ဒီဇင်ဘာ ၈ ၊ ၂၀၁၄
M-media
– ရန်ကုန်မြစ်တစ်ဖက်ကမ်းမှ ခရီးသည်များ မြို့တွင်းသို့ လွယ်ကူစွာ သွားလာနိုင်ရေးအတွက် မြန်မာ့မီးရထားဌာနက ရန်ကုန်မြို့ ပုဇွန်တောင်နှင့် ထော်လီကွေ့အကြား ကမ်းနားလမ်း ရထားလမ်းပိုင်းကို လူစီးကားရထား တွဲ ၂ တွဲဖြင့် စတင်ပြေးဆွဲပေးနေသည်ဟု ဒီဇင်ဘာ ၈ ရက်နေ့ထုတ် ကြေးမုံသတင်းစာတွင် ဖော်ပြထားသည်။
RBE (A) နှင့် RBE (B) အဆင့်မြင့် ကားရထား ၂ စီးဖြင့် ဒီဇင်ဘာ ၇ ရက်နေ့ တနင်္ဂနွေနေ့မှ စတင်ကာ ပြေးဆွဲပေးခြင်းဖြစ်ပြီး လက်မှတ်ခမှာ တစ်ဦးလျှင် ၁၀၀ ကျပ် သတ်မှတ်ထားသည်ဟု သိရသည်။
လက်မှတ်ရောင်းချမှုကို ရထားတွဲပေါ်တွင်ပင် ပြုလုပ်မည်ဖြစ်ကာ RBE (A) ကားရထားမှာ နံနက် ၆ နာရီ မိနစ် ၂၀ တွင် ပုဇွန်တောင်ဘူတာမှ စတင်ထွက်ခွာမည်ဖြစ်ပြီး ပန်းဆိုးတန်း ဘူတာသို့ နံနက် ၆ နာရီ ၅၀ မိနစ်တွင် ရောက်ရှိမည်ဖြစ်သည်။ RBE (B) ကားရထားမှာ ပန်းဆိုးတန်းဘူတာမှ နံနက် ၇ နာရီတွင် စတင်ထွက်ခွာမည်ဖြစ်ပြီး ထော်လီကွေ့ဘူတာသို့ နံနက် ၇ နာရီ ၂၅ မိနစ်တွင် ဆိုက်ရောက်မည်ဖြစ်သည်။
ခရီးစဉ် တစ်ပိုင်းအတွက် ကြာချိန်မှာ ၂၅ မိနစ်ရှိမည်ဖြစ်ပြီး RBE (A) က ညနေ ၅ နာရီအထိလည်းကောင်း၊ RBE (B) က ညနေ ၄ နာရီ မိနစ် ၂၀ တွင်လည်းကောင်း နောက်ဆုံးထား၍ တစ်နေ့လျှင် ၁၄ ခေါက် ပြေးဆွဲပေးသွားမည်ဖြစ်သည်။ ထို့နောက် အဆိုပါ ရထားနှစ်စင်းလုံးမှာ မလွှကုန်းဘူတာတွင် ညအိပ်ရပ်နားမည်ဖြစ်သည်။
`တော်တော်ကောင်းပါတယ်။ ကျွန်တော်တို့လို နေ့စဉ် မြို့ထဲကို အလုပ်သွားလုပ်တဲ့သူတွေကတော့ ပိုလွယ်သွားတာပေါ့ဗျာ။ အရင်ကဆို ဘတ်စ်ကားဂိတ်လမ်းလျှောက်ရတယ်၊ ဘတ်စ်ကားစောင့်ရတယ်။ အခုဆိုရင် သင်္ဘောပေါ်ကဆင်းတာနဲ့ ရထားတက်စီးသွားလိုက်ရုံပဲ။ ရထားခကလည်း ၁၀၀ ဆိုတော့ လက်လုပ်လက်စားသမားတွေအတွက် အဆင်ပြေတယ်လေ´ ဟု ပုဇွန်တောင်တွင် အလုပ်လုပ်ကိုင်နေသည့် ဒလဘက်ကမ်းတွင်နေထိုင်သူ ကိုပုံဆိုးက ပြောကြားခဲ့သည်။
အဆိုပါ ကားရထားများတွင် ဘရိတ်စနစ် ၅ မျိုးပါဝင်ပြီး ခရီးသည်များအတွက် အန္တရာယ်ကင်းအောင် စီစဉ်ပေးထားသည်ဟုလည်း သိရသည်။
သို့သော်လည်း ကမ်းနားလမ်းရှိ ကွန်တိန်နာကားများသွားသော ကွန်ကရစ်လမ်းမနှင့် ဘေးချင်းယှဉ်လျက်ရှိနေသည့် အဆိုပါ ရထားပြေးဆွဲမှုမှာ အန္တရာယ်များရှိနေသည်ဟု ပြောကြားမှုများလည်း ရှိနေသည်။
`ကွန်တိန်နာသွားတဲ့ ကွန်ကရစ်လမ်းနဲ့ ဘေးချင်းယှဉ်နေပြီး အတားအဆီးလည်း မရှိတဲ့အခါကျတော့ ကားသမားတွေအတွက်ရော၊ ရထားအတွက်ပါ အန္တရာယ်တော်တော်ကြီးပါတယ်။ ပြီးတော့ ပန်းဆိုးတန်း သင်္ဘောဆိပ်ထဲကို ကားတွေဝင်တာရှိတယ်၊ အဲဒီနားမှာ လူကူးဂုံးကျော်တံတားက မပြီးသေးတော့ သင်္ဘောနဲ့လာတဲ့ ခရီးသည်တွေ လမ်းဖြတ်ကူးတာရှိတယ်။ အဲဒီအတွက် အန္တရာယ် ရှိပါတယ်။ အရင်ကလည်း လမ်းဖြတ်ကူးတဲ့ခရီးသည်တွေ ကွန်တိန်နာကားတွေနဲ့ တိုက်မိတာရှိတယ်ဆိုတော့ တာဝန်ရှိသူတွေအနေနဲ့ ဒါလေးတွေကို စဉ်စားပြင်ဆင်ပေးရင် ပိုပြီး အန္တရာယ်ကင်းသွားမယ်ထင်တယ်´ ဟု ပန်းဆိုးတန်း တက္ကဆီဂိတ်တွင် ဂိတ်ထိုးသည့် တက္ကဆီယာဉ်မောင်း ဦးတင်ရွှေက ပြောကြားခဲ့သည်။
ရန်ကုန်မြစ်ရိုးတစ်လျှောက်ရှိ ဆိပ်ကမ်းများမှ ကုန်ပစ္စည်းများကို ကုန်တင်ရထားများဖြင့် သယ်ယူနိုင်ရန်အတွက် ဓနိတောမှ အလုံအထိ ရှည်လျားသည့် ကမ်းနားလမ်း ရထားလမ်းပိုင်းကို ဖောက်လုပ်ခဲ့ခြင်းဖြစ်ပြီး ၁၈၈၀ ခုနှစ် မတ်လ ၁ ရက်နေ့တွင် စတင် ပြေးဆွဲခဲ့ခြင်းဖြစ်သည်။
အဆိုပါ ကားရထားများကို ထော်လီကွေ့မှ ပန်းလှိုင်လမ်းအထိ တိုးချဲ့ပြေးဆွဲသွားရန် အစီအစဉ်ရှိနေပြီး အနာဂတ်တွင် လျှပ်စစ်ရထားပြေးဆွဲရန် စီမံကိန်း၏ ရှေ့ပြေးအစီအစဉ်ဖြစ်သည်ဟု မြန်မာ့မီးရထားမှ ပြောကြားခဲ့ကြောင်း ကြေးမုံသတင်းစာတွင် ထည့်သွင်းဖော်ပြထားသည်။
ကိုးကား ကြေးမုံ
