ဇူလိုင် ၅၊ ၂၀၁၅
M-Media
– တရုတ်နိုင်ငံမှာ မိမိတို့နိုင်ငံ၏ ကုန်သွယ်မှု လျှို့ဝှက်ချက်များနှင့် အစိုးရအချက်အလက် အများအပြားကို ခိုးယူခဲ့သည်ဟု ၂၀၁၆ ခုနှစ် သမ္မတလောင်းအဖြစ် ၀င်ရောက်ယှဉ်ပြိုင်မည့် ဟီလာရီကလင်တန်က ပြောကြားလိုက်သည်။
နယူးဟမ့်ရှိုင်းယား၌ ယမန်နေ့က ပြုလုပ်ခဲ့သည့် မဲဆွယ်ပွဲတွင် ကလင်တန်က ထိုကဲ့သို့ ပြောကြားလိုက်ခြင်းဖြစ်ပြီး မိမိအနေဖြင့် တရုတ်နိုင်ငံအား ငြိမ်းချမ်းစွာ ကြီးထွားလာသည်ကို မြင်လိုသော်လည်း မိမိတို့အမေရိကန်မှာ ဆက်လက်၍ နိုးနိုးကြားကြားရှိသွားမည်ဟု ထည့်သွင်းသတိပေးခဲ့သည်။
“ဒါပေမယ့် ကျွန်မတို့ အပြည့်အ၀ နိုးနိုးကြားကြားရှိရမှာပါ။ တရုတ်ရဲ့ စစ်တပ်ဟာ အလျင်အမြန် ကြီးထွားလာနေပါတယ်။ စစ်ဘက်ဆိုင်ရာ နေရာတွေကို သူတို့ တည်ဆောက်နေပြီး ကျွန်မတိုနဲ့ စာချုပ်စာတမ်းတွေရှိထားတဲ့ ဖိလစ်ပိုင်လို နိုင်ငံတွေကို ထပ်ပြီး ခြိမ်းခြောက်နေပါတယ်။ ဘာ့ကြောင့်လည်းဆိုတော့ အချေအတင်ဖြစ်နေတဲ့ နေရာမှာ သူတို့ ဆောက်နေလို့ပါပဲ ” ဟု ၂၀၀၉ ခုနှစ်မှ ၂၀၁၃ ခုနှစ်အထိ နိုင်ငံခြားရေးဝန်ကြီးအဖြစ် တာဝန်ထမ်းဆောင်ခဲ့သော ဟီလာရီကလင်တန်က ပြောကြားခဲ့သည်။
ထို့ပြင် တရုတ်နိုင်ငံမှာ ကာကွယ်ရေးကန်ထရိုက်တာများမှ ကုန်သွယ်မှုဆိုင်ရာ လျှို့ဝှက်ချက်များကို ခိုးယူခြင်း၊ အစိုးရ၏ အချက်အလက် အမြောက်အများကို ခိုးယူခြင်းတို့ဖြင့် အမြတ်ထုတ်ရေး ဆောင်ရွက်နေသည်ဟုလည်း ၎င်းက ဆိုသည်။
တရုတ်နိုင်ငံနှင့်ပတ်သက်၍ ကလင်တန်၏ ထိုသို့ပြောဆိုမှုမှာ သမ္မတအိုဘားမား၏ ဒီမိုကရက်တစ်အုပ်ချုပ်ရေးအဖွဲ့မှ များသောအားဖြင့် အသုံးပြုသော စကားများထက် ပိုမို၍ ပြင်းထန်နေသည်။
၂၀၁၆ ရွေးကောက်ပွဲတွင် သမ္မတလောင်းအဖြစ် ၀င်ရောက်ယှဉ်ပြိုင်မည့် ကလင်တန်၏ ထိုပြောကြားမှုအတွက် မှတ်ချက်ပေးရန် အိမ်ဖြူတော်က ငြင်းဆိုခဲ့သည်။
အမေရိကန်၏ ၀န်ထမ်းရေးရာ စီမံခန့်ခွဲမှုရုံးမှ ကွန်ပျူတာစနစ်ကို ချိုးဖျက်ဝင်ရောက်၍ ယခင်နှင့် ယခု ၀န်ထမ်း စုစုပေါင်း ၄.၂ သန်း၏ အချက်အလက်များ ခိုးယူခံရမှုတွင် တရုတ်နိုင်ငံမှာ ထိပ်ဆုံးမှ သံသယရှိသူဖြစ်သည်ဟု အမေရိကန်အစိုးရ တာဝန်ရှိသူများက မကြားသေးမီက ပြောကြားထားသည်။ သို့သော်လည်း တရုတ်နိုင်ငံကမူ မိမိတို့ ဆောင်ရွက်ခြင်းမရှိဟု ငြင်းဆိုခဲ့သည်။
Ref: Aljazeera
