Tag: Iran

မတ် ၆၊ ၂၀၂၀
M-Media

• အီရန်နိုင်ငံခြားရေးဝန်ကြီးရဲ့ အကြံပေးတစ်ဦးဖြစ်ပြီး ၁၉၇၉ ခုနှစ် အမေရိကန်သံရုံး စီးနင်းမှုမှာ ပါဝင်ခဲ့တဲ့ ဟိုစိန် ရှီခိုစလမ်ဟာ မနေ့က COVID-19 ဗိုင်းရပ်စ်ကြောင့် သေဆုံးသွားပါတယ်။ အီရန်မှာ ကူးစက်သူဦးရေဟာ ၃၅၁၃ ဦး ရှိလာပြီး သေဆုံးသူကတော့ ၁၀၇ ဦး ရှိနေပါတယ်။ သေဆုံးသူတွေထဲက ၆ ဦးဟာနိုင်ငံရေးသမားတွေနဲ့ အစိုးရတာဝန်ရှိသူတွေ ဖြစ်ပါတယ်။
• တောင်ကိုရီးယားမှာ မ​နေ့က ကူးစက်သူ ၅၁၈ ဦး ရှိခဲ့ပြီး စုစုပေါင်း ၆၂၈၄ ဦး ရှိလာတာပါ။ သေဆုံးသူကတော့ ၄၂ ဦး ရှိခဲ့ပါတယ်။
• တရုတ်နိုင်ငံမှာ မနေ့က လူပေါင်း ၁၄၃ ဦးကို ထပ်မံကူးစက်ခဲ့ပြီး၊ သေဆုံးသူက ၃၀ လောက် ရှိခဲ့ပါတယ်။ ဒါ့ကြောင့် နိုင်ငံတစ်ဝှမ်း သေဆုံးသူအရေအတွက်က ၃၀၄၂ ဦးရှိကာ ကူးစက်မှုကတော့ ၈၀၅၅၂ ဦး ရှိလာပါတယ်။
• အမေရိကန်နိုင်ငံမှာ ဗိုင်းရပ်စ်ကြောင့် သေဆုံးသူအရေအတွက်ဟာ ၁၂ ဦး ရှိနေပြီး ကူးစက်မှုက ၁၂၉ ခု ရှိလာပါတယ်။
• ပုပ်ရဟန်းမင်းကြီး သီတင်းသုံးတဲ့ ဗာတီကန်မှာ ဗိုင်းရပ်ကူးစက်နေသူတစ်ဦးကို မ​နေ့က ပထမဆုံး တွေ့ခဲ့ရပါတယ်။ ကိုရိုနာကူးစက်သူ တက်ရောက်နေကာ အခြားလူနာ ၁၀၀ လောက်ရှိ​တဲ့ ဆေးခန်းရဲ့ ပြင်လူနာဌာနကို ပိတ်ထားလိုက်ပြီး ပိုးသတ်ရေးလုပ်ငန်း လုပ်ဆောင်သွားမယ်လို့ ပြောရေးဆိုခွင့်ရှိသူ မက်တီယို ဘရူနီက ပြောကြားလိုက်ပါတယ်။
• အာဖရိကက ကင်မရွန်းနိုင်နဲ့ ဥရောပက ဆားဘီးယားနိုင်ငံတွေမှာ ဗိုင်းရပ်စ်ကူးစနေသူတွေကို ပထမဆုံး တွေ့ခဲ့ရပါတယ်။
• အိန္ဒိယနိုင်ငံမှာ ကူးစက်သူဟာ ၆ ဦးကနေ မနေ့မှာ ၃၁ ဦးအထိ သိသိသာသာ မြင့်တက်လာပါတယ်။ မလေးရှားနိုင်ငံမှာလည်း မတ် ၆ ရက်နေ့ တစ်ရက်တည်းမှာတင် ကူးစက်နေသူ ၂၈ ဦး ထပ်တွေ့ခဲ့ပြီး စုစုပေါင်း ကူးစက်နေသူအရေအတွက် ၈၃ ဦး ဖြစ်လာတာပါ။ အဲဒီအထဲက ၂၃ ဦးဟာ ဆေးရုံကနေ ဆင်းသွားပြီ ဖြစ်ပါတယ်။ ရောဂါကူးစက်ထားသူတွေနဲ့ ထိတွေ့ ဆက်ဆံထားတဲ့ လူ ၉၅၆ ဦးကိုလည်း မလေးရှားအာဏာပိုင်တွေ ဆက်လက် စောင့်ကြည့်နေပါတယ်။
• နိုင်ငံအတွင်း ဗိုင်းရပ်စ် တားဆီးနှိမ်နှင်းရေး တစ်စိတ်တစ်ပိုင်းအဖြစ် တစ်လကို နှာခေါင်းစည်း ၃ သန်းလောက် ထုတ်လုပ်နိုင်မယ့် စက်ရုံတစ်ခုတည်ဆောက်ဖို့ ထိုင်းဘီလီယံနာ Dhanin Chearavanont ရဲ့ စီးပွားရေးလုပ်ငန်းစုက စီစဉ်နေပါတယ်။ စက်ရုံက ထွက်ရှိမယ့် နှာခေါင်းစည်းတွေကို ဆေးရုံဆေးခန်းတွေက ကျန်းမာရေးဝန်ထမ်းတွေ နှာခေါင်းစည်း အလွယ်တကူမရနိုင်တဲ့သူတွေကို အခမဲ့ ထောက်ပံ့ပေးသွားမှာဖြစ်ပါတယ်။ ကိုရိုနာဗိုင်းရပ်စ်သစ် ပြန့်နှံ့ပြီးနောက်ပိုင်း အာရှကကုမ္ပဏီတွေဟာ နှာခေါင်းစည်းတွေ ပိုမိုထုတ်လုပ်ရေး အားထုတ်ကြိုးပမ်းလာကြပါတယ်။

Ref: Aljazeera

မတ် ၆၊ ၂၀၂၀
M-Media

-လက်ရှိ ကမ္ဘာတစ်ဝှမ်းမှာ ကူးစက်ပြန့်နှံ့နေတဲ့ ကိုရိုနာဗိုင်းရပ်စ်သစ် Covid-2019 ဟာ တရုတ်နဲ့ အီရန်တို့ကို ပစ်မှတ်ထားတဲ့ အမေရိကန်ရဲ့ ဇီ၀တိုက်ခိုက်မှုတစ်ခု ဖြစ်နိုင်တယ်လို့ အီရန်တော်လှန်ရေးအစောင့်တပ်ဖွဲ့ အကြီးအကဲ ဟိုစိန် ဆာလာမီက မနေ့မှာ ပြောကြားလိုက်ပါတယ်။

တရုတ်နိုင်ငံအလယ်ပိုင်း ဝူဟန်မြို့ကနေ စတင်ခဲ့တဲ့ ဒီဗိုင်းရပ်စ်ဟာ ကမ္ဘာ့နိုင်ငံပေါင်း တော်တော်များများကို ပြန့်နှံ့နေပြီး အီတလီ၊ အီရန်နဲ့ တောင်ကိုရီးယားတို့မှာအကြီးအကျယ် ဖြစ်ပွား​နေပါတယ်။ အီရန်နိုင်ငံမှာ ဒီဗိုင်းရပ်စ်ကြောင့် သေဆုံးသူဟာ ၁၀၇ ဦး ရှိပြီး ကူးစက်သူကတော့ ၃၅၁၃ ဦး ရှိနေတာပါ။

အီရန် လွှတ်တော်အမတ်တစ်ချို့နဲ့ အစိုးရတာဝန်ရှိသူတစ်ချို့လည်း ကူးစက်နေပြီး၊ နိုင်ငံတစ်ဝှမ်း ပြန့်နှံ့မှု မဖြစ်စေရေးအတွက် မတ်လ ၂၀ ရက်နေ့ ပြီးဆုံးမယ့် ပြက္ခဒိန်တစ်နှစ်အတွက် ကျောင်းတွေ​၊ တက္ကသိုလ်တွေအားလုံးကို ပိတ်ထားပါတယ်။

တော်လှန်ရေးအစောင့်တပ်ဖွဲ့ရဲ့ အကြီးအကဲ ​ဟိုစိန် ဆာလာမီက ဗိုင်းရပ်စ်ပြန့်နှံ့မှုအတွက် အမေရိကန်ကို စွပ်စွဲခဲ့ပါတယ်။

“ဗိုင်းရပ်စ်ဟာ အမေရိကရဲ့ ဇီ၀တိုက်ခိုက်မှုတစ်ခုဖြစ်နိုင်ပါတယ်။ အရင်ဆုံး တရုတ်နိုင်ငံ နောက်ပိုင်း အီရန်နဲ့ တစ်ကမ္ဘာလုံးကို ပြန့်နှံ့သွားတာမျိုးပါ”

အီရန်အနေနဲ့ ဒီဗိုင်းရပ်စ်ကို တိုက်ဖျက်သွားမှာဖြစ်ပြီး နောက်ဆုံးမှာ တာဝန်ရှိတဲ့ အမေရိကန်ထံကိုပဲ ပြန်ရောက်သွားလိမ့်မယ်လို့လည်း ဆာလာမီက ထည့်သွင်းပြောဆိုခဲ့ပါတယ်။

Covid-2019 ဗိုင်းရပ်စ်ဟာ အမေရိကန်ရဲ့ ထုတ်ကုန်ဖြစ်တယ်ဆိုတဲ့ ဒီလိုပြောဆိုမှုတွေဟာ သိပ်မကြာခင်ရက်ပိုင်းကတည်းက စတင်ပြန့်နှံ့လာတာဖြစ်ပေမယ့် ခိုင်မာတဲ့ သက်သေမျိုး မပြနိုင်ပါဘူး။

အီရန် အရပ်ဖက်ကာကွယ်ရေးအဖွဲ့ အကြီးအကဲ ဗိုလ်ချုပ် ဂိုလမ် ရီဇာ ဂျလာလီက ကိုရိုနာဗိုင်းရပ်စ်သစ်နဲ့ပတ်သက်ပြီး မီဒီယာတွေ ကြောက်ရွံ့မှုက အမေရိကန်ဟာ တရုတ်နဲ့ အီရန်တို့အပေါ် ဇီ၀တိုက်ခိုက်မှု လုပ်တယ်ဆိုတဲ့ သဘောထားတွေကို ပိုမိုအားကောင်းစေတယ်လို့ အင်္ဂါနေ့မှာ ပြောကြားခဲ့ပါတယ်။ ဒါပေမယ့် ဗိုင်းရပ်စ်ရဲ့ ဗီဇနဲ့ပတ်သက်ပြီး ဓာတ်ခွဲစမ်းသပ်မှုတွေ ပြုလုပ်ပြီးမှသာ ဒါကို အတိအကျ ပြောနိုင်မယ်လို့ သူက ဆိုပါတယ်။

Ref: RT