News @ M-Media

Tag: EPL2020-21

  • တစ်ကျော့ပြန် အိမ်ပြန်ခရီးအကြောင်း ရော်နယ်ဒို ဘယ်လိုဖွင့်ဟသလဲ

    တစ်ကျော့ပြန် အိမ်ပြန်ခရီးအကြောင်း ရော်နယ်ဒို ဘယ်လိုဖွင့်ဟသလဲ

    စက်တင်ဘာ ၂၊ ၂၀၂၁
    M-Media

    -မန်ချက်စတာယူနိုက်ကနေ ထွက်ခွာသွားတာ ၁၂ နှစ်ကြာပြီးတဲ့နောက် ပေါ်တူဂီတိုက်စစ်မှူး ခရစ္စတီယာနို ရော်နယ်ဒိုဟာ သူအောင်မြင်ရာမြေကို ပြန်လည်နင်းခဲ့ပြီ ဖြစ်ပါတယ်။

    အသက် ၃၆ နှစ်အရွယ်ရော်နယ်ဒိုဟာ ပြီးခဲ့တဲ့တစ်ပတ်ကမှ ရုတ်တရက် မန်ယူနဲ့ သဘောတူညီချက်ရခဲ့ပြီး ဩဂုတ်လ ၃၁ ရက်နေ့က အဆုံးသတ်ခဲ့တဲ့ နွေရာသီအပြောင်းအရွှေ့မှာ စိတ်ဝင်စားစရာ အကောင်းဆုံးအဖြစ်အပျက်လည်း ဖြစ်ပါတယ်။

    စက်တင်ဘာ ဒုတိယပတ်လောက်မှာ မန်ယူနဲ့အတူ ပွဲထွက်ဖို့ရှိနေတဲ့ ရော်နယ်ဒိုရဲ့ ရင်ခုန်သံတွေကို မန်ယူအသင်းက အင်တာဗျူးပြီး သူတို့ရဲ့ ဝဘ်ဆိုက်မှာ လွှင့်တင်ပေးထားပါတယ်။

    အိမ်ပြန်လာရတာ ပျော်တယ်

    ကြီးကျယ်တဲ့သမိုင်းကြောင်းရှိတဲ့ မန်ယူကို ပြန်လာရတာပျော်ရွှင်တယ်လို့ ရော်နယ်ဒိုက ဖွင့်ဟပါတယ်။

    “ခင်ဗျားတို့သိတဲ့အတိုင်းပဲ။ ဩအံ့ဖွယ်ရာကောင်းတဲ့ ဒီအသင်းမှာ ကျွန်တော်ဟာ သမိုင်းကောင်းတွေရှိခဲ့တယ်။ အသက် ၁၈ နှစ်သားမှာ ကျွန်တော်ဒီကိုရောက်ခဲ့တာပါ။ ၁၂ နှစ်တာနောက်ပိုင်း ဒီနေရာကို ပြန်လာရတာ အရမ်းပျော်တာပေါ့။ ပွဲကစားဖို့လည်း မစောင့်နိုင်တော့ပါဘူး”

    ဖာဂူဆန်အကြောင်း

    မန်ယူရဲ့ မြို့ခံပြိုင်ဘက် မန်စီးတီးအသင်းကို ရော်နယ်ဒို ပြောင်းတော့မယ်လို့ သတင်းတွေ ကျယ်ကျယ်ပြန့်ပြန့်ထွက်ပြီး ၂၄ နာရီအတွင်းမှာပဲ မန်ယူနဲ့ ရော်နယ်ဒို သဘောတူညီချက် ရခဲ့တာပါ။ ရော်နယ်ဒိုကို အသက် ၁၈ နှစ်အရွယ်ကတည်းကနေ ပြုစုပျိုးထောင်ပေးခဲ့တဲ့ မန်ယူနည်းပြဟောင်း ဖာဂူဆန်က ဒီအပြောင်းအရွှေ့မှာ အဓိကကျတဲ့အခန်းကဏ္ဍကနေ ပါဝင်ခဲ့ပါတယ်။

    ရော်နယ်ဒိုကလည်း ဖာဂူဆန်ဟာ သူ့ရဲ့အောင်မြင်မှုမှာ အရေးပါခဲ့ပြီး၊ သူ့ရဲ့ ဘောလုံးဖခင်ဖြစ်တယ်လို့ ထပ်မံဖွင့်ဟ ပြောဆိုခဲ့ပါတယ်။

    “ကျွန်တော့်အတွက်တော့ ဆာအဲလက်စ်ဖာဂူဆန်ဟာ ဘောလုံးလောကရဲ့ ဖခင်ပါပဲ။ ကျွန်တော့်ကို အများကြီးကူညီပေးတယ်၊ သင်ပေးတယ်။ ကြီးမားတဲ့ အခန်းကဏ္ဍကနေ ပါဝင်ခဲ့ပါတယ်။ ကျွန်တော်တို့မှာ ဆက်ဆံရေးကောင်းရှိတယ်၊ အမြဲတမ်း အဆက်အသွယ်ရှိတယ်။ သူ့ကို ကျွန်တော် တော်တော်လေး ချစ်ပါတယ်။ သူဟာ တစ်မူထူးခြားတဲ့ ပုဂ္ဂိုလ်ပါ။ ကျွန်တော် ဒီလိုအခြေအနေ ဖြစ်လာတာ၊ မန်ယူကို ပြန်ရောက်လာတာတွေဟာ အဓိကက သူ့ကြောင့်ပါ”

    အကောင်းဆုံး ဆုံးဖြတ်ချက်

    မန်ယူကို ပြန်လာဖို့ ဆုံးဖြတ်မှုဟာ အကောင်းဆုံး ဆုံးဖြတ်ချက်ဖြစ်ပြီး စာမျက်နှာသစ် ဖွင့်လှစ်တိုက်တာ ဖြစ်တယ်လို့ ရော်နယ်ဒိုက ဆိုပါတယ်။

    “စာမျက်နှာသစ် ဖွင့်လိုက်တယ်။ အရမ်းလည်း ပျော်ရွှင်ကျေနပ်မိပါတယ်။ ကျွန်တော် ရှေ့ဆက်မယ်၊ သမိုင်းသစ်ရေးမယ်၊ မန်ယူကို ကြီးမားတဲ့ ရလဒ်တွေရအောင်၊ ဖလားတွေရအောင်၊ နံပါတ်တစ်အသင်းဖြစ်ပြီး အောင်မြင်မှုတွေရအောင် ကျွန်တော် ကူညီပေးသွားမှာပါ”

    ပရိတ်သတ်တွေအတွက် သတင်းစကား

    နည်းပြဆိုးလ်ရှားနဲ့ အရင်က ကစားဖော်ဖြစ်ခဲ့ပြီး ကောင်းမွန်တဲ့ဆက်ဆံရေးရှိကြောင်း၊ လက်ရှိမှာ ဆိုးလ်ရှားက နည်းပြဖြစ်နေတဲ့အတွက် အသင်းအောင်မြင်ရေး နည်းပြလိုချင်တာ ဘာမဆို လုပ်ပေးသွားမယ်လို့ ရော်နယ်ဒိုက ဆိုပါတယ်။

    ရော်နယ်ဒိုအမည်နဲ့သီချင်းကို အမြဲတမ်းဆိုနေပြီး၊ အသင်းပြန်ရောက်လာတာကို သောင်း​သောင်းဖျဖျ ကြိုဆိုနေတဲ့ ပရိတ်သတ်ကို ဘာပြောချင်လဲလို့ မေးမြန်းရာမှာတော့ ရော်နယ်ဒိုက မန်ယူပရိတ်သတ်တွေဟာ အထူးစပါယ်ရှယ်ဖြစ်ပြီး၊ အရင်ရော်နယ်ဒိုကို မကြာခင်ပြန်မြင်ရတော့မယ်လို့ သတင်းစကားပါးချင်ကြောင်း ဖြေကြားခဲ့ပါတယ်။

    “ပရိတ်သတ်ဆိုတာ ဘောလုံးအားကစားရဲ့ သော့ချက်ပါ။ အရင်တစ်နှစ်နဲ့မတူတာက အခုနှစ်မှာ ဘောလုံးကွင်းတွေထဲ ပရိတ်သတ်တွေ ပြန်ရောက်လာကြပါပြီ။ ပရိတ်သတ်တွေက အဓိကဖြစ်ပါတယ်။ မန်ယူပရိတ်သတ်တွေကတော့ အထူးစပါယ်ရှယ်ပါ။ ကျွန်တော် သူတို့ကို ကောင်းကောင်းမှတ်မိတယ်။ သူတို့ ကျွန်တော့်နာမည်နဲ့သီချင်းကို အမြဲတမ်းဆိုနေတာကို ကျွန်တော်သိတယ်။ အဲဒီအတွက်လည်း တော်တော်ပျော်ရွှင်ရပါတယ်။ အရင်ကလိုပဲ ကွင်းထဲမှာ အဆုံးစွန်ဆုံးလုပ်ပြဖို့ ကျွန်တော် ဆုံးဖြတ်ထားတယ်။ အကောင်းဆုံးဖြစ်အောင် ကြိုးစားမယ်။ ဂိုးတွေသွင်းမယ်၊ အသင်းဖော်တွေကို ဖန်တီးပေးမယ်၊ ဖလားတွေယူမယ်။ ပရိတ်သတ်တွေနဲ့ အရမ်းအရမ်းကို တွေ့ချင်နေပါပြီ”

    Ref: manutd.com

  • အသင်းဟောင်းမန်ယူနဲ့ ပြန်လည်ပေါင်းထုတ်မယ့် ရော်နယ်ဒို ဘာတွေရင်ဖွင့်သလဲ

    အသင်းဟောင်းမန်ယူနဲ့ ပြန်လည်ပေါင်းထုတ်မယ့် ရော်နယ်ဒို ဘာတွေရင်ဖွင့်သလဲ

    ဩဂုတ် ၂၈၊ ၂၀၂၁
    M-Media

    -ဂျူဗင်တပ်စ်အသင်းရဲ့ တိုက်စစ်မှူး ခရစ္စတီယာနို ရော်နယ်ဒိုဟာ မနေ့က မန်ချက်စတာယူနိုက်တက်နဲ့ ပြန်လည်ပေါင်းထုတ်ဖို့ သဘောတူညီချက် ရရှိသွားခဲ့ပါတယ်။

    ​မန်ယူရဲ့ မြို့ခံပြိုင်ဘက် မန်စီးတီးကို ပြောင်းတော့မယ်လို့ သတင်းတွေ ကျယ်ကျယ်ပြန့်ပြန့် ထွက်ပြီးတဲ့နောက်ပိုင်း မန်ယူကို အံ့အားသင့်ဖွယ် ရောက်ရှိသွားတာပါ။

    မန်ယူနည်းပြဟောင်းဖြစ်ပြီး၊ ရော်နယ်ဒိုကို ပြုစုပျိုးထောင်ပေးခဲ့တဲ့ ဆာ အဲလက်စ်ဖာဂူဆန်က အသင်းနဲ့ ကစားသမားအကြားမှာ ဝင်ရောက်ညှိနှိုင်းပေးခဲ့တာလို့ အင်္ဂလိပ် ပြည်တွင်းသတင်းတွေက ဖော်ပြကြပါတယ်။

    အသက် ၃၆ နှစ်အရွယ် ရော်နယ်ဒိုဟာ ၂၀၀၃ ခုနှစ်ကနေ ၂၀၀၉ ခုနှစ်အထိ မန်ယူမှာကစားခဲ့ပြီးတဲ့နောက် အသင်းကထွက်ခွာပြီး ၁၃ နှစ်အကြာမှာ ပြန်လည်ရောက်ရှိလာတာပါ။

    ရော်နယ်ဒိုအတွက် မန်ယူဟာ ဂျူဗင်တပ်စ်ကို ပြောင်းရွှေ့ကြေး ယူရို ၂၅ သန်း ပေးချေရမှာဖြစ်ပါတယ်။ ​နိုင်ငံအသင်းနဲ့ကစားဖို့ ပေါ်တူဂီရောက်နေတဲ့ ရော်နယ်ဒိုဟာ ရက်ပိုင်းအတွင်း မန်ချက်စတာမြို့ကို လာရောက်ကာ အပြောင်းအရွှေ့ အပြီးသတ်ဖို့ ရှိနေပါတယ်။

    နောက်ဆုံးနှုတ်ဆက်စကား

    အသင်းအတွက် စိတ်ရောကိုယ်ပါနှစ်မြှုပ်ကစားခဲ့သလို တူရင်မြို့ကိုလည်း ချစ်ခင်မြတ်နိုးတယ်လို့ ဂျူဗင်တပ်စ်ပရိတ်သတ်တွေကို ရော်နယ်ဒိုက နောက်ဆုံးစကား ပါးခဲ့ပါတယ်။

    “အံ့ဩစရာအကောင်းအဆုံးအသင်း၊ အီတလီမှာ အကြီးကျယ်ဆုံးအသင်း၊ ဥရောက အကြီးကျယ်ဆုံး အသင်းတွေက တစ်သင်းကနေ ဒီကနေ့ ကျွန်တော် ထွက်ခွာရပါပြီ။ ဂျူဗင်တပ်စ်အသင်းအတွက် ကျွန်တော် စိတ်ရောကိုယ်ပါ နှစ်မြှုပ်ကစားခဲ့ပြီး ကျွန်တော့်ရဲ့ နောက်ဆုံးအချိန်အထိ တူရင်မြို့ကို ချစ်မြတ်နိုးခဲ့ပါတယ်”

    ဂျူဗီပရိတ်သတ်တွေကို ကျေးဇူးတင်ပြီး အသင်းရဲ့ ပရိတ်သတ်တစ်ဦးအဖြစ် ဆက်ရှိနေမယ်လို့လည်း ရော်နယ်ဒိုက ဆိုပါတယ်။

    “ဂျူဗီပရိတ်သတ်တွေက ကျွန်တော့်ကို အမြဲတမ်း လေးစားတယ်။ ဒီလေးစားမှုကို ကျေးဇူးဆပ်ဖို့အတွက် ပွဲတိုင်း၊ ရာသီတိုင်း၊ ပြိုင်ပွဲတိုင်းမှာ ကျွန်တော် တိုက်ပွဲဝင်ခဲ့တယ်။ ကျွန်တော်တို့ ပြန်ကြည့်လိုက်ရင် ကြီးမားတဲ့ အောင်မြင်မှုတွေရခဲ့တယ်။ ကျွန်တော်တို့လိုချင်တာ အားလုံးတော့ မဟုတ်ဘူးပေါ့။ ဒါပေမယ့် လှပတဲ့ သမိုင်းကို ကျွန်တော်တို့ အတူတကွ ရေးနိုင်ခဲ့ပါတယ်”

    “ကျွန်တော်ဟာ အမြဲတမ်း ခင်ဗျားတို့ထဲကတစ်ယောက် ဖြစ်နေမှာပါ။ ခင်ဗျားတို့ဟာ ကျွန်တော့်သမိုင်းရဲ့ အစိတ်အပိုင်းဖြစ်သွားပြီ။ ကျွန်တော်လည်း ခင်ဗျားတို့သမိုင်းရဲ့ အစိတ်အပိုင်းဖြစ်နေမယ်လို့ ခံစားရပါတယ်။ အီတလီ၊ ဂျူဗီ၊ တူရင်မြို့၊ ဂျူဗီပရိတ်သတ် ဒါတွေအားလုံး ကျွန်တော့်ရဲ့ နှလုံးသားမှာ အမြဲတမ်း ရှိနေမှာပါ”

    နံပါတ် ၇ ပြန်ဝတ်မှာလား

    အတိတ်က မန်ယူမှာ အောင်မြင်ကျော်ကြားစဉ်အချိန်က ရော်နယ်ဒိုကို နံပါတ် ၇ ဂျာစီနဲ့ တွဲပြီး သိကြပါတယ်။ တစ်ကျော့ပြန် အိမ်ပြန်ခရီးမှာတော့ နံပါတ် ၇ ပြန်၀တ်မလားဆိုတဲ့ မေးခွန်းတွေ ထွက်ပေါ်လာပါတယ်။

    ပရီးမီးယားလိဂ် စည်းမျဉ်းစည်းကမ်းတွေအရ ရော်နယ်ဒိုဟာ​ နံပါတ် ၇ ဂျာစီပြန်ရဖို့ အခွင့်အလမ်း သိပ်မရှိပါဘူး။ နံပါတ် ၇ ဂျာစီကို တိုက်စစ်မှူး ကာဗာနီနဲ့တွဲကာ မန်ယူက ပရီးမီးယားလိဂ်မှာ ဒီရာသီအတွက် မှတ်ပုံတင်ထားတာပါ။ စည်းမျဉ်းအရ မှတ်ပုံတင်ထားတဲ့ ကစားသမား အသင်းက ထွက်ခွာမှသာ တစ်ခြားကစားသမားက ဝတ်ခွင့်ရမှာ ဖြစ်ပါတယ်။

    ပရီးမီးယားလိဂ်ဘုတ်အဖွဲ့ရဲ့ အထူးခွင့်ပြုချက်နဲ့ နံပါတ်ပြောင်းလို့ရတယ်ဆိုတဲ့ စည်းမျဉ်းတစ်ချက် ရှိ​နေပေမယ့် အရင်က ဒီစည်းမျဉ်းကို ကျင့်သုံးခဲ့တဲ့ သမိုင်းမျိုး ပရီးမီးယားလိဂ်မှာ မရှိပါဘူး။

    မန်ယူနောက်ခံလူဟောင်းဖြစ်ပြီး လက်ရှိမှာ ဘောလုံးရေးရာ သုံးသပ်သူဖြစ်နေတဲ့ ဖာဒီနန်က မန်ယူအသင်းနဲ့ ပရိတ်သတ်တွေက ရော်နယ်ဒိုပြန်လာမှုကို သောင်းသောင်းဖျဖျ ကြိုဆိုတဲ့ အနေအထားမှာ ကာဗာနီက သူ့ရဲ့ ကျောနံပါတ် ၇ ဂျာစီကို စွန့်လွှတ်ကောင်း စွန့်လွှတ်နိုင်တယ်လို့ သုံးသပ်ပါတယ်။

    Ref: Goal, Daily Mail

  • ခရစ္စတီယာနိုရော်နယ်ဒို ပရီးမီးယားလိဂ်သို့ပြန်လာရန် နီးစပ်နေ

    ခရစ္စတီယာနိုရော်နယ်ဒို ပရီးမီးယားလိဂ်သို့ပြန်လာရန် နီးစပ်နေ

    ဩဂုတ် ၂၇၊ ၂၀၂၁
    M-Media

    -ဂျူဗင်တပ်စ်အသင်း တိုက်စစ်မှူး ခရစ္စတီယာနိုရော်နယ်ဒိုနဲ့ မန်စီးတီးအသင်းတို့အကြား အပြီးသတ်သဘောတူညီချက်ရတော့မယ်လို့ နီးစပ်တဲ့ သတင်းရင်းမြစ်တွေက ESPN သတင်းဌာနကို အတည်ပြု ပြောကြားလိုက်ပါတယ်။

    အသက် ၃၆ နှစ်အရွယ် ရော်နယ်ဒိုဟာ ဂျုဗင်တပ်စ်အသင်းနဲ့ သက်တမ်းတစ်နှစ်သာ ကျန်တော့တာပါ။

    ရော်နယ်ဒိုရဲ့အေးဂျင့် ဂျော့ဂျ်မန်ဒက်စ်နဲ့ ဂျူဗင်တပ်စ်အသင်းတာဝန်ရှိသူတွေ အပြောင်းအရွှေ့ကိစ္စ ဆွေးနွေးခဲ့တယ်လို့ ပြီးခဲ့တဲ့ရက်ပိုင်းမှာ သတင်းထွက်ခဲ့ပြီး၊ ရော်နယ်ဒိုနဲ့ မန်စီးတီးနည်းပြ ပက်ဂွါဒီယိုလာတို့လည်း ကြာသာပတေးနေ့ မနက်ပိုင်းမှာ ဖုန်းဆက်ဆွေးနွေးခဲ့ပါတယ်။

    ရော်နယ်ဒိုက စနေနေ့မှာကစားမယ့် အမ်ပိုလီအသင်းနဲ့ စီးရီးအေပွဲမှာ ပါဝင်မှာမဟုတ်ဘူးလို့ ဂျူဗင်တပ်စ်အသင်းကို အကြောင်းကြားထားပါတယ်။ ရော်နယ်ဒိုဟာ နွေရာသီအပြောင်းအရွှေ့ရောက်ရင် ဂျူဗင်တပ်စ်အသင်းကနေ ထွက်ခွာမယ်လို့ ဇွန်လမှာ သတင်းထွက်ခဲ့တာပါ။ နွေရာသီအပြောင်းအရွှေ့ဟာ ဩဂုတ်လ ၃၁ ရက်နေ့မှာ ကုန်ဆုံးမှာဖြစ်ပါတယ်။

    ဂျူဗင်တပ်စ်အသင်းက ရော်နယ်ဒိုအတွက် ပြောင်းရွှေ့ကြေး ယူရို သန်း ၃၀ ပတ်ဝန်းကျင် လိုချင်နေတာ ဖြစ်ပါတယ်။ ပြောင်းရွှေ့ကြေး၊ ရော်နယ်ဒိုရဲ့ မြင့်မားတဲ့လစာငွေတွေနဲ့ပတ်သက်ပြီး ညှိနှိုင်းရမယ့် ကိစ္စတွေ ရှိနေသေးတယ်လို့ မန်စီးတီးအသင်းနဲ့ နီးစပ်သူတွေက ပြောပါတယ်။

    ရော်နယ်ဒိုဟာ မန်စီးတီးအသင်းရဲ့ မြို့ခံပြိုင်ဘက် မန်ယူမှာ ၂၀၀၃ ခုနှစ်ကနေ ၂၀၀၉ ခုနှစ်အထိ ကစားခဲ့ပြီး အဲဒီနောက် ရီးယဲလ်မက်ဒရစ်ကို ပြောင်းရွှေ့သွားကာ၊ ၂၀၁၈ ခုနှစ်မှာတော့ ဂျူဗင်တပ်စ်အသင်းကို ရောက်ရှိခဲ့တာ ဖြစ်ပါတယ်။

    Ref: ESPN

  • တနင်္ဂနွေနေနေ့ ဘောလုံးသတင်းများ

    တနင်္ဂနွေနေနေ့ ဘောလုံးသတင်းများ

    ဇန်နဝါရီ ၃၁၊ ၂၀၂၁
    M-Media

    လူသားဝါဒ အဆိုးဆုံးအနေအထားကို ရောက်နေပြီဟု ရက်ရှ်ဖို့ဒ်ပြော

    လူသားဝါဒနဲ့ ဆိုရှယ်မီဒီယာအသုံးပြုမှုပုံစံဟာ အဆိုးဆုံးအနေအထားကို ရောက်နေပြီလို့ လူမျိုးရေးခွဲခြားခံရတဲ့ မန်ယူတိုက်စစ်မှူး ရက်ရှ်ဖို့ဒ်က ပြောကြားလိုက်ပါတယ်။

    အသက် ၂၂ နှစ်အရွယ် ရက်ရှ်ဖို့ဟာ မနေ့က အာဆင်နယ်နဲ့ ဂိုးမရှိသရေကျတဲ့ပွဲအပြီး Instagram စာမျက်နှာမှာ လူမျိုးရေးခွဲခြားမှု မက်ဆေ့ချ်တွေ အများအပြားရခဲ့တာပါ။

    လူမည်းတစ်ယောက်ဆိုတဲ့ မိမိရဲ့ဖြစ်တည်မှုကို ဂုဏ်ယူသလို ဒီလိုခွဲခြားတဲ့ မက်ဆေ့တွေအတွက် ဘယ်လိုမှ မခံစားရဘူးလို့ ရက်ရှ်ဖို့ဒ်က Instagram မှာ ရေးခဲ့ပါတယ်။ မိမိကို ထောက်ခံအားပေးတဲ့သူတွေကို ကျေးဇူးတင်တယ်လို့ သူက ဆိုပါတယ်။

    ဘောလုံးဝေဖန်သုံးသပ်သူတွေ၊ နည်းပြတွေနဲ့ ကစားသမားတွေက ဒီကိစ္စကို ရှုတ်ချခဲ့ပါတယ်။ အခုတစ်ပတ်အတွင်း ပရီးမီးယားလိဂ်မှာ လူမည်းကစားသမားတစ်ချို့ လူမျိုးရေးခွဲခြားစော်ကားမှုတွေ တောက်လျှောက်ခံလာရပြီး ရဲတပ်ဖွဲ့က စုံစမ်းစစ်ဆေးမှုတွေ လုပ်​ဆောင်နေပါတယ်။

    အင်္ဂလိပ်ဘောလုံးအဖွဲ့ချုပ် FA က လူမျိုးရေးခွဲခြားစော်ကားမှု ပုံစံအားလုံးကို တိုက်ဖျက်သွားမယ်လို့ မနေ့က မနက်ပိုင်း ထုတ်ပြန်တဲ့ ကြေငြာချက်မှာ ဖော်ပြထားပါတယ်။

    သားရဲများကဲ့သို့ ကစားခဲ့သည့် အသင်းသားများကို ဂွါဒီယိုလာ ကျေးဇူးတင်

    ရှက်ဖီးယူနိုက်တက်ကို ၁ ဂိုး ဂိုးမရှိနဲ့ နိုင်တဲ့ပွဲမှာ ကစားသမားတွေဟာ သားရဲတွေလို မဆုတ်မနစ်ဇွဲလုံ့လနဲ့ ကစားခဲ့ကြတဲ့အတွက် ကျေးဇူးတင်တယ်လို့ မန်စီးတီးနည်းပြ ပက်ဂွါဒီယိုလာက ချီးကျူးလိုက်ပါတယ်။

    ဒီအနိုင်ကြောင့် သမိုင်းတစ်လျှောက် ပြိုင်ပွဲပေါင်းစုံ ၁၂ ပွဲဆက်တိုက်နိုင်တဲ့စံချိန်ကို ရခဲ့သလို ဒုတိယနေရာကမန်ယူကို တစ်ပွဲလျော့ ၃ မှတ်အသာနဲ့ ဇယားကို ဦးဆောင်ထားနိုင်ပါတယ်။ ဒီဇင်ဘာနဲ့ ဇန်နဝါရီလတွေမှာ ဒီလို တည်ငြိမ်တဲ့ခြေစွမ်းမျိုးရတာဟာ ထူးခြားမှုဖြစ်ပြီး အသင်းဟာ ဘက်ပေါင်းစုံ ကောင်းမွန်လာတယ်လို့ ဂွါဒီယိုလာက ပြောပါတယ်။

    လာမယ့်ပွဲတွေဟာ အမှတ်ဆုံးရှုံးနိုင်ချေရှိတာကြောင့် ဒီအခြေအနေကို အကောင်းဆုံး တုန့်ပြန်သွားနိုင်ရေး မျှော်လင့်ထားတယ်လို့ သူက ဆိုပါတယ်။

    မာဆေးလ်အသင်းကွင်းအနီး တိုက်ခိုက်မှုဖြစ်

    ပြင်သစ်လိဂ်ဝမ်းကလပ် မာဆေးလ်အသင်းရဲ့ လေ့ကျင့်ကွင်းမှာ မနေ့က ရဲတပ်ဖွဲ့နဲ့ ဆန္ဒပြသူတွေအကြား ရုန်းရင်းဆန်ခတ် ဖြစ်တာကြောင့် ဒီနေ့ ရန်နက်စ်အသင်းနဲ့ကစားမယ့် ပွဲစဉ်ကို ရပ်ဆိုင်းလိုက်ပါတယ်။

    အသင်းရဲ့ ကွင်းတွင်းကွင်းပြင် အခြေအနေတွေကို မကျေနပ်တာကြောင့် ပရိတ်သတ်တွေဟာ ပြီးခဲ့တဲ့သီတင်းပတ်တွေမှာ ဆန္ဒပြမှု ခပ်စိပ်စိပ် ပြုလုပ်လာတာပါ။ မနေ့က ဆန္ဒပြမှုမှာတော့ လေ့ကျင့်ကွင်းထဲ ချိုးဖျက်ဝင်ရောက်မှုတွေ ရှိခဲ့ပြီး ရဲတပ်ဖွဲ့က အင်အားသုံး တားဆီးခဲ့ရပါတယ်။

    ဆန္ဒပြသူအနည်းဆုံး ၂၅ ဦးကို ဖမ်းဆီးခံခဲ့ရသလို၊ ရဲတပ်ဖွဲ့ဝင် ၇ ဦး ဒဏ်ရာရရှိခဲ့ပါတယ်။ ဒီလိုတိုက်ခိုက်မှုတွေကို လုံး၀ လက်မခံနိုင်ကြောင်း၊ ကျူးလွန်သူတွေဟာ တာဝန်မဲ့သူတွေဖြစ်ကြောင်း အသင်းရဲ့ ထုတ်ပြန်ချက်မှာ ဖော်ပြထားပြီး ဒီအဖြစ်အပျက်ကြောင့် ပျက်ဆီးမှုဟာ ယူရိုသိန်းချီ ပမာဏအထိ ရှိခဲ့တယ်လို့ ဆိုပါတယ်။

    Ref: BBC

  • ဗုဒ္ဓဟူးနေ့ ဘောလုံးသတင်းများ

    ဗုဒ္ဓဟူးနေ့ ဘောလုံးသတင်းများ

    ဇန်နဝါရီ ၂၇၊ ၂၀၂၁
    M-Media

    ချယ်ဆီးနည်းပြသစ် တူချယ်

    ချယ်ဆီးနည်းပြသစ် တူချယ် ထိပ်တန်းကစားသမားများကို ခေါ်ယူမည်

    ကစားသမားတွေကို တွေ့ခွင့်ရပြီး ကမ္ဘာ့စိတ်လှုပ်ရှားစရာအကောင်းဆုံးလိဂ်ကို ကြုံတွေ့ခွင့်ရဖို့ မစောင့်နို်ငတော့ဘူးလို့ ချန်ဆီးနည်းပြသစ် သောမတ်စ် တူချယ်က ပြောပါတယ်။

    ချယ်ဆီးဟာ တနင်္လာနေ့က လမ်းပတ်ကို ထုတ်ပယ်ခဲ့ပြီးနောက် တူချယ်ကို မနေ့က ခန့်အပ်ခဲ့တာပါ။ တူချယ်ဟာ ချယ်ဆီးကို ကိုင်တွယ်တဲ့ ပထမဆုံး ဂျာမန်နိုင်ငံသားဖြစ်လာပြီး မနက်ဖြန် ဝုလ်ဗ်နဲ့ပွဲကို စကိုင်ရမှာပါ။

    ချယ်ဆီးက မိမိအပေါ် ယုံကြည်မှုရှိတဲ့အတွက် အံ့ဩရတယ်လို့ တူချယ်က ပြောကြားခဲ့ပြီး လမ်းပတ်ရဲ့ စွမ်းဆောင်မှုတွေ၊ သူထားခဲ့တဲ့ အမွေအနှစ်တွေကို အလေးထားတယ်လို့လည်း ဆိုပါတယ်။

    လမ်းပတ်မြေတောင်မြှောက်ပေးခဲ့တဲ့ လူငယ်တွေကို ဆက်သုံးမှာဖြစ်ပေမယ့် လာမယ့်နွေရာသီအပြောင်းအရွှေ့မှာ ဒေါ့မွန်က ဟာလန်းလို ထိပ်တန်းကစားသမားအချို့ ခေါ်ယူဖို့လည်း တူချယ်က စီစဉ်နေပါတယ်။

    ကစားသမားများ လစာ မတရားတောင်းသည်ဆိုသည့်သတင်းကို ကိုးမန်းငြင်း

    အသင်းအဆင်မပြေ ဖြစ်နေတဲ့အချိန် ကစားသမားတွေက လစာတိုးတောင်းနေကြတယ်ဆိုတဲ့သတင်းကို ဘာစီလိုနာနည်းပြ ရော်နယ်ကိုးမန်းက ငြင်းဆိုလိုက်ပါတယ်။

    ပွဲတွေရွှေ့ဆိုင်းရတာ ကွင်းအတွင်း ပရိသတ်ဝင်ရောက်ကြည့်ရှုခွင့် မရသေးတာလို ကိုဗစ်နောက်ဆက်တွဲ ပြဿနာတွေကြောင့် ဘောလုံးလောကမှာ ဝင်ငွေ အကြီးအကျယ် ထိခိုက်မှု ရှိနေတာ ဖြစ်ပါတယ်။

    ဘာစီလိုနာအသင်းလည်း အခြားအသင်းတွေနည်းတူ ဝင်ငွေကျဆင်းတာ ပေးရမယ့်အကြွေး နင့်လာတာမျိုးကို ရင်ဆိုင်နေရပါတယ်။ စာချုပ်ထပ်တိုးတဲ့ ကစားသမားတွေ လစာတိုးတောင်းတယ်ဆိုတဲ့ သတင်းမျိုးလည်း ထွက်နေပြီး ကိုးမန်းက ဒါဟာ မဟုတ်ကြောင်း၊ အသင်းရဲ့ လက်ရှိအခြေအနေကို ကစားသမားတွေ နားလည်ပြီး လစာလျှော့ကာ စာချုပ်ချုပ်တဲ့ ကစားသမားတွေသာ ရှိကြောင်း ထည့်သွင်းပြောကြားခဲ့ပါတယ်။

    အချိန်ပေးခဲ့သည့် ဘုတ်အဖွဲ့ကို ဆိုးလ်ရှား ကျေးဇူးတင်

    လမ်းပတ်လိုကံကြမ္မာမျိုး မကြုံတဲ့အတွက် အသင်းဘုတ်အဖွဲ့ကို ကျေးဇူးတင်တယ်လို့ မန်ယူနည်းပြ ဆိုးလ်ရှားက ပြောပါတယ်။

    ပြီးခဲ့တဲ့ ၈ ပွဲမှာ ခြောက်ပွဲရှုံးပြီး စွမ်းဆောင်ရည်ကျဆင်းလာတဲ့အတွက် နည်းပြလမ်းပတ်ကို ချယ်ဆီးက တနင်္လာနေ့မှာ ထုတ်ပယ်ခဲ့တာပါ။ ရာသီအစပိုင်းမှာ မန်ယူလည်း ဒီလိုအခြေအနေဆိုးမျိုး ကြုံတွေ့ခဲ့ရပြီး အသင်းအုပ်ချုပ်ရေးပိုင်းက ဖြေး​ဖြေးမှန်မှန်သွားဖို့ သူ့ကို ထောက်ခံပေးခဲ့တယ်လို့ ဆိုလ်ရှားက ဆိုပါတယ်။

    အသင်းကို နည်းပြတာဟာ ရေရှည်သွားရတဲ့အလုပ်မျိုးဖြစ်ပြီး ချယ်ဆီးဘုတ်အဖွဲ့က လမ်းပတ်အပေါ် အချိန်မပေးတာကို အံ့ဩမိကြောင်း၊ ဒီအတွက် မှတ်ချက်မပေးလိုဘဲ ချယ်ဆီးကို ဇယားထိပ်ရောက်အောင် ပို့ပေးနိုင်ခဲ့တဲ့ လမ်းပတ်ဟာ နည်းပြဘ၀မှာ တစ်ကျော့ပြန်အောင်မြင်လာမယ်လို့ ယုံကြည်ကြောင်း ထည့်သွင်းပြောဆိုခဲ့ပါတယ်။

    Ref: BBC