Tag: Iran

ဒီဇင်ဘာ ၁၊ ၂၀၁၉
M-Media

-ရေငုပ်သင်္ဘောသုံး ပြည်တွင်းဖြစ် Jask ခရုဇ်ဒုံးကျည်ကို အမြောက်အများထုတ်လုပ်တော့မယ်လို့ အီရန်ရေတပ်က ကြေငြာလိုက်ပြီး ပြည်တွင်းဖြစ် ရေတပ်သုံးပစ္စည်းတွေကိုလည်း ထုတ်ပြလိုက်ပါတယ်။

အီရန်ရေတပ်ဟာ မနေ့က စစ်လက်နက်ပစ္စည်းပြပွဲတစ်ခု ပြုလုပ်ခဲ့တာပါ။ ရေတပ်အကြီးအကဲ ဗိုလ်ချုပ် ဟိုစိန်ခန်ဇာဒီက Jask ခရုဇ်ဒုံးကျည်ကို အမြောက်အများ ထုတ်လုပ်တော့မှာဖြစ်ပြီး ရေငုပ်သင်္ဘောအားလုံးမှာ တပ်ဆင်အသုံးပြုသွားမယ်လို့ ပြောကြားခဲ့ပါတယ်။

တာဝေးပစ်နိုင်မယ့် Jask-2 ခရုဇ်ဒုံးကျည်ကို အီရန်က ထုတ်လုပ်ထားပြီး၊ Jask-3 စီမံကိန်းကိုလည်း လုပ်ဆောင်နေပါတယ်။

မနေ့က အခမ်းအနားမှာ အီရန်က ပြည်တွင်းဖြစ် Pelikan ဒရုန်း၊ Sadaf-2 ရေမြှုပ်မိုင်း၊ Soren ရှာဖွေရေးစနစ်၊ Balaban ပဲ့ထိန်းဗုံးနဲ့ Loqman လေ့ကျင့်ရေး သင်္ဘောတွေကိုလည်း ထုတ်ပြခဲ့ပါတယ်။

Soren စနစ်ဟာ တစ်ကမ္ဘာလုံးအသုံးပြုနေတဲ့ GPS စနစ်ကို အသုံးမပြုဘဲ သတင်းအချက်အလက်တွေကို ရယူ ထောက်လှမ်းနိုင်မှာ ဖြစ်ပါတယ်။ Pelikan ဒရုန်းကတော့ ဒေါင်လိုက်ပျံတက်နိုင်စွမ်းရှိပြီး ရေကြောင်းစောင့်ကြည့်ရေးလုပ်ငန်းတွေအတွက် ဖြစ်ပါတယ်။

ဗိုလ်ချုပ်ခန်ဇာဒီက လာမယ့်လအတွင်း အိန္ဒိယသမုဒ္ဒရာမှာ တရုတ်၊ ရုရှားတို့နဲ့ ရေတပ်စစ်ရေးလေ့ကျင့်မှု လုပ်ဆောင်သွားမယ်လို့လည်း မနေ့က အခမ်းအနားမှာ ပြောကြားခဲ့ပါတယ်။

Ref: Press TV

နိုဝင်ဘာ ၂၆၊ ၂၀၁၉
M-Media

-အမေရိကန်နဲ့ မဟာမိတ်တွေက စည်းကျော်လာရင် ချေမှုန်းမယ်လို့ အီရန် တော်လှန်ရေးအစောင့်တပ်ဖွဲ့ IRGC အကြီးအကဲ ဗိုလ်ချုပ် ဟိုစိန် ဆာလာမီက ပြောကြားလိုက်ပါတယ်။

မနေ့က မြို့တော်တီဟီရန်မှာပြုလုပ်တဲ့ အစိုးရထောက်ခံပွဲအခမ်းအနားမှာ ဆာလာမီက အခုလို ပြောကြားလိုက်တာဖြစ်ပြီး လူဒါဇင်နဲ့ချီ သေဆုံးခဲ့တဲ့ မကြာသေးခင်က လူထုဆန္ဒပြမှုအတွက်လည်း အမေရိကန်နဲ့ မဟာမိတ်တွေကို အပြစ်တင်ခဲ့ပါတယ်။

“အမေရိကန်၊ ဇိုင်ယွန်အာဏာရှင် (အစ္စရေး)နဲ့ ဆော်ဒီအာရေဗျတို့ရဲ့ ရန်လိုတဲ့လုပ်ရပ်ကို ကျွန်တော်တို့ ချုပ်တည်းခဲ့တယ်၊ သည်းခံခဲ့တယ်။ ဒါပေမယ့် စည်းကျော်လာမယ်ဆိုရင်တော့ သူတို့ကို ချေမှုန်းသွားမှာပါ”

အဲဒီအစိုးရထောက်ခံပွဲကို အီရန်ပြည်သူ ထောင်သောင်းချီ တက်ရောက်ခဲ့ကြပါတယ်။

ဓာတ်ဆီစျေး မြင့်တက်မှုကြောင့် အီရန်မှာ ပြီးခဲ့တဲ့တစ်ပတ်အတွင်း လူထုအုံကြွမှုတွေ ဖြစ်ပေါ်ခဲ့ပါတယ်။ လုံခြုံရေတပ်ဖွဲ့ဝင်တွေကလည်း အင်အားသုံးနှိမ်နှင်းခဲ့တဲ့အတွက် ဒါဇင်နဲ့ချီ သေဆုံးခဲ့ပါတယ်။ အီရန်ကတော့ ဒီ လူထုအုံကြွမှုတွေဟာ နိုင်ငံခြားတိုင်းပြည်တွေရဲ့ ကြားဝင် သွေးထိုးမှုကြောင့် ပေါ်ပေါက်လာတာဖြစ်တယ်လို့ ပြောကြားခဲ့ပါတယ်။

Ref : Aljazeera

နိုဝင်ဘာ ၁၄၊ ၂၀၁၉
M-Media

-၃၃ ကြိမ်မြောက် ‘နိုင်ငံတကာ အစ္စလာမ့်ညီညွတ်ရေးညီလာခံ’ ကို ဒီကနေ့ အီရန်နိုင်ငံ မြို့တော် တီဟီရန်မှာ စတင်ကျင်းပခဲ့ပါတယ်။

မွတ်စလင်တွေအကြား ညီညွတ်ရေးနဲ့ ပြဿနာတွေကို စုပေါင်းအဖြေရှာရေး ရည်ရွယ်တဲ့ ဒီညီလာခံကို နှစ်စဉ် ပြုလုပ်လာခဲ့တာဖြစ်ပြီး ဒီနှစ် ညီလာခံခေါင်းစဉ်က ‘အလ်-အက္ကဆွာဗလီကို ညီညွတ်စွာကာကွယ်ရေး’ ဖြစ်ပါတယ်။

နိုဝင်ဘာ ၁၄ ရက်နေ့ကနေ ၁၆ ရက်နေ့အထိ ပြုလပ်မယ့် ညီလာခံကို နိုင်ငံပေါင်း ၉၃ နိုင်ငံက ဘာသာရေး၊ နိုင်ငံရေးနဲ့ နယ်ပယ်အသီးသီးက ကျွမ်းကျင်သူတွေ အပါအဝင် လူ ၃၅၀ လောက် တက်ရောက်ကြပါတယ်။

ဒီကနေ့ ညီလာခံအဖွင့်မိန့်ခွန်းမှာ အီရန်သမ္မတ ဟာဆန် ရူဟာနီက ဒေသတွင်းပြဿနာတွေကို တစ်ခြားဒေသက နိုင်ငံတွေ ဝင်ရောက်ဖြေရှင်းလို့မရဘူးလို့ ပြောကြားခဲ့သလို အမေရိကန်ကိုလည်း ပြစ်တင်ပြောဆိုခဲ့ပါတယ်။

“အမေရိကန်ဟာ အစ္စလာမ်နဲ့ ဒေသတွင်းနိုင်ငံတွေအတွက် မိတ်ဆွေမဟုတ်ပါဘူး။ ပြဿနာတွေရဲ့ ရင်းမြစ်သာဖြစ်ပြီး ဒေသတွင်းကို လူသတ်ပွဲတွေ၊ သွေးချောင်းစီးမှုတွေကိုသာ ယူဆောင်လာတာပါ”

အရှေ့အလယ်ပိုင်းက ပြဿနာတွေကို ဒေသတွင်းနိုင်ငံတွေရဲ့ ပူးပေါင်းဆောင်ရွက်မှုနဲ့သာ ဖြေရှင်းနိုင်မှာဖြစ်ပြီး အီရန်ဟာ ဆော်ဒီ၊ ကူဝိတ်၊ ဘာရိန်း၊ ယူအေအီးနဲ့ ဒေသတွင်း အခြားနိုင်ငံတွေရဲ့ မိတ်ဆွေနိုင်ငံဖြစ်တယ်လို့လည်း ရူဟာနီက ထည့်သွင်းပြောကြားခဲ့ပါတယ်။

Ref: ipfnews