Tag: Iran

ဇန်နဝါရီ ၁၆၊ ၂၀၂၁
M-Media

-ပြည်တွင်းဖြစ် နောက်ဆုံးပေါ် ဒုံးကျည်တွေ၊ တိုက်ပွဲဝင်ဒရုန်းတွေ စမ်းသပ်မယ့် အကြီးစား စစ်ရေးလေ့ကျင့်မှုတစ်ခုကို အီရန်က နိုင်ငံအလယ်ပိုင်းမှာ စတင်ပြုလုပ်နေပါတယ်။

ဒီစစ်ရေးလေ့ကျင့်မှုကို Great Prophet 15 လို့ အမည်ပေးထားပါတယ်။ လေ့ကျင့်မှု ပထမအဆင့်မှာပဲ မြေပြင်ကမြေပြင်ပစ် မျိုးဆက်သစ် တိုက်ချင်းပစ် ဒုံးကျည်တွေ၊ ဗုံးကြဲဒရုန်းတွေကို စမ်းသပ် အသုံးပြုခဲ့ပြီး ပစ်မှတ်တွေကို ထိမှန်ခဲ့တယ်လို့ အီရန်စစ်တပ်က ထုတ်ပြန်ခဲ့ပါတယ်။

မနေ့က ဒုံးကျည်ပစ်လွှတ်မှုကို တက်ရောက်ကြည့်ရှုခဲ့တဲ့ တော်လှန်ရေးအစောင့်တပ်ဖွဲ့ အကြီးအကဲ ဗိုလ်ချုပ် ဟိုစိန် ဆာလာမီက မိမိတို့ရဲ့ အရေးပါတဲ့ အကျိုးစီးပွားကို ကာကွယ်ဖို့ အီရန်က ခိုင်မာတဲ့သန္နိဌာန် ချထားတယ်ဆိုတာကို ဒုံးကျည်သစ်နဲ့ ဒရုန်းအသစ်တွေက ပြသနေတာလို့ ပြောကြားခဲ့ပါတယ်။

အခု စစ်ရေးလေ့ကျင့်မှုမှာ Zulfaqar၊ Zelzal နဲ့ Dezful စတဲ့ ပြည်တွင်းဖြစ်ဒုံးကျည်တွေကိုလည်း စမ်းသပ်ခဲ့ပါတယ်။ ဒီဒုံးကျည်တွေဟာ ​ပဲ့ထိန်း ဒုံးထိပ်ဖူးတွေ တပ်ဆင်လို့ရပြီး ရန်သူတွေရဲ့ ဒုံးခွင်းစနစ်ကို ထိုးဖောက်ဝင်ရောက် နှောက်ယှက်နိုင်တယ်လို့ ဆိုပါတယ်။

အီရန်ဟာ ပြီးခဲ့တဲ့တစ်ပတ်ကပဲ နိုင်ငံတောင်ပိုင်းက မဟာဗျူဟာကျတဲ့ အိုမန်ပင်လယ်နဲ့ ပါရှန်ပင်လယ်ကွေ့မှာ ရေတပ်စစ်ရေးလေ့ကျင့်မှု လုပ်ခဲ့ပါတယ်။

Ref: Press TV

ဇန်နဝါရီ ၉၊ ၂၀၂၁
M-Media

-ပါရှန်ပယ်လယ်ကွေ့မှာ တည်ဆောက်ထားတဲ့ ဧရာမ မြေအောက်ဒုံးကျည်စခန်းကို အီရန်က မနေ့မှာ ထုတ်ပြလိုက်ပြီး အမေရိကန်နဲ့ တင်းမာမှုတွေ မြင့်တက်လာတဲ့အချိန်မှာ ဒီဆောင်ရွက်မှု ပေါ်ပေါက်လာတာပါ။

အီရန်တော်လှန်ရေးအစောင့်တပ် (IRGC) က ထိပ်တန်း တပ်မှူးတွေ ဒုံးကျည်စခန်း စစ်ဆေးနေတာကို နိုင်ငံပိုင်သတင်းဌာနက ထုတ်လွှင့်ပြသခဲ့တာ ဖြစ်ပါတယ်။ ဝင်ပေါက် ကြမ်းပြင်မှာ အစ္စရေးနဲ့ အမေရိကန်အလံကို ဆေးခြယ်ထားပြီး တပ်မှူးတွေက ဒီအလံပေါ်ကို ဖြတ်လျှောက်သွားကြတာပါ။

အဆုံးမရှိတဲ့ လှိုဏ်ခေါင်းကြီးမှာ ဒုံးကျည်အမျိုးစားများစွားနဲ့ ဒုံးပစ်လောင်ချာ အများအပြား ရှိနေတာကိုလည်း ဒီဗီဒီယိုမှာ တွေ့ရပါတယ်။

IRGC အကြီးအကဲ ဟိုစိန် ဆာလာမီက မိမိတို့ရေတပ်မှာ ဒီလို မြေအောက်ဒုံးကျည်စခန်းတွေအများအပြား ရှိနေတယ်လို့ ဗီဒီယိုမှာ ပြောကြားခဲ့ပါတယ်။

“ဒီကနေ့ IRGC ရေတပ်က ဒုံးကျည်တွေဟာ ကီလိုမီတာရာချီ သွားနိုင်ပြီး ပိုမိုတိကျလာသလို ဖျက်ဆီးနိုင်စွမ်းလည်း မြင့်လာပါပြီ”

ဒီဒုံးကျည်စခန်းရဲ့ တည်နေရာအတိအကျကိုတော့ ထည့်သွင်းဖော်ပြခဲ့ခြင်း မရှိပါဘူး။

​IRGC အကြီးအကဲ ကာစင်ဆိုလိုင်မာနီကို အမေရိကန်က လုပ်ကြံသတ်ဖြတ်မှု တစ်နှစ်ပြည့်သွားတဲ့အချိန်မှာ အမေရိကန်နဲ့ အီရန်တို့အကြား တင်းမာမှုက ပိုမိုမြင့်တက်လာပါတယ်။

နှစ်ပတ်လည်မှာ အီရန်က လက်တုန့်ပြန်တိုက်ခိုက်မှာကို အမေရိကန်က စိုးရိမ်တဲ့အတွက် အရှေ့အလယ်ပိုင်းက အမေရိကန်ရေတပ်ရဲ့ တစ်စီးတည်းသော လေယာဉ်တင်သင်္ဘော စခန်းပြန်လည်ခေါ်ယူမှုကို အမေရိကန်က ရပ်ဆိုင်းထားပါတယ်။

အီရန်တာဝန်ရှိသူတွေက ဗိုလ်ချုပ် ဆိုလိုင်မာနီကို လုပ်ကြံတဲ့သူတွေကို လက်စားချေမှာဖြစ်ပေမယ့် သင့်လျော်တဲ့အချိန်ရောက်မှ လုပ်ဆောင်မယ်လို့ ပြောကြားထားပါတယ်။

အီရန်ဟာ လွန်ခဲ့တဲ့ ၃ ရက်က ပြည်တွင်းဖြစ် မောင်းသူမဲ့လေယာဉ်တွေနဲ့ ပထမဆုံး စစ်ရေးလေ့ကျင့်မှုကို ပြုလုပ်ခဲ့ပါတယ်။

Ref: Aljazeera

ဒီဇင်ဘာ ၂၊ ၂၀၂၀
M-Media

-ယူရေနီယံသန့်စင်မှုကို ၂၀ ရာခိုင်နှုန်းအထိရောက်အောင် လုပ်ဆောင်သွားမယ်လို့ အီရန်က နိုင်ငံတကာ အနုမြူအေဂျင်စီ IAEA ကို အကြောင်းကြားလိုက်ပါတယ်။

အီရန်ဟာ အရင်က ယူရေနီယံကို ၂၀ ရာခိုင်နှုန်းအထိ သန့်စင်နိုင်ခဲ့ပေမယ့် ၂၀၁၅ ခုနှစ် နျူသဘောတူညီချက်မှာ ၃.၆၇ ရာခိုင်နှုန်းသာ သန့်စင်ရမယ်လို့ ပါဝင်တာကြောင့် သန့်စင်မှုလုပ်ငန်းကို လျှော့ချခဲ့ပါတယ်။

နျူသဘောတူညီချက်ကနေ အမေရိကန်နှုတ်ထွက်ခဲ့တဲ့ ၂၀၁၈ ခုနှစ်ကစလို့ အီရန်က ယူရေနီယံ သန့်စင်မှု ပြန်လုပ်ခဲ့ပြီး လက်ရှိမှာ ၄.၅ ရာခိုင်နှုန်း သန့်စင်ထားနိုင်ပါတယ်။ ယူရေနီယံကို ၉၀ ရာခိုင်နှုန်း သန့်စင်နိုင်မှသာ လက်နက်ထုတ်နိုင်မှာ ဖြစ်ပါတယ်။

IAEA ရဲ့ မနေ့က ထုတ်ပြန်ချက်မှာ အီရန်က လွှတ်တော်မှာ မကြာသေးမီက အတည်ပြုလိုက်တဲ့ ဥပဒေသစ်အရ ယူရေနီယံသန့်စင်မှုလုပ်ငန်းကို Fordow ဓာတ်ပေါင်းဖိုမှာ ၂၀ ရာခိုင်နှုန်းအထိ လုပ်​ဆောင်သွားမယ်လို့ အကြောင်းကြားခဲ့ကြောင်း ဖော်ပြထားပါတယ်။ သန့်စင်မှု လုပ်ဆောင်နေပြီလားဆိုတာ မပြောထားဘူးလို့လည်း IAEA က ဆိုပါတယ်။

Fordow ဓာတ်ပေါင်းဖိုကို လေကြောင်းရန် ကာကွယ်နိုင်ဖို့အတွက် တောင်ထဲမှာမြှုပ်ပြီး တည်ဆောက်ထားတာပါ။

အီရန်ရဲ့ နျူကလီးယားလုပ်ငန်းတွေဟာ လက်နက်ထုတ်ဖို့ရည်ရွယ်တယ်လို့ အမေရိကန်နဲ့ အနောက်နိုင်ငံတွေက စွပ်စွဲထားပြီး အီရန်ကတော့ ဒါကို ငြင်းပါတယ်။

သမ္မတထရမ့်လက်ထက်မှာ ၂၀၁၅ နျူသဘောတူညီချက်နေထွက်ပြီး အီရန်အပေါ် ပိတ်ဆို့မှုတွေ လုပ်ဆောင်ခဲ့ပေမယ့် ဇန်နဝါရီ ၂၀ ရက်နေ့မှာ အာဏာလွှဲပြောင်းယူမယ့် သမ္မတသစ် ဂျိုးဘိုင်ဒန်က ဒီစာချုပ်မှာ ပြန်လည်ပါဝင်သွားဖို့ ရှိနေပါတယ။်

Ref: Reuters

ဒီဇင်ဘာ ၂၉၊ ၂၀၂၀
M-Media

-တော်လှန်ရေးအစောင့်တပ်ဖွဲ့က ဗိုလ်ချုပ် ကာစင် ဆိုလိုင်မာနီ လုပ်ကြံခံရမှုမှာ ပါဝင်တယ်လို့ ယူဆရသူ အနည်းဆုံး ၄၈ ဦးကို ဖမ်းဆီးထားတယ်လို့ အီရန်တရားရေးဌာနရဲ့ လူ့အခွင့်အရေးကောင်စီက ထုတ်ပြန်ပါတယ်။

ဆိုလိုင်မာနီဟာ ဇန်နဝါရီလက အီရတ်မှာ အမေရိကန်ရဲ့လုပ်ကြံမှုကို ခံခဲ့ရတာပါ။ ဒီကိစ္စကြောင့် နှစ်နိုင်ငံ တင်းမာမှုတွေ မြင့်တက်ခဲ့ပြီး အီရန်ကလည်း အီရတ်က အမေရိကန်စစ်စခန်းအချို့ကို ဒုံးကျည်တွေနဲ့ တုန့်ပြန် တိုက်ခိုက်ခဲ့ပါတယ်။

အီရန်လူ့အခွင့်အရေးကောင်စီရဲ့ မနေ့ကထုတ်ပြန်ချက်မှာတော့ ဗိုလ်ချုပ် ဆိုလိုင်မာနီ လုပ်ကြံခံရမှုနဲ့ ပတ်သက်ပြီး ၄၈ ဦးကို ဖမ်းဆီးထားကာ တရားစွဲဆိုရေး လိုအပ်တာတွေ လုပ်ဆောင်နေကြောင်း၊ လုပ်ကြံမှုမှာ ပါဝင်တဲ့ နိုင်ငံတွေထံကနေ ဒီလူတွေရဲ့ အချက်အလက်တွေ၊ အထောက်အထားတွေ တောင်းထားကြောင်း ဖော်ပြခဲ့ပါတယ်။

ဗိုလ်ချုပ် ဆိုလိုင်မာနီဟာ အီရန်ရဲ့အင်အား အရှေ့အလယ်ပိုင်းတစ်ခွင် ဖြန့်ကျက်မှုမှာ အဓိကကျခဲ့ပြီး၊ အီရတ်နဲ့ ဆီးရီးယားက IS အကြမ်းဖက်အဖွဲ့ကို ရှင်းလင်းသုတ်သင်မှုမှာလည်း အရေးပါခဲ့ပါတယ်။

ဆိုလိုင်မာနီကို လုပ်ကြံမှုအတွင်း အီရတ်၊ အစ္စရေးနဲ့ တစ်ခြားနိုင်ငံတစ်ချို့ ပူးပေါင်းပါဝင်ခဲ့ပြီး နောက်ဆုံးရအချက်အလက်တွေအရ ဂျာမနီလည်း ဒီကိစ္စမှာ ပါဝင်တယ်လို့ ကောင်စီတာဝန်ရှိသူ အလီ ဘက္ကရီ ကာနီက မနေ့မှာ ပြောကြားခဲ့ပါတယ်။

Ref: Press TV

ဒီဇင်ဘာ ၂၆၊ ၂၀၂၀
M-Media

-ခရစ်တော်ဖွားမြင်ရာ ခရစ္စမတ်အချိန်ကာလအတွင်း အီရန်နဲ့ ကမ္ဘာတစ်ဝှမ်းမှာရှိတဲ့ ခရစ်ယာန်ဘာသာဝင်တွေကို ချီးကျူးဂုဏ်ပြုတယ်လို့ အီရန်အဓိပတိ အယာတိုလာ အလီခါမေနီက နှုတ်ခွန်းဆက်စကား ပြောကြားခဲ့ပါတယ်။

“တမန်တော် ယောရှုခရစ်တော်ရဲ့ မွေးနေ့မှာ ကမ္ဘာပေါ်က မွတ်စလင်နဲ့ ခရစ်ယာန်တွေအားလုံး – အထူးသဖြင့် ကျွန်တော်တို့ရဲ့ ခရစ်ယာန်ညီနောင်တွေကို ချီးကျူးဂုဏ်ပြုတယ်လို့ နှုတ်ခွန်းဆက်စကား ပါးလိုက်ပါတယ်” လို ခါမေနီက Tiwtter စာမျက်နှာမှာ မနေ့က ရေးသားခဲ့ပါတယ်။

အီရန်သမ္မတ ဟာဆန်ရူဟာနီကလည်း ပုပ်ရဟန်းမင်းကြီး ဖရန်စစ်နဲ့ ကမ္ဘာတစ်ဝှမ်းက ခရစ်ယာန်ခေါင်းဆောင်တွေထံ ခရစ္စမတ်နှုတ်ခွန်းဆက်စကား ရေးသားပေးပို့ခဲ့ပါတယ်။

ပုပ်ရဟန်းမင်းကြီးထံ ရေးသားပေးပို့တဲ့စာမှာ ယေရှုခရစ်တော်ဟာ ငြိမ်းချမ်းရေးနဲ့ သနားကြင်နာမှုပြယုဂ်ဖြစ်ပြီး၊ ကိုယ်တော်ရဲ့ အပြုအမူတွေက လက်ရှိ ကမ္ဘာတစ်ဝှမ်း ရင်ဆိုင်ကြုံတွေ့နေရတဲ့ လှုမှုရေး၊ ယဉ်ကျေးမှုဆိုင်ရာ စိန်ခေါ်မှုတွေကို ဖြေရှင်းဖို့ နည်းလမ်းဖြစ်တယ်လို့ ရူဟာနီက ထည့်သွင်းရေးသားခဲ့ပါတယ်။

Ref: Press TV