Tag: Iran

မတ် ၁၆၊ ၂၀၂၁
M-Media

-တတိယမြောက် ပြည်တွင်းဖြစ် ကိုဗစ်ကာကွယ်ဆေး Fakhravac ကို လူသားတွေမှာ စတင်စမ်းသပ်နေပြီလို့ အီရန်က ကြေငြာပါတယ်။

ပြီးခဲ့တဲ့နှစ် နိုဝင်ဘာနှောင်းပိုင်းမှာ လုပ်ကြံခံလိုက်ရတဲ့ နျူသိပ္ပံပညာရှင် မိုရှန် ဖာကရီဇာဒါကို ဂုဏ်ပြုတဲ့အနေနဲ့ Fakhravac လို့ အမည်ပေးထားတာပါ။ ဖာကရီဇာဒါဟာ ကိုဗစ်ကာကွယ်ဆေး ထုတ်လုပ်ရေးအဖွဲ့တစ်ခုကို ဦးဆောင်ခဲ့သူလည်း ဖြစ်ပါတယ်။

Fakhravac ကိုဗစ်ကာကွယ်ဆေး လူသားတွေမှာ စတင်စမ်းသပ်ထိုးနှံမှု အခမ်းအနားကို ဒီကနေ့ မြို့တော်တီဟီရန်မှာ ပြုလုပ်ခဲ့ပါတယ်။ ဒီအခမ်းအနားကို ကာကွယ်ရေးဝန်ကြီး အမီရန် ဟာတာမီ၊ ကျန်းမာရေးဝန်ကြီး စအီဒ် နာမာကီနဲ့ ဖာကရီဇာဒါရဲ့ မိသားစုဝင်တွေ ဒီအခမ်းအနားကို တက်ရောက်ခဲ့ပါတယ်။

ဖာကရီဇာဒါရဲ့သားဖြစ်သူ ဟာမဒ် ဖာကရီဇာဒါက မိမိဆန္ဒအလျောက် ဒီကာကွယ်ဆေးကို ထိုးနှံခဲ့ပါတယ်။

အီရန်ရဲ့ ပထမဦးစားပေး ကိုဗစ်ကာကွယ်ဆေးဟာ COVIran Barekat ဖြစ်ပြီး လက်ရှိမှာ အလုံးရေ ၃ သန်းထုတ်လုပ်မှု စတင်နေပြီလို့ အီရန် ကိုဗစ်ကာကွယ်ဆေးစီမံကိန်း Setad ရဲ့ အကြီးအကဲ မိုဟာမက် မွခ်ဘာရ်က ပြောပါတယ်။ အခုနွေရာသီကုန်ရင် အလုံးရေ ၁၅ သန်းလောက် ထုတ်လုပ်ဖို့ အီရန်က စီစဉ်နေပါတယ်။

ကနဦးစမ်းသပ်မှုတွေအရ Barekat ကာကွယ်ဆေးဟာ ၉၀ ရာခိုင်နှုန်း ထိရောက်မှုရှိတယ်လို့ အီရန်အာဏာပိုင်တွေက ​ပြောပါတယ်။ တနင်္လာနေ့မှာ အဆင့် ၂ စမ်းသပ်မှု စတင်ခဲ့ပြီး သိပ်မကြာခင်မှာ အဆင့် ၃ စမ်းသပ်မှုနဲ့ပေါင်းကာ နိုင်ငံအတွင်းက လူသောင်းချီကို ထိုးပေးမှာ ဖြစ်ပါတယ်။

အီရန်ဆေးသုတေသနကုမ္ပဏီ Pasteur Institute of Iran နဲ့ ကျူးဘားနိုင်ငံတို့ ပူးပေါင်းထုတ်လုပ်တဲ့ ကိုဗစ်ကာကွယ်ဆေးတစ်မျိုးကိုလည်း လူသားတွေမှာ စတင်စမ်းသပ်ခဲ့ပြီး အလုံးရေ ၁ သိန်း မှာယူခဲ့ပါတယ်။

နောက်ထပ် အီရန်ဆေးဝါးလုပ်ငန်း Razi Vaccine and Serum Research Institute က ထုတ်တဲ့ Razi COV-Pars ကိုလည်း လူသားတွေမှာ စမ်းသပ်ဖို့ စီစဉ်နေပါတယ်။

၂၀၂၀ အစောပိုင်း ကိုဗစ် စတင်ပြန့်နှံချိန်ကစလို့ အီရန်မှာ သေဆုံးသူ ၆၁၀၀၀ ရှိခဲ့တာပါ။ လက်ရှိမှာ နိုင်ငံရပ်ခြားက ကိုဗစ်ကာကွယ်ဆေးတွေကို တင်သွင်းပြီး ထိုးပေးတာမျိုးတွေကိုလည်း အီရန်က လုပ်ဆောင်နေပါတယ်။

Ref: Aljazeera

ဇန်နဝါရီ ၃၁၊ ၂၀၂၀၁
M-Media

-ပြည်တွင်းမှာထုတ်လုပ်ပြီး လက်ရှိ စမ်းသပ်နေတဲ့ ကိုဗစ်ကာကွယ်ဆေးဟာ ယူကေမှာ ပြန့်နှံ့နေတဲ့ ပုံပြောင်းဗိုင်းရပ်စ် ကာကွယ်ရေးမှာ ထိရောက်မှုရှိတယ်ဆိုတာ တွေ့ရကြောင်း အီရန် ကျန်းမာရေးဝန်ကြီးဌာနက ထုတ်ပြန်ပါတယ်။

COVIran Barekat လို့ အမည်ပေးထားတဲ့ အဲဒီကာကွယ်ဆေးကို အဓိပတိ အယာတိုလာ ခါမေနီ တိုက်ရိုက်ကွပ်ကဲတဲ့ Setad အဖွဲ့က ထုတ်လုပ်​နေတာဖြစ်ပါတယ်။

“ဒီကာကွယ်ဆေးထိုးထားသူရဲ့ သွေးရည်ကြည်ဟာ အင်္ဂလန်က ပုံပြောင်း ကိုရိုနာဗိုင်းရပ်စ် ကို အပြည့်အ၀ ဆန့်ကျင် တိုက်ဖျက်နိုင်တယ်ဆိုတာ ​လူသားနဲ့စမ်းသပ်မှုမှာ တွေ့ရပါတယ်” လို့ အီရန် ကာကွယ်ဆေးထုတ်လုပ်မှုဆိုင်ရာ အကြီးအကဲ ဟာဆန် ဂျာလီလီက ပြောပါတယ်။

ကိုရိုနာဗိုင်းရပ်စ်တိုက်ဖျက်ရေး လုပ်ငန်းအဖွဲ့က တာဝန်ရှိသူ မီနို မိုဟ်ရက်ဇ်ကလည်း ဒီသတင်းကို အတည်ပြုပါတယ်။

“ကူးစက်မှု ၇၀ ရာခိုင်နှုန်းမြန်တဲ့ အင်္ဂလိပ်ပုံပြောင်းဗိုင်းရပ်စ် နမူနာကို ကျန်းမာရေးဝန်ကြီးဌာနက Setad သုတေသနပညာရှင်တွေကို ပေးပါတယ်။ COVIran Barekat ဆေး ပထမဆုံးထိုးထားတဲ့ လူ ၃ ဦးရဲ့ သွေးရည်ကြည်မှာ စမ်းသပ်လိုက်တဲ့အခါ ​ဗိုင်းရပ်စ်ကို လုံး၀ ဆန့်ကျင်တိုက်ဖျက်နိုင်တယ်ဆိုတာ တွေ့ခဲ့ရပါတယ်”

ယူကေမှာ ပြန့်နှံ့နေတဲ့ ပုံပြောင်းကိုဗစ် ကူးစက်ထားမှု အီရန်မှာတွေ့တာ ၇ ဦး ရှိနေပါပြီ။

COVIran Barekat ကိုဗစ် လူသားတွေမှာ စမ်းသပ်ထိုးနှံမှုကို ဒီဇင်ဘာ ၂၉ ရက်နေ့က စတင်ခဲ့ပြီး အနည်းဆုံး လူ ၃၂ ဦး ပထမတစ်ကြိမ် ထိုးနှံထားပြီး ဖြစ်ပါတယ်။ ဒီဆေးဟာ နှစ်ကြိမ်ထိုးရတာပါ။ ဖေဖော်ဝါရီနှောင်းပိုင်းမှာလည်း နောက်ထပ် ၅၆ ဦးကို ထိုးနှံပေးဖို့ ရှိနေပါတယ်။ ဒီဆေးကို ရိုးရိုး ကိုဗစ်ဗိုင်းရပ်စ်အတွက်လည်း သုံးလို့ရပြီး ဘေးထွက်ဆိုးကျိုးမရှိဘူးလို့ ဆိုပါတယ်။

မတ်လမကုန်ခင် COVIran Barekat ကာကွယ်ဆေး ၂ သန်း ထုတ်လုပ်ဖို့ အီရန်က စီစဉ်ထားပြီး နောက်ထပ် ၂ လနေရင် ၁၀ သန်း ထုတ်လုပ်မှာ ဖြစ်ပါတယ်။ အီရန်ပြည်တွင်းမှာထုတ်လုပ်တဲ့ အခြား ကိုဗစ်ကာကွယ်ဆေးတစ်ချို့လည်း ရှိနေပြီး လူသားတွေမှာ စမ်းသပ်ဖို့ စီစဉ်နေပါတယ်။

Ref: Aljazeera