နိုဝင်ဘာ ၉၊ ၂၀၁၉
M-Media
-တိုင်းပြည်ပိုင်နက်အတွင်း ကျူးကျော်ဝင်ရောက်လာတဲ့ နိုင်ငံခြား ဒရုန်းတစ်စင်းကို ပစ်ချလိုက်တယ်လို့ အီရန်က မနေ့မှာ သတင်းထုတ်ပြန်ပါတယ်။
နိုင်ငံအနောက်တောင်ပိုင်း ပါရှန်ပင်လယ်ကွေ့က ခူဇက်စတန်ပြည်နယ် မာရှာဟာ ဆိပ်ကမ်းမြို့ကို ဒရုန်းက ဝင်ရောက်လာခဲ့တာပါ။
အီရန် လေတပ်ရဲ့ တပ်မှူး ဗိုလ်မှူးချုပ် အလီရီဇာ ဆာဘာဟီက နိုင်ငံခြားတိုင်းပြည်က ဒရုန်းတစ်ခုဟာ သောကြာနေ့မနက်ပိုင်းက နိုင်ငံပိုင်နက်ထဲ ဝင်ရောက်လာခဲ့တာဖြစ်ပြီး အရေးပါတဲ့နေရာတွေကို မရောက်မီ ပြည်တွင်းဖြစ် ဒုံးခွင်းစနစ်နဲ့ ပစ်ချနိုင်ခဲ့တယ်လို့ ပြောကြားခဲ့ပါတယ်။
ဘယ်နိုင်ငံက ဒရုန်းလဲဆိုတာကို ဗိုလ်မှူးချုပ်က မပြောခဲ့ပေမယ့် နိုင်ငံလေပိုင်နက်အပေါ် ဘယ်လိုကျူးကျော်မှုမျိုးမဆို ပြင်းပြင်းထန်ထန် တုန့်ပြန်သွားမယ်ဆိုတာ အီရန်က အကြိမ်ကြိမ် သတိပေးထားပြီးဖြစ်ကြောင်း ထည့်သွင်းပြောဆိုခဲ့ပါတယ်။
အီရန်အာဏာပိုင်တွေဟာ ဒရုန်းအပျက်အဆီးတွေကို သိမ်းဆည်းကာ စုံစမ်းစစ်ဆေးမှုတွေ ပြုလုပ်နေပါတယ်။ အမေရိကန်ကတော့ အီရန်က ပစ်ချလိုက်တယ်ဆိုတဲ့ ဒရုန်းဟာ သူတို့ဆီကမဟုတ်ဘူးလို့ ထုတ်ပြန်ထားပါတယ်။
ဇွန်လတုန်းကလည်း အီရန်ဟာ နိုင်ငံတောင်ပိုင်း ဟော်ရ်မုဇ်ဂန် ကမ်းရိုးတန်းဒေသမှာ အမေရိကန် ထောက်လှမ်းရေး ဒရုန်းတစ်စင်းကို ပြည်တွင်းဖြစ် လေကြောင်းရန် ကာကွယ်ရေးစနစ်နဲ့ ပစ်ချခဲ့ဖူးပါတယ်။
Ref: Press TV
