Tag: Iran

ဇွန် ၆၊ ၂၀၂၀
M-Media

-အီရန်နိုင်ငံမှာ ကိုရိုနာဗိုင်းရပ်စ် ကူးစက်မှုအရေအတွက် ပြန်လည်မြင့်တက်လာတာကြောင့် အာဏာပိုင်တွေက ကန့်သတ်ထိန်းချုပ်မှုတွေ ထပ်မံလုပ်ဆောင်နေရပါတယ်။

ဇွန်လ ၁ ရက်နေ့ကစလို့ ကူးစက်သူအရေအတွက်ဟာ သိသိသာသာ မြင့်တက်လာခဲ့ပြီး ၅ ရက်အတွင်း စုစုပေါင်း ၃၅၇၄ ဦး ရှိလာပါတယ်။

အီရန်လခြမ်းနီအဖွဲ့ရဲ့ နိုင်ငံတကာဆိုင်ရာ ဒါရိုက်တာ မန်ဆူရာ ဘဂ်ဟီရီက ကူးစက်မှု ပြန်လည်မြင့်တက်လာရတဲ့ အကြောင်းအရင်းတွေထဲမှာ ခရီးသွားကန့်သတ်မှု၊ ခပ်ခွာခွာနေထိုင်မှု သတ်မှတ်ချက်တွေကို ပြည်သူတွေက မလိုက်နာတာတွေ ပါဝင်တယ်လို့ ပြောကြားခဲ့ပါတယ်။

ကိုဗစ်ကာကွယ်ရေး ညွှန်ကြားချက်တွေကို ပြည်သူတွေက မလိုက်နာမှုနဲ့ပတ်သက်ပြီး ပြီးခဲ့တဲ့ရက်ပိုင်းအတွင်း အီရန်အာဏာပိုင်တွေက လူသိရှင်ကြား ဝေဖန်ခဲ့ကြပါတယ်။

“ကိုရိုနာဗိုင်းရပ်စ်ကိစ္စ ပြီးဆုံးသွားပြီလို့ လူတွေက ထင်နေကြပါတယ်။ ဒီကပ်ဆိုးဟာ မပြီးဆုံးသေးပါဘူး။ ဘယ်လိုအချိန်မျိုးမှာမဆို အရင်ကထက်ပိုပြီး ဆိုးဝါးလာနိုင်ပါတယ်” လို့ ကျန်းမာရေးဝန်ကြီး ဆအီဒ် နာမာကီက အင်္ဂါနေ့ သတင်းစာရှင်းလင်းပွဲမှာ ပြောကြားခဲ့ပါတယ်။

နောက်တစ်ရက်မှာပဲ သမ္မတရူဟာနီက ကိုဗစ်တစ်ကျော့ပြန် ပြန်လာနိုင်ပြီး အာဏာပိုင်တွေအနေနဲ့ ကန့်သတ်မှုတွေ ပြန်လည်လုပ်ဆောင်ရနိုင်တယ်ဆိုတဲ့အချက်ကို ထည့်သွင်းစဉ်စားထားကြဖို့ ပြည်သူတွေကို တိုက်တွန်းခဲ့ပါတယ်။

အီရန်မှာ Covid-19 ကူးစက်မှုကို ဖေဖော်ဝါရီလမှာ စတင်တွေ့ရှိခဲ့ရတာဖြစ်ပြီး လက်ရှိအချိန်အထိ စုစုပေါင်း ကူးစက်သူအရေအတွက် ၁၆၇၀၀၀ ကျော် ရှိကာ သေဆုံးသူက ၈၁၄၃ ဦး ရှိခဲ့ပါတယ်။

Ref: Aljazeera

မေ ၂၂၊ ၂၀၂၀
M-Media

-ပါလက်စတိုင်းနိုင်ငံ လွတ်မြောက်ရေးဟာ မွတ်စလင်ကမ္ဘရဲ့ တာဝန်၀တ္တရားတစ်ရပ်ဖြစ်ပြီး လူတိုင်းက ကူညီဆောင်ရွက်ပေးသင့်တယ်လို့ အီရန် အဓိပတိ အယာတိုလာ ဆယဒ် အလီခါမေနီက ပြောကြားလိုက်ပါတယ်။

ရမ်ဇာန်ဥပုသ်လရဲ့ နောက်ဆုံးသီတင်းပတ် သောကြာနေ့မှာ ကျရောက်တဲ့ ‘အလ်-ကွဒ်စ်’ နေ့ အထိမ်းအမှတ် မိန့်ခွန်းမှာ ခါမေနီက ဒီလိုပြောကြားလိုက်တာပါ။ အစ္စရေးရဲ့ ကျူးကျော်သိမ်းပိုက်မှုကို ခံစားနေရတဲ့ ပါလက်စတိုင်းပြည်သူတွေနဲ့ တစ်သားတည်းရှိကြောင်း ပြသဖို့ အီရန် အစ္စလာမ့်မစ်တော်လှန်ရေးခေါင်းဆောင် အယာတိုလာ ခိုမေနီက ဒီနေ့ကို သတ်မှတ်ပေးခဲ့တာ ဖြစ်ပါတယ်။

“ပါလက်စတိုင်း လွတ်မြောက်ရေး လှုပ်ရှားမှုဟာ ဘုရားသခင်ရဲ့လမ်းတော်မှာ ကြိုးပမ်းမှုပါ။ အစ္စလာမ်ကမ္ဘာရဲ့ တာဝန်၊ အစ္စလာမ်ကမ္ဘာရဲ့ ရည်မှန်းချက်လည်း ဖြစ်ပါတယ်။ ဒီကြိုးပမ်းမှုအတွက် အောင်ပွဲကို အာမခံထားပြီး ဖြစ်ပါတယ်” လို့​ အလီခါမေနီက ဒီကနေ့ သူ့ရဲ့ ရုပ်သံမိန့်ခွန်းမှာ ထည့်သွင်း ပြောကြားခဲ့ပါတယ်။

အစ္စရေးရဲ့ ဇိုင်ယွန်အစိုးရဟာ ကြီးထွားလာမှုဟာ ကင်ဆာလိုဆိုးရွားပြီး ဒေသတွင်းကို ဖျက်ဆီးပစ်မှာဖြစ်ကြောင်း ဒီကင်ဆာဆဲလ်ကို လုံး၀ အမြစ်ဖြတ် သုတ်သင်ရမှာဖြစ်ကြောင်းလည်း ခါမေနီက ဆိုပါတယ်။

ကမ္ဘာတစ်ဝှမ်းမှာရှိတဲ့ ဂျူးတွေဟာ ပါလက်စတိုင်းဒေသကို သိမ်းပိုက်ရေးအတွက် ၁၈ ရာစုလောက်ကတည်းက စီစဉ်ခဲ့ကြတာပါ။ ဒုတိယကမ္ဘာစစ်အတွင်း ဥရောပကနေ ပါလက်စတိုင်းကို နည်းမျိုးစုံနဲ့ ထွက်ပြေးဝင်ရောက်လာကြတဲ့ ဂျူးတွေဟာ အင်္ဂလိပ်၊ အမေရိကန်တို့နဲ့ပေါင်းပြီး ပါလက်စတိုင်းပိုင်နက်တွေကို ကျူးကျော်သိမ်းပိုက်ကာ ၁၉၄၈ ခုနှစ်မှာ အစ္စရေးနိုင်ငံအဖြစ် ထူထောင်ခဲ့ကြတာ ဖြစ်ပါတယ်။

ပါလက်စတိုင်းတွေဟာ ယနေ့အချိန်အထိ အစ္စရေးရဲ့ ကျူးကျော်သိမ်းပိုက်မှု၊ သတ်ဖြတ်မှု၊ မောင်းထုတ်မှု ဒဏ်တွေကို ခံစားနေကြရပါတယ်။

အစ္စရေးရဲ့ သံတမန်ဆက်ဆံရေးထူထောင်ဖို့ ကြိုးစားနေတဲ့ အာရပ်နိုင်ငံတစ်ချို့ကိုလည်း ခါမေနီက ဒီကနေ့မိန့်ခွန်းမှာ ရှုတ်ချခဲ့ပြီး အမေရိကန်ရဲ့ လက်ပါးစေ လက်ကိုင်တုတ်တွေလို့ ပြောကြားခဲ့ပါတယ်။

Ref: Press TV