ဇွန် ၁၇၊ ၂၀၁၅
M-Media
– တရုတ်နိုင်ငံ ဇင်ကျန်းပြည်နယ် အနောက်ပိုင်းရှိ ဒေသများမှ အစ္စလာမ်ဘာသာဝင် ကွန်မြူနစ်ပါတီဝင်များ၊ အစိုးရ၀န်ထမ်းများ၊ ကျောင်းသားများနှင့် ဆရာများအနေဖြင့် မကြာခင်ကျရောက်တော့မည့် ရမ်ဇာန်ဥပုသ်လတွင် ဥပုသ်သီလ ဆောက်တည်ခြင်း မပြုရန် တရုတ်အစိုးရက တားဆီးလိုက်ပြီး ဒေသခံ ၀ီဂါလူမျိုးများအနေဖြင့် စိုးရိမ်မှုများ မြင့်တက်လာခဲ့သည်ဟု သိရသည်။
“တရုတ်အစိုးရက ပိတ်ပင်မှုတွေကို တိုးမြှင့်နေပြီး ရမ်ဇာန်ကပ်လာတာနဲ့ စောင့်ကြည့်မှုတွေ ပြုလုပ်နေပါတယ်။ ၀ီဂါလူမျိုးတွေရဲ့ ဘာသာတရားကို နိုင်ငံရေးထဲ တော်တော်လေး သွတ်သွင်းပါတယ်။ ပြီးတော့ ထိန်းချုပ်မှု မြင့်တက်လာတာဟာ ပြင်းထန်တဲ့ ခုခံမှုကို ဖြစ်စေနိုင်ပါတယ်” ဟု အဝေးရောက် ကမ္ဘာ့ဝီဂါကွန်ဂရက်အဖွဲ့မှ ထုတ်ပြန်သော ကြေညာချက်တွင် အဖွဲ့၏ ပြောရေးဆိုခွင့်ရှိသူ ဒီလ်ဇက် ရာဇစ်က ပြောကြားခဲ့သည်။
တရုတ်အာဏာပိုင်များအနေဖြင့် ၀ီဂါလူမျိုး အစိုးရ၀န်ထမ်းများကို ဥပုသ်သီလ ဆောက်တည်ခြင်းမပြုရန် တိုက်တွန်းမှုအား ရာဇစ်က ရှုတ်ချခဲ့ပြီး အစ္စလာမ်သာသနာကို ထိန်းချုပ်ရန် ရည်ရွယ်မှုအဖြစ် ရှုမြင်သည်ဟု ပြောကြားခဲ့သည်။
တရုတ်အစိုးရ၏ ၀ဘ်ဆိုက်တစ်ခုအရ ကာဇက်ကစ္စတန်နယ်စပ်အနီး ဂျင်ဂ်ဟီကောင်တီရှိ ဟာလာလ်စားသောက်ဆိုင်များကို ရမ်ဇာန်လအတွင်း ပုသ်သီလဆောက်တည်ကြသော နေ့ဘက်အချိန်၌ ဖွင့်လှစ်ရန် အစားသောက် ဘေးအန္တရာယ်ကင်းရှင်းရေး တာဝန်ရှိသူများက တိုက်တွန်းထားသည်ဟု သိရသည်။
ထို့ပြင် ရမ်ဇာန်အတွင်း ထိုကဲ့သို့ ဖွင့်ထားသော ဟာလာလ် စားသောက်ဆိုင်များကို အစားသောက်ဘေးအန္တရာယ်ကင်းရှင်းရေး စစ်ဆေးသူများက လာရောက်ဆုချမည်ဟုလည်း အဆိုပါ ၀ဘ်ဆိုက်တွင် ဖော်ပြထားသည်။
ဇင်ကျန်းပြည်နယ်ရှိ မာရာလ်ဘီဇီကောင်တီတွင်လည်း ဘာသာရေးဆိုင်ရာ ကန့်သတ်ချုပ်ချယ်မှုများကို ပိုမိုပြုလုပ်လာပြီး ကွန်မြူနစ်ပါတီဝင်များအား “မိမိတို့တွင် ဘာသာအယူဝါဒမရှိ၊ ဘာသာရေးဆိုင်ရာ လှုပ်ရှားမှုများကို တက်ရောက်မည်မဟုတ်၊
ရမ်ဇာန်လတွင်လည်း ဥပုသ်သီလ ဆောက်တည်ခြင်းမပြု” ဟူသော ခံဝန်များကို နှုတ်ဖြင့်လည်းကောင်း၊ စာဖြင့်လည်းကောင်း ကတိပြုရန် အတင်းအဓမ္မ ဆောင်ရွက်ခဲ့သည်ဟုလည်း နိုင်ငံပိုင်မီဒီယာက ဖော်ပြခဲ့သည်။
တရုတ်အာဏာပိုင်များမှာ နှစ်စဉ် ရမ်ဇာန်ဥပုသ်လရောက်တိုင်း နိုင်ငံအနောက်မြောက်ပိုင်းရှိ ဇင်ကျန်းပြည်နယ်မှ ၀ီဂါမွတ်စလင်များကို ဘာသာရေးဆိုင်ရာ ကန့်သတ်ချုပ်ချယ်မှုများ အကြိမ်ကြိမ်အခါအခါ ပြုလုပ်ခဲ့သည်။
ရမ်ဇာန်ဥပုသ်လတွင် အရွယ်ရောက်ပြီးသော အစ္စလာမ်ဘာသာဝင် အမျိုးသား၊ အမျိုးသမီးတိုင်း ဥပုသ်သီလဆောက်တည်ရန်မှာ မလုပ်မနေရ ဖြစ်သည်။ သို့သော်လည်း ကျန်းမာရေးချို့တဲ့သူများ၊ ခရီးသွားသူများနှင့် ဥပုသ်သီလဆောက်တည်ခြင်းကြောင့် ကျန်းမာရေးအခြေအနေ ဆိုးရွားမည့်အန္တရာယ် ရှိနေသူများအတွက်မူ ပလပ်ခွင့်ရှိသည်။
တရုတ်ကွန်မြူနစ်အစိုးရမှာ ရမ်ဇာန်လတွင် ဥပုသ်သီလဆောက်တည်ခြင်းမပြုရန် အင်အားသုံး ဆောင်ရွက်ခြင်း အပါအ၀င် ဇင်ကျန်းပြည်နယ်ရှိ ၀ီဂါမွတ်စလင်များအား အစ္စလာမ်က သတ်မှတ်ထားသည့် လုံခြုံစွာ ၀တ်စားဆင်ယင်ခြင်းမပြုရန်နှင့် အစိုးရအဆောက်အအုံများတွင် ဘာသာရေးဆိုင်ရာ ကျင့်သုံးမှုများမပြုရန် တားမြစ်ပိတ်ပင်ခြင်း၊ မွတ်စလင်ဈေးဆိုင်များအနေဖြင့်
အစ္စလာမ်က တားမြစ်ထားသော အရက်နှင့် ဆေးလိပ်တို့ကို ရောင်းချရန် အတင်းအဓမ္မ ခိုင်းစေခြင်း စသည့် ဘာသာရေးဆိုင်ရာ ကန့်သတ်ချုပ်ချယ်မှုများနှင့် ဖျက်ဆီးမှုများကို နှစ်ပေါင်းများစွာ စနစ်တကျ ဆောင်ရွက်ပြုလုပ်လျက် ရှိနေသည်။
ထိုသို့ ကန့်သတ်ချုပ်ချယ်မှုများကို မခံနိုင်သည့်အတွက်ကြောင့် သဘောထားတင်းမာသည့် ၀ီဂါလူမျိုးအချို့က အစိုးရအား ပစ်မှတ်ထားသည့် တိုက်ခိုက်မှုများကို ပြီးခဲ့သည့် နှစ်အနည်းငယ်အတွင်း ပြုလုပ်လာကြသည်။
Ref: Onislam
