News @ M-Media

Tag: Laliga 2019-20

  • တနင်္လာနေ့ ဘောလုံးသတင်းများ

    တနင်္လာနေ့ ဘောလုံးသတင်းများ

    ဇန်နဝါရ ၂၇၊ ၂၀၂၀
    M-Media

    FA ဖလား ပြန်ကန်ပွဲကို လီဗာပူးလ် ကစားမည်မဟုတ်

    ဖေဖော်ဝါရီ ပထမအပတ်မှာ ကစားမယ့် FA ဖလား စတုတ္ထအဆင့် ပြန်ကန်ပွဲစဉ်အတွင်း Shrewsbury Town နဲ့ပွဲကို ကစားမှာမဟုတ်ဘူးလို့ လီဗာပူးလ်နည်းပြ ယာဂန်ကလော့ပ်က ပြောကြားလိုက်ပါတယ်။ ဒီကနေ့မနက်ကပွဲမှာ ၂ ဂိုးပြတ်နဲ့ ဦးဆောင်ခဲ့တဲ့လီဗာပူးလ်ဟာ နောက်ပိုင်းမှာ ချေပဂိုးတွေ ပေးခဲ့ရကာ သရေကျခဲ့တာပါ။ ပြန်ကန်ပွဲဟာ ပရီးမီးယားလိဂ် ဆောင်းရာသီနားရက်ကာလဖြစ်ပြီး အင်္ဂလန်ဘောလုံးအဖွဲ့ချုပ် FA က ကစားသမားတွေအတွက် နားရက်ကာလကို အလေးမထားပေမယ့် မိမိတို့က အလေးထားတယ်လို့ ကလော့ပ်က ဆိုပါတယ်။

    ပရိတ်သတ်တွေကြောင့် အက်စပန်ညိုကွင်း ပိတ်ခံရဖွယ်ရှိနေ

    စနေနေ့က ၁ ဂိုးစီသရေကျတဲ့ပွဲမှာ ပြိုင်ဘက် ဘီဘာလ်အို တိုက်စစ်မှူး အီနာဂီ ဝီလီယံကို အက်စပန်ညိုပရိတ်သတ်တွေက လူမျိုးရေးခွဲခြားမှုအတွက် အက်စပန်ညိုအသင်း ကွင်းတစ်စိတ်တစ်ပိုင်းပိတ်တဲ့ ပြစ်ဒဏ်မျိုးချမှတ်ဖို့ လာလီဂါပြိုင်ပွဲ ကျင်းပရေး တာဝန်ရှိသူတွေက စပိန်ဘောလုံးအဖွဲ့ချုပ်ကို တောင်းဆိုလိုက်ပါတယ်။ ဘောလုံးအဖွဲ့ချုပ်က ဒီကိစ္စကို ဗုဒ္ဓဟူးနေ့မှာ ဆွေးနွေးဖို့ ရှိနေပါတယ်။ လာလီဂါတာဝန်ရှိသူတွေက ဒီအဖြစ်အပျက်မှာ ပါဝင်တဲ့ ပရိတ်သတ်တွေကို စုံစမ်းဖော်ထုတ်ကာ အမုန်းရာဇဝတ်မှုနဲ့ တရားစွဲဆိုဖို့လည်း လုပ်ဆောင်နေပါတယ်။

    ဆော်ဒီက နယူးကာဆယ်အသင်းကို ဝယ်ယူရန် နီးစပ်လာ

    ဆော်ဒီအာရေဗျရဲ့ နိုင်ငံပိုင် ရန်ပုံငွေအဖွဲ့ PIF က ပရီးမီးယားလိဂ်ကလပ် နယူးကာဆယ်အသင်းကို ပေါင် သန်း ၃၄၀ နဲ့ဝယ်ယူဖို့အတွက် ပြီးခဲ့တဲ့လအနည်းက ပြုလုပ်လာခဲ့တဲ့ ဆွေးနွေးမှုဟာ တိုးတက်မှု ရနေပါတယ်။ အသင်းကို ဗြိတိန် ဘီလီယံနာ မိုက် အက်ရှ်လေက ၂၀၀၇ ခုနှစ်ကတည်းက ပိုင်ဆိုင်ခဲ့တာပါ။ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်ဟာ ပရီးမီးယားလိဂ်ဘောလုံးကလပ်အသင်း တစ်ခုခုကို ဝယ်ယူဖို့ စိတ်အားထက်သန်နေတာဖြစ်ပါတယ်။ ယူအေအီးကို အုပ်စိုးသူမိသားစုထဲက တစ်ဦးဖြစ်တဲ့ ဘီလီယံနာ ရှိခ်ခါလစ်ဟာ ပြီးခဲ့တဲ့နှစ်က နယူးကာဆယ်အသင်းကို ဝယ်ယူဖို့ နီးစပ်ခဲ့ပေမယ့် နောက်ပိုင်းမှာ သဘောတူညီချက် ပျက်ပြယ်ခဲ့ပါတယ်။

    Ref: BBC

  • အင်္ဂါနေ့ ဘောလုံးသတင်းများ

    အင်္ဂါနေ့ ဘောလုံးသတင်းများ

    ဇန်နဝါရီ ၂၁၊ ၂၀၂၀
    M-Media

    ပြဿနာအားလုံးဖြေရှင်းနိုင်သည့် ရော်နယ်ဒိုဟု ဂျူဗင်တပ်စ်နည်းပြ ချီးကျူး

    တိုက်စစ်မှူး ခရစ္စတီယာနိုရော်နယ်ဒိုဟာ ပြဿနာအားလုံးကို ဖြေရှင်းနိုင်တဲ့ ကစားသမား ဖြစ်တယ်လို့ ဂျူဗင်တပ်စ်နည်းပြ မောင်ရီဇီယို ဆာရီက ပြောကြားလိုက်ပါတယ်။ အခုတစ်ပတ် ပါးမားအသင်းကို ၂ ဂိုး ၁ ဂိုးနဲ့ အနိုင်ရတဲ့ပွဲမှာ ရော်နယ်ဒိုဟာ ၂ ဂိုးစလုံး သွင်းပေးခဲ့သလို ‌အသင်းရဲ့ခံစစ်အတွက်လည်း ကူညီပေးခဲ့ပါတယ်။ ရော်နယ်ဒိုဟာ စီးရီးအေ ၇ ပွဲဆက်တိုက် ဂိုးသွင်းနိုင်တဲ့ စံချိန်ကိုလည်း အဲဒီပွဲမှာ ရရှိခဲ့ပါတယ်။ ဂျူဗင်တပ်စ်ဟာလက်ရှိ စီးရီးအေကို ဦးဆောင်နေပြီး ဆာရီက ရော်နယ်ဒိုကို ချီးကျူးခဲ့ပေမယ့် အသင်းလိုက်ကစားပုံအတွက် စိတ်ပျက်ရတယ်လို့‌ ပြောဆိုခဲ့ပါတယ်။

    ကစားသမားများ၏ အပြုအမူကြောင့် မန်ယူကို FA က တရားစွဲ

    လီဗာပူးလ်ကို ၂ ဂိုး ဂိုးမရှိနဲ့ ရှုံးနိမ့်ခဲ့တဲ့ တနင်္ဂနွေနေ့ပွဲမှာ ကစားသမားတွေ ဒိုင်လူကြီးကို ၀ိုင်းအုံစောဒကတက်မှုအတွက် မန်ယူအသင်းကို အင်္ဂလန်ဘောလုံးအဖွဲ့ချုပ် FA က တရားစွဲဆိုထားပါတယ်။ လီဗာပူးလ်တိုက်စစ်မှူး ဖာမီနို ဒုတိယဦးဆောင်ဂိုး သွင်းယူမှုမှာ နောက်ခံလူ ဗန်ဒိုက်ဟာ ဂိုးသမား ဒီဂီယာအပေါ် ပြစ်ဒဏ်ကျူးလွန်ခဲ့တယ်လို့ မန်ယူကစားသမားတွေက ကွင်းလယ်ဒိုင် ခရေ့ဂျ် ပေါ်ဆန်ကို စောဒကတက်ခဲ့တာပါ။ ကွင်းလယ်ဒိုင်က VAR ကြည့်ကာ ဂိုးပေးမှုကို ပယ်ဖျက်ခဲ့ပါတယ်။ ဒီအဖြစ်အပျက်အတွင်း မန်ယူကစားသမားတွေဟာ ကစားသမားကျင့်ဝတ်နဲ့ မညီတဲ့ အပြုအမူတွေ ပြုလုပ်ခဲ့တယ်လို့ဆိုကာ FA က တရားစွဲဆိုခဲ့တာ ဖြစ်ပါတယ်။ မန်ယူနောက်ခံလူဟောင်းဖြစ်ပြီး လက်ရှိမှာ ဘောလုံးပွဲသုံးသပ်သူအဖြစ် ဆောင်ရွက်နေတဲ့ ဂယ်ရီနဗီးလ်က ဗန်ဒိုက်ဟာ ဒီဂီယာကို ပြစ်ဒဏ်ကျူးလွန်မှုမရှိဘဲ မန်ယူကစားသမားတွေရဲ့ ဖိအားကြောင့် ဒိုင်လူကြီးက ဂိုးမပေးခဲ့တာဖြစ်တယ်လို့ ဝေဖန်ခဲ့ပါတယ်။

    နေးမာလက်သစ်ဟု နာမည်ကြီးနေသူကို ရီးယဲလ်ခေါ်ယူ

    ဘရာဇီးလ်ကလပ် ဖလာမင်ဂိုအသင်းက အသက် ၁၈ နှစ်အရွယ် ကွင်းလယ်တိုက်စစ်မှူး ရီနီ ဂျီးဆက်စ်ကို ရီးယဲလ်မက်ဒရစ်အသင်းက ကန်ဒေါ်လာ ၃၃ သန်းနဲ့ မနေ့မှာခေါ်ယူခဲ့ပြီး အသင်းသမိုင်းတစ်လျှောက် ဆောင်းရာသီမှာ စျေးအကြီးဆုံးပေးပြီး ခေါ်ယူမှုလည်းဖြစ်ပါတယ်။ နေးမာလက်သစ်အဖြစ် သတ်မှတ်ခံထားရတဲ့ ဂျီးဆက်စ်ဟာ ဖလာမင်ဂိုအသင်းကြီးနဲ့ ပထမဆုံးရာသီမှာပဲ ခြေစွမ်းပြကာ အသင်းနဲ့အတူ အမှတ်ပေးဖလား၊ ရှုံထွက်ဖလားတွေကို ရရှိခဲ့ပါတယ်။ ရီးယဲလ်ဟာ အလားအလာရှိတဲ့ လူငယ်သွေးသစ် ကစားသမားတွေအတွက် ဘရာဇီးလ်စျေးကွက်ကို အဓိကထားပြီး ပြီးခဲ့တဲ့ ၂ နှစ်အတွင်း ဘရာဇီးလ်လူငယ်ကစားသမား အနည်းဆုံး ၃ ဦးအထိ ခေါ်ယူထားပါတယ်။

    Ref: Goal, BBC

  • ဗုဒ္ဓဟူးနေ့ ဘောလုံးသတင်းများ

    ဗုဒ္ဓဟူးနေ့ ဘောလုံးသတင်းများ

    ဇန်နဝါရီ ၁၅၊ ၂၀၂၀
    M-Media

    ဘာကာနည်းပြဖြစ်လာရန် စိတ်ကူးပင်မယဉ်မိဟု စတီယန်ပြော

    ဘာစီလိုနာအသင်းရဲ့ နည်းပြဖြစ်လာဖို့ စိတ်ကူးမယဉ်ခဲ့မိဘူးလို့ နည်းပြသစ် ကီကေး စတီယန်က ပြောကြားလိုက်ပါတယ်။ အသက် ၆၁ နှစ်အရွယ် ရီးယဲလ်ဘက်တစ်နည်း‌ပြဟောင်း စတီယန်ဟာ မနေ့က ၂ နှစ်ခွဲစာချုပ် ချုပ်ဆိုခဲ့တာပါ။ ဒုတိယတန်းအသင်း လက်စ် ပါးလ်မက်စ်နဲ့ လာလီဂါမှာ စွမ်းဆောင်ရည်ကောင်းပြသခဲ့တဲ့ စတီယန်ဟာ ရီးယဲလ်ဘက်တစ်နဲ့ ပထမဆုံးရာသီမှာပဲ ‌အဆင့် ၆ နဲ့ ယူရိုပါလိဂ်ရအောင် စွမ်းဆောင်ပေးနိုင်ခဲ့တာပါ။ အခုလို အခွင့်အရေးပေးတဲ့အတွက် ဘာစီလိုနာအသင်းကို ကျေးဇူးတင်ပြီး စိန်ခေါ်မှုတွေအတွက် ‌စိတ်လှုပ်ရှားမိတယ်လို့လည်း စတီယန်က ထည့်သွင်းပြောဆိုခဲ့ပါတယ်။ ‌

    လုံခြုံရေးစိုးရိမ်မှုကြောင့် ပင်လယ်ကွေ့လေ့ကျင့်မှုအစီအစဉ်ကို မန်ယူပယ်ဖျက်

    နောက်လ ဆောင်းရာသီ အနားပေးချိန်မှာ ကာတာ ဒါမှမဟုတ် ဒူဘိုင်းကို သွားရောက်လေ့ကျင့်ဖို့ စီစဉ်ထားမှုကို လုံခြုံရေးအခြေအနေကြောင့် မန်ယူအသင်းက ဖျက်သိမ်းလိုက်ပါတယ်။ မန်ယူဟာ ပြီးခဲ့တဲ့နှစ် ဇန်နဝါရီနဲ့ နိုဝင်ဘာလတွေမှာ ယူအေအီးနိုင်ငံ ဒူဘိုင်းမြို့ကို သွားရောက်ကာ ‌လေ့ကျင့်ခဲ့သလို၊ ကာတာနိုင်ငံမြို့ ဒိုဟာမှာလည်း လေ့ကျင်ခဲ့ဖူးပါတယ်။ ပြီးခဲ့တဲ့တစ်ပတ်အတွင်း အီရန်နဲ့ အမေရိကန်တို့အကြား တင်းမာမှုအရှိ ပိုမိုမြင့်တက်မှုကြောင့် ပင်လယ်ကွေ့ဒေသမှာ လုံခြုံရေးအခြေအနေ စိုးရိမ်လာရတာပါ။ နည်းပြ ဆိုးရှားဟာ ပင်လယ်ကွေ့နိုင်ငံတွေအစား စပိန် ဒါမှမဟုတ် ပေါ်တူဂီကိုသွားရောက်လေ့ကျင့်ဖို့ စီစဉ်ထားပါတယ်။

    အာတီတာသာ အသင်းအတွက် သင့်တော်သည့်လူဟု အိုဇေးလ်ပြော

    နည်းပြဟောင်း အူနိုင်း အမ်မရီလက်ထက်မှာ အာဆင်နယ်အသင်းရဲ့ တန်ဖိုးတွေ ပျောက်ဆုံးခဲ့တယ်လို့ ကွင်းလယ်လူ အိုဇေးလ်က ဝေဖန်ပြောကြားလိုက်ပါတယ်။ အူနိုင်းရဲ့ ၁၈ လ နည်းပြသက်တမ်းမှာ အိုဇေးလ်ဟာ ပုံမှန်ကစားခွင့်မရခဲ့ဘဲ နည်းပြသစ် အာတီတာရဲ့ လက်ထက်ရောက်မှ ပွဲထွက်ခွင့်ရခဲ့တာ ဖြစ်ပါတယ်။ အာတီတာလက်အောက်မှာ အသင်းရဲ့ တိုက်ပွဲဝင်စိတ်ဓာတ်၊ ပိုင်ဆိုင်မှုအသားပေးတဲ့ အသင်းရဲ့ ကစားပုံတွေ ပြန်ရလာပြီး ကစားသမားတွေအားလုံး ပျော်ရွှင်ကျေနပ်နေကြကြောင်း အာတီတာသာလျှင် အာဆင်နယ်အတွက် မန်ကန်တဲ့နည်းပြဖြစ်ကြောင်း အိုဇေးလ်က ထည့်သွင်းပြောဆိုခဲ့ပါတယ်။

    Ref: BBC, Daily Mail

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    အောက်တိုဘာ ၃၁၊ ၂၀၁၉
    M-Media

    နေးမာကိုခေါ်ရန် လစာစောင့်ယူပေးမည်ဟု ဘာကာကစားသမားများ ကမ်းလှမ်း
    ===============
    နေးမာကို ပီအက်စ်ဂျီကနေ ပြန်လည်ခေါ်ယူရေး လိုအပ်လာရင် လစာကို စောင့်ယူပေးလို့ရတယ်လို့ ဘာစီလိုနာ ကစားသမားတွေက အသင်းကို ကမ်းလှမ်းလိုက်ပါတယ်။ ၂၀၁၇ ခုနှစ်မှာ ကမ္ဘာ့စံချိန်တင်ပြောင်းရွှေ့ကြေး ပေါင် သန်း ၂၀၀ နဲ့ ပြောင်းသွားတဲ့ နေးမာကို ပြန်လည်ခေါ်ယူရေးအတွက် ဘာစီလိုနာဟာ နည်းလမ်းပေါင်းစုံနဲ့ ကြိုးစားနေပေမယ့် လက်တွေ့မှာ ဖြစ်မလာပါဘူး။ နောက်ခံလူ ပီကေးက Financial Fair Play သတ်မှတ်ချက် ပြည့်မီရေးအတွက် လစာတစ်ချို့တစ်ဝက်ကို ၁ နှစ်၊ ၂ နှစ်လောက် စောင့်ယူကာ အသင်းကို အကူအညီပေးလို့ ရတယ်လို့ ပြောကြားခဲ့ပါတယ်။

    ဗြိတိန်တွင် လွှမ်းမိုးမှုအရှိဆုံးလူမည်းကစားသမားစာရင်း ထုတ်ပြန်
    =====================
    ဗြိတိန်ရဲ့ လွှမ်းမိုးမှုအရှိဆုံး လူမည်းကစားသမားစာရင်း Football Black List မှာ မန်စီးတီးအသင်း တိုက်စစ်မှူး ရဟင်း စတာလင်က ထိပ်ဆုံးမှာ ရှိနေပါတယ်။ ၂၀၀၈ ခုနှစ်က စတင်ထုတ်ပြန်ခဲ့တဲ့ ဒီစာရင်းမှာ ကစားသမားတစ်ဦးရဲ့ နယ်ပယ်စုံ ကြိုးစားအားထုတ်မှုတွေကို လေ့လာဆန်းစစ်ကာ အဆင့်သတ်မှတ်တာ ဖြစ်ပါတယ်။ စတာလင်ရဲ့အနောက်မှာ ဆာဒီယို မာနေး၊ ဒန်နီရို့စ်၊ အီနီလို အလူကိုနဲ့ အန်နီတာ အေဆန်တီတို့က အစဉ်လိုက်ရှိနေပါတယ်။ စတာလင်ဟာ ပြီးခဲ့တဲ့နှစ်တွေအတွင်း လူမျိုးရေးခွဲခြားမှုကို ပွင့်ပွင့်လင်းလင်း ဆန့်ကျင်မှုအတွက် အသိအမှတ်ပြုခံခဲ့ရပါတယ်။

    မန်စီးတီးဒေတာဘေ့စ်ကို ဟက်ခဲ့မှုအတွက် လီဗာပူးလ်ကို FA က ဖြေရှင်းချက်တောင်း
    =======================
    ဘောလုံးသမားရှာဖွေတဲ့ ကွန်ပျူတာစနစ်ကို ချိုးဖျက်ဝင်ရောက်မှုအတွက် မန်စီးတီးကို လီဗာပူးလ်က ပေါင် ၁ သန်း ပေးခဲ့ရတယ်ဆိုတဲ့သတင်းအတွက် အင်္ဂလိပ်ဘောလုံးအဖွဲ့ချုပ် FA က လီဗာပူးလ်အသင်းထံ ဖြေရှင်းချက် တောင်းလိုက်ပါတယ်။ လီဗာပူးလ်ဟာ မန်စီးတီးရဲ့ ဒေတာဘေ့စ် ၇ ခုထဲကို အကြိမ်ရေ ရာနဲ့ချီ ၀င်ရောက်ခဲ့တယ်လို့ဆိုပြီး ဒီအတွက် ၂၀၁၃ ခုနှစ်က ပေါင် ၁ သန်းနဲ့ ကျေအေးမှုယူခဲ့တာပါ။ လီဗာပူးလ်ကတော့ ဒီသတင်းကို ငြင်းဆိုပါတယ်။ လက်ရှိမှာ FA ဒီကိစ္စအတွက် စုံစမ်းစစ်ဆေးရမလားဆိုတာ သုံးသပ်မှုတွေ လုပ်ဆောင်နေပါတယ်။

    Ref: BBC, Daily Mail

  • Untitled post 82348

    ဗုဒ္ဓဟူးနေ့ ဘောလုံးသတင်းများ

    အောက်တိုဘာ ၁၆၊ ၂၀၁၉
    M-Media

    လူမျိုးရေးခွဲခြားသည့် ဘောလုံးပရိသတ် ၆ ဦးကို ဘူလ်ဂေးရီးယား ဖမ်းဆီး

    တနင်္လာနေ့က အင်္ဂလန်အသင်းကို ၆ ဂိုးပြတ်နဲ့ ရှုံးနိမ့်ခဲ့တဲ့ ယူရို ၂၀၂၂ ခြေစစ်ပွဲမှာ အင်္ဂလန်ကစားသမားတွေကို လူမျိုးရေးခွဲခြားစော်ကားခဲ့တဲ့ အိမ်ရှင်ဘူလ်ဂေးရီးယားပရိတ်သတ် ၆ ဦးကို ဖမ်းဆီးလိုက်တယ်လို့ ဘူလ်ဂေးရီးယား ရဲတပ်ဖွဲ့က သတင်းထုတ်ပြန်ပါတယ်။ အဲဒီပွဲမှာ လူမျိုးရေး ခွဲခြားစော်ကားမှုကြောင့် ၂ ကြိမ်တိုင်တိုင် ပွဲကို ရပ်နားခဲ့ရပါတယ်။ ရဲတပ်ဖွဲ့က လူမျိုးရေးခွဲခြားစော်ကားသူ ပရိတ်သတ် ၁၅ ဦးကို ဖော်ထုတ်နိုင်ခဲ့တယ်လို့ ဆိုပါတယ်။ ဒီကိစ္စရဲ့ နောက်ဆက်တွဲအဖြစ် ဘူလ်ဂေးရီးယားဘောလုံးအဖွဲ့ချုပ် ဥက္ကဌလည်း အင်္ဂါနေ့မှာ ရာထူးကနေ နှုတ်ထွက်သွားခဲ့ပါတယ်။

    ဘာကာ-ရီးယဲလ်ပွဲ ကွင်းပြောင်းရန် လာလီဂါက စပိန်ဘောလုံးအဖွဲ့ချုပ်ကို တောင်းဆိုထား

    ကာတာလိုနီယာဒေသ ခွဲထွက်ရေးခေါင်းဆောင် ၉ ဦးကို စပိန်တရားရုံးက ထောင်ဒဏ်တွေချမှတ်မှု နောက်ဆက်တွဲအဖြစ် ဒေသတွင်း မတည်မငြိမ်ဖြစ်မှာ စိုးရိမ်ရတဲ့အတွက် အောက်တိုဘာ ၂၆ ရက်နေ့မှာ ကစားမယ့် ဘာစီလိုနာ-ရီးယဲလ်မက်ဒရစ်ပွဲကို ဘာစီလိုနာအိမ်ကွင်းအစား ရီးယဲလ်အိမ်ကွင်းမှာ ပြောင်းကစားဖို့ လာလီဂါတာဝန်ရှိသူတွေက စပိန်ဘောလုံးအဖွဲ့ချုပ်ကို မေတ္တာရပ်ခံထားပါတယ်။ ဘာစီလိုနာဘောလုံးအသင်းဟာ ကာတာလိုနီယာရဲ့မြို့တော် ဘာစီလိုနာမှာ အခြေစိုက်တာဖြစ်ပါတယ်။ လက်ရှိမှာ ဆန္ဒပြမှုတွေ ဖြစ်ပေါ်နေပြီး ပွဲကစားတဲ့နေမှာ ဆန္ဒပြမှုတွေ ပြင်းထန်လာမှာကို လာလီဂါ တာဝန်ရှိသူတွေက စိုးရိမ်နေတာပါ။ စပိန်ဘောလုံးအဖွဲ့ချုပ်က ဘာစီလိုနာနဲ့ ရီးယဲလ်တို့ရဲ့ အမြင်တွေကို မးမြန်းပြီး လာမယ့်ရက်ပိုင်းအတွင်း ဆုံးဖြတ်သွားမယ်လို့ ပြောကြားခဲ့ပါတယ်။

    ပဲရစ်တွင် လူမျိုးရေးခွဲခြားသူများ ပြည့်နေသည်ဟု ပီအက်စ်ဂျီနောက်ခံလူဟောင်း ပြော

    ပဲရစ်မြို့ဟာ စိတ်ပျက်ငြီးငွေ့စရာကောင်းပြီး လူမျိုးရေးခွဲခြားသူတွေနဲ့ ပြည့်နေတဲ့မြို့ ဖြစ်တယ်လို့ ပီအက်စ်ဂျီနောက်ခံလူဟောင်း ဒါနီအဲလ်ဗက်စ်က ပြောကြားလိုက်ပါတယ်။ ဂျူဗင်တပ်စ်ကနေ ထွက်ခွာပြီးတဲ့နောက် အဲလ်ဗက်စ်ဟာ ပီအက်စ်ဂျီမှာ ၂ နှစ်တာ သွားရောက်ကစားခဲ့ပြီး အခုအချိန်မှာတော့ မိခင်နိုင်ငံ ဘရာဇီးလ်က ဆော်ပေါ်လိုအသင်းမှာ ကစားနေပါတယ်။ အဲလ်ဗက်စ်ဟာ ကစားသမားဘ၀ သက်တမ်းတစ်လျှောက် လူမျိုးရေးခွဲခြားမှုကို အကြိမ်ကြိမ် ခံစားခဲ့ရဖူးပြီး အထင်ရှားဆုံးကတော့ ဘာစီလိုနာမှာကစားခဲ့တဲ့ ၂၀၁၄ ခုနှစ်က ငှက်ပျောသီးနဲ့ ပစ်ပေါက်ခံရတာ ဖြစ်ပါတယ်။ ပီအက်စ်ဂျီမှာကစားစဉ် လူမျိုးရေးခွဲခြားခံရတာမျိုး ကိုယ်တိုင် မကြုံခဲ့ရပေမယ့် သူငယ်ချင်းတွေ ကြုံတွေ့ရတာကို မျက်မြင်တွေ့ခဲ့ရတယ်လို့ အဲလ်ဗက်စ်က ဆိုပါတယ်။

    Ref: BBC, Daily Mail