News @ M-Media

Tag: Islam In France

  • ပြင်သစ်မြို့ ၁၈ ခုတွင် အစ္စလာမ့် အနုသုခုမပြပွဲများ ပြုလုပ်သွားမည်

    ပြင်သစ်မြို့ ၁၈ ခုတွင် အစ္စလာမ့် အနုသုခုမပြပွဲများ ပြုလုပ်သွားမည်

    နိုဝင်ဘာ ၂၀၊ ၂၀၂၁
    M-Media

    ပြင်သစ်မှ ဗလီဝတ်ကျောင်းတော်တစ်လုံး

    -နိုင်ငံတစ်၀ှမ်း ပြန့်နှံ့နေတဲ့ အစ္စလာမ်ကြောက်ရောဂါကို တိုက်ဖျက်နိုင်ရေး၊ အစ္စလာမ်သာသနာနဲ့ ပတ်သက်တဲ့ အသိပညာ ပိုမိုကြွယ်၀လာရေးတို့အတွက် ပြင်သစ်က မြို့ ၁၈ မြို့မှာ အရှေးဟောင်းအစ္စလာမ့် အနုပညာလက်ရာ ပြပွဲတွေကို ကျင်းပဖို့ ရှိနေပါတယ်။

    ‘အစ္စလာမ့်အနုသုခုမ – ပစ္စုပ္ပန်မှ အတိတ်ကို လှမ်းကြည့်ခြင်း’ ခေါင်းစဥ်နဲ့ ပြပွဲကို ပြုလုပ်သွားမှာပါ။ နို၀င်ဘာ ၂၀ ရက်နေ့ကနေ လာမယ့်နှစ် မတ်လ ၂၇ ရက်နေ့အထိ ပြသမှာဖြစ်ပြီး လူတိုင်းအခမဲ့ ကြည့်ရှုနိုင်မှာ ဖြစ်ပါတယ်။

    ပြသမယ့် ရှေးဟောင်း အစ္စလာမ့်အနုပညာ လက်ရာပစ္စည်းတွေထဲမှာ ပြင်သစ်နိုင်ငံနဲ့ ကမ္ဘာတစ်၀ှမ်းက ပစ္စည်းတွေ ပါ၀င်မှာဖြစ်ပါတယ်။

    ၁၁ ရာစုက ဗလီ၀တ်ကျောင်းတော်မှာ အသုံးပြုတဲ့ မီးအိမ်၊ သစ်သားနဲ့ ထွင်းထုထားတဲ့ ကုရ်အာန်စာပန်းချီ၊ အိန္ဒိယနဲ့ မော်ရိုကိုတို့မှာ မွတ်စလင်တွေ တီထွင်အသုံးပြုခဲ့တဲ့ နက္ခတဗေဒဆိုင်ရာပစ္စည်း စတာမျိုးတွေဖြစ်ပါတယ်။

    ပြပွဲစီစဥ်သူဖြစ်ပြီး ပဲရစ်မြို့ Louvre ပြတိုက်က အစ္စလာမ်ုအနုသုခုမဌာနမှူးလည်းဖြစ်တဲ့ ယန်နစ် လင့်ဇ်က အစ္စလာမ့်အနုပညာနဲ့ပတ်သက်ပြီး အသိပညာအားနည်းမှုကို ဒီပြပွဲကနေ တိုက်ဖျက်ပေးနိုင်လိမ့်မယ်လို့ မျှော်လင့်ကြောင်း ပြောကြားခဲ့ပါတယ်။

    ပြပွဲတစ်ခုချင်းစီတိုင်းမှာ အစ္စလာမ့်သမိုင်းကြောင်းနဲ့ အနုသုခုမ လက်ရာအကြောင်း ရှင်းပြပေးမယ့် ပညာရှင်တွေ ပါ၀င်မှာပါ။

    “ဒီပြပွဲတွေဟာ အနုပညာလက်ရာတွေကို သိပ်မကြည့်ဖြစ်တဲ့ သူတွေ ဆွဲဆောင်ဖို့ ရည်ရွယ်တာ ဖြစ်ပါတယ်” လို့ အစ္စလာမ့်ရေးရာအကြောင်း ရှင်းပြဖို့ တာ၀န်ယူထားတဲ့ ပါလက်စတိုင်းအနုပညာရှင် ရေဒါ ဆာဒါဟ်က ပြောပါတယ်။

    ဒီပြပွဲ ဖြစ်မြောက်ဖို့အတွက် ပြင်သစ်အစိုးရက ယူရို ၄ သန်း ရန်ပုံငွေထောက်ပံ့ပေးထားပြီး ကျောင်းသားလူငယ်တွေကို ပစ်မှတ်ထားဖို့လည်း ပွဲစီစဉ်သူတွေကို လမ်းညွှန်ထားပါတယ်။

    အနုပညာလက်ရာတွေကို ပြသမှုအပြင် ဆွေနွေးပွဲတွေ၊ တိုက်ရိုက်ထုတ်လွှင့်ပြသမှု အစီအစဥ်တွေ၊ မှတ်တမ်းရုပ်ရှင် ကြည့်ရှု သုံးသပ်ပွဲတွေလည်း ပါ၀င်မှာဖြစ်ပါတယ်။

    အစ္စလာမ့် စာပန်းချီ ပညာရပ်၊ ပန်းချီလက်ရာ၊ အစ္စလာမ့်သာသနာက စေ့ဆော်မှုကြောင့် ဖြစ်လာတဲ့ သိပ္ပံဆိုင်ရာ တိုးတက်ဖြစ်ထွန်းမှုတွေအကြောင်း ဟောပြောပို့ချပွဲတွေလည်း ပါ၀င်မှာပါ။

    ပြင်သစ်အစိုးရဟာ နိုင်ငံအတွင်း အစ္စလာမ်ကြောက်ရောဂါ မြင့်တက်လာမှု တိုက်ဖျက်ရေး စီမံကိန်းချမှတ် လုပ်ဆောင်နေပြီး အခုအစီအစဥ်ဟာ ဒီစီမံကိန်းကနေ ပေါ်ထွက်လာတာ ဖြစ်ပါတယ်။

    Ref:Euro News

  • ပြင်သစ်အစိုးရနှင့် နိုင်ငံအတွင်း မွတ်စလင်ခေါင်းဆောင်များ သဘောတူညီချက်တစ်ခု ရရှိ

    ပြင်သစ်အစိုးရနှင့် နိုင်ငံအတွင်း မွတ်စလင်ခေါင်းဆောင်များ သဘောတူညီချက်တစ်ခု ရရှိ

    ဇန်နဝါရီ ၁၇၊ ၂၀၂၁
    M-Media

    -အစ္စလာမ်ဘာသာကို နိုင်ငံရေးဝါဒအသွင် ပုံဖော်မှု ဆန့်ကျင်ရေး၊ နိုင်ငံအတွင်းက အစ္စလာမ်ဘာသာကို နိုင်ငံရပ်ခြားက ဝင်ရောက်စွက်ဖက်မှု တိုက်ဖျက်ရေး၊ အစ္စလာမ်သာသနာကို ပြင်သစ်နိုင်ငံ​ရေးစနစ်နဲ့ ကိုက်ညီစွာ ကျင့်သုံးရေး စတာတွေ ပါဝင်တဲ့ ‘မူဝါဒဆိုင်ရာ သဘောတူညီချက်’ တစ်ခုကို ပြင်သစ် အစ္စလာမ်သာသနာရေးရာကောင်စီ (CFCM) နဲ့ ပြင်သစ်အစိုးရတို့ မနေ့က လက်မှတ်ရေးထိုးခဲ့ကြပါတယ်။

    CFCM ကို ၂၀၀၃ ခုနှစ်မှာ ဖွဲ့စည်းခဲ့တာဖြစ်ပြီး နိုင်ငံတစ်ဝှမ်းက ဗလီဝတ်ကျောင်းတော်တွေ၊ အစ္စလာမ့်သာသနိကအဆောက်အဦးတွေကို စီမံခန့်ခွဲနေတဲ့အဖွဲ့ ဖြစ်ပါတယ်။

    CFCM မနေ့ကထုတ်ပြန်တဲ့ ကြေငြာချက်မှာ ပြင်သစ်ရဲ့ ဘာသာရေးမစွက်တဲ့ နိုင်ငံရေးစနစ်နဲ့ ကိုက်ညီစွာ အစ္စလာမ်သာသနာကို ကျင့်သုံးနိုင်ရေး၊ အစ္စလာမ်သာသနာကို နိုင်ငံရေးလက်နက် တစ်ခုသဖွယ် အသုံးချမှု တိုက်ဖျက်ရေး၊ ပြင်သစ်နိုင်ငံက အစ္စလာမ်ဘာသာအပေါ် တစ်ခြားနိုင်ငံတွေက ဝင်ရောက်စွက်ဖက်မှုကို တားဆီးရေး၊ အစ္စလာမ်ဘာသာဝင်တစ်ချို့မှာရှိနေတဲ့ အမျိုးသား အမျိုးသမီး ခွဲခြားဆက်ဆံတဲ့ လူမျိုးစု​​ဓလေ့တွေကို တားဆီးရေး စတာတွေအတွက် အစိုးရနဲ့ သဘောတူညီခဲ့တာလို့ ဖော်ပြထားပါတယ်။

    သဘောတူညီချက်အရ နိုင်ငံတော်အဆင့် ရှေ့ဆောင်အီမာမ်များကောင်စီ ဖွဲ့စည်းနိုင်မှာဖြစ်ပြီး ဒီကောင်စီက နိုင်ငံတစ်ဝှမ်း ဗလီတွေမှာ ရှေ့ဆောင်အီမာမ်တွေ ခန့်ထားတာ၊ ထုတ်ပယ်တာတွေ လုပ်ဆောင်နိုင်မှာပါ။

    CFCM ခေါင်းဆောင်တွေနဲ့ တွေ့ဆုံ​ဆွေးနွေးခဲ့တဲ့ ပြင်သစ်ပြည်ထဲရေးဝန်ကြီး Gérald Darmanin က ဒီသဘောတူညီချက်ဟာ ‘ပြင်သစ်နိုင်ငံက အစ္စလာမ်ဘာသာဝင်တွေနဲ့ ပြင်သစ်နိုင်ငံအတွက် အရေးပါတဲ့ ခြေလှမ်းတစ်ခု ဖြစ်တယ်’ လို့ ပြောကြားခဲ့ပါတယ်။

    ပြင်သစ်နိုင်ငံက အစ္စလာမ်ဘာသာဝင်တစ်ချို့မှာ ရှိနေတဲ့ အစွန်းရောက်ဝါဒကို တိုက်ဖျက်ရေး၊ နိုင်ငံရဲ့ ဘာသာရေးမစွက်တဲ့ နိုင်ငံရေးတန်ဖိုးတွေကို ထိန်းသိမ်းရေးဆိုတဲ့ ငြင်သစ်သမ္မ မာခရွန်ရဲ့ စီမံကိန်းကနေ ဒီသဘောတူညီချက် ထွက်ပေါ်လာတာပါ။

    မာခရွန်ဟာ နိုဝင်ဘာလက အစ္စလာမ်ဘာသာရေးခေါင်းဆောင်တွေနဲ့ တွေ့ဆုံကာ နိုင်ငံအတွင်းက အစ္စလာမ်သာသနာ ကျင့်သုံးမှုကို စနစ်တကျဖြစ်အောင်လုပ်မယ့် သူ့ရဲ့အစီအစဉ်ကို လက်ခံဖို့ တိုက်တွန်းခဲ့ပါတယ်။

    မွတ်စလင်ခေါင်းဆောင်တစ်ချို့က ဒီမူဝါဒကို လက်မှတ်ရေးထိုးဖို့အတွက် ဖိအားပေးတဲ့သဘောမျိုး ခံစားရတယ်လို့ ပြောကြားခဲ့ပါတယ်။

    “ဒီမူဝါဒသဘောတူညီချက်မှာပါဝင်တဲ့ အချက်အားလုံးကို သဘောတူတာတော့ မဟုတ်ပါဘူး။ ဒါပေမယ့် ပြင်သစ်က အစ္စလာမ်သာသနာအတွက် အလှည့်အပြောင်းတစ်ခုကို ရောက်နေပြီး ကျွန်တော်တို့ မွတစ်လင်တွေကလည်း ကိုယ့်ရဲ့ တာဝန်၀တ္တရားတွေကို ကျေပွန်ရပါမယ်” လို့ CFCM ရဲ့ ဒုတိယ ဥက္ကဌဖြစ်ပြီး ပဲရစ်ဂျာမေဗလီရဲ့ အုပ်ချုပ်သူလည်းဖြစ်တဲ့ Chems-Eddine Hafiz က ပြောကြားခဲ့ပါတယ်။

    Ref : Anadolu Agency

  • နိုင်ငံ၏ရပ်တည်ချက်ကို မွတ်စလင်ခေါင်းဆောင်များထံ ကိုယ်စားလှယ်လွှတ်၍ ပြင်သစ်က ရှင်းပြမည်

    နိုင်ငံ၏ရပ်တည်ချက်ကို မွတ်စလင်ခေါင်းဆောင်များထံ ကိုယ်စားလှယ်လွှတ်၍ ပြင်သစ်က ရှင်းပြမည်

    နိုဝင်ဘာ ၆၊ ၂၀၂၀
    M-Media

    ပြင်သစ်သမ္မ မာခရွန်

    -ဘာသာရေးမစွက်တဲ့ နိုင်ငံရေးနစ်ဟာ နိုင်ငံသား အစ္စလာမ်ဘာသာဝင်တွေအပေါ် ခွဲခြားဖိနှိပ်ဖို့ မဟုတ်ဘူးဆိုတာ အချို့မွတ်စလင်နိုင်ငံတွေထံ သွားရောက်ရှင်းပြနိုင်ရေး အထူးကိုယ်စားလှယ်အဖွဲ့ စေလွှတ်ဖို့ ပြင်သစ်နိုင်ငံက စီစဉ်နေပါတယ်။

    တမန်တော်မိုဟာမက်ကို ရုပ်ပြောင်ရေးဆွဲလှောင်ပြောင်တဲ့ ကျောင်းဆရာတစ်ဦး ပြီးခဲ့တဲ့လအစောပိုင်းက အကြမ်းဖက်သတ်ဖြတ်ခံရပြီးတဲ့နောက် ပြင်သစ်သမ္မတ မာခရွန်ရဲ့ မှတ်ချက်တွေကြောင့် ကမ္ဘာတစ်ဝှမ်းက အစ္စလာမ်ဘာသာဝင်တွေ ဆန္ဒပြတာ ပြင်သစ်ကုန်ပစ္စည်း သပိတ်မှောက်တာတွေ ဖြစ်ခဲ့ပါတယ်။

    မာခရွန်က ဒီမိုကရေစီရဲ့ တန်ဖိုးတစ်ခုဖြစ်တဲ့ လွတ်လပ်စွာဖော်ပြခွင့်ကို ဆက်လက်ကာကွယ်သွားမှာဖြစ်ပြီး ဘာသာရေးခေါင်းဆောင်တွေအပေါ် လှောင်ပြောင်စော်ကားမှုကို အရေးယူမှာမဟုတ်ဘူးလို့ ပြောကြားခဲ့တာ ဖြစ်ပါတယ်။ ဒီမတိုင်ခင်ကလည်း ပြင်သစ်မွတ်စလင်လူ့အဖွဲ့အစည်းအတွင်းမှာ ရှိနေတဲ့ အစွန်းရောက်ဝါဒကို တိုက်ဖျက်သွားမယ်လို့ ထုတ်ဖော်ပြောဆိုခဲ့ပါတယ်။

    ဒါပေမယ့် နောက်ပိုင်း အလ်ဂျာဇီးရားသတင်းဌာနနဲ့ အင်တာဗျူးမှာတော့ မိမိ ပုဂ္ဂလိက သဘောထားအရ တမန်တော်မိုဟာမက် ရုပ်ပြောင်ရေးဆွဲမှုကို အားမပေးဘဲ၊ ဘာသာရေးခေါင်းဆောင် စော်ကားခံရမှုအတွက် မွတ်စလင်တွေ ဒေါသထွက်တာကို နားလည်တယ်လို့ ပြောကြားခဲ့ပါတယ်။

    မာခရွန်ဟာ သူ့ရဲ့ရပ်တည်ချက်နဲ့ပတ်သက်ပြီး မွတ်စလင်ကမ္ဘာက ခေါင်းဆောင်တစ်ချို့ကို ဖုန်းနဲ့ ရှင်းပြခဲ့ပါတယ်။ မိမိတို့ဟာ အစွန်းရောက်အကြမ်းဖက်ဝါဒနဲ့ အစ္စလာမ်ဘာသာတရားကို ခွဲခြားမြင်ကြောင်း၊ နိုင်ငံအတွင်းမှာရှိနေတဲ့ အစ္စလာမ်ဘာသာဝင်တွေအပေါ် ဖိနှိပ်မှာမဟုတ်ကြောင်း ထည့်သွင်းပြောကြားခဲ့ပါတယ်။

    ယူအေအီးနိုင်ငံခြားရေးဝန်ကြီးက မာခရွန်ရဲ့ ရပ်တည်ချက်ကို လက်ခံဖို့ မွတ်စလင်အသိုင်းအဝိုင်းကို တိုက်တွန်းခဲ့ပါတယ်။

    Ref: The Gurdian

  • ဘာသာရေးခေါင်းဆောင်စော်ကားခံရ၍ ဒေါသထွက်သည်ကို နားလည်သည်ဟု ပြင်သစ်သမ္မတပြော

    ဘာသာရေးခေါင်းဆောင်စော်ကားခံရ၍ ဒေါသထွက်သည်ကို နားလည်သည်ဟု ပြင်သစ်သမ္မတပြော

    နိုဝင်ဘာ ၁၊ ၂၀၂၀
    M-Media

    ပြင်သစ်သမ္မ မာခရွန်

    -တမန်တော်မိုဟာမက်ကို လှောင်ပြောင်တဲ့ရုပ်ပြောင် ရေးဆွဲတဲ့အတွက် အစ္စလာမ်ဘာသာဝင်တွေ မနှစ်မြို့ ဒေါသထွက်တာကို နားလည်ပေမယ့် အကြမ်းဖက်တုန့်ပြန်တာမျိုးကို လက်မခံဘူးလို့ ပြင်သစ်သမ္မတ မာခရွန်က ပြောကြားလိုက်ပါတယ်။

    တမန်တော်မိုဟာမက်ရုပ်ပြောင်ရေးဆွဲဖော်ပြမှု၊ ဒီလိုရေးဆွဲဖော်ပြခွင့်ကို ဆက်လက်ခွင့်ပြုမယ့်ဆိုတဲ့ မာခရွန်ရဲ့ မှတ်ချက် စတာတွေကြောင့် ပြီးခဲ့တဲ့လအတွင်း ပြင်သစ်မှာ ဓားကိုင်အကြမ်းဖက်သတ်ဖြတ်မှု ၂ ခု ဖြစ်ပွားခဲ့ပြီး လူ ၄ ဦး သေဆုံးခဲ့ပါတယ်။

    မာခရွန်ရဲ့မှတ်ချက်အတွက် ကမ္ဘာတစ်ဝှမ်းက အစ္စလာမ်ဘာသာဝင်တွေ ဆန္ဒပြခဲ့ကြပြီး ပြင်သစ်ထုတ်ကုန်တွေကို သပိတ်မှောက်ဖို့ လှုံ့ဆော်မှုတွေလည်း ရှိခဲ့ပါတယ်။ တမန်တော်မိုဟာမက်ကို ရုပ်ပုံရေးဆွဲတာဟာ အ,ဂါရ၀ပြုတယ်၊ ဘာသာရေးစော်ကားတယ်လို့ မွတ်စလင်တွေက ခံယူထားတာပါ။

    စနေနေ့က အာရဘီရုပ်သံလိုင်းတစ်ခုနဲ့ အင်တာဗျူးမှာ တိုင်းပြည်ရဲ့ အခြေခံမူဖြစ်တဲ့ လွတ်လပ်စွာ ထုတ်ဖော်ပြောဆိုခွင့်ကို ဆက်လက်ကာကွယ်သွားမယ်လို့ ပြောကြားခဲ့ပါတယ်။ ဒါပေမယ့် တမန်တော်မိုဟာမက်ကို ရုပ်ပြောင်ရေးဆွဲတာမျိုး မိမိအနေနဲ့ တရားဝင်ထောက်ခံအားပေးမှာမဟုတ်ဘဲ ပြင်သစ်ကလည်း မွတ်စလင်ဆန့်ကျင်ရေးလမ်းကြောင်းကို ဘယ်တော့မှ သွားမှာမဟုတ်ဘူးလို့ ထည့်သွင်းပြောဆိုခဲ့ပါတယ်။

    “ဒီလိုကာတွန်းတွေကြောင့် လူတွေ ဒေါသထွက်တယ်ဆိုတာကို ကျွန်တော်နားလည်ပြီး၊ သူတို့ကိုလည်း လေးစားပါတယ်။ ဒါပေမယ့် ဒီကာတွန်းကို အကြောင်းပြပြီး အကြမ်းဖက်တာမျိုးကိုတော့ ကျွန်တော် ဘယ်တော့မှ လက်ခံမှာမဟုတ်ပါဘူး။ တိုင်းပြည်ရဲ့ လွတ်လပ်စွာ ရေးသားခွင့်၊ ရေးဆွဲခွင့်၊ တွေးတောခွင့် မူကိုတော့ အမြဲတမ်း ကာကွယ်သွားမှာပါ”

    တင်းမာနေတဲ့ဒီအခြေအနေကို လျော့ပါးအောင် ဆောင်ရွက်ဖို့ဟာ မိမိတာဝန်ဖြစ်ပြီး ဒါကိုလည်း လုပ်ဆောင်နေကြောင်း၊ တစ်ချိန်တည်းမှာပဲ အခြေခံဥပဒေမှာ အာမခံထားတဲ့အခွင့်အရေးတွေကို ကာကွယ်သွားမှာဖြစ်ကြောင်း မာခရွန်က ထည့်သွင်းပြောဆိုခဲ့ပါတယ်။

    အာရဘီရုပ်သံလိုင်းနဲ့ အင်တာဗျူးမှာ ဖြေကြားခဲ့တာကို ပြင်သစ်သမ္မတရုံးက ဒီကနေ့မှာ ထုတ်ပြန်ခဲ့တာ ဖြစ်ပါတယ်။

    Ref: Alarabiya ​

  • အစွန်းရောက်တွေကြောင့် မိအေးနှစ်ခါနာတဲ့ ပြင်သစ်မွတ်စလင်များ

    အစွန်းရောက်တွေကြောင့် မိအေးနှစ်ခါနာတဲ့ ပြင်သစ်မွတ်စလင်များ

    အောက်တိုဘာ ၃၀၊ ၂၀၂၀
    M-Media

    ဝမ်းနည်းခြင်းအထိမ်းအမှတ် ဆီမီးထွန်းနေသည့် ပြင်သစ်မွတ်စလင်များ

    -မနေ့က နိုက်စ်မြို့မှာ ဖြစ်ပွားခဲ့တဲ့ ဓားကိုင် အကြမ်းဖက်သတ်ဖြတ်မှုကို ပြင်သစ်မွတ်စလင်တွေက ရှုတ်ချလိုက်ပြီး ဝါဒနဲ့ ဝါဒီကို ခွဲခြားမြင်ဖို့လိုအပ်တယ်လို့လည်း ပြောကြားခဲ့ပါတယ်။

    စာသင်ချိန်အတွင်း တမန်တော်မိုဟာမက်ရုပ်ပြောင်ကာတွန်း အသုံးပြုခဲ့တဲ့ ပဲရစ်က ကျောင်းဆရာတစ်ဦး အခုလအစောပိုင်းမှာ သတ်ဖြတ်ခံခဲ့ရပြီးတဲ့နောက် ပြင်သစ်သမ္မတ မာခရွန် ပြောကြားခဲ့တဲ့ မှတ်ချက်ကြောင့် မွတ်စလင်ကမ္ဘာနဲ့ ​ပြင်သစ်အစိုးရတို့အကြား တင်းမာမှုတွေ မြင့်တက်နေတာပါ။

    မာခရွန်က ပြင်သစ်ဟာ ဘာသာရေးမစွက်တဲ့ နိုင်ငံရေးစနစ်ကို တစ်စိုက်မတ်မတ် ကာကွယ်သွားမှာဖြစ်ပြီး ဘာသာရေးခေါင်းဆောင်တွေအပေါ် လှောင်ပြောင်စော်ကားမှုကို ပိတ်ပင်သွားမှာမဟုတ်ဘူးလို့ ပြောခဲ့တာ ဖြစ်ပါတယ်။ နောက်ဆက်တွဲအဖြစ် အစ္စလာမ်ဘာသာဝင်အများစုရှိရာ နိုင်ငံတွေမှာ ပြင်သစ်အစိုးရကို ဆန့်ကျင်ဆန္ဒပြတာ၊ ပြင်သစ်ကုန်ပစ္စည်းတွေကို သပိတ်မှောက်တာတွေ ဖြစ်လာပါတယ်။

    မနေ့က နိုက်စ်မြို့ တိုက်ခိုက်မှုမှာတော့ လူ ၃ ဦးသေဆုံးကာ အများအပြား ဒဏ်ရာရခဲ့ပါတယ်။ ကျူးလွန်သူဟာ တူနီးရှားနွယ်ဖွားတစ်ဦးဖြစ်ပြီး ရဲတပ်ဖွဲ့က ဖမ်းဆီးနိုင်ခဲ့ပါတယ်။

    ပြင်သစ်က လူ့အခွင့်အရေး တက်ကြွလှုပ်ရှားသူ ယာစီရ်လူတီက ဒီသတ်ဖြတ်မှုကို ရှုတ်ချခဲ့ပြီး၊ အကြမ်းဖက်မှု ကျူးလွန်သူဟာ မွတ်စလင်၊ ခရစ်ယာန် ခွဲခြားနေတာမျိုး မရှိဘူးလို့ ထောက်ပြခဲ့ပါတယ်။

    “ဘုရားကျောင်းထဲမှာ အမျိုးသမီးတစ်ဦးကို ခေါင်းဖြတ်လိုက်တာကိုကြည့်ရင် ဒီလူတွေဟာ ဘာကိုမှ အလေးအမြတ်မထားဘူးဆိုတာ တွေ့ရမှာပါ။ ကိုယ်ကျင့်တရားဆိုတာ ဒီလူတွေမှာ မရှိပါဘူး။ (အခုရက်ပိုင်း) ကမ္ဘာတစ်ဝှမ်းက ဗလီဝတ်ကျောင်းတော်တွေမှာ လူ ၇၅၀ လောက် အသတ်ခံရတယ်။ ဒီနှစ်ခုကို ချိတ်ဆက်ကြည့်ရင် ဒီလို အစွန်းရောက်ဝါဒမျိုးဟာ ကမ္ဘာ့ကိုပြန့်နှံ့နေပြီး ဒါကို တိုက်ဖျက်ရာမှာ ကျွန်တော်တို့ ရှုံးနိမ့်နေတယ်ဆိုတာကို ပြသနေပါတယ်။ အကြမ်းဖက်သမားတွေက ဘာသာလူမျိုးမခွဲဘဲ သတ်ဖြတ်နေပေမယ့် ကျွန်တော်တို့ကတော့ ဒီတိုက်ခိုက်မှုတွေကို ဘာသာလူမျိုးခွဲပြီး ရှုမြင်နေကြပါတယ်”

    ပဲရစ်မှာ ကျောင်းဆရာတစ်ဦး အသတ်ခံရပြီးတဲ့နောက် ပြင်သစ်အစိုးရဟာ နိုင်ငံအတွင်းမှာရှိတဲ့ အစ္စလာမ်ဘာသာဝင်လူ့အဖွဲ့အစည်းပေါ် သံသယမျက်လုံးနဲ့ ပိုမိုစောင့်ကြည့်လာခဲ့ပြီး ဗလီတွေ၊ အစ္စလာမ်ဘာသာရေးစာသင်ကျောင်းတွေ၊ မွတ်စလင်ပရဟိတအဖွဲ့တွေအထိပါ ဒီကိစ္စက ရိုက်ခတ်လာခဲ့ပါတယ်။

    ဒီကိစ္စနောက်ပိုင်း ပြင်သစ်အစိုးရက ဖျက်သိမ်းခိုင်းခဲ့တဲ့ နာမည်ကြီး မွတ်စလင်ပရဟိတအဖွဲ့ Barakacity ကို တည်ထောင်သူ အီဒရစ် စီဟာမီဒီကလည်း ဒီလိုအစွန်းရောက်တွေကြောင့် တစ်ခြားသူတွေပါ ဒုက္ခရောက်တယ်လို့ ပြောကြားခဲ့ပါတယ်။

    “ဒါမျိုးတိုက်ခိုက်မှုတွေက ဆိုးရွားလွန်းတယ်။ ငြိမ်းချမ်းတဲ့ဘ၀သစ် လာရောက်ရှာဖွေသူတွေရှိတဲ့ နေရာမျိုးမှာ ဖြစ်တာက မိအေးနှစ်ခါနာတာပါပဲ။ ထိခိုက်ခံစားရသူတွေ သူတို့ရဲ့မိသားစုတွေကို အားပေးကြသလို၊ တကယ်ဘာသာရေးလေးစားတဲ့ သူတွေကိုလည်း အားပေးကြပါတယ်။ ပြင်သစ်ဟာ ရူးနှမ်းမှု၊ အမုန်း၊ ဒေါသနဲ့ လက်စားချေလိုမှုထဲကို ကျရောက်နေပါပြီ “

    ဂျာနယ်လစ်တစ်ယောက်ဖြစ်တဲ့ ဖိုက်ဇာ ဘင် မိုဟာမက်က တမန်တော်မိုဟာမက် ဖော်ဆောင်ခဲ့တဲ့ ငြိမ်းချမ်းရေးတန်ဖိုး၊ အတူယှဉ်တွဲနေထိုင်မှု ဓလေ့တွေကို ဆိုရှယ်မီဒီယာကနေတစ်ဆင့် ဖော်ထုတ်ခြင်းဟာ အခုလိုအချိန်အခါမျိုးမှာ အသုံးဝင်လိမ့်မယ်လို့ ယူဆနေပါတယ်။

    ” ‘ဂျူးဖြစ်ဖြစ်၊ ခရစ်ယာန်ဖြစ်ဖြစ် ဘယ်သူ့ကိုမဆို ထိခိုက်နစ်နာအောင်လုပ်ခဲ့သူဟာ ကမ္ဘာ့တရားစီရင်မယ့်နေ့မှာ ကျွန်ုပ်နဲ့ ဆန့်ကျင်ဖက်လားရာမှာ ရှိလိမ့်မယ်’ လို့ တမန်တော်မိုဟာမက်က မိန့်ကြားခဲ့ပါတယ်” လို့ ဖိုက်ဇာက Twitter စာမျက်နှာမှာ ရေးသားခဲ့ပါတယ်။

    လူမှုရေးအဖွဲ့ Front de Mères က ဖာတီမာ အူဆက်က ဒီလိုအချိန်အခါမျိုးမှာ အားလုံး စုစုစည်းစည်း ညီညီညွတ်ညွတ်ရှိဖို့ အရေးကြီးတယ်လို့ ပြောကြားခဲ့ပါတယ်။

    “ကျွန်မတို့ကို အကြောက်တရားနဲ့ အာဃာဒ စက်ဝန်းထဲက သားကောင်တွေဖြစ်အောင် လုပ်ထားတဲ့ အမုန်းဝါဒဖြန့်သူတွေကို အတူတကွ ဆန့်ကျင်ကြပါစို့။ စည်းလုံးမှု၊ သာတူညီမျှမှု၊ တရားမျှတမှုနဲ့ လူ့ဂုဏ်သိက္ခာအပေါ် အလေးထားမှုတွေ ရှိကြပါ”

    ရုပ်သံအစီအစဉ်တင်ဆက်သူ ဆီဘက်စတီယန် အလ်ဒဲလ်ဟာမစ်ကလည်း နိုက်စ်မြို့မှာဖြစ်ခဲ့တဲ့ အဖြစ်အပျက်တွေဟာ အလွန်စက်ဆုပ်စရာကောင်းတယ်လို့ ပြောကြားခဲ့ပါတယ်။

    “ထိခိုက်ခံစားရသူတွေ၊ သူတို့ရဲ့မိသားစုတွေနဲ့ ထပ်တူထပ်မျှ ဝမ်းနည်းရပါတယ်။ ဒါဟာ အရိုင်းအစိုင်းဝါဒမျိုးပါ။ ကျူးလွန်သူတွေကို လူလို့တောင် ပြောလို့မရပါဘူး”

    နိုင်ငံရေးသမားတွေဟာ ဒီအဖြစ်အပျက်ပေါ်မှာ အမြတ်ထုတ်နေတယ်လို့လည်း ပြင်သစ်မွတ်စလင်တစ်ချို့က ယူဆနေကြပါတယ်။

    ပြင်သစ်က လက်ယာစွန်းရောက်အဖွဲ့တွေဟာ ဒီအဖြစ်အပျက်ကို အခြေခံပြီး နိုင်ငံအတွင်းက အစ္စလာမ်ဘာသာဝင်တွေအပေါ် အကြမ်းဖက်ဖို့ လှုံဆော်တာတွေအထိ ရှိလာပါတယ်။

    Ref: Aljazeera