၁၀ ရက်နေ့ နိုင်ငံတကာသတင်းများ

    အောက်တိုဘာ ၁၀ ရက်နေ့ နိုင်ငံတကာသတင်းများ

    M-Media

    (ဓာတ်ပုံ – နိုဘယ်ဆုရ စာရေးဆရာမ ဟန်ကန်)

    iPhone 16 ရောင်းချမှုကို အင်ဒိုပိတ်မည်
    —————
    မိခင်ကုမ္ပဏီ Apple က ရင်းနှီးမြှုပ်နှံမှုနဲ့ တင်သွင်းရောင်းချမှု စည်းမျဥ်းစည်းကမ်းတွေကို မလိုက်နာတဲ့အတွက် iPhone 16 ရောင်းချခွင့်ကို ပိတ်ပင်မယ်လို့ အင်ဒိုနီးရှားက ထုတ်ပြန်ပါတယ်။ Apple ရဲ့ တင်သွင်းရောင်းချခွင့် လိုင်စင်ဟာ သက်တမ်းကုန်နေသလို၊ ဒေါ်လာ သန်း ၁၀၀ ရင်းနှီးမြှုပ်နှံမယ်လို့ ကတိပြုထားရာမှာလည်း ၉၄ သန်းကျော်သာ ရင်းနှီးမြှုပ်နှံထားတာ ဖြစ်ပါတယ်။

    တောင်တရုတ်ပင်လယ်အရေးအတွက် အာဆီယံကို ဖိလစ်ပိုင် ဖိအားပေး
    ————
    တောင်တရုတ်ပင်လယ်မှာ လိုက်နာရမယ့် ကျင့်၀တ်တွေနဲ့ပတ်သက်ပြီး ဆွေးနွေးညှိနှိုင်းဖို့အတွက် အာဆီယံခေါင်းဆောင်တွေနဲ့ တရုတ်၀န်ကြီးချုပ်ကို အာဆီယံအစည်းအ၀ေးမှာ ဖိလစ်ပိုင်သမ္မတ မားကို့စ်က ဖိအားပေးခဲ့ပါတယ်။ တရုတ်ဟာ ဖိလစ်ပိုင်ကို ခြိမ်းခြောက်မှုတွေ လုပ်နေတယ်လို့လည်း သူက စွပ်စွဲခဲ့ပါတယ်။

    ကိုရီးယားစာရေးဆရာမ နိုဘယ်ဆုရရှိ
    ————-
    ၂၀၂၄ ခုနှစ်အတွက် စာပေနိုဘယ်ဆုကို တောင်ကိုရီးယား စာရေးဆရာမ ဟန်ကန်က ရရှိခဲ့ပါတယ်။ ၁၉၉၃ ခုနှစ်မှာ ကဗျာနဲ့ စာပေလောကထဲ ၀င်ရောက်လာပြီးနောက် The Vegetarian၊ Your Cold Hands၊ Scars စတဲ့ ၀တ္ထုတွေနဲ့ ကျော်ကြားခဲ့ပါတယ်။ The Vegetarian ဟာ အင်္ဂလိပ်စာပေကို ပထမဆုံး ပြန်ဆိုရတဲ့ ကိုရီးယား၀တ္ထုဖြစ်ပါတယ်။ တောင်ကိုရီးယားရဲ့ နိုဘယ်ဆုရ ပထမဆုံး စာရေးဆရာမအဖြစ် မှတ်တမ်း၀င်တဲ့ ဟန်ကန်ဟာ ဆုကြေး အမေရိကန်ဒေါ်လာ ၁ သန်း ရရှိမှာ ဖြစ်ပါတယ်။

    Ref: CNA


  • အောက်တိုဘာ ၄ ရက်နေ့ နိုင်ငံတကာသတင်းများ

    အောက်တိုဘာ ၄ ရက်နေ့ နိုင်ငံတကာသတင်းများ

    M-Media

    အွန်လိုင်းလူလိမ်ဂိုဏ်းကို ဖိလစ်ပိုင် ဖမ်းဆီး
    ——
    မြို့တော် မနီလာမှာ အွန်လိုင်းလိမ်လည်မှုလုပ်နေတဲ့ လူ ၂၅၀ ပါ ဂိုဏ်းတစ်ခုကို ဖိလစ်ပိုင်အာဏာပိုင်တွေက ဖမ်းဆီးလိုက်ပြီး အများစုဟာ တရုတ်နိုင်ငံသားတွေ ဖြစ်တယ်လို့ ဆိုပါတယ်။ အွန်လိုင်း ငွေကြေး လိမ်လည်မှုပေါင်းများစွာနဲ့ ဆက်စပ်နေတဲ့အတွက် နိုင်ငံခြား ဂိမ်းလုပ်ငန်းတွေကို ပိတ်ပင်ကြောင်း ဖိလစ်ပိုင် သမ္မတ မားကို့စ်က ဇူလိုင်လမှာ ကြေငြာခဲ့ပါတယ်။

    တိုက်ခိုက်ခံရပါက နျူသုံးမည်ဟု ကင်ဂျုံအွန် ခြိမ်းခြောက်
    ————-
    တောင်ကိုရီးယားနဲ့ အမေရိကန်တို့က တိုက်ခိုက်မှုတွေလုပ်လာရင် နျူလက်နက်အသုံးပြုသွားမယ်လို့ မြောက်ကိုရီးယားခေါင်းဆောင်က ခြိမ်းခြောက်လိုက်ပါတယ်။ ဒီနှစ်နိုင်ငံဟာ အာရှဒေသအတွင်း မတည်မငြိမ်ဖြစ်အောင် လုပ်ဆောင်နေပြီး တောင်ကိုရီးယားခေါင်းဆောင်တွေဟာ ပုံမှန်မဟုတ်တဲ့သူတွေ လို့လည်း ကင်ဂျုံအွန်က ၀ေဖန်ခဲ့ပါတယ်။

    အရှေ့အာရှ စစ်ဖက်မဟာမိတ်ဖွဲ့ရန် ဂျပန်၀န်ကြီးချုပ် အဆိုပြု
    ——————-
    အရှေ့အာရှနိုင်ငံတွေဟာ ယူကရိန်းလို ကျူးကျော်တိုက်ခိုက်မှု ခံရနိုင်တဲ့အတွက် ဒေသတွင်း စစ်ဖက် မဟာမိတ်တပ်ပေါင်းစုတစ်ခု ဖွဲ့စည်းဖို့ ဂျပန်၀န်ကြီးချုပ် ရှီဂဲရု အီချီဒါက တိုက်တွန်းလိုက်ပါတယ်။ ဂျပန်နိုင်ငံမှာ အသက်အရွယ်ကြီးရင့်သူ မြင့်တက်လာတာနဲ့ မွေးဖွားနှုန်း ကျဆင်းလာတာတွေဟာ အရေးပေါ်အခြေအနေအထိ ရောက်နေပြီလို့လည်း ၀န်ကြီးချုပ်က ထည့်သွင်းပြောဆိုခဲ့ပါတယ်။ ဂျပန်ဟာ ပြီးခဲ့တဲ့နှစ်အနည်းငယ်အတွင်း တရုတ်နဲ့လည်း တင်းမာမှု မြင့်တက်လာပါတယ်။

    Ref: CNA

  • သီရိလင်္ကာတွင် မာ့စ်၀ါဒီခေါင်းဆောင် သမ္မတဖြစ်လာ

    သီရိလင်္ကာတွင် မာ့စ်၀ါဒီခေါင်းဆောင် သမ္မတဖြစ်လာ

    စက်တင်ဘာ ၂၃၊ ၂၀၂၄
    M-Media

    -တနင်္ဂနွေ့နေ့က ပြီးဆုံးခဲ့ပြီဖြစ်တဲ့ သီရိလင်္ကာ သမ္မတရွေးကောက်ပွဲမှာ မာ့စ်၀ါဒယိမ်းတဲ့ နိုင်ငံရေးသမား အနူရာ ကူမာရာ ဒီဆာနာယာကီက အနိုင်ရရှိသွားပါတယ်။

    အနူရာဟာ အသက် ၅၅ နှစ်အရွယ်ရှိပြီး ပြည်သူ့လွတ်မြောက်ရေးပါတီ (JVP) နဲ့ ပြည်သူ့အင်အား မဟာမိတ်တပ်ပေါင်းစု (NPP) ရဲ့ ခေါင်းဆောင်လည်းဖြစ်ပါတယ်။

    ပထမအကြိမ် ရွေးကောက်ပွဲမှာ သမ္မတလောင်းတွေ မဲရရှိမှု ၅၀ ရာခိုင်နှုန်း မကျော်တဲ့အတွက် ဒုတိအကြိမ် မဲပြန်ရေခဲ့ရပြီး ဒါဟာ နိုင်ငံ့သမိုင်းမှာ ပထမဆုံးဖြစ်ပါတယ်။ အနူရာက မဲအရေအတွက် ၄၂ ဒဿမ ၃၁ ရာခိုင်နှုန်း ရခဲ့ပြီး အတိုက်အခံခေါင်းဆောင် ဆာဂျစ် ပရီ မာဒါဆာက ၃၂ ဒဿမ ၇၆ ရာခိုင်နှုန်း ရရှိခဲ့ပါတယ်။

    လက်ရှိသမ္မတ ရာနီလ် ၀စ်ကရီမီဆင်ဟီက ၁၇ ဒဿမ ၂၇ ရာခိုင်နှုန်းသာ ရရှိခဲ့ပါတယ်။ သီရိလင်္ကာဟာ ၂၀၂၂ ခုနှစ်မှာ စီးပွားရေး ပြိုလဲခဲ့ပြီး ဒီဒဏ်ကို အခုအချိန်အထိ ခံစားနေရဆဲပါ။ သမ္မတသစ် ကူမာရာရဲ့ အဓိက စိန်ခေါ်မှုဟာ စီးပွားရေး ဦးမော့လာအောင် ပြန်လည်လုပ်ဆောင်ဖို့ ဖြစ်ပါတယ်။

    Ref: Reuters

  • စက်တင်ဘာ ၂၂ ရက်နေ့ နိုင်ငံတကာသတင်းများ

    စက်တင်ဘာ ၂၂ ရက်နေ့ နိုင်ငံတကာသတင်းများ

    M-Media

    (ဓာတ်ပုံ – အင်ဒိုနီးရှားမှ ကမ္ဘာ့အမြင့်ဆုံး ခရစ်တော်ရုပ်ထု)

    အင်ဒိုနီးရှားတွင် ကမ္ဘာ့အမြင့်ဆုံး ခရစ်တော်ရုပ်တု ဖွင့်လှစ်
    ———–
    မြောက်ဆူမားတြားပြည်နယ်က နာမည်ကျော် တိုဘာကန် တောင်စောင်းမှာ ၆၁ မီတာမြင့်တဲ့ ယေရှုခရစ်ရုပ်ထုကို စက်တင်ဘာ ၁၉ ရက်နေ့မှာ ဖွင့်လှစ်ခဲ့ပါတယ်။ မြောက်ဆူမားတြားဟာ ခရစ်ယာန်ဘာသာ၀င် အများစုရှိရာ ဒေသဖြစ်ပြီး ဒီရုပ်တုကို နှစ်ချီ ဆောက်လုပ်ခဲ့ရတာပါ။ ကမ္ဘာပေါ်က အမြင့်ဆုံး ခရစ်တော်ရုပ်တုအဖြစ်လည်း မှတ်တမ်း၀င်ပါတယ်။

    ထိုင်းစစ်တပ်ခေါင်းဆောင်များ အပြောင်းအလဲလုပ်မည်
    ———–
    ထိုင်းစစ်တပ်က အရာရှိအရာခံ စုစုပေါင်း ၈၀၈ ဦးကို အပြောင်းအလဲလုပ်မှာ ဖြစ်ပြီး ဒီစာရင်းကို ထိုင်း၀န်ကြီးချုပ်ရုံးက နန်တော်ကို တင်သွင်းထားကာ ဘုရင်အတည်ပြုရင် အောက်တိုဘာ ၁ ရက်နေ့မှာ စတင် အသက်၀င်မှာဖြစ်ပါတယ်။ အခုပြောင်းအလဲမှာ လကုန်ပင်စင်ယူတော့မယ့် ထိုင်းကြည်းတပ်ဗိုလ်ချုပ်နဲ့ ရေတပ်ဗိုလ်ချုပ်နေရာကို အစားထိုးမှုလည်း ပါ၀င်မှာ ဖြစ်ပါတယ်။

    တရုတ်ဆော့ဖ်၀ဲသုံးကားများကို အမေရိကန်ပိတ်မည်
    ————-
    တရုတ်ထုတ်ဆော့ဖ်၀ဲတွေ ထည့်သွင်းထားတဲ့ ကားတွေအားလုံးကို တင်သွင်းခွင့် ပိတ်ပင်မယ့် အမိန့်တစ်ခုကို အမေရိကန်က နောက်တစ်ပတ်မှာ ထုတ်ပြန်ကြေငြာဖို့ ရှိပါတယ်။ အမေရိကန်ယာဥ်မောင်းတွေရဲ့ အချက်အလက်တွေကို တရုတ်ကုမ္ပဏီတွေက ခိုးယူမှာ စိုးရိမ်တာကြောင့်ဖြစ်ပြီး ဒါဟာ နိုင်ငံတော် လုံခြုံရေးကိုပါ ထိခိုက်လာနိုင်တယ်လို့လည်း ဆိုပါတယ်။ အမေရိကန်ဟာ တရုတ်ထုတ် လျှပ်စစ်ကားတွေကို အခွန်တိုးကောက်ဖို့လည်း အမိန့်ထုတ်ထားပါတယ်။

    Ref: CNA, Jakarta Post


  • စက်တင်ဘာ ၂၀ ရက်နေ့ သတင်းတို

    စက်တင်ဘာ ၂၀ ရက်နေ့ သတင်းတို

    M-Media

    အာဆီယံ ၄ နိုင်ငံ ဓာတ်အားလိုင်းမှ စင်ကာပူက ဓာတ်အားထပ်တိုးယူ
    —————
    လာအို-ထိုင်း-မလေးရှား-စင်ကာပူ မဟာဓာတ်အားလိုင်းကနေ ဓာတ်အား မီဂါ၀ပ် ၁၀၀ ကို စင်ကာပူက ထပ်တိုးယူခဲ့ပြီး စုစုပေါင်း မီဂါ၀ပ် ၂၀၀ ရယူ သုံးစွဲနေပြီဖြစ်ပါတယ်။ ၂၀၂၂ ခုနှစ် ဇွန်လ လာအိုကနေ မီဂါ၀ပ် ၁၀၀ စင်ကာပူက စယူတဲ့အချိန် ဒီစီမံကိန်းကို စတင်ခဲ့တာပါ။ လက်ရှိမှာ မလေးရှားကလည်း ဒီမဟာဓာတ်အားလိုင်းကနေ ရယူသုံးစွဲနေပြီး နောက်ပိုင်းမှာ အာဆီယံ ၁၀ နိုင်ငံစလုံးအထိ ချိတ်ဆက်သွားဖို့ ရှိနေပါတယ်။

    ဂေါ်ဖီရှားပါးမှုကြောင့် ကိုရီယားကင်ချီလုပ်ငန်း ထိခိုက်လာ
    ———
    ကင်ချီရဲ့ အဓိကပါ၀င်ပစ္စည်းဖြစ်တဲ့ ဂေါ်ဖီဟာ တောင်ကိုရီးယား အပူလှိုင်းကြောင့် ပြီးခဲ့တဲ့နှစ်ကထက်စာရင် ၇၀ ရာခိုင်နှုန်းနီးပါး စျေးတက်လာပြီး ကမ္ဘာကျော် ကင်ချီထုတ်လုပ်မှုလုပ်ငန်းပါ ထိခိုက်လာပါတယ်။ ဒီလိုအနေအထားအတိုင်း ဆက်သွားရင် ၂၀၉၀ ခုနှစ်အရောက် တောင်းကိုရီးယားမှာ ဂေါ်ဖီလုံး၀ စိုက်လို့ရတော့မှာ မဟုတ်တဲ့အတွက် ပညာရှင်တွေက နည်းလမ်းသစ်တွေရှာဖွေကာ ကင်ချီလုပ်ငန်းကို ထိန်းသိမ်းဖို့ ကြိုးပမ်းနေကြပါတယ်။

    တရုတ်ပြည်တွင် ဂျပန်လူမျိုးများ စိုးရိမ်စိတ်မြင့်တက်လာ
    ———–
    ရှန်ဇန်းမြို့မှာ ပြီးခဲ့တဲ့ရက်ပိုင်းက ၁၀ နှစ်အရွယ် ဂျပန်ကလေးငယ် ဓားထိုးသတ်ဖြတ်ခံရပြီးနောက်ပိုင်း တရုတ်မှာရှိနေတဲ့ ဂျပန်လုပ်ငန်းတွေက သူတို့ရဲ့ ဂျပန်၀န်ထမ်းတွေနဲ့ မိသားစုတွေကို နေရပ်ပြန်ဖို့ ရွေးချယ်မှုတွေ ပေးလာပါတယ်။ တရုတ်မှာ ဂျပန်မုန်းတီးရေးစိတ်ဓာတ်ဟာ အခုအချိန်အထိ ကျန်ရှိနေသေးပြီး ပြီးခဲ့တဲ့ လအနည်းငယ်အတွင်း တိုက်ခိုက်ခံရတဲ့ ဂျပန်နိုင်ငံသား အနည်းဆုံး ၂ ဦး ရှိပါတယ်။

    (ဓာတ်ပုံ- တောင်ကိုရီးယား ဂေါ်ဖီ)