ဩဂုတ် ၉၊ ၂၀၂၀
M-Media
-အိန္ဒိယနိုင်ငံမြောက်ပိုင်း ရာဂျက်စတန်ပြည်နယ်မှာ မွတ်စလင်တက္ကဆီယာဉ်မောင်းတစ်ဦးဟာ လူ ၂ ဦးရဲ့ အကြမ်းဖက်တိုက်ခိုက်မှုကို ခံခဲ့ရပါတယ်။
ဆီကာရ်ခရိုင်မှာ သောကြာနေ့မနက် အစောပိုင်းက အသက် ၅၂ နှစ်အရွယ် တက္ကဆီယာဉ်မောင်း ဂါဖာရ်အဟ်မဒ်မောင်းလာတဲ့ ကားကို လူနှစ်ဦးကတားကာ ဆေးလိပ်တောင်းသောက်ပြီးတဲ့နောက် ဂါဖာရ်ကို ကားထဲကနေ ဆွဲထုတ်ပြီး ထိုးကြိတ်ကန်ကျောက်ခဲ့တာပါ။ ကျူးလွန်သူတွေဟာ ဟိန္ဒူဘုရားစာကို အဓမ္မဆိုခိုင်းခဲ့ပြီး၊ ‘မိုဒီအဓွန့်ရှည်ပါစေ’ လို့လည်း ပြောခိုင်းခဲ့ပါတယ်။
တိုက်ခိုက်မှုကြောင့် ဂါဖာရ်ဟာ မျက်နှာဖူးယောင်ဒဏ်ရာ၊ မျက်လုံးညိုမည်းဒဏ်ရာတွေ ရရှိခဲ့ပါတယ်။ တိုက်ခိုက်သူတွေဟာ သူ သတိမေ့နေတဲ့အချိန် ရူပီ ၇၀၀ နဲ့ လက်ပတ်နာရီတစ်လုံး ခိုးယူသွားတယ်လို့လည်း ဂါဖာရ်က ဆိုပါတယ်။ ဒီကိစ္စနဲ့ပတ်သက်ပြီး သံသယရှိသူ ၂ ဦးကို ရဲတပ်ဖွဲ့က ဖမ်းဆီးထားပါတယ်။
ကျူးလွန်သူတွေဟာ အရင်က ရာဇဝတ်မှုကျူးလွန်ခဲ့တဲ့ မှတ်တမ်းရှိပြီး တရားရေးအရ ဆက်လက်ဆောင်ရွက်နေတယ်လို့ ဆီကာရ်ရဲစခန်းက Twitter စာမျက်နှာ ရေးသားခဲ့ပါတယ်။
ဟိန္ဒူအမျိုးသားရေးပါတီ BJP အာဏာရခဲ့တဲ့ ၂၀၁၄ ခုနှစ်နောက်ပိုင်း အိန္ဒိယမှာ ဒါလစ်ဇာနိမ့်တွေ၊ ခရစ်ယာန်တွေ၊ မွတ်စလင်တွေ အကြမ်းဖက်ခံရမှု မြင့်တက်လာခဲ့ပြီး ဟိန္ဒူဘုရားစာ အဓမ္မဆိုခိုင်းတာ၊ ဟိန္ဒူနတ်ဘုရားတွေကို ရှိခိုးခိုင်းတာလို ဘာသာရေးအကြမ်းဖက်မှုတွေလည်း ရှိလာပါတယ်။
Ref: New Indian Express
