News @ M-Media

Tag: Chinese Muslims

  • ယူအေအီးတွင် တရုတ်ကစီမံသည့် ဝီဂါအကျဉ်းထောင်ရှိနေကြောင်း အထောက်အထား ထွက်ပေါ်လာ

    ယူအေအီးတွင် တရုတ်ကစီမံသည့် ဝီဂါအကျဉ်းထောင်ရှိနေကြောင်း အထောက်အထား ထွက်ပေါ်လာ

    ဩဂုတ် ၁၇၊ ၂၀၂၁
    M-Media

    -အာရပ်စော်ဘွားများပြည်ထောင်စု (ယူအေအီး) နိုင်ငံမှာ ဝီဂါတွေကို တရုတ်အစိုးရအလိုကျ ဖမ်းဆီးထိန်းသိမ်းထားတဲ့ သီးသန့်ထောင်တစ်ခု ရှိနေတယ်လို့ ဖမ်းခံရသူ အမျိုးသမီးတစ်ဦးက ထုတ်ဖော်ပြောဆိုလိုက်ပြီး နိုင်ငံခြားမှာ ဝီဂါတွေ၊ သဘောထားမတိုက်ဆိုင်သူတွေကို နှိပ်ကွပ်ဖို့ တရုတ်အစိုးရက ‘အမှောင်ကမ္ဘာ’’ ဖန်တီးထားတယ်ဆိုတဲ့ အထောက်အထား ပထမဆုံး ထွက်ပေါ်လာတာ ဖြစ်ပါတယ်။

    ခင်ပွန်းလောင်းက တရုတ်အစိုးရကို ဆန့်ကျင်သူဖြစ်တယ်ဆိုတဲ့ စွဲချက်နဲ့ ယူအေအီးမှာ ဖမ်းဆီးခံခဲ့ရတဲ့ အသက် ၂၆ နှစ်အရွယ် ၀ူဟွမ်ဆိုတဲ့ အမျိုးသမီးက သူကြုံတွေ့ရတာတွေကို AP သတင်းဌာနထံ ထုတ်ဖော်ပြောဆိုခဲ့တာ ဖြစ်ပါတယ်။ သူမဟာ ဒူဘိုင်းက ဟိုတယ်တစ်ခုမှာ ဖမ်းဆီးခံလိုက်ရပြီး ထောင်အဖြစ် အသွင်ပြောင်းထားကာ တရုတ်အာဏာပိုင်တွေစီမံတဲ့ အဆောက်အဦးတစ်ခုမှာ ထိန်းသိမ်းခံခဲ့ရတာပါ။

    အဲဒီမှာ ဝီဂါလူမျိုး အကျဉ်းသားနှစ်ဦးကို တွေ့ခဲ့ရတယ်လို့ ၀ူဟွမ်က ပြောပါတယ်။ ခင်ပွန်းလောင်း အသက် ၁၉ နှစ်အရွယ် ဝမ်ကျင်းယူက အရှက်ရအောင် လုပ်တယ်ဆိုပြီး တရုတ်အာဏာပိုင်တွေက ၀ူဟွမ်ကို အဓမ္မ လက်မှတ်ရေးထိုးခိုင်းခဲ့ပြီးတဲ့နောက် ဇွန်လ ၈ ရက်နေ့မှာ ပြန်လွှတ်ပေးခဲ့ပါတယ်။ ၀ူဟွမ်ဟာ လက်ရှိ နယ်သာလန်နိုင်ငံမှာ ခိုလှုံနေရသူပါ။

    တရုတ်နိုင်ငံအနောက်ပိုင်း ရှင်ကျန်းပြည်နယ်မှာ ဝီဂါနဲ့ အခြားလူမျိူးစုတွေကို တရုတ်အစိုးရက သန်းနဲ့ချီ အကျဉ်းစခန်းမှာ ထိန်းသိမ်းထားတာ၊ လူမျိုးရေး အမှတ်သညာ၊ ယဉ်ကျေးမှု၊ ဘာသာစကားနဲ့ ဘာသာတရား ပျောက်သွားအောင် လုပ်ဆောင်တာ၊ ညှင်းပမ်းနှိပ်စက်တာတွေ ရှိနေတယ်ဆိုတဲ့ အထောက်အထားတွေကို ကမ္ဘာ့မီဒီယာတွေ၊ လူ့အခွင့်အရေး အဖွဲ့အစည်းတွေက ပြီးခဲ့တဲ့ ၂ နှစ်အတွင်း ဖော်ထုတ်ခဲ့ကြပါတယ်။

    နိုင်ငံရပ်ခြားမှာလည်း ဝီဂါလိုလူမျိုးစုတွေ၊ သူတို့ကို ဆန့်ကျင်သူတွေကို ဖမ်းဆီးနှိပ်ကွပ်ဖို့ တရုတ်အစိုးရက ‘အမှောင်ကမ္ဘာတွေ’ ဖန်တီးထားတယ်ဆိုတဲ့ သတင်းတွေ ထွက်နေပြီး ၀ူဟွမ်ရဲ့ အခုပြောကြားမှုက ပထမဆုံး သက်သေအထောက်အထား ဖြစ်ပါတယ်။

    ဝီဂါတွေကို လွှဲပြောင်းပေး

    ဒူဘိုင်းက တရုတ်အကျဉ်းထောင် ဘယ်နေရာမှာ ရှိလဲဆိုတာ အတိအကျ မပြနိုင်တာကြောင့် ၀ူဟွမ်ရဲ့ ပြောကြားမှုတွေကို AP သတင်းဌာနက သီးခြားအတည်ပြုနိုင်ခြင်း မရှိပေမယ့် သူမရဲ့ နိုင်ငံကူးလက်မှတ်မှာ တုံးထုထားတာ၊ တရုတ်အာဏာပိုင်တစ်ဦးက သူမကို မေးခွန်းမေးတဲ့ ဖုန်းအသံဖိုင်၊ ဖမ်းခံထားရတဲ့ ဝီဂါနှစ်ယောက်ကို ကယ်တင်ဖို့ ကြားလူတစ်ဦးနဲ့ ဆက်သွယ်ပေးတဲ့ သူမရဲ့ မက်ဆေ့ချ် စတဲ့ ၀ူဟွမ်ရဲ့ ပြောကြားမှုကို ခိုင်လုံစေမယ့် အထောက်အထားတွေကို AP သတင်းဌာနက ရရှိခဲ့ပါတယ်။

    တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဟွာချွမ်ယင်က ၀ူဟွမ်ရဲ့ ဒီပြောကြားမှုတွေဟာ မဟုတ်မှန်ဘူးလို့ AP သတင်းဌာနကို ဖြေကြားခဲ့ပါတယ်။ ယူအေအီးကတော့ တုန့်ပြန်ပြောဆိုခြင်း မရှိသေးပါဘူး။

    ထိုင်ဝမ် Academia Sinica အသင်းက လက်ထောက် ပရော်ဖက်ဆာ ချန်ယုကျီက ​နိုင်ငံခြားထွက်ပြေးသွားတဲ့ ဝီဂါတွေကို တရုတ်အစိုးရက ပြန်ရအောင် နည်းလမ်းပေါင်းစုံနဲ့ လုပ်ဆောင်နေပြီး၊ ဘုရားရှိခိုးတာလို လုပ်ရပ်မျိုးကို အကြမ်းဖက်စွဲချက်နဲ့ တရားစွဲထောင်ချတာတွေ ရှိတယ်လို့ ပြောကြားခဲ့ပါတယ်။ ဒူဘိုင်းမှာ ဖမ်းခံရတဲ့ ၀ူဟွမ်နဲ့ သူမရဲ့ ခင်ပွန်းလောင်းတို့ဟာ တရုတ်နိုင်ငံက လူများစုဖြစ်တဲ့ ဟန်တရုတ်လူမျိုးတွေ ဖြစ်ပါတယ်။

    ယူအေအီးဟာ ဝီဂါတွေကို ဖမ်းဆီးစစ်ဆေးကာ တရုတ်အလိုကျ ပြန်ပို့တာတွေ လုပ်နေတယ်ဆိုတာ အရင်ကတည်းက သတင်းထွက်နေတာ ဖြစ်ပါတယ်။

    Detained in Dubai ဆိုတဲ့ အကြံပေးရေးအဖွဲ့ကို ဖွဲ့စည်းထားတဲ့ ရဒ်ဟာ စတီလင်းက အကျဉ်းထောင်တစ်ဖြစ်လဲ ယူအေအီးက အဆောက်အဦးတွေမှာ ဖမ်းဆီးထိန်းသိမ်းခံခဲ့ရသူ တစ်ဒါဇင်လောက်နဲ့ ဆက်သွယ်ဆောင်ရွက်ဖူးပြီး၊ အဲဒီအထဲမှာ ကနေဒါ၊ အိန္ဒိယနဲ့ ဂျော်ဒန်နိုင်ငံသားတွေ ပါဝင်ပေမယ့် တရုတ်နိုင်ငံကလူ မပါဝင်ဘူးလို့ ဆိုပါတယ်။

    “သူတို့နဲ့ မဟာမိတ်ဖြစ်တဲ့ နိုင်ငံခြားအစိုးရတွေအလိုကျ ယူအေအီးက လူတွေဖမ်းဆီးပေးတယ်ဆိုတာကိုတော့ သံသယဖြစ်စရာ မလိုပါဘူး”

    ဒူဘိုင်းက အကျဉ်းစခန်း

    မေလ ၂၇ နေ့မှာ ၀ူဟွမ်ကို ဒူဘိုင်းက သူမတည်းရာ ဟိုတယ်မှာ တရုတ်အာဏာပိုင်တွေက လာရောက်မေးမြန်းခဲ့ပြီး နောက်ပိုင်းမှာ ဒူဘိုင်းရဲတပ်ဖွဲ့က ရဲစခန်းကို ခေါ်ဆောင်သွားခဲ့ပါတယ်။

    ၃ ရက်မြောက်နေ့မှာတော့ ဒူဘိုင်း တရုတ်ကောင်စစ်ဝန်ရုံးက ကောင်စစ်ဝန် လီရှုဟန် ရောက်လာပြီး တရုတ်အစိုးရကို ဆန့်ကျင်ဖို့ နိုင်ငံခြားအဖွဲ့အစည်းတွေထံကနေ ငွေကြေးရယူခဲ့လားဆိုတာ သူမကို မေးမြန်းခဲ့တယ်လို့ ဆိုပါတယ်။

    အဲဒီနောက်မှာတော့ သူမကို လက်ထိပ်ခပ်ကာ ကားနဲ့ နာရီဝက်လောက်မောင်းရတဲ့ ၃ ထပ်အဆောက်အဦးတစ်ခုစီ ခေါ်ဆောင်သွားခဲ့ပါတယ်။ အဲဒီအဆောက်အဦးက အခန်းတိုင်းကို အချုပ်ခန်းအဖြစ် ဖန်တီးထားတယ်လို့ ၀ူဟွမ်က ပြောပါတယ်။

    အဲဒီမှာ ၀ူဟွမ်ဟာ ဝီဂါလူမျိုးအမျိုးသမီးနှစ်ဦးကို တွေ့ခဲ့ပြီး တစ်ဦးက ‘တရုတ်ပြည်မပြန်ချင်ဘူး တူရကီပဲ သွားချင်တယ်’ လို့ ပြောတာကို ကြားခဲ့တယ်လို့ သူမက ဆိုပါတယ်။

    အဲဒီထောင်မှာရှိတဲ့ အစောင့်တွေက ၀ူဟွမ်ကို ဖုန်းနဲ့ ဆင်းကတ်တစ်ခုပေးပြီး ခင်ပွန်းလောင်းနဲ့ အကူအညီပေးရေးအဖွဲ့ ChinaAid က အကြီးအကဲ ခရစ်ယာန်တရားဟောဆရာ ဘော့ဘ်ဖူကို ဖုန်းခေါ်ဖို့ ပြောခဲ့ပါတယ်။ ChinaAid ဟာ အကျိုးအမြတ်မယူတဲ့ ခရစ်ယာန် အကူအညီပေးရေးအဖွဲ့ဖြစ်ပြီး ၀ူဟွမ်တို့ကို ကူညီနေတာပါ။

    ခင်ပွန်းလောင်း ဝမ်နဲ့ ခရစ်ယာန်တရားဟောဆရာတို့က ၀ူဟွမ်ထံကနေ ဖုန်းခေါ်ဆိုမှု ရခဲ့ကြောင်း AP သတင်းဌာနကို အတည်ပြု ပြောဆိုခဲ့ပါတယ်။

    နောက်ဆုံးမှာ ၀ူဟွမ်ဟာ ခင်ပွန်းလောင်းက အရှက်ရအောင်လုပ်ပါတဲ့ဆိုတဲ့ ထွက်ဆိုချက်ကို လက်မှတ်ထိုးပေးခဲ့ရပြီး ပြန်လွတ်လာတဲ့အချိန်မှာ ယူကရိန်းကို သွားကာ ခင်ပွန်းလောင်း ဝမ်နဲ့ ပြန်လည်ပေါင်းစည်းနိုင်ခဲ့ပါတယ်။

    တရုတ်အာဏာပိုင်တွေက ယူကရိန်းအထိလိုက်ကာ ပြန်ခေါ်မယ်လို့ သူတို့နှစ်ဦးကို ခြိမ်းခြောက်တာကြောင့် ၀ူဟွမ်နဲ့ ခင်ပွန်းလောင်းတို့ဟာ နယ်သာလန်နိုင်ငံကို ထွက်ပြေးခိုလှုံခဲ့ရပါတယ်။

    Ref: AP

  • ဝီဂါများကို နည်းပညာသစ်စမ်းသည့် ပစ္စည်းများအဖြစ် တရုတ်အစိုးရက အသုံးပြုနေ

    ဝီဂါများကို နည်းပညာသစ်စမ်းသည့် ပစ္စည်းများအဖြစ် တရုတ်အစိုးရက အသုံးပြုနေ

    မေ ၂၇၊ ၂၀၂၁
    M-Media

    (ဓာတ်ပုံ – ဝီဂါများကို ထားရှိသည့် အကျဉ်းစခန်း)

    -ဉာဏ်ရည်တုနည်းပညာ AI အသုံးပြုထားတဲ့ ကင်မရာနဲ့ မျက်နှာကိုစကန်ဖတ်ကာ စိတ်ခံစားမှုဖော်ထုတ်တဲ့ နည်းပညာကို တရုတ်က ၀ီဂါမွတ်စလင်တွေနဲ့ စမ်းသပ်အကောင်အထည်ဖော်နေပြီး၊ လူ့အခွင့်အရေးလှုပ်ရှားသူတွေက ဒီလုပ်ရပ်ကို ရှုတ်ချလိုက်ပါတယ်။

    တရုတ်နိုင်ငံ အနောက်မြောက်ပိုင်း ဝီဂါတွေရဲ့ဒေသဖြစ်တဲ့ ရှင်ကျန်းပြည်နယ်က ရဲစခန်းတွေမှာ ဒီစနစ်ကို တပ်ဆင်တဲ့အချိန် ပါဝင်ခဲ့တဲ့ ဆော့ဖ်ဝဲ အင်ဂျင်နီယာတစ်ဦးက ဘီဘီစီသတင်းဌာနကို ဖွင့်ချခဲ့တာပါ။

    လန်ဒန်တရုတ်သံရုံးက ဒီသတင်းနဲ့ပတ်သက်လို့ မှတ်ချက်ပေးဖို့ ငြင်းဆိုခဲ့ပြီး နိုင်ငံအတွင်းက တိုင်းရင်းသားလူမျိုးစုအားလုံးရဲ့ နိုင်ငံရေးနဲ့ နိုင်ငံသားအခွင့်အရေးကို အာမခံပေးထားတယ်လို့ ဖြေကြားခဲ့ပါတယ်။

    ရှင်ကျန်းပြည်နယ်မှာ ဝီဂါအပါအဝင် အခြား တိုင်းရင်းသားလူနည်းစု စုစုပေါင်း ၁၂ သန်းလောက် ရှိနေတာပါ။ ဝီဂါနဲ့ အခြား အစ္စလာမ်ဘာသာဝင် လူမျိုးစုငယ်တွေဟာ တရုတ်အစိုးရရဲ့ ဖိနှိပ်ညှမ်းပမ်းမှုဒဏ်ကို ခံနေရတာ ဖြစ်ပါတယ်။

    ရှင်ကျန်းမှာ ဝီဂါအပါအဝင် လူတစ်သန်းလောက်ကို တရုတ်အစိုးရက အကျဉ်းစခန်းတွေထဲ ထည့်ထားပြီး တရုတ်ဇာတ်သွင်းနေတာကိုလည်း နိုင်ငံတကာမီဒီယာတွေ၊ လူ့အခွင့်အရေးအဖွဲ့တွေက ဖော်ထုတ်ခဲ့ကြပါတယ်။ ရှင်ကျန်းက လူနည်းစုတွေရဲ့ယဉ်ကျေးမှု၊ ဓလေ့ထုံးတမ်း၊ ရိုးရာ၊ ဘာသာတရားနဲ့ လူမျိုးပါ တိမ်ကောပျောက်ပျက်သွားအောင် တရုတ်အစိုးရက လုပ်နေတဲ့ သတင်းတွေလည်း ပြီးခဲ့တဲ့နှစ်အနည်းငယ်အတွင်း အများအပြား ထွက်လာခဲ့ပါတယ်။

    အခုလည်း AI ကင်မရာနဲ့ မျက်နှာအမူအရာကို စကန်ဖတ်ပြီး စိတ်အခြေအနေကို ဖော်ထုတ်တဲ့ နည်းပညာကို တရုတ်က ဝီဂါလူမျိုးတွေနဲ့ စတင်စမ်းသပ်နေတာပါ။

    “ဓာတ်ခွဲခန်းမှာ ကြွက်တွေကို အသုံးပြုစမ်းသပ်သလိုပဲ တရုတ်အစိုးရဟာ စမ်းသပ်မှုများစွာအတွက် ဝီဂါတွေကို အစမ်းသပ်ခံအဖြစ် အသုံးပြုနေတာပါ” လို့ ဒီနည်းပညာ တပ်ဆင်မှုမှာ ပါဝင်ခဲ့တဲ့ ဆော့ဖ်ဝဲ အင်ဂျင်နီယာက ဘီဘီစီသတင်းဌာနကို ပြောပါတယ်။

    လုံခြုံရေး စိုးရိမ်ရတဲ့အတွက် သူ့ရဲ့အမည်နဲ့ သူလုပ်တဲ့ကုမ္ပဏီတွေကို ထုတ်ဖော်ပြောဆိုခြင်း မရှိပါဘူး။

    စမ်းသပ်မယ့်လူရဲ့ ၃ မီတာအကွာမှာ ကင်မရာကို တပ်ဆင်ထားရပြီး အလိမ်ဖော်စက်နဲ့ ဆင်တူပေမယ့် နည်းပညာပိုမြင့်တယ်လို့လည်း ဒီ အင်ဂျင်နီယာက ပြောပါတယ်။ တရုတ်နိုင်ငံတစ်ဝှမ်းက ရဲစခန်းတွေမှာ အသုံးပြုတဲ့ အချုပ်ထိုင်ခုံမှာ လူတွေကို ထိုင်ခိုင်းပြီး စမ်းသပ်တာလို့ သူက ဆိုပါတယ်။

    “ထိုင်ခုံမှာ လက်နဲ့ခြေထောက်တွေကို သံကွင်းတွေနဲ့ခပ်ပြီး ချုပ်ထားတာပါ”

    မျက်နှာအမူအရာနဲ့ ချွေးပေါက်အနေအထား အပြောင်းအလဲကိုလိုက်ပြီး ဖော်ထုတ်နိုင်တဲ့အထိ ဒီနည်းပညာကို ဖန်တီးထားတယ်လို့လည်း ဆော့ဖ်ဝဲအင်ဂျင်နီယာက ပြောပါတယ်။

    စကန်ဖတ်လို့ရလာတဲ့ ရလဒ်ကို စက်ဝိုင်းပုံဇယား (Pie chart) နဲ့ပြပြီး စိုးရိမ်ကြောင့်ကြမှု စတဲ့ စိတ်ခံစားမှုအခြေအနေတွေကို အရောင်တွေနဲ့ ဖော်ပြပေးတာပါ။ တရုတ်အစိုးရဟာ ဒီနည်းပညာကို ဘာအထောက်အထားမှ မရှာနိုင်ခင် ကြိုတင်သုံးသပ်မှုကိစ္စမှာ အသုံးပြုဖို့ ရည်ရွယ်တာလို့လည်း အင်ဂျင်နီယာက ဆိုပါတယ်။

    ဒီအထောက်အထားတွေကို ကြည့်ရှုလေ့လာခွင့်ရခဲ့တဲ့ လူ့အခွင့်အရေး စောင့်ကြည့်အဖွဲ့ (HRW) က တရုတ်ရေးရာကျွမ်းကျင်သူ ဆိုဖီရစ်ချက်ဆန်က တရုတ်အစိုးရရဲ့ ဒီလုပ်ရပ်ဟာ အလွန်အမင်းဖိအားပေးထားတဲ့ အခြေအနေတစ်ခုအောက်မှာ ဖြစ်လာတဲ့ တုန်လှုပ်ခြောက်ခြားမှုကို အသုံးပြုပြီး လူတွေကို အပြစ်ရှိသူတွေအဖြစ် ပုံဖော်တာမျိုး ဖြစ်လာနိုင်တဲ့အတွက် တုန်လှုပ်ဖွယ်ကောင်းတယ်လို့ ပြောကြားခဲ့ပါတယ်။

    ဝီဂါများအားလုံးကို တရုတ်အစိုးရက ထိန်းချုပ်ထား

    တရုတ်အစိုးရ အာဏာပိုင်တွေဟာ ဝီဂါတွေရဲ့ DNA နမူနာတွေ ပုံမှန် တောင်းယူလေ့ရှိပြီး၊ ဒစ်ဂျစ်တယ်စကန်ဖန်တာ၊ အစိုးရ အက်ပလီကေးရှင်းကို ဖုန်းမှာ ဒေါင်းလုပ်ဆွဲခိုင်းပြီး ဖုန်းနံပါတ်၊ စာတိုအပါအဝင် ဖုန်းထဲရှိသမျှ အချက်အလက်အားလုံးကို ရယူတာတွေ လုပ်ဆောင်နေတယ်လို့ ကိုလိုရာဒိုတက္ကသိုလ်က ပညာရှင် ဒါရန် ဘိုင်လာက ပြောပါတယ်။

    “ဝီဂါတွေဟာ ဒေတာတွေထုတ်ပေးရတဲ့ဘ၀ ရောက်နေတာပါ။ စမတ်ဖုန်းဆိုတာ အမြဲတမ်းယူသွားရတဲ့ပစ္စည်းဖြစ်ပြီး ဒါကို ယူမသွားဘူးဆိုရင် အဖမ်းခံရတယ်။ ယူသွားပြန်တော့လည်း နောက်ယောင်ခံခြင်းကို ခံနေရပြန်ပါတယ်။ ဝီဂါတွေဟာ ပြေးပေါက်မရှိတော့ဘူးလို ခံစားနေရတာပါ”

    ဒီအချက်အလက်တွေကို Integrated Joint Operations Platform လို့ခေါ်တဲ့ ကွန်ပျူတာစနစ်ထဲကို ထည့်သွင်းပြီး၊ အိမ်ရှေ့ကမထွက်ဘဲ အိမ်နောက်ဖေးကထွက်တာ၊ ကိုယ့်ရဲ့ကားမှာ အသုံးပြုလို့မရတဲ့ ဓာတ်ငွေ့ကို တင်ဆောင်တာတွေဟာ ဥပဒေချိုးဖောက်တဲ့လုပ်ရပ်အဖြစ် သတ်မှတ်တဲ့အထိ ဒီကွန်ပျူတာစနစ်ကို အသုံးပြုနေတယ်လို့ HRW က ပြောပါတယ်။

    “အာဏာပိုင်တွေဟာ လူနေအိမ်တွေရဲ့ အိမ်အ၀မှာ QR ကုတ်တွေထားပြီး ဘယ်သူက ဒီအိမ်မှာ ရှိရမယ်၊ ဘယ်သူက မရှိရဘူး စတာမျိုးတွေကို အလွယ်တကူ သိရှိစောင့်ကြည့်နိုင်အောင် လုပ်ထားပါတယ်”

    လူနည်းစုတွေအပေါ် ဒီလို စောင့်ကြည့်၊ ထိန်းချုပ်၊ ဖိနှိပ်တဲ့ တရုတ်အစိုးရရဲ့ လုပ်ရပ်တွေမှာ Huawei လို နည်းပညာကုမ္ပဏီတွေက ပူးပေါင်းပါဝင်နေတယ်ဆိုတဲ့ သတင်းတွေလည်း ထွက်နေပါတယ်။

    Ref: BBC

  • ဝီဂါများအပေါ် တရုတ်၏ကျူးလွန်မှုက လူမျိုးတုန်းသတ်ဖြတ်မှု သတ်မှတ်ချက် ၅ ချက်စလုံးနှင့် ကိုက်ညီနေ

    ဝီဂါများအပေါ် တရုတ်၏ကျူးလွန်မှုက လူမျိုးတုန်းသတ်ဖြတ်မှု သတ်မှတ်ချက် ၅ ချက်စလုံးနှင့် ကိုက်ညီနေ

    မတ် ၁၁၊ ၂၀၂၁
    M-Media

    -တရုတ်အစိုးရဟာ ဝီဂါမွတ်စလင်တွေအပေါ် လူမျိုးတုန်းသတ်ဖြတ်မှု ကျူးလွန်နေတယ်ဆိုတာကို မြေပြင်အထောက်အထားတွေက ရှင်းရှင်းလင်းလင်း ခိုင်ခိုင်မာမာ ဖော်ပြနေတယ်လို့ အမေရိကန်အခြေစိုက် တတ်သိပညာရှင်များအဖွဲ့ Newlines Institute for Strategy and Policy က ပြောကြားလိုက်ပါတယ်။

    Newlines Institute for Strategy and Policy အဖွဲ့ဟာ အင်္ဂါနေ့က ဝီဂါကိစ္စနဲ့ပတ်သက်ပြီး အစီရင်ခံစာတစ်စောင် ထုတ်ပြန်ခဲ့တာပါ။ ၁၉၄၈ ခုနှစ် လူမျိုးတုန်းသတ်ဖြတ်မှု တားဆီးကာကွယ်ရေးနှင့် အပြစ်ပေးအရေးယူရေး သဘောတူညီချက်ပါ အချက်အလက်တွေကို အခြေခံပြီး သုံးသပ်လေ့လာကာ လွတ်လပ်တဲ့အဖွဲ့အစည်းက ထုတ်ပြန်တဲ့ ပထမဆုံး အစီရင်ခံစာ ဖြစ်ပါတယ်။

    တရုတ်အစိုးရကထုတ်ပြန်တဲ့ စာရွက်စာတမ်းတွေ၊ မျက်မြင်သက်သေတွေရဲ့ ထွက်ဆိုချက်တွေ၊ ဂြိုဟ်တုပုံရိပ်တွေ အပါအဝင် အတည်ပြုလို့ရတဲ့ အထောက်အထားမှန်သမျှကို စုဆောင်းကာ နယ်ပယ်အသီးသီးက ကျွမ်းကျင်သူပေါင်း ၃၀ ကျော်နဲ့ လေ့လာ ဆန်းစစ်ခဲ့တာပါ။

    တရုတ်သမ္မတ ရှီကျင့်ဖျင်ဟာ ၂၀၁၄ ခုနှစ်က ‘အကြမ်းဖက်မှုတိုက်ဖျက်ရေး’ ဆိုတဲ့ခေါင်းစဉ်နဲ့ ဝီဂါလူမျိုးတွေကို ဖျက်ဆီးဖျောက်ဖျက်မယ့် စီမံကိန်းကို စတင်ခဲ့တယ်လို့ အစီရင်ခံမှာ ဖော်ပြထားပါတယ်။

    အဲဒီနောက် တရုတ်အာဏာပိုင်တွေဟာ လူသန်းချီ အကျဉ်းစခန်းထဲ ပိတ်လှောင်တာ၊ ဝီဂါခေါင်းဆောင်တွေကို သတ်ဖြတ်တာ၊ အဓမ္မသားကြောဖြတ်တာ၊ ကလေးတွေကို မိဘတွေထံကနေ ခွဲထုတ်တာတွေ လုပ်ဆောင်ခဲ့သလို၊ ဗလီတွေ၊ ဘာသာရေးနဲ့ ယဉ်ကျေးမှု အထိမ်းအမှတ် အဆောက်အဦးတွေ ဖျက်ဆီးကာ ဝီဂါလူမျိုးတွေရဲ့ အမှတ်သညာကိုဖျောက်ဖျက်ဖို့ လုပ်ဆောင်လာတယ်လို့ Newlines Institute for Strategy and Policy အဖွဲ့က ပြောပါတယ်။

    တရုတ်အစိုးရက ဝီဂါတွေအပေါ် ကျူးလွန်မှုတွေဟာ ​လူမျိုးတုန်းသတ်ဖြတ်မှု သတ်မှတ်ချက် ၅ ချက်စလုံးနဲ့ ကိုက်ညီနေတယ်ဆိုတဲ့ တိကျခိုင်မာတဲ့ အထောက်အထားတွေကို တွေ့ခဲ့ရကြောင်း လေ့လာသုံးသပ်ခဲ့တဲ့ ပညာရှင်တွေက ပြောပါတယ်။

    လူမျိုးတုန်းသတ်ဖြတ်မှုမြောက်တဲ့ အချက် ၅ ချက်က လူမျိုးစုတစ်စုကို သီးသန့်သတ်ဖြတ်တာ၊ အဲဒီလူမျိုးစုကို ရုပ်ပိုင်းဆိုင်ရာ စိတ်ပိုင်းဆိုင်အပေါ်မှာ ဆိုးဆိုးရွားရွား ဒုက္ခပေးတာ၊ လူမျိုးစုတစ်ခုလုံးရဲ့ အမှတ်သညာတစ်ခုလုံး ဒါမှမဟုတ် တစ်စိတ်တစ်ပိုင်း ပျက်ဆီးပပျောက်သွားစေမယ့် အခြေအနေမျိုးကို ရည်ရွယ်ချက်ရှိရှိ တွက်ချက် အကောင်အထည်ဖော် ဆောင်ရွက်တာ၊ ကလေးမွေးဖွားမှုကိုတားဆီးတဲ့ လုပ်ရပ်တွေ ဆောင်ရွက်တာ၊ အဲဒီလူမျိုးစုက ကလေးငယ်တွေကို အခြားလူမျိုးစုတွေဆီ အဓမ္မပို့ဆောင် ကြီးပြင်းစေတာတွေ ဖြစ်ပါတယ်။

    အစုလိုက်အပြုံလိုက် သေဆုံးမှု

    ဝီဂါတွေကို အကျဉ်းစခန်းထဲမှာ ပိတ်လှောင်ထားတဲ့ အစီအစဉ်အတွင်း အစုအလိုက်အပြုံလိုက်သေဆုံးမှု ဖြစ်ပေါ်ခဲ့တယ်ဆိုတဲ့ ခိုင်လုံတဲ့ သတင်းအချက်အလက်တွေကို ရရှိခဲ့သလို ဝီဂါခေါင်းဆောင်တွေကိုလည်း တရုတ်အစိုးရက သေဒဏ်ပေးသတ်ပစ်တာ၊ နှစ်ရှည်ထောင်ဒဏ်ချတာတွေ ရှိတယ်လို့ တတ်သိပညာရှင်များအဖွဲ့က ပြောပါတယ်။

    “အဓမ္မကျင့်တာ၊ လိင်ပိုင်းဆိုင်ရာစော်ကားတာ၊ လူမြင်ကွင်းမှာ အရှက်တကွဲအကျိုးနည်းအောင် လုပ်တာတွေအပါအဝင် ဝီဂါတွေဟာ စနစ်တကျညှင်းပမ်းမှု၊ ရက်စက်မှု၊ လူမဆန်မှု၊ နှိမ့်ချစော်ကားမှုတွေကို အကျဉ်းစခန်းထဲမှာရော အပြင်မှာပါ ခံစားနေရပါတယ်” လို့ အစီရင်ခံစာမှာ ဖော်ပြထားပါတယ်။

    တရုတ်အာဏာပိုင်တွေဟာ အရွယ်ကောင်း ဝီဂါအမျိုးသားတွေကို အသက်ရှင်ရပ်တည်လို့မရတဲ့ အခြေအနေမျိုးဖြစ်အောင် စနစ်တကျ အကျဉ်းချသလို၊ အလုပ်ကြမ်းစခန်းတွေကို အဓမ္မပို့ပစ်တာ၊ ဝီဂါမျိုးသမီးတွေကို အဓမ္မ သားကြောဖြတ်တာတွေ လုပ်ဆောင်ခဲ့ပါတယ်။

    ၂၀၁၉ တစ်နှစ်တည်းမှာပဲ ရှင်ကျန်းပြည်နယ်က က​လေးမွေးနိုင်တဲ့အရွယ် ဝီဂါအမျိုးသမီး အနည်းဆုံး ၈၀ ရာခိုင်နှုန်းကို သားကြောဖြတ်တာ၊ သန္ဓေတားပစ္စည်းထည့်တာတွေလုပ်ဖို့ တရုတ်အစိုးရက စီစဉ်ခဲ့ကြောင်း အစီရင်ခံစာမှာ ဖော်ပြထားပါတယ်။ တရုတ်အစိုးရဟာ ရှင်ကျန်းပြည်နယ်မှာ သန္ဓေတားမှုဗျူဟာကို ကျယ်ကျယ်ပြန့်ပြန့် ဆောင်ရွက်ခဲ့တာကြောင့် ၂၀၁၅ ခုနှစ်ကနေ ၂၀၁၈ ခုနှစ်အတွင်း ဝီဂါတွေအများအပြားနေထိုင်တဲ့ ခရိုင် ၂ ခုမှာ မွေးဖွားနှုန်းဟာ ၈၄ ရာခိုင်နှုန်းအထိ ကျဆင်းသွားခဲ့ပါတယ်။

    ဝီဂါမိသားစုတွေထဲက မိဘတွေကို အကျဉ်းစခန်းတွေထဲမှာ ပိတ်လှောင်ကာ ကလေးတွေကို အစိုးရရဲ့ မိဘမဲ့​ေဂဟာကို အဓမ္မပို့ဆောင်ပြီး ဝီဂါတွေရဲ့ယဉ်ကျေးမှု၊ ဘာသာစကား၊အမွေအနှစ် ပျောက်သွားအောင် တရုတ်ဇာတ်သွင်းနေတယ်လို့ Newlines Institute for Strategy and Policy အဖွဲ့က ပြောပါတယ်။

    ရှင်ကျန်းမှာ ဒီလို မိဘမဲ့​ဂေဟာ တည်ဆောက်မှုအရေအတွက် မြင့်တက်လာခဲ့ပြီး ၂၀၁၇ ခုနှစ်ကနေ ၂၀၁၉ ခုနှစ်အတွင်း မိဘတွေထံကနေခေါ်ဆောင်ကာ ဒီကျောင်းတွေကို အဓမ္မပို့ခံရတဲ့ ဝီဂါကလေးငယ်အရေအတွက် ၇၆.၉ ရာခိုင်နှုန်းအထိ ရှိတယ်လို့ အစီရင်ခံစာမှာ ဖော်ပြထားပါတယ်။

    ဒီမူဝါဒတွေဟာ သမ္မတ ရှီကျင့်ဖျင်နဲ့ ရှင်ကျန်းပြည်နယ် ကွန်မြူနစ်ပါတီ ထိပ်တန်းခေါင်းဆောင်တွေထံကနေ တိုက်ရိုက်လာတာဖြစ်ပြီး၊ အစိုးရရဲ့ အမိန့်စာတွေမှာ ‘ကျူငုတ်မကျန်စေနဲ့’ ‘ဇာတိ၊ ပုညတွေကို လုံး၀ ဖျက်ဆီးဖယ်ရှားပစ်’ ‘အားလုံးကို ပုံစံပေး’ ‘သနားတယ်ဆိုတာမျိုး မရှိစေနဲ့’ စတဲ့ စကားလုံးတွေကို သုံးနှုန်းထားတယ်လို့ အစီရင်ခံစာက ဆိုပါတယ်။

    ၂၀၂၀ ခုနှစ် မိန့်ခွန်းမှာ ရှီကျင့်ဖျင်က ရှင်းကျန်းမှာကျင့်သုံးတဲ့ မူဝါဒတွေ လုံး၀မှန်ကန်ပြီး အောင်မြင်တယ်လို့ ချီးကျူးခဲ့သလို ရှေ့လာမယ့်နှစ်တွေမှာလည်း ဆက်လက်ကျင့်သုံးသွားဖို့ ပြောကြားခဲ့ပါတယ်။

    “ဝီဂါတွေအပေါ် ချမှတ်ကျင့်သုံးတဲ့ မူဝါဒတွေဟာ ရင်းမြစ်တွေကို အပြည့်အ၀သုံးကာ
    အချိန်တော်တော်ကြာကြာ စီမံပြီး လူသိရှင်ကြားကြေငြာ၊ စနစ်တကျ အကောင်အထည်ဖော်ခဲ့တာ ဖြစ်ပါတယ်။ ဝီဂါလိုလူမျိုးစုကို တစ်ခုလုံးဖြစ်စေ တစ်စိတ်တစ်ပိုင်းဖြစ်စေ ဖျက်ဆီးဖျောက်ဖျက်လိုတဲ့ ရည်ရွယ်ချက်မျိုး ရှိတယ်ဆိုတာ ငြင်းလို့ကို မရပါဘူး။ ဒါ့ကြောင့် ဂျီနီဗာသဘောတူညီချက်ကို ချိုးဖောက်ပြီး ဝီဂါတွေအပေါ် လူမျိုးတုန်းသတ်ဖြတ်နေတာအတွက် တရုတ်အစိုးရက လုံး၀ တာဝန်ခံရမှာ ဖြစ်ပါတယ်” လို့ အစီရင်ခံစာမှာ ဖော်ပြထားပါတယ်။

    အမေရိကန်၊ ကနေဒါနဲ့ နယ်သာလန် လွှတ်တော်တွေက တရုတ်အစိုးရရဲ့ ဝီဂါတွေအပေါ် ကျူးလွန်မှုကို လူမျိုးတုန်းသတ်ဖြတ်မှုအဖြစ် သတ်မှတ်ထားပြီး၊ တာဝန်ရှိတဲ့ တရုတ်ခေါင်းဆောင်တွေအပေါ် အမေရိကန်က အရေးယူ ပိတ်ဆို့မှုတွေလည်း ပြုလုပ်ထားပါတယ်။

    တရုတ်အစိုးရကတော့ လူမျိုးတုန်းသတ်ဖြတ်တယ်ဆိုတဲ့ စွပ်စွဲချက်တွေကို တစ်စိုက်မတ်မတ် ငြင်းဆိုထားပါတယ်။

    Ref: Aljazeera

  • တရုတ်အစိုးရက ဝီဂါများကို မတရားဖမ်းဆီးထောင်ချမှု သိသိသာသာ မြင့်တက်လာ

    တရုတ်အစိုးရက ဝီဂါများကို မတရားဖမ်းဆီးထောင်ချမှု သိသိသာသာ မြင့်တက်လာ

    ဖေဖော်ဝါရီ ၂၄၊ ၂၀၂၁
    M-Media

    ဝီဂါများအား အကျဉ်းချထားသည့် အကျဉ်းစခန်း

    -နိုင်ငံအနောက်ပိုင်း ရှင်ကျန်းပြည်နယ်က ဝီဂါနဲ့ အခြား လူနည်းစု အစ္စလာမ်ဘာသာဝင်တွေကို ခေါင်းစဉ်အမျိုးမျိုးတပ်ကာ ဖမ်းဆီး ထောင်ချမှု​တွေကို တရုတ်အစိုးရက ပိုလုပ်လာတယ်လို့ လူ့အခွင့်အရေးစောင့်ကြည့်အဖွဲ့ HRW က ပြောကြားလိုက်ပါတယ်။

    ဝီဂါတွေ မတရား ဖမ်းဆီးထောင်ချခံရမှုနဲ့ပတ်သက်ပြီး HRW က ဒီကနေ့မှာ အစီရင်ခံစာတစ်စောင်ကို ထုတ်ပြန်ခဲ့တာပါ။

    ၂၀၁၆ ခုနှစ်ကတည်းက ရှင်ကျန်းပြည်နယ်မှာရှိတဲ့ ဝီဂါ စုစုပေါင်း ၂ သိန်း ၅ သောင်းကျော်လောက် ဒီလို ဖမ်းဆီးထောင်ချခံခဲ့ရကြောင်း အစီရင်ခံစာမှာ ဖော်ပြထားပါတယ်။

    “တရားဥပဒေအရလို့ ခေါင်းစဉ်တပ်ထားပေမယ့် ရှင်ကျန်းမှာ အကျဉ်းချခံရတဲ့ ဝီဂါတော်တော်များများဟာ သာမန်ပြည်သူတွေဖြစ်ပြီး သူတို့ရဲ့ နေ့စဉ်ဘ၀ အသက်ရှင်နေထိုင်မှုနဲ့ ဘာသာရေးကျင့်သုံးမှုတွေကြောင့် ပြင်ဒဏ်ချမှတ်ခံရတာ ဖြစ်ပါတယ်” လို့ HRW က သုတေသနပညာရှင် မာယာဝမ်က ပြောပါတယ်။

    အဲဒီလို မတရားထောင်ချမှုဟာ ၂၀၁၇ ခုနှစ်ကနေ ၂၀၁၉ ခုနှစ်အတွင်း သိသိသာသာကို မြင့်တက်လာခဲ့တာပါ။ ၂၀၁၆ ခုနှစ်မှာ လူ ၄ သောင်း အကျဉ်းချခံခဲ့ရပြီး၊ ၂၀၁၇ ခုနှစ် တစ်သိန်းနီးပါးအထိ မြင့်တက်လာပါတယ်။

    ဘယ်အစားအသောက်က စားလို့မရဘူး (ဟာရမ်ဖြစ်တယ်)၊ ဘယ်အစားအသောက်က စားလို့ရတယ် (ဟာလာလ်ဖြစ်တယ်) ဆိုတာမျိုး ပြောတာ၊ နိုင်ငံရပ်ခြားက ဆွေမျိုးအတွက် လက်ဆောင်ယူသွားတာ၊ အချင်းချင်း စကားများရန်ဖြစ်တာလို ကိစ္စတွေအတွက် ဖမ်းဆီးပြီး နှစ်ရှည် ထောင်ချတာမျိုးပါ။

    ရဲတပ်ဖွဲ့၊ ရှေ့နေတွေနဲ့ တရားရုံးတွေဟာ ‘အကြမ်းဖက်ဝါဒ တိုက်ဖျက်ရေး’ ခေါင်းစဉ်နဲ့ မြန်မြန်ဆန်ဆန် တရားစွဲဆိုထောင်ချပြီး တော်တော်များများကတော့ အမှန်တကယ် ရာဇဝတ်မှုကျူးလွန်မှု မရှိသူတွေဖြစ်တယ်လို့ HRW ရဲ့ အစီရင်ခံစာမှာ ဖော်ပြထားပါတယ်။

    တရုတ်အစိုးရဟာ ရှင်ကျန်းပြည်နယ်က ဝီဂါနဲ့ အခြား အစ္စလာမ်ဘာသာဝင် လူနည်းစု တစ်သန်းလောက်ကို အကျဉ်းစခန်းထဲမှာ ထိန်းသိမ်းပြီး လူမျိုးနဲ့ ဘာသာပျောက်အောင် လုပ်ဆောင်တာ၊ အမျိုးသမီးတွေကို သားကြောဖြတ်တာ၊ အဓမ္မလုပ်အားခိုင်းစေတာ စတဲ့ ညှမ်းပမ်းမှုပေါင်းစုံ လုပ်ဆောင်နေတယ်လို့ နိုင်ငံတကာ မီဒီယာတွေနဲ့ လူ့အခွင့်အရေးအဖွဲ့တွေက ဖော်ထုတ်ခဲ့ကြပါတယ်။

    ဒီလုပ်ရပ်တွေဟာ လူမျိုးတုန်းသတ်ဖြတ်မှုမြောက်တယ်လို့ အမေရိကန်နဲ့ ကနေဒါ လွှတ်တော်တို့က သတ်မှတ်ထားပါတယ်။

    “ရှင်ကျန်းမှာ လွတ်လပ်တဲ့ စုံစမ်းစစ်ဆေးမှုလုပ်နိုင်ရေး နိုင်ငံတကာက တရုတ်အစိုးရကို ဖိအားပိုပေးဖို့ လိုပါတယ်။ ​​ဒါဟာ မတရား ဖမ်းဆီးထောင်ချခံရတဲ့သူတွေ ပြန်လည်လွတ်မြောက်ဖို့ အကောင်းဆုံး မျှော်လင့်ချက် ဖြစ်ပါတယ်” လို့ မာယာဝမ်က ထည့်သွင်းပြောဆိုခဲ့ပါတယ်။

    Ref: Aljazeera

  • ဝီဂါလူမျိုးများကို အဓ္ဓမလုပ်အားခိုင်းစေ၍ ထုတ်သည့်ပစ္စည်းများကို အမေရိကန်က တင်သွင်းခွင့် ပိတ်

    ဝီဂါလူမျိုးများကို အဓ္ဓမလုပ်အားခိုင်းစေ၍ ထုတ်သည့်ပစ္စည်းများကို အမေရိကန်က တင်သွင်းခွင့် ပိတ်

    ​စက်တင်ဘာ ၁၅၊ ၂၀၂၀
    M-Media

    -ရှင်ကျန်းဒေသမှာ ဝီဂါတွေကို တရုတ်အစိုးရက အဓမ္မလုပ်အားခိုင်းစေပြီး ထုတ်လုပ်တဲ့ ပစ္စည်းတွေကို အမေရိကန်အစိုးရက တင်သွင်းခွင့် ပိတ်ပင်လိုက်ပြီး၊ တင်သွင်းလာတဲ့ပစ္စည်းတွေကိုလည်း နိုင်ငံတော်ဘဏ္ဍာအဖြစ် သိမ်းယူဖို့ အမိန့်ထုတ်ပြန်လိုက်ပါတယ်။

    “တရုတ်အစိုးရဟာ ဝီဂါလူမျိုးတွေနဲ့ အခြားလူနည်းစုတွေအပေါ် စနစ်တကျ စီမံကိန်းနဲ့ ညှင်းပမ်းနှိပ်စက်နေပါတယ်။ အဓမ္မလုပ်အားခိုင်းစေမှုဟာ ကြမ်းကြုတ်တဲ့ လူ့အခွင့်အရေးချိုးဖောက်မှုပါ” လို့ အမေရိကန် အကောက်ခွန်နဲ့ နယ်စပ်ကာကွယ်ရေးဌာနရဲ့ ကော်မရှင်နာမင်းကြီး မာ့ခ် မော်ဂန်က ပြောကြားခဲ့ပါတယ်။

    ပိတ်ပင်ခံရတဲ့ ပစ္စည်းတွေက ရှင်ကျန်းပြည်နယ်၊ အနားက အန်ဟွေပြည်နယ်တို့မှာရှိတဲ့ နေရာ ၅ ခုက ထုတ်လုပ်တဲ့ ချည်ထည်၊ အဝတ်အထည်၊ ဆံပင်ပစ္စည်း၊ အီလက်ထရောနစ်ထုတ်ကုန်တွေဖြစ်ပါတယ်ပါ။ အဲဒီနေရာတ​ွေဟာ တရုတ်က လေ့ကျင့်ရေးသင်တန်းကျောင်းလို့ခေါ်တဲ့ အကျဉ်းစခန်းတွေ ပါဝင်ပါတယ်။

    ရှင်ကျန်းပြည်နယ်က Lop County No 4 အကျဉ်းစခန်းဟာ အဓမ္မလုပ်အားခိုင်းစေမှု အဓိကနေရာဖြစ်တယ်လို့ အမေရိကန် ပြည်တွင်းလုံခြုံရေး ဒုတိယဝန်ကြီး ကန်ကျူစီလီနီက ပြောပါတယ်။

    “ဒါဟာ အသက်မွေးသင်တန်းကျောင်းမဟုတ်ဘူးဗျ။ တိုင်းရင်းသားလူနည်းစုတွေကို ညှင်းပမ်းနှိပ်စက်ပြီး၊ လွတ်လပ်မှုမရှိ၊ ရင်းမြစ်တွေမရှိတဲ့ ဆိုးရွားတဲ့အခြေအနေမျိုးမှာ အဓမ္မလုပ်အားခိုင်းစေတဲ့ အကျဉ်းစခန်းပါ။ ဒါဟာ ခေတ်သစ်ကျွန်ပြုမှု ဖြစ်ပါတယ်”

    ပစ္စည်းတွင် တင်သွင်းခွင့် ပိတ်ပင်မှုအပြင်၊ ဥပဒေချိုးဖောက်ပြီး တင်သွင်းလာရင် နိုင်ငံတော်ဘဏ္ဍာအဖြစ် သိမ်းဆည်းနိုင်မယ့် အမိန့်ကိုလည်း တစ်ပါတည်း ထုတ်ပြန်ထားပါတယ်။

    တရုတ်အစိုးရက ဝီဂါတွေအပေါ် ညှင်းပမ်းမှုနဲ့ပတ်သက်ပြီး အမေရိကန်က ပိတ်ဆို့အရေးယူမှုတွေ တိုးမြှင့်လုပ်ဆောင်လာတာပါ။

    ပြီးခဲ့တဲ့ ဇူလိုင်လနဲ့ ဩဂုတ်လအတွင်း ဝီဂါနဲ့ အခြားလူမျိုးစုတွေအပေါ် ခေါင်းပုံဖြတ်အမြတ်ထုတ်ကာ၊ အဓမ္မလုပ်အားခိုင်းစေမှုကနေ ထုတ်လုပ်ထားတဲ့ ဆံပင်တုပစ္စည်းတွေ၊ အဝတ်အထည်ပစ္စည်းတွေကို အမေရိကန်အကောက်ခွန်ဌာနက တင်သွင်းခွင့် ပိတ်ပင်ခဲ့ပါတယ်။

    Ref: AFP