အောက်တိုဘာ၊ ၃၀၊ ၂၀၁၂
(မဇ္ဈိမသတင်းဂျာနယ်အတွဲ-၁၊အမှတ်-၆၊စာ-၁၂)
ရခိုင်ပြည်နယ်တွင် မေလကုန်မှ စတင်သည့် ဗုဒ္ဓဘာသာ ရခိုင်များနှင့် ရိုဟင်ဂျာ အစ္စလာမ်ဘာသာဝင်များအကြား တင်းမာမှုများမှသည် ဇွန်လအတွင်း အကြမ်းဖက်တိုက်ခိုက်မှုများ၊ မီးရှိုးဖျက်စီးမှုများ ဖြစ်ပေါ်ခဲ့သည်။
အာဏာပိုင်များက မြို့နယ်အချို့အား ပုဒ်မ ၁၄၄ ထုတ်ပြန်ခဲ့ပြီးနောက် အရေးပေါ်အခြေအနေပင် ကြေငြာခဲ့ရပြီး အခြေအနေများ ငြိမ်သက်သွားသယောင်ရှိခဲ့သော်လည်း အောက်တိုဘာလ ၂၁ ရက်နေ့မှ စတင်ကာ နှစ်ဖက်အုပ်စုများ ထိပ်တိုက်ရင်ဆိုင် တိုက်ခိုက်မှုများနှင့် မီးရှို့ဖျက်ဆီးမှုများ ဖြစ်ပေါ်လာခဲ့ပြန်သည်။
ယခုကဲ့သို အဓိကရုဏ်းများအပေါ် မီဒီယာများ သတင်း တင်ဆက်မှုများနှင့် ပက်သက်၍ သဘောထားများ သိရှိနိုင်ရန်အတွက် ရန်ကုန်မြို့ အခြေစိုက် မြန်မာနိုင်ငံလုံးဆိုင်ရာ အစ္စလာမ်ဘာသာရေး အဖွဲ့၏ တွဲဖက်အတွင်းရေးမှူးချုပ် ဦးဝဏ္ဏရွှေအား မဇ္စျိမသတင်းဌာနက ဆက်သွယ်မေးမြန်းထားသည်။
အိဒ်နေ့ကို တနိုင်ငံလုံး မကျင်းပဖို့ ဘာကြောင့် ဆုံးဖြတ်ခဲ့ရလဲဆိုတာ ရှင်းပြပေးပါဦး။
အိဒ်နေ့ကို ကျွန်တော်တို့ မကျင်းပဖြစ်တဲ့အကြောင်းကတော့ ရခိုင်ဒေသမှာ ၅ လကျော်မျှ တရားဥပဒေစိုးမိုးမှုကင်းမဲ့နေတာ၊ အပြစ်မဲ့ပြည်သူတွေ သေကြေကြတယ်။ အိုးအိမ်တွေ စွန့်ခွာ ထွက်ပြေရတယ်။ ဒီအခြေအနေကို ကျွန်တော်တို့ စိတ်မချမ်းမြေ့ဘူး။ တရားဥပဒေ စိုးမိုးရေး ရှိစေချင်တယ်။ အဒီ ရခိုင်ပဋိပက္ခကို အကြောင်းပြုပြီးတော့ အခြားပြည်နယ်နဲ့ တိုင်းတွေမှာလည်း ကျွန်တော်တို့နိုင်ငံမှာ ရှိခဲ့ပြီးသား ဘာသာ တစ်ခုနဲ့ တစ်ခုကြားမှာ လေးစားမှု၊ နားလည်းမှုတွေဟာ တဖြည်းဖြည်း လျော့ပါးလာတယ်။
အဲ့ဒီကိစ္စကို အကြောင်းပြုပြီးတော့ ကုရ်ဘာနီအိဒ်နေ့ ပြုလုပ်ဆင်နွှဲခြင်းအားဖြင့် ရှေ့ကကောင်းခဲ့တဲ့ အစဉ်အလာတွေကို ထိခိုက်နိုင်တဲ့ အတွက် ဒီနှစ်အတွက် ကုရ်ဘာနီအိဒ်နေ့ စွန့်လွှတ်လိုက်ပါတယ်။
ကုရ်ဘာနီအိဒ်နေ့ဟာ အစ္စလာမ်ဘာသာဝင်တွေ အထွဋ်အမြတ်ထားရာ နေ့ထူးနေ့မြတ်တစ်ခုလို့ သိရပါတယ်။ ဒီလိုနေ့မျိုးကို မကျင်းပရပဲ စွန့်လွှတ်လိုက်ရတော့ ဘယ်လိုခံစားရပါသလဲ။
လူမျိုးတိုင်း ဘာသာတိုင်းပါပဲ။ နေ့ထူးနေ့မြတ် နှစ်ပတ်လည်းရက်ဆိုတာ တစ်နှစ်လုံး စောင့်နေတဲ့ရက်ပါပဲ။ ဒီရက်ကို စွန့်လွှတ်တဲ့ အတွက် မွတ်စလင်မ်အားလုံးကတော့ အတိုင်းမသိ ၀မ်းနည်းပါတယ်။ ဒါပေမယ့် အဲ့ဒီဝမ်းနည်းတာက ရခိုင်ဒေသဖြစ်စဉ်ကို အကြောင်းပြုပြီး ကျွန်တော်တို့ နိုင်ငံမှာ မကြုံဖူးတဲ့ အဲ့လို ကိစ္စရပ်တွေဖြစ်နေတာ ၀မ်းနည်းစရာပါ။
ပဋိပက္ခမှာ ထိခိုက်နစ်နာမှုတွေ သေဆုံးမှုတွေကိုရော ဘယ်လိုသတင်းရပါသလဲ။
အခုဖြစ်နေတဲ့ သတင်းအားလုံးဟာ အများအားဖြင့် အလွဲတွေချည်းပဲ။ ရခိုင်ဒေသမှာရှိတဲ့ ပြည်သူတွေဆိုရင်လည်း အသက်အိုးအိမ် လုံခြုံမှုမရှိဘူး။ စားဖို့ ရိက္ခာ မရှိဘူး။ ဒါပေမယ့် အဲ့ဒါ ပြောင်းပြန်ကြီးခမျ။ ဘယ်လိုလဲဆိုတော့ အဲ့ဒီလူတွေကပဲ အကြမ်းဖက်မှုတွေ ဆောင်ရွက်မယ့်အနေအထားမျိုးလို သတင်းတွေဟာ မတည်ငြိမ်ပါဘူး။ မမှန်ဘူး။ ကျွန်တော်တို့ပြောချင်တာ ရခိုင်ဒေသမှာ အများစုက နှစ်ဖက်ပြည်သူတွေ ဒုက္ခရောက်နေပါတယ်။ ဖြေရှင်းနိုင်တဲ့ နည်းလမ်းတွေကို ကျွန်တော်တို့ ဘာသာရေး အဖွဲ့အစည်းတွေက ရှာဖွေနေပါတယ်။ အမှန်တကယ်ဒီလူတွေအတွက်လိုနေတာက ရိက္ခာတို့၊ တည်ငြိမ်အေးချမ်းစွာ အသက်ရှင်နေထိုင်ခွင့်တို့ဖြစ်ပါတယ်။
သတင်းအမျိုးမျိုး တစ်နေရာနဲ့ တစ်နေရာ မတူညီကြဘူးဖြစ်နေပါတယ်။ မှန်ကန်တိကျတဲ့ ကိန်ဂဏန်းတွေနဲ့ အဖြစ်မှန်တွေကို သိရဖို့နဲ့ မှန်ကန်တဲ့ အချက်အလက်တွေ ရရှိဖို့အတွက် ဘယ်လိုဆောင်ရွက်ရင် ရနိုင်တယ်လို့ အကြံပြုချင်ပါသလဲ။
အဲ့လိုနေရာတွေ သတင်းရယူဖို့၊ ထုတ်လုပ်ဖို့ဆိုတာ နိုင်ငံပိုင် သတင်းဌာနတွေလည်း ရှိတာပဲလေ။ ဖြစ်စဉ်ဖြစ်ရပ်တွေကို အချိန်နဲ့ တပြေးညီ တိတိကျကျ မှန်မှန်ကန်ကန် ဖော်ထုတ်မယ်ဆိုရင် ဒီကောလဟာလတွေ၊ ထင်ကြေးနဲ့ သတင်းတွေ၊ လေထဲမှာ ပျောက်သွားမှာပေါ့။
ဦးဝဏ္ဏရွှေတို့ သတင်းရင်းမြစ်တွေအရ ရာဂဏန်းတောင်ရှိနေတယ်ဆိုတော့၊ အတော်လေးကို ကွာခြားနေတာ တွေ့ရပါတယ်။
နိုင်ငံတော် အစိုးရက ဘက်ပေါင်းစုံက စဉ်းစားပြီးတော့ သတင်းကို လိုတဲ့ အဆင့်ဆင့်က ထုတ်ပြန်သွားတဲ့ သဘောမျိုး ကျွန်တော်တို့ ယူဆပါတယ်။ ဒါပေမယ့် အဲ့ဒါကလည်း နိုင်ငံတော်က ချင့်ချိန်ပြီး သတင်းကို ထုတ်ပြန်တဲ့ အခါမှာ အခက်အခဲက ဘာပေါ်လာလဲဆိုတော့ ချင့်ချိန်ပြီးသတင်းထုတ်ပြန်တဲ့ အပေါ် အခွင့်ကောင်းယူပြီး သတင်းမှားတွေ ၀င်လာတတ်တာပေါ့နော်။ ကျွန်တော်တို့ အမြင်ကတော့ နိုင်ငံတော်ကနေ သတင်းကို အချိန်နဲ့တပြေးညီ ထုတ်ပေးမယ်။ သတင်းမှားတွေကို မှားရင်မှားကြောင်း ချေဖျက်ပေးမယ်ဆိုရင်တော့ ကောလဟာလတွေ ပျောက်သွားမှာပေါ့။
အရင် ဇွန်အရေးအခင်းကိစ္စကို စုံစမ်းရေးကော်မရှင်တွေ သွားရောက် စုံစမ်းဖော်ထုတ်နေတဲ့ကာလမှာ (အစီရင်ခံစာတောင် ထွက်မလာသေးပါဘူး) တကျော့ပြန်ဖြစ်လာရတော့ ဘာကြောင့်လို့ သုံးသပ်နိုင်မလဲခမျ။
လက်ရှိဖြစ်နေတဲ့ဟာရော အရင်ဖြစ်စဉ် ဖြစ်နေတဲ့ဟာရော၊ ဒီဖြစ်စဉ်ရဲ့ အစရော အားလုံးဟာ ဥပဒေချိုးဖောက်မှုတွေချည်းပဲ။ ဥပဒေကို မလေးမစားလုပ်ပြီး ဆောင်ရွက်တဲ့သူတွေကြောင့် ဥပဒေဘောင်ထဲက ဖြေရှင်းရမယ့်အစား ဥပဒေမဲ့ဖြေရှင်းတာတွေက တနေ့တနေ့ ဥပဒေမဲ့ ဆောင်ရွက်ချက်တွေ ခေတ်စားလာပြီးတော့ ဥပဒေမဲ့မှုအပေါ်မှာ ဥပဒေထပ်မဲ့တဲ့ဟာဖြစ်ပါတယ်။ ဒါတွေကို ဖြေဖျောက်ဖို့ဆိုတာ ဒီနေရာမှာ လူမျိုးဘာသာကို အဓိကမထားပဲနဲ့၊ ကျွန်တော်တို့ မြင်ရမှာက ဘယ်လူမျိုးပဲဖြစ်ဖြစ်၊ ဘယ်ဘာသာပဲဖြစ်ဖြစ် ဥပဒေနဲ့ အညီနေတဲ့သူဟာ ဥပဒေဘက်တော်သားဟာ လူကောင်းတွေ ဖြစ်ပါတယ်။ ဥပဒေကို ဆန့်ကျင်ဖောက်ဖျက်တဲ့ ဘယ်လူမျိုး၊ ဘယ်လူမျိုး၊ ဘယ်ဘာသာမဆို ဥပဒေနဲ့ အညီအရေးယူဆောင်ရွက်မယ်ဆိုရင် ဒီဥပဒေမဲ့မှုတွေဟာ ပျောက်ကွယ်သွားမှာ ဖြစ်ပါတယ်။ ပြည်သူလူထုဘက်က အားနည်းချက်လို့ ကျွန်တော်မဆိုလိုဘူးခမျ။ ကျွန်တော်တို့ နိုင်ငံ ရာခိုင်နှုံးအားဖြင့်ပြောရရင် နည်းနည်းလေးသာ ဆိုးတာဖြစ်ပါလိမ့်မယ်။ ကျွန်တော်တို့ နိုင်ငံသားအများစုကြီးက လူကောင်းတွေပါပဲ။
အစ္စလာမ်ဘာသာရေး အဖွဲ့အစည်းတွေကလဲ အကြမ်းမဖက်တဲ့နည်းနဲ့ ငြိမ်းငြိမ်းချမ်းချမ်းနဲ့ ဒီပဋိပက္ခကို ဖြေရှင်းဖို့ပြောသလို၊ ဗုဒ္ဓဘာသာ ဆရာတော်ကြီးတွေ နိုင်ငံတော် သံဃာ့မဟာ နာယကအဆင့် ဆရာတော်ကြီးတွေကလည်း မေတ္တာရှေ့ထားပြီး ဆောင်ရွက်ဖို့ ဆော်သြကြပါတယ်။ ဒါဟာ နှစ်ဖက် အသိုင်းအ၀ိုင်းကြားမှာ ဘာသာရေးတာဝန်ရှိသူတွေဘက်က တာဝန်ပျက်ကွက်မှု မဟုတ်ပါဘူးခမျ။ တပိုင်းက နိုင်ငံတော်အစိုးရအနေနဲ့ တည်ငြိမ်းအေးချမ်းစွာနေဖို့ပြောတယ်။ ပြုပြင်ဆောင်ရွက်ဖို့ ပြောတာတွေလဲ ရှိပါတယ်။ သို့သော် ဥပဒေစိုးမိုးမှု မဲ့တယ်ဆိုတာက ဥပဒေကို ကိုင်စွဲပြီး ဆောင်ရွက်တဲ့ အဖွဲ့အစည်းများဟာ ဥပဒေနဲ့အညီ တိတိကျကျ ဆောင်ရွက်ပေးဖို့လိုပါတယ်။ ဥပဒေနဲ့ အညီ တိတိကျကျ ဆောင်ရွက်ပေးရင် ပြစ်မှုတစ်ခု ကျူးလွန်တာနဲ့ အဲ့ဒီပြစ်မှုနဲ့ အညီ အရေးယူပေးမယ်ဆိုရင် နောက်လူက အဲ့ဒီပြစ်မှုကို မကျူးလွန်တော့ဘူး။
မီဒီယာများကလည်း ကျွန်တော်တို့ နိုင်ငံရဲ့ သတင်းကို ရေးသားတဲ့ အခါမှာ ဘာသာပေါင်းစုံ ချစ်ကြည်ရေးကိုလည်း ရှေးရှုပေးပါလို့ မေတ္တာ ရပ်ခံလိုပါတယ်။ ဖြစ်စဉ်ဖြစ်ရပ်အမှန်ကို ရေးတာကိုတော့ ကျွန်တော်တို့လည်း လက်ခံပါတယ်။ သို့သော် သတင်းရဲ့ ဦးတည်ချက်ကတော့ ဘာသာပေါင်းစုံချစ်ကြည်ရေးကို ရှေးရှုပေးပါလို့ ကျွန်တော်တို့အနေနဲ့ မေတ္တာရပ်ခံလိုပါတယ်။
ဆိုတော့ ဥပဒေကို အကောင်အထည်ဖော်တဲ့ အပိုင်းမှာ ချွတ်ယွင်းအားနည်းချက်တွေ တွေ့နေရတယ်လို့ ဆိုလိုချင်ပါသလားခမျ။
ပွင့်ပွင့်လင်းလင်းပြောရရင်တော့ ကျွန်တော် အဲ့လိုပဲ ယူဆပါတယ်။
OIC ရုံးဖွင့်မယ့်ကိစ္စနဲ့ ပက်သက်ပြီးရော သတင်းတွေက အမျိုးမျိုးဖြစ်နေပါတယ်။ OIC ရုံးဖွင့်ဖို့ဆိုတဲ့ ကိစ္စမှာ မြန်မာအစ္စလာမ်အဖွဲ့ကြီးကို ဆွေးနွေးတိုင်ပင်မှုတွေ ရှိခဲ့လားခမျ။
ဒီနေရာမှာ တစ်ချက်ရှိတာက ဘယ်အဖွဲ့အစည်းပဲလာလာ ကျွန်တော်တို့ နိုင်ငံအတွင်းမှာရှိတဲ့ လူမျိုးတစ်မျိုးနဲ့တစ်မျိုး၊ ဘာသာတစ်ခုနဲ့တစ်ခုကြားမှာ ချစ်ကြည်မှုကို ထိခိုက်စေမယ်ဆိုရင်တော့ ဒီလုပ်ရပ်မျိုးကို စဉ်းစာသင့်တယ်။ OIC နဲ့ပက်သက်လို့ ကျွန်တော်တို့ကို နိုင်ငံတော်အစိုးရကနေပြီးတော့ စာချုပ်မချုပ်ခင်ရော၊ ချုပ်ပြီးတော့ရော တစ်စုံတရာ ညှိနှိုင်းခဲ့တာ တိုင်ပင်ခဲ့တာ ဆွေးနွေးခဲ့တာ မရှိပါဘူး။ အလားတူပဲ OIC ကို ဗမာပြည်ထဲမှာ ရုံးခန်းဖွင့်ဖို့အတွက် ကျွန်တော်တို့ ၅ ဖွဲ့ကနေ တောင်းဆိုခဲ့တာ၊ တိုက်တွန်းခဲ့တာ၊ အကြံပေးခဲ့တာလဲ မရှိပါဘူး။ OIC နဲ့ပက်သက်လို့ MOU စာချုပ် ချုပ်ပြီးတဲ့ နောက်ပိုင်းမှာလည်း ကျွန်တော်တို့ တွေ့ရှိချက်အရ ဆိုလို့ ရှိရင် အစိုးရက အများပြည်သူ သိရှိအောင် ကြေငြာပေးခဲ့ခြင်းလည်း မရှိဘူး။ ကြေငြာပေးတဲ့ အချက်တွေဟာ ကောလဟာလတွေ ပျံ့နှံ့ပြီးတော့ နားလည်မှု လွဲမှားမှုတွေပျံ့နှံ့ပြီးတော့ ကြီးထွားတဲ့အချိန်ကြမှ ထုတ်ပြန်တော့ OIC နဲ့ ပက်သက်ပြီး ကျွန်တော်တို့အတွက်လည်း ပြောရဆိုရ ခက်တဲ့အနေအထားမျိုးဖြစ်သွားပါတယ်။
OIC နဲ့ နယ်စပ်ရေးရာဝန်ကြီးနဲ့ ချုပ်ဆိုခဲ့တဲ့ စာချုပ်ဆိုတာ ဖတ်ခွင့်၊ သိခွင့် ရလားခမျ။
ကျွန်တော်တို့လည်းမသိရပါဘူးခမျ။ OIC နဲ့ အစိုးရ ဆောင်ရွက်ချက်ကို တစ်စုံတစ်ရာ မသိရပါဘူး။ အကြမ်းဖျင်းပေါ့နော် မီဒီယာမှာ ပါသလောက်တော့ သိပါတယ်။ လူမှုအထောက်အကူပြု လုပ်ငန်းတွေဆောင်ရွက်ပေးမယ်။ ဘာသာရေး ကိစ္စမပါဘူးဆိုတဲ့ သဘောတွေ ကျွန်တော်တို့ ဖတ်ရပါတယ်။
မြန်မာအစ္စလာမ်အဖွဲ့ကြီးအနေနဲ့ရော ရခိုင်ပြည်နယ်မှာ ဒုက္ခရောက်နေသူတွေအတွက် ဘာတွေဆောင်ရွက်ပေးနေပါသလဲ။
ဇွန်လမှာစဖြစ်ကတည်းက ဒုက္ခသည် ကူညီရေးပံ့ပိုးမှုကော်မတီဆိုတာ ကျွန်တော်တို့ ဖွဲ့ပြီးတော့ တနိုင်တပိုင် ဆန်တို့၊ ဆီတို့၊ ရိက္ခာတို့ ထောက်ပံ့တဲ့ကိစ္စတွေ လုပ်ခဲ့ပါတယ်။ ဒီလိုလုပ်တဲ့နေရာမှာ ကျွန်တော်တို့က အစ္စလာမ် ဘာသာဝင်တွေတင်မကဘူး။ ဒုက္ခရောက်နေတဲ့ ကျွန်တော်တို့ ညီနောင်ပြည်သူတွေပါ ကျွန်တော်တို့ တတ်နိုင်တဲ့နည်းလမ်းနဲ့ တတ်စွမ်းသမျှ ကူညီဆောင်ရွက်ပေးခဲ့ပါတယ်။
အခေါ်အဝေါ်တွေနဲ့ ပက်သက်ပြီး ရခိုင်ပြည်နယ်မှာရှိတဲ့ အစ္စလာမ်ဘာသာဝင်တွေကို ဘင်္ဂါလီတွေလို့ခေါ်ကြသလို၊ တချို့မလည်း ရိုဟင်ဂျာလို့ ခေါ်ကြပါတယ်။ ဘာကွာခြားလဲဗျ။
ကျွန်တော်တို့ ဘာသာရေး အဖွဲ့အစည်းတွေနဲ့ သက်ဆိုင်တဲ့ဟာက မြန်မာနိုင်ငံ နယ်နမိတ်အတွင်းမှာရှိတဲ့ အစ္စလာမ်သာသနာကိုကိုးကွယ်တဲ့ မည်သည့်လူမျိုးမဆို ကျွန်တော်တို့နဲ့ သက်ဆိုင်ပါတယ်။ ကျွန်တော်တို့က သူတို့ရဲ့ ဘာသာရေးနဲ့ ပက်သက်တဲ့ ကိစ္စတွေကို ဆောင်ရွက်တာ ဖြစ်ပါတယ်။ ဥပမာ ရခိုင်ပြည်နယ်မှာ တိုင်းရင်းသားထဲမှာ ကမန်လူမျိုးရှိတယ်။ သူတို့တွေက အစ္စလာမ်ဘာသာဝင်တွေပါ။ တိုင်းရင်းသားတွေပါပဲ။ အလားတူပဲ အခြားအခြားသော ပြည်နယ်နဲ့ တိုင်းတွေမှာလည်း တိုင်းရင်းသားလူမျိုးတွေထဲမှာ အစ္စလာမ်ဘာသာဝင် အနည်းနဲ့ အများဆိုသလိုရှိပါတယ်။ သူတို့ လူမျိုးတစ်မျိုးချင်းဆိုင်ရာ အမျိုးသားရေး၊ သူတို့ အမည်ပြဌာန်းတာနဲ့ ပက်သက်လို့ ကျွန်တော်တို့ ဘာသာရေးအဖွဲ့တွေရဲ့ တာဝန်လည်းမဟုတ်ပါဘူး။ သူတို့ ရဲ့ အယူအဆသာလျှင်ဖြစ်ပါတယ်။ ကျွန်တော်တို့ရဲ့တာဝန်ကတော့ သူတို့ရဲ့ ကိုးကွယ် ယုံကြည်မှုနဲ့ပက်သက်တဲ့ ကိစ္စရပ်တွေကို ဆောင်ရွက်တဲ့ အဖွဲ့အစည်းဖြစ်ပါတယ်။
အရင်တုန်းကရော မြန်မာနိုင်ငံမှာ အခုလို အီးဒ်နေ့ မကျင်းပဘဲ ရှောင်ကြဉ်ခဲ့ရတာတွေ ဖြစ်ခဲ့ဖူးလားဗျ။
ဖြစ်ခဲ့ဖူးပါတယ်။ ၁၉၈၃ ခုနှစ်မှာ တစ်ခေါက်ဖြစ်ပါတယ်။ အဲ့ဒီတုန်းက ဘာသာတစ်ခုနဲ့ တစ်ခုကြား နားလည်မှုတွေ ပျက်ပြားလို့ဖြစ်ပါတယ်ခဗျာ။ ၁၉၈၇ မှာတစ်ခါ ၁၉၉၇ မှာတစ်ခါဖြစ်တယ်။ သုံးကြိမ်ဖြစ်ဖူးပါတယ်။ ၁၉၈၃ မှာ ဖြစ်တဲ့ကိစ္စကတော့ မော်လမြိုင်မှာ ဖြစ်ခဲ့တယ်။ ရေးမြို့မှာ ဗလီဝတ်ကျောင်းတော် ဖျက်စီးခံရတဲ့ ကိစ္စဖြစ်ဖူးတယ်။ ၁၉၈၇ မှာဖြစ်တဲ့ ကိစ္စကတော့ ညောင်တုန်းမြို့မှာ ပြသနာ အနည်းငယ်တက်ခဲ့ဖူးတယ်။ နောက်တစ်ခေါက် တောင်ကြီးမြို့မှာ ဖြစ်ခဲ့ဖူးတယ်။ ၁၉၉၇ မှာတော့ ရန်ကုန်မြို့မှာလည်း အနည်းငယ် ဖြစ်ခဲ့ဖူးပါတယ်။ ကျွန်တော်တို့ မှီသလောက်ဖြစ်စဉ်တွေကို တင်ပြတာခဗျ။
ဘာတွေ ထပ်မံဖြည့်စွက်ပြောကြားလိုပါသလဲခမျ။
ကျွန်တော်တို့ မြန်မာပြည်မှာ အစ္စလာမ်ဘာသာရောက် ရှိခဲ့တာ နှစ်ပေါင်းများစွာကြာပါပြီ။ ကျန်တဲ့ ညီနောင်တွေရဲ့ အကြားမှာ ငြိမ်းငြိမ်းချမ်းချမ်း၊ ချစ်ချစ်ခင်ခင် နေထိုင်ခဲ့ပါတယ်။ ရခိုင်ပြည်နယ် ပဋိပက္ခကို အကြောင်းပြုပြီးတော့ ကျွန်တော်တို့မှာ ဘာဖြစ်လဲဆိုတော့ ကျန်တဲ့ ဘာသာဝင်တွေနဲ့ ကျွန်တော်တို့နဲ့ကြားမှာ အားတုံ့အားနာ ဖြစ်နေရပါတယ်။ အဲ့လို အားတုံ့အားနာ ဖြစ်နေရတာကို ကျွန်တော်တို့ မနေလိုပါဘူး။ အရင်လိုပဲ ဘာသာတစ်ခုနဲ တစ်ခုကြားမှာ ချစ်ချစ်ကြည်ကြည်နေရတာကိုပဲ ကျွန်တော်တို့ ကြိုက်ပါတယ်။ ဘာသာပေါင်းဆုံးချစ်ကြည်ရေးကို ကျွန်တော်တို့လည်း တတ်နိုင်သမျှ ဆောင်ရွက်နေပါတယ်။
မီဒီယာများကလည်း ကျွန်တော်တို့ နိုင်ငံရဲ့ သတင်းကို ရေးသားတဲ့အခါမှာ ဘာသာပေါင်းစုံ ချစ်ကြည်ရေးကိုလည်း ရှေ့ရှုပေးပါလို့ မေတ္တာရပ်ခံလိုပါတယ်။ ဖြစ်စဉ်ဖြစ်ရပ် အမှန်ကိုရေးတာကိုတော့ ကျွန်တ်ာတို့လည်း လက်ခဲ့ပါတယ်။ သို့သော် သတင်းရဲ့ ဦးတည်ချက်ကတော့ ဘာသာပေါင်းစုံချစ်ကြည်ရေးကို ရှေးရှုပေးပါလို့ ကျွန်တော်တို့ အနေနဲ့ မေတ္တာရပ်ခံလိုပါတယ်။
