အောက်တိုဘာ ၁၅၊ ၂၀၁၉
M-Media
-ဘင်္ဂလားဒေ့ရှ်ဟာ ပြည်တွင်းထုတ်သင်္ဘောတွေကို လက်ရှိမှာ အာရှ၊ အာဖရိကနဲ့ ဥရောပက နိုင်ငံပေါင်း ၁၂ နိုင်ငံလောက်ကို တင်ပို့ရောင်းချနေပြီး လာမယ့် ၁၀ စုနှစ်တစ်ခုအတွင်း ကမ္ဘာ့သင်္ဘောတည်ဆောက်ရေးလုပ်ငန်းမှာ ထိပ်တန်းနေရာတစ်ခု ရောက်လာနိုင်တယ်လို့ ကျွမ်းကျင်သူတွေက သုံးသပ်ထားပါတယ်။
ပြီးခဲ့တဲ့ရက်ပိုင်းကပဲ ယူအေအီးအခြေစိုက် သင်္ဘောကုမ္ပဏီ Al Rashid က ဘင်္ဂလားဒေ့ရှ်နိုင်ငံရဲ့ ထိပ်တန်း သင်္ဘောတည်ဆောက်ရေးလုပ်ငန်း Western Marine Shipyard Limited (WMS) နဲ့ ဆွေးနွေးမှုတွေပြုလုပ်ကာ ကန်ဒေါ်လာ ၆.၈ သန်း တန်ဖိုးရှိတဲ့ ရေနံတင်သင်္ဘော ၂ စင်း ဆောက်လုပ်ဖို့ စာချုပ်ချုပ်ဆိုခဲ့ပါတယ်။
WMS ဥက္ကဌ ဆိုက်ဖွလ် အစ္စလာမ်က အစိုးရရဲ့ ကူညီပံ့ပိုးမှုနဲ့အတူ နိုင်ငံရဲ့ ပို့ကုန်ပုံစံ ပြောင်းလဲမှုမှာ သင်္ဘောတည်ဆောက်ရေးလုပ်ငန်းက အရေးပါတဲ့ အခန်းကဏ္ဍကနေ ပါဝင်လာလိမ့်မယ်လို့ ပြောကြားခဲ့ပါတယ်။
“ဒီကဏ္ဍမှာ အဓိကပြဿနာက စီမံကိန်းကြီးတွေ လုပ်ဆောင်ဖို့အတွက် အရင်းအနှီး လိုအပ်တာပါ။ ဘဏ်တွေ၊ ဘဏ္ဍာရေးလုပ်ငန်းတွေက ရှေ့ထွက်လာပြီး ပါဝင်ကူညီပေးမယ်ဆိုရင် ပြည်တွင်းနဲ့ ပြည်ပကနေ အမှာတွေ ပိုရလာနိုင်ပါတယ်”
ဘင်္ဂလားဒေ့ရှ် သင်္ဘောကျင်းများအဖွဲ့ AEOSIB ရဲ့ ဥက္ကဌ အဘ်ဒူလာဟီ ဘာရီက ဘင်္ဂလားဒေ့ရှ်ကထုတ်လုပ်တဲ့ သင်္ဘောတွေဟာ အိန္ဒိယ၊ ပါကစ္စတန်၊ ဆော်ဒီအာရေဗျ၊ ယူအေအီး၊ နော်ဝေ၊ ဆွီဒင်၊ ဒိန်းမတ်၊ ဖင်လန်၊ အီတလီ၊ ဂျာမနီနဲ့ အာဖရိကနိုင်ငံအချို့ကို တင်ပို့နေရပြီး အလားအလာကောင်းတွေ အများကြီးရှိတယ်လို့ ပြောကြားခဲ့ပါတယ်။
လက်ရှိ ဘင်္ဂလားဒေ့ရှ်မှာ သင်္ဘောကျင်းပေါင်း ၁၀၀ ကျော်လောက် ရှိနေပြီး ပြည်တွင်းနဲ့ ပြည်ပစျေးကွက်အတွက် သင်္ဘောအရွယ်အစားပေါင်းစုံကို ထုတ်လုပ်နေပါတယ်။ အဲဒီအထဲမှာ သင်္ဘောကျင်း ၁၂ ခုက နိုင်ငံတကာရဲ့ ဝယ်လိုအားကို ဖြည့်ဆည်းပေးနိုင်မယ့် အနေအထားကို ရောက်ရှိနေပြီ ဖြစ်ပါတယ်။
ဘာရီက အစိုးရနဲ့ ပုဂ္ဂလိကတို့ရဲ့ ပူးပေါင်းပါဝင်မှုနဲ့အတူ နောက်ထပ် ၅ နှစ်အတွင်း ဘင်္ဂလားဒေ့ရှ်ရဲ့ သင်္ဘောတည်ဆောက်ရေးလုပ်ငန်း ရွှေခေတ်ကာလကို ရောက်ရှိလာတော့မယ်လို့ သုံးသပ်ခဲ့ပါတယ်။
“စီစဉ်ထားတဲ့အတိုင်းသာ သွားမယ်ဆိုရင် လာမယ့် ၅ နှစ်အတွင်း ကျွန်တော်တို့ရဲ့ သင်္ဘောတည်ဆောက်ရေးလုပ်ငန်းကနေ ရရှိမယ့်ဝင်ငွေဟာ တစ်နှစ်ကို ကန်ဒေါ်လာ ၁ ဘီလီယံ ကျော်လာပါလိမ့်မယ်”
ဆော်ဒီနဲ့ ယူအေအီးအပါအဝင် အရှေ့အလယ်ပိုင်း နိုင်ငံတွေနဲ့ ဆက်ဆံရေးကောင်း တည်ဆောက်ထားနိုင်တာကြောင့် နိုင်ငံရဲ့ သင်္ဘောတည်ဆောက်ရေးလုပ်ငန်းမှာ ပိုမို အကျိုးဖြစ်ထွန်းလိမ့်မယ်လို့ ဘာရီက ဆိုပါတယ်။
ဘာရီဦးစီးတဲ့ Ananda သင်္ဘောကျင်းဟာ လက်ရှိမှာ ကုန်တင်သင်္ဘောတွေ တည်ဆောက်ကာ ဂျာမနီနိုင်ငံကို တင်ပို့နေပြီး ဥရောပစျေးကွက်ကို ထိုးဖောက်ဝင်ရောက်ဖို့ ပြင်ဆင်နေပါတယ်။
ဘင်္ဂလားဒေ့ရှ်နိုင်ငံရဲ့ စီးပွားရေးဟာ ပြီးခဲ့တဲ့နှစ်အနည်းငယ်အတွင်းမှာ တစ်ရိပ်ရိပ် တက်လာခဲ့ပြီး ကမ္ဘာ့အထည်ချုပ်လုပ်ငန်းမှာလည်း တရုတ်နိုင်ငံကို ယှဉ်ပြိုင်နိုင်စွမ်း ရှိတဲ့အထိ ဖြစ်လာပါတယ်။
Ref: Arab News
