Tag: Bangladesh

ဇူလိုင် ၂၊ ၂၀၂၂
M-Media

-အစ္စလာမ့်မစ် အမျိုးသားရေး အစွန်းရောက်တွေ လမ်းကြောင်းမှန်ပေါ် ပြန်ရောက်လာရေး စိတ်ပိုင်းဆိုင်ရာ ပြုပြင်တည့်မတ်ပေးမယ့် အစီအစဥ်သစ်တစ်ခုကို ဘင်္ဂလားဒေ့ရှ်က မကြာခင် စတင်ပါတော့မယ်။

ထောင်ကျနေတဲ့ အစွန်းရောက်တွေ၊ စစ်သွေးကြွတွေမှာ ဒီအစီအစဥ်ကို စတင်အကောင်အထည်ဖော်မှာဖြစ်ပါတယ်။

၂၀၁၆ ခုနှစ် မြို့တော်ဒါကာက စားသောက်ဆိုင်တစ်ခုကို အစ္စလာမ့်မစ် စစ်သွေးကြွတွေ ၀င်ရောက်တိုက်ခိုက်ခဲ့ပြီးတဲ့နောက် ဘင်္ဂလားဒေ့ရှ်အစိုးရဟာ အမျိုးသားရေးအစွန်းရောက်တွေ၊ IS လို အကြမ်းဖက်အဖွဲ့အစည်းတွေကို အဓိကထား ကိုင်တွယ် နှိမ်နှင်းခဲ့ပါတယ်။

စစ်သွေးကြွတွေကို ဖမ်းဆီးနိုင်ရေး ဘင်္ဂလားဒေ့ရှ် အထူးတပ်ဖွဲ့ဟာ စစ်ဆင်ရေးမြောက်များစွာ လုပ်ဆောင်ခဲ့ပါတယ်။

အစွန်းရောက်တွေကို အသိပညာပေးမယ့် အစီအစဥ်ဟာ ဒီလူတွေ စစ်သွေးကြွ လမ်းကြောင်းပေါ် ပြန်မရောက်ရေး ရည်ရွယ်တာဖြစ်တယ်လို့ ဘင်္ဂလားဒေ့ရှ် ရဲတပ်ဖွဲ့ရဲ့ အကြမ်းဖက်တိုက်ဖျက်ရေးအဖွဲ့ CTTC ပြောရေးဆိုခွင့်ရှိသူက ပြောပါတယ်။

အသိပညာပေးအစီအစဥ်မှာ နိုင်ငံက ထိပ်တန်း စိတ်ပညာဆရာ၀န်တွေ၊ ဘာသာရေးခေါင်းဆောင်တွေ၊ အကြမ်းဖက်၀ါဒ တိုက်ဖျက်ရေး ကျွမ်းကျင်သူတွေ ပါ၀င်ကူညီပေးမှာပါ။

ဖမ်းဆီးထားတဲ့ အစွန်းရောက်တွေထဲက အယောက် ၂၀ ကို လာမယ့် တစ်နှစ်အတွင်း စိတ်ပိုင်းဆိုင်ရာ ပြုပြင်ပေးသွားမှာဖြစ်ပြီး ထောင်ဒဏ်ပြည့်သွားတဲ့အချိန် လူ့အသိုင်းအ၀ိုင်းထဲ ပြန်လည်၀င်ဆံ့နိုင်ရေး၊ အသက်မွေး၀မ်းကြောင်းအတွက် မိမိခြေထောက်ပေါ် ရပ်တည်နိုင်ရေးတွေပါ အစိုးရက ကူညီပေးသွားမှာဖြစ်ပါတယ်။

၂၀၁၆ ခုနှစ် အကြမ်းဖက်တိုက်ခိုက်မှုပြီးကတည်းက အစွန်းရောက် သံသယရှိသူ လူ ၇ ထောင်လောက်ကို ဖမ်းဆီးထားတယ်လို့ CTTC အကြီးအကဲ ပြည်ထဲရေး၀န်ကြီး အဆာဒူဇာမန်ခန်းက ပြောပါတယ်။

Ref: Business-standard

ဇွန် ၂၇၊ ၂၀၂၂
M-Media

-ဘင်္ဂလားဒေ့ရှ်ဟာ နိုင်ငံရဲ့ အရှည်ဆုံး မြစ်ကူးတံတားကို စနေနေ့မှာ အောင်မြင်စွာ ဖွင့်လှစ်နိုင်ခဲ့ပါတယ်။

ပဒ်မာ မြစ်ပေါ်မှာ တည်ဆောက်ထားတဲ့အတွက် Padma တံတားလို့ အမည်ပေးထားပြီး မြို့တော် ဒါကာကနေ နိုင်ငံ အနောက်တောင်ပိုင်းက ၀ေးလံခေါင်ဖျားတဲ့ ဒေသတွေကို ဆက်သွယ်ထားပါတယ်။

အခက်အခဲတွေရှိခဲ့ပြီး အချိန်အတော်ကြာ ရွှေ့ဆိုင်းခဲ့ပြီးတဲ့နောက် ဖွင့်လှစ်နိုင်ခဲ့တဲ့ ဒီတံတားဟာ ‘နိုင်ငံ့ဂုဏ်သိက္ခာ’ ကို ဖော်ကျူးနေတဲ့ အမှတ်သညာတစ်ခုဖြစ်တယ်လို့ ၀န်ကြီးချုပ် ရှိခ်ဟာဆီနာက ဖွင့်ပွဲအခမ်းအနားမိန့်ခွန်းမှာ ပြောကြားခဲ့ပါတယ်။

ဘင်္ဂလားဒေ့ရှ်အစိုးရအတွင်း ခြစားမှုတွေ ရှိတယ်ဆိုတဲ့သတင်းကြောင့် ၂၀၁၂ ခုနှစ်မှာ ကမ္ဘာ့ဘဏ်က တံတားအတွက် ချေးငွေပးမယ့်အစီအစဥ်ကို ရပ်ဆိုင်းခဲ့သလို အာရှဖွံဖြိုးရေးဘဏ်(ADB)၊ ဂျပန်နိုင်ငံတကာ ပူးပေါင်းဆောင်ရွက်ရေး အေဂျင်စီ (JICA) တို့လည်း စီမံကိန်းမှာ မပါ၀င်တော့ပါဘူး။

ဒီတံတားကို မိမိတို့အစိုးရငွေနဲ့ ပြီးအောင်ဆောက်လုပ်မယ်ဆိုတဲ့ ၀န်ကြီးချုပ်ဟာဆီနာရဲ့ စကားဟာ ကျော်ကြားခဲ့ပြီး မဖြစ်နိုင်ဘူးလို့ ကျွမ်းကျင်သူတွေက သုံးသပ်ခဲ့ကြပါတယ်။

စုစုပေါင်း ကန်ဒေါလာ ၄ ဘီလီယံနီးပါး ကုန်ကျခဲ့တဲ့ ဒီတံတားကို ၂၀၁၅ ခုနှစ် နို၀င်ဘာလမှာ စတင်ဆောက်လုပ်ခဲ့တာ ဖြစ်ပါတယ်။

“ကျွန်မတို့ အမြဲတမ်း သူများကို အားကိုးနေရလိမ့်မယ်လို့ တစ်ချို့တွေက ပြောကြတယ်။ ကျွန်မတို့ရဲ့ နိုင်ငံ့ခေါင်းဆောင်ကြီး ရှိခ် မူဂျီဘူရ် ရဟ်မန်က ကိုယ့်ကိုယ်ကိုယုံကြည်မှုရှိဖို့ရဲ့ အရေးကြီးပုံကို သင်ပြပေးခဲ့ပါတယ်” လို့ ရှိခ် ဟာဆီနာက တံတားဖွင့်ပွဲမှာ ထည့်သွင်းပြောဆိုခဲ့ပါတယ်။

မူဂျီဘူရ် ရဟ်မန်ဟာ ပါကစ္စတန်ကနေခွဲထွက်ပြီး လွတ်လပ်တဲ့ ဘင်္ဂလားဒေ့ရှ်နိုင်ငံဖြစ်လာရေး အားထုတ်ကြိုးပမ်းခဲ့သူ ဖြစ်ပါတယ်။

“Padma တံတားဟာ အုတ်တွေ၊ ကွန်ကရစ်တွေတစ်ပုံတစ်ပင်နဲ့ ဧရာမတံတားသက်သက်သာ မဟုတ်ပါဘူး။ ဘင်္ဂလားဒေ့ရှ်ရဲ့ အမှတ်သညာ၊ ဂုဏ်သိက္ခာ၊ လုပ်နိုင်စွမ်းတွေကို ဖော်ကျူးနေတာလည်းဖြစ်ပါတယ်။ ကိုယ့်အားကိုယ်ကိုးနိုင်တယ်ဆိုတာ ကျွန်မတို့ ကမ္ဘာကို ပြလိုက်တာပါ”

အံ့ဖွယ်နည်းပညာ

ပဒ်မာမြစ်ဟာ တောင်အမေရိကက အမေဇုန်မြစ်ပြီးရင် ကမ္ဘာပေါ်မှာ တံတားဆောက်ဖို့ မဖြစ်နိုင်ဆုံး၊ အခက်အခဲဆုံး မြစ်ဖြစ်ပါတယ်။

တံတားကို တရုတ်ဆောက်လုပ်ရေးကုမ္ပဏီ RMBEG က ဦးဆောင်ပြီး ဘင်္ဂလားဒေ့ရှ်အင်ဂျင်နီယာ ၁၂၀၀ နဲ့ ဆောက်လုပ်ခဲ့တာပါ။

တံတားဆောက်ဖို့ မြစ်အောက် ပေ ၄၀၀ အနက်မှာ စတီချောင်းတွေနဲ့ ပိုင်ရိုက်ခဲ့ရပြီး ကမ္ဘာ့ပေါ်က မြစ်ကူးတံတားတည်ဆောက်မှုတွေထဲမှာ အနက်ဆုံး ပိုင်ရိုက်ရတဲ့တံတား ဖြစ်လာပါတယ်။

မြစ်အတွင်း စက္ကန့် ၂၀ တိုင်း စီးဆင်းတဲ့ ရေပမာဏဟာ မြို့တော်ဒါကာမှာ တစ်ရက်သုံးတဲ့ ရေပမာဏနဲ့ အတူတူပဲလို့ စီမံကိန်းဒါရိုက်တာ ရှာဖီကူ အစ္စလာမ်က ပြောပါတယ်။

“အမေဇုန်ပြီးရင် ပဒ်မာမြစ်ဟာ ကမ္ဘာပေါ်မှာ ရေစီးအသန်ဆုံးဖြစ်ပါတယ်။ ဒါ့ကြောင့် ကမ္ဘာ့အနက်ဆုံး၊ အထူဆုံး ပိုင်မျိုးကို ရိုက်ရပါတယ်”

ကမ္ဘာ့အဆင့်အမြင့်ဆုံး ဘယ်ရင် (FPB) ကို ပထမဆုံးအသုံးပြုတဲ့ တံတားလည်း ဖြစ်ပါတယ်။ FPB ဟာ ပြင်းဟာ ၉ မဂ္ဂနီကျုရှိတဲ့ ငလျင်ဒဏ်ကို ခံနိုင်ပါတယ်။

၀န်အား တန်ချိန် တစ်သောင်းကျော်အထိ ခံနိုင်ရည်ရှိပြီး ကမ္ဘာပေါ်မှာ ၀န်အားအများဆုံး ခံနိုင်တဲ့တံတားအဖြစ်လည်း မှတ်တမ်း၀င်ပါတယ်။

တံတားတည်ဆောက်မှုမှာ အင်ဂျင်နီယာပိုင်းဆိုင်ရာ မကြုံစဖူးစိန်ခေါ်မှုတွေ ရှိခဲ့ပြီး ဒီဟာတွေကို ကျော်ဖြတ်ဖို့ ကြိုးစားခဲ့ရတဲ့အတွက် ကုန်ကျစားရိတ်ဟာ မူလ ခန့်မှန်းထားတဲ့ ပမာဏထက် ၃ ဆလောက် ပိုကုန်ခဲ့တယ်လို့ ရှာဖီကူ အစ္စလာမ်က ထည့်သွင်းပြောဆိုခဲ့ပါတယ်။

Padma တံတားကြောင့် နိုင်ငံအနောက်တောင်ပိုင်း ၀ေလံခေါင်ဖျားတဲ့ ဒေသတွေကနေ မြို့တော်ဒါကာကို သွားရတဲ့ ခရီးဟာ ၃ ပုံ ၁ ပုံလောက် လျော့ကျသွားမှာဖြစ်ပြီး၊ ဒုတိယအကြီးဆုံး ဆိပ်ကမ်း မွန်လာနဲ့ မြို့တော်ဒါကာကို သွားရတဲ့ခရီးစဥ်ဟာလည်း ပိုမို မြန်ဆန်လာမှာ ဖြစ်ပါတယ်။

တံတားမှာ ကားလမ်း ၄ ခုနဲ့ ရထားလမ်းတစ်ခုတို့ ပါ၀င်ပါတယ်။ အရင်က ကားတစ်တန်၊ သင်္ဘောတစ်တန်နဲ့ အနိုင်ငံအနောက်တောင်ပိုင်းကို သွားရတာဖြစ်ပြီး အခုတံတားသစ်ကြောင့် လူတွေ၊ ကားတွေ အချိန်စောင့်ရမှု တစ်ရက်ကို နာရီပေါင်း ၂ သိန်းလောက် သက်သာမှာ ဖြစ်ပါတယ်။

ဘင်္ဂလားဒေ့ရှ် အနောက်တောင်ပိုင်းဟာ စိုက်ပျိုးရေးနဲ့ မွေးမြူရေး အချက်အခြာဒေသဖြစ်ပြီး အခုတံတားကြောင့် ကုန်စည်စီးဆင်းမှု ပိုမိုမြန်ဆန်လာမှာ ဖြစ်ပါတယ်။

Ref: Aljazeera

ဧပြီ ၂၆၊ ၂၀၂၂

M-Media

-စီးပွားရေးအကြပ်အတည်းကို အကြီးအကျယ်ရင်ဆိုင်နေရတဲ့ သီရိလင်္ကာနဲ့ ပါကစ္စတန်နိုင်ငံတို့ဟာ ဘင်္ဂလားဒေ့ရှ်ရဲ့ ဖြစ်ပေါ်တိုးတက်မှုတွေကို အတုယူလုပ်ဆောင်သင့်တယ်လို့ ပညာရှင်တွေက တိုက်တွန်းထားပါတယ်။ 

သီရိလင်္ကာနိုင်ငံဟာ စီးပွားရေးအကြပ်အတည်း၊ နိုင်ငံခြားအရန်ငွေ ပြတ်လပ်မှုကြောင့် ဒေ၀ါလီခံကြောင်း အစိုးရက အခုလအတွင်းမှာ ကြေငြာခဲ့သလို၊ ပါကစ္စတန်မှာလည်း စီးပွားရေး ကျဆင်းမှု၊ ငွေကြေးဖောင်းပွမှုတွေကြောင့် ၀န်ကြီးချုပ် အင်မရန်းခန်း ပြုတ်ကျကာ နိုင်ငံရေး မတည်မငြိမ် ဖြစ်နေပါတယ်။

တောင်အာရှက အိမ်နီးချင်းနိုင်ငံတွေ ဒီလို အခက်အခဲ ကြုံနေရတဲ့အချိန်မှာ ဘင်္ဂလားဒေ့ရှ်ကတော့ စီးပွားရေး၊ ပညာရေး၊ ကျန်းမာရေး နယ်ပယ်စုံမှာ တိုးတက်မှုတွေနဲ့ ရှေ့ကို ဆက်လက်ချီတက်နေပါတယ်။

၁၉၇၂ ခုနှစ် လွတ်လပ်ရေးရကာစက အနာဂတ်မရှိတဲ့ တိုင်းပြည်လို့ အမေရိကန်နိုင်ငံခြားရေး၀န်ကြီး ဟင်နရီကစ်ဆင်ဂျာရဲ့ ချိုးချိုးနှိမ်နှိမ် အပြောခံရတဲ့ ဘင်္ဂလားဒေ့ရှ်ဟာ ပြီးခဲ့တဲ့နှစ်ပေါင်း ၃၀ အတွင်း အကြီးအကျယ် တိုးတက်မှုတွေနဲ့အတူ ကမ္ဘာ့ စီးပွားရေးအကြီးဆုံး နိုင်ငံ ၄၀ စာရင်းထဲ ပါလာခဲ့ပြီ ဖြစ်ပါတယ်။ 

ဒီကနေ့မှာတော့ ၂၁ ရာစု ဖွံ့ဖြိုးတိုးတက်မှု ပြယုဂ်အဖြစ် နိုင်ငံတကာပညာရှင်တွေ ဥပမာပေးပြောရတဲ့နိုင်ငံမျိုး ဖြစ်လာပါပြီ။

အထည်ချုပ်လုပ်ငန်း

ဘင်္ဂလားဒေ့ရှ်ဟာ တရုတ်ပြီးရင် ကမ္ဘာမှာ ဒုတိယအကြီးဆုံး အထည်ချုပ်လုပ်ငန်းကို ပိုင်ဆိုင်တဲ့နိုင်ငံ ဖြစ်ပါတယ်။ နိုင်ငံရဲ့ စီးပွားရေးတိုးတက်မှုမှာ အထည်ချုပ်လုပ်ငန်းက အဓိကျတဲ့ အခန်းကဏ္ဍမှာ ပါ၀င်ပါတယ်။

ပြီးခဲ့တဲ့ ၇ နှစ်အတွင်း အထည်ချုပ်လုပ်ငန်းကနေ ရရှိတဲ့၀င်ငွေဟာ ကန်ဒေါ်လာ ၁၉ ဘီလီယံကနေ ၃၄ ဘီလီယံအထိ ရှိလာပြီး ၇၉ ရာခိုနှုန်း မြင့်တက်လာတာပါ။ 

ပြည်ပတင်ပို့မှုကို ရှေ့ရှုတဲ့ မူ၀ါဒကြောင့် ၁၉၉၀ ပြည့်နှစ်တွေက စတင်ခဲ့တဲ့ စီးပွားရေးတိုးတက်မှုနဲ့အတူ အထည်ချုပ်လုပ်ငန်း ဖွံ့ဖြိုးလာတာဖြစ်ပြီး လက်ရှိ ဘင်္ဂလားဒေ့ရှ်ရဲ့ ပြည်ပပို့ကုန် ၇၇ ရာနှုန်းဟာ အထည်ချုပ်လုပ်ငန်းက ဖြစ်ပါတယ်။  

LDC က လွတ်မြောက်မည်

ပါကစ္စတန်ကနေ ခွဲထွက်ပြီး လွတ်လပ်တဲ့နိုင်ငံထူထောင်တဲ့ ၁၉၇၂ ခုနှစ်တုန်းက ဘင်္ဂလားဒေ့ရှ်ဟာ လူတစ်ဦးချင်း ၀င်ငွေအနည်းဆုံး ဆင်းရဲတဲ့တိုင်းပြည်အဖြစ် ချဒ်၊ ရ၀မ်ဒါ၊ ဘူရန်ဒီ နီပေါတို့နဲ့အတူ သတ်မှတ်ခံခဲ့ရတာ ဖြစ်ပါတယ်။ 

ပြီးခဲ့တဲ့နှစ်ပေါင်း ၂၀ အတွင်း ဆင်းရဲမွဲတေမှုဟာ ၄၃.၅ ရာခိုင်နှုန်းကနေ ၁၄.၃ ရာခိုင်နှုန်းအထိ ကျဆင်းသွားပါတယ်။ 

ပညာရေး၊ စီးပွားရေး၊ ကျန်းမာရေး အဖက်ဖက်က ဖွံ့ဖြိုးတိုးတက်လာတာကြောင့် ဘင်္ဂလားဒေ့ရှ်ဟာ ကုလရဲ့ ဖွံ့ဖြိုးမှုအနိမ့်ဆုံးနိုင်ငံများစာရင်း LDC ကနေ ၂၀၂၆ ခုနှစ်မှာ လွတ်မြောက်တော့မှာဖြစ်ပြီး ၀င်ငွေအလယ်အလတ်ရှိတဲ့ တိုင်းပြည်အဖြစ် ရပ်တည်နိုင်တော့မှာ ဖြစ်ပါတယ်။ 

NGO များ၏ အခန်းကဏ္ဍ 

ဘင်္ဂလားဒေ့ရှ်ရဲ့ တိုးတက်မှုမှာ အကူအညီပေးရေးအဖွဲ့အစည်း NGO တွေရဲ့ အခန်းကဏ္ဍကလည်း အဓိကကျပါတယ်။ 

NGO တွေရဲ့ ကြိုးပမ်းမှုကြောင့် ကလေးငယ်တွေ စာတတ်မြောက်မှုနဲ့ ကျန်းမာရေးကဏ္ဍတွေမှာ တိုးတက်လာသလို၊ အသေးစား၊ အလတ်စား စီးပွားရေးလုပ်ငန်းတွေလည်း ဖွံ့ဖြိုးလာပါတယ်။ 

ဘင်္ဂါလီ ပရဟိတသမား နိုဘယ်ဆုရှင် မိုဟာက်ယူနွတ် တည်ထောင်တဲ့ ‘ယူနွတ်စင်တာ’ (Yunus Centre) ဟာ ထင်ရှားပြီး စီးပွားရေး တိုးတက်မှုနဲ့ ဆင်းရဲမွဲတေမှုလျှော့ချရေးမှာ အထောက်အကူအများကြီး ဖြစ်စေခဲ့ပါတယ်။

ဒစ်ဂျစ်ကဏ္ဍ

နည်းပညာကဏ္ဍ အားကောင်းလာမှုကလည်း ဘင်္ဂလားဒေ့ရှ် ဖွံ့ဖြိုး တိုးတက်လာမှုရဲ့ အစိတ်အပိုင်းတစ်ခုဖြစ်ပါတယ်။ တောင်အာရှမှာ အိုင်တီအချက်အခြာနိုင်ငံတစ်ခုအဖြစ် သတ်မှတ်ခံထားရတာပါ။  

အစိုးရဟာ မြို့ပြတောရွာ အားလုံးမှာ ဖုန်းနဲ့ အင်တာနက်ဆက်သွယ်ရေး အဆင်ပြေပြေသုံးစွဲနိုင်အောင် စီစဥ်ပေးထားပါတယ်။ 

ကမ္ဘာ့ဒစ်ဂျစ်တယ်လုပ်သားအင်အား များပြားတဲ့ နိုင်ငံစာရင်းမှာ ဘင်္ဂလားဒေ့ရှ် ပါ၀င်ပြီး၊ အွန်လိုင်းလုပ်သား ဒုတိယအများဆုံး နိုင်ငံ ဖြစ်ပါတယ်။ အွန်လိုင်းမှာ အိုင်တီနဲ့ အသက်မွေးတဲ့ freelance နည်းပညာသမား ၅ သိန်းရှိပြီး တစ်နှစ်ကို ကန်ဒေါ်လာ သန်း ၁၀၀ လောက် ၀င်ငွေရှိပါတယ်။

နိုင်ငံခြားကို ဆော့ဖ်၀ဲရောင်းတာလို digital export လုပ်ငန်းကို လွန်ခဲ့တဲ့ နှစ် ၂၀ လောက်ကတည်းက ဘင်္ဂလားဒေ့ရှ်မှာ စတင်လုပ်ဆောင်နိုင်ခဲ့ပါတယ်။ 

GDP နှင့် လူ့အဖွဲ့အစည်း တိုးတက်မှု

ဘင်္ဂလားဒေ့ရှ်ဟာ လူဦးရေရော၊ စီးပွးရေးအင်အားရော ကြီးမားတဲ့ တရုတ်နဲ့ အိန္ဒိယ နှစ်နိုင်ငံကြားမှာ ရှိနေတာပါ။ 

အိန္ဒိယဟာ ကမ္ဘာ့ စီးပွားရေးအင်အားအကောင်းဆုံး နိုင်ငံတွေထဲက တစ်ခုဖြစ်ပြီး ဘင်္ဂလားဒေ့ရှ်ထက် စီးပွားရေးအင်အား ၁၀ ဆ ကျော် ကြီးပါတယ်။ 

ဒါပေမယ့် တစ်ဦးချင်း ဂျီဒီပီမှာ ဘင်္ဂလားဒေ့ရှ်ဟာ အိန္ဒိယကို ကျော်သွားတာ ၂ နှစ် ရှိသွားပါပြီ။ အမျိုးသမီးတွေ စာတတ်မြောက်မှုနှုန်း၊ အသက် ၅ နှစ်အောက် ကလေးငယ်တွေ သေဆုံးမှုနှုန်းကျဆင်းမှု စတဲ့ အခြား လူမှုရေးဆိုင်ရာ ဖြစ်ပေါ်တိုးတက်မှု အချက်အလက်တွေမှာတော့ လွန်ခဲ့တဲ့ ၇ နှစ်လောက်ကတည်းက ဘင်္ဂလားဒေ့ရှ်ဟာ အိန္ဒိယထက် သာလွန်နေခဲ့ပြီ ဖြစ်ပါတယ်။ 

မတ် ၂၂၊ ၂၀၂၂

M-Media 

-တရုတ်နဲ့ ဖက်စပ်ဆောက်လုပ်တဲ့ ကျောက်မီးသွေး ဓတ်အားပေးစက်ရုံကို ဘင်္ဂလားဒေ့ရှ်က တနင်္လာနေ့မှာ ဖွင့်လှစ်ခဲ့ပြီး ဒီစက်ရုံကြောင့် နိုင်ငံတစ်၀ှမ်းလုံးကို ရာနှုန်းပြည့် လျှပ်စစ်ဓာတ်အား ပေးနိုင်ပြီ ဖြစ်ပါတယ်။

နိုင်ငံအလယ်ပိုင်း ပိုင်ရာမြို့က အဲဒီဓာတ်အားပေးစက်ရုံဟာ Ultra Supercritical နည်းပညာကို အသုံးပြုထားတဲ့ စက်ရုံဖြစ်ပြီး ဓာတ်အား ၁၃၂၀ မီဂါ၀ပ် ထုတ်လုပ်ပေးနိုင်ပါတယ်။ 

မနေ့က ဖွင့်ပွဲအခမ်းအနားကို ၀န်ကြီးချုပ် ရှိခ်ဟာဆီနာ၊  ဘင်္ဂလားဒေ့ရှ်ဆိုင်ရာ တရုတ်သံအမတ် လီဂျင်မင်တို့ တက်ရောက်ခဲ့ပါတယ်။ 

ဓာတ်အားပေးစက်ရုံကို ၂၀၁၆ ခုနှစ်က စတင်ဆောက်လုပ်တာဖြစ်ပြီး ကမ္ဘာပေါ်မှာ Ultra Supercritical နည်းပညာကို အသုံးပြုတဲ့ ၁၃ ခုမြောက် နိုင်ငံအဖြစ် ဘင်္ဂလားဒေ့ရှ်က မှတ်တမ်း၀င်ခဲ့ပါတယ်။ 

ဒီဓာတ်အားပေးစက်ရုံကြောင့် နိုင်ငံတစ်၀ှမ်းက အိမ်ထောင်စုတိုင်းကို ဓာတ်အားပေးနိုင်ပြီ ဖြစ်ပါတယ်။ 

“အိမ်ထောင်စုတိုင် မီးပေးနိုင်တော့မယ့် ဒီစက်ရုံကြီးဟာ ကြီးမားတဲ့ အောင်မြင်မှုကြီးပါ” လို့ ၀န်ကြီးချုပ် ရှိခ်ဟာဆီနာက ဖွင့်ပွဲအခမ်းအနားမှာ ပြောကြားခဲ့ပါတယ်။ 

တရုတ်အစိုးရနဲ့ စီမံကိန်းမှာပါ၀င်ခဲ့သူအားလုံးကိုလည်း ကျေးဇူးတင်ကြောင်း ၀န်ကြီးချုပ်က ထည့်သွင်းပြောဆိုခဲ့ပါတယ်။ 

ဘင်္ဂလားဒေ့ရှ်နိုင်ငံကို တည်ထောင်သူ ရှိခ် မူဂျီဘူ ရဟ်မန်ရဲ့ အသက် နှစ် ၁၀၀ ပြည့်တဲ့ ၂၀၂၂ ခုနှစ်မှာ တစ်နိုင်ငံလုံး မီးပေးနိုင်အောင် ဆောင်ရွက်မယ်လို့ ဘင်္ဂလားဒေ့ရှ်အစိုးရက ကတိပြုထားပြီး ဒီကတိက၀တ်ကို အကောင်အထည်ဖော်နိုင်ခဲ့တာလည်း ဖြစ်ပါတယ်။ 

Ref: Xhinhua