Tag: Iran

ဇူလိုင် ၁၇၊ ၂၀၂၀
M-Media

-အီရန်ဟာ ကမ္ဘာပေါ်မှာ ပျားရည်ထုတ်လုပ်တင်ပို့မှု၊ ပျားမွေးမြူမှု စတုတ္တအများဆုံး နိုင်ငံအဖြစ်ကို ရောက်ရှိလာပါတယ်။

ပြီးခဲ့တဲ့နှစ်အတွင်း အီရန်ရဲ့ ပျားရည်တင်ပို့မှု ပမာဏဟာ မက်ထရစ်တန် ၁၁၂၅၀၀ ရှိခဲ့ပြီး တစ်နှစ်အတွင်း တင်ပို့မှု ၂၄ ရာခိုင်နှုန်း တိုးတက်လာတာ ဖြစ်ပါတယ်။

အီရန်စိုက်ပျိုးရေးဝန်ကြီးဌာနက အကြီးတန်းတာဝန်ရှိသူဖြစ်ပြီး ပျားမွေးမြူရေးစီမံကိန်းရဲ့ အကြီးအကဲလည်းဖြစ်တဲ့ ဖာရ်ဟဒ် ဂက်ဖာရီက နိုင်ငံမှာ ပျားမွေးမြူရေးလုပ်ငန်း အရေအတွက်ကလည်း တိုးတက်လာခဲ့ပြီး စုစုပေါင်း ၉၈၀၀၀ လောက်ရှိတယ်လို့ ပြောကြားခဲ့ပါတယ်။

ပျားရည်အပြင် ပျားနဲ့ပတ်သက်တဲ့ အခြားထုတ်ကုန်တွေ အီရန်က တင်ပို့နိုင်မှုလည်း မြင့်တက်လာခဲ့ပါတယ်။

ဂက်ဖာရီက နိုင်ငံအတွင်း ပျားမွေးမြူရေး လုပ်ငန်း၊ ဒီလုပ်ငန်းနဲ့ ဆက်စပ်တဲ့ ထုတ်ကုန်ထုတ်လုပ်မှုလုပ်ငန်းတွေ ပိုမိုတိုးတက်စေဖို့ စီမံကိန်းတွေကို ဆက်လက်အကောင်အထည်ဖော် ဆောင်ရွက်သွားမယ်လို့ ထည့်သွင်း ပြောဆိုခဲ့ပါတယ်။

ပြီးခဲ့တဲ့နှစ်အတွင်း အီရန်ရဲ့ လယ်ယာထုတ်ကုန် တင်ပို့မှုပမာဏလည်း တိုးတက်လာခဲ့ပါတယ်။

Ref: Press TV

ဇူလိုင် ၆၊ ၂၀၂၀
M-Media

-တောင်ပိုင်း ကမ်းရိုးတမ်းအပါအဝင် ကုန်းတွင်းနဲ့ ကမ်းလွန်တွေမှာ ဒုံးကျည်မြို့တော်ကွန်ယက် တည်ဆောက်ထားပြီး ဒါဟာ ရန်သူနိုင်ငံတွေအတွက် အိပ်မက်ဆိုး ဖြစ်လိမ့်မယ်လို့ အီရန်တော်လှန်ရေးအစောင့်တပ်ဖွဲ့ (IRGC) က ထုတ်ဖော်ပြောကြားလိုက်ပါတယ်။

အဲဒီကွန်ယက်မှာ မြေအောက်ဘန်ကာတွေ၊ ကမ်းလွန်ရွေ့လျားစနစ် ဒုံးကျည်တွေ ပါဝင်တယ်လို့ ရေတပ်ဗိုလ်ချုပ် အလီရီဇာ တန်ဆီရီက ပြောပါတယ်။

“ပါရှန်ပင်လယ်ကွေ့နဲ့ အိုမန်ပင်လယ်ကွေ့ တစ်လျှောက်လုံးမှာ မြေအောက် ကုန်းတွင်းနဲ့ ကမ်းလွန် ဒုံးကျည်​မြို့တော်တွေ တည်ဆောက်ထားပါတယ်။ ဒါဟာ ရန်သူနိုင်ငံတွေအတွက် အိပ်မက်ဆိုး ဖြစ်မှာပါ”

နိုင်ငံတောက်ဘက် နယ်စပ်တစ်လျှောက်လုံးမှာ ရေယာဉ်စု ၄၂၈ စုနဲ့ တပ်ဖွဲ့ဝင် ၂၃၀၀၀ လောက်ကို တပ်ဖြန့်ချထားပြီး ရန်သူတွေ မထင်မှတ်ထားတဲ့ တာဝေးပစ်ဒုံးကျည်တွေ၊ ရေတပ်သင်္ဘောအသစ်တွေလည်း မကြာခင် ထုတ်ပြဖို့ရှိတယ်လို့ အလီရီဇာက ထည့်သွင်း ပြောကြားခဲ့ပါတယ်။

အပြည့်အ၀လည်ပတ်နိုင်တဲ့ မြေအောက် ဒုံးကျည်စက်ရုံတွေ၊ မြို့တော်တွေ တည်ရှိနေပြီလို့ အီရန်တော်လှန်ရေးအေစာင့်တပ်ဖွဲ့က မကြာခဏ ထုတ်ပြောလေ့ရှိပေမယ့် ဓာတ်ပုံတွေ၊ ဗီဒီယိုတွေ ထုတ်ပြတာမျိုးတော့ မရှိပါဘူး။

ပြီးခဲ့တဲ့ နွေရာသီကစလို့ ရှန်ပင်လယ်ကွေ့မှာ ရေနံတင်သင်္ဘော တိုက်ခိုက်ခံရတာလို တင်းမာမှုမျိုးတွေ ဖြစ်ပေါ်ခဲ့ပြီး အမေရိကန်က ဒီတိုက်ခိုက်မှုတွေဟာ အီရန်ရဲ့လက်ချက်လို့ စွပ်စွဲခဲ့ပါတယ်။ အီရန်ကတော့ ဒီစွပ်စွဲမှုကို ငြင်းဆိုပါတယ်။

Ref: RT

ဇွန် ၆၊ ၂၀၂၀
M-Media

-အီရန်နိုင်ငံမှာ ကိုရိုနာဗိုင်းရပ်စ် ကူးစက်မှုအရေအတွက် ပြန်လည်မြင့်တက်လာတာကြောင့် အာဏာပိုင်တွေက ကန့်သတ်ထိန်းချုပ်မှုတွေ ထပ်မံလုပ်ဆောင်နေရပါတယ်။

ဇွန်လ ၁ ရက်နေ့ကစလို့ ကူးစက်သူအရေအတွက်ဟာ သိသိသာသာ မြင့်တက်လာခဲ့ပြီး ၅ ရက်အတွင်း စုစုပေါင်း ၃၅၇၄ ဦး ရှိလာပါတယ်။

အီရန်လခြမ်းနီအဖွဲ့ရဲ့ နိုင်ငံတကာဆိုင်ရာ ဒါရိုက်တာ မန်ဆူရာ ဘဂ်ဟီရီက ကူးစက်မှု ပြန်လည်မြင့်တက်လာရတဲ့ အကြောင်းအရင်းတွေထဲမှာ ခရီးသွားကန့်သတ်မှု၊ ခပ်ခွာခွာနေထိုင်မှု သတ်မှတ်ချက်တွေကို ပြည်သူတွေက မလိုက်နာတာတွေ ပါဝင်တယ်လို့ ပြောကြားခဲ့ပါတယ်။

ကိုဗစ်ကာကွယ်ရေး ညွှန်ကြားချက်တွေကို ပြည်သူတွေက မလိုက်နာမှုနဲ့ပတ်သက်ပြီး ပြီးခဲ့တဲ့ရက်ပိုင်းအတွင်း အီရန်အာဏာပိုင်တွေက လူသိရှင်ကြား ဝေဖန်ခဲ့ကြပါတယ်။

“ကိုရိုနာဗိုင်းရပ်စ်ကိစ္စ ပြီးဆုံးသွားပြီလို့ လူတွေက ထင်နေကြပါတယ်။ ဒီကပ်ဆိုးဟာ မပြီးဆုံးသေးပါဘူး။ ဘယ်လိုအချိန်မျိုးမှာမဆို အရင်ကထက်ပိုပြီး ဆိုးဝါးလာနိုင်ပါတယ်” လို့ ကျန်းမာရေးဝန်ကြီး ဆအီဒ် နာမာကီက အင်္ဂါနေ့ သတင်းစာရှင်းလင်းပွဲမှာ ပြောကြားခဲ့ပါတယ်။

နောက်တစ်ရက်မှာပဲ သမ္မတရူဟာနီက ကိုဗစ်တစ်ကျော့ပြန် ပြန်လာနိုင်ပြီး အာဏာပိုင်တွေအနေနဲ့ ကန့်သတ်မှုတွေ ပြန်လည်လုပ်ဆောင်ရနိုင်တယ်ဆိုတဲ့အချက်ကို ထည့်သွင်းစဉ်စားထားကြဖို့ ပြည်သူတွေကို တိုက်တွန်းခဲ့ပါတယ်။

အီရန်မှာ Covid-19 ကူးစက်မှုကို ဖေဖော်ဝါရီလမှာ စတင်တွေ့ရှိခဲ့ရတာဖြစ်ပြီး လက်ရှိအချိန်အထိ စုစုပေါင်း ကူးစက်သူအရေအတွက် ၁၆၇၀၀၀ ကျော် ရှိကာ သေဆုံးသူက ၈၁၄၃ ဦး ရှိခဲ့ပါတယ်။

Ref: Aljazeera