Tag: malaysia

ဇွန် ၂၂၊ ၂၀၁၈
M-Media

– မလေးရှားနိုင်ငံတစ်ဝှမ်းက စားသောက်ဆိုင်တွေအနေနဲ့ နောက်နှစ်ကနေစပြီး ပြည်တွင်းကလူတွေကိုသာ စာဖိုမှူးအဖြစ် ခန့်ထားရမယ်လို့ မလေးရှား လူ့စွမ်းအားအရင်းအမြစ် ၀န်ကြီးဌာနက မနေ့မှာ အမိန့်ထုတ်ပြန်လိုက်ပြီး နိုင်ငံခြား အလုပ်သမားတွေအပေါ် မှီခိုမှု လျှော့ချဖို့ဖြစ်တယ်လို့ ဆိုပါတယ်။

“နိုင်ငံသားစားဖိုမှူးတွေပဲ ကျွန်တော်တို့ လိုချင်ပါတယ်။ ဘာအလျှော့အတင်းမှမရှိဘူး။ ဒီဇင်ဘာ ၃၁ ရက်နေ့ ကနေစပြီး ဒါကိုလိုက်နာဖို့ အသိပေးသွားမှာပါ။ မလိုက်နာဘူးဆိုရင်တော့ အဲဒီအတွက် ဘာမှ မကူညီနိုင်ပါဘူး” လို့ လူ့စွမ်းအား အရင်းအမြစ်ဝန်ကြီး အမ် ကူလာ ဆီဂါရန်က ပြောကြားခဲ့ပါတယ်။

မစ္စတာ ဆီဂါရန်ဟာ စောစောပိုင်းက အိန္ဒိယစားသောက်ဆိုင်လုပ်ငန်းရှင်များအသင်း (Prisma) နဲ့ တွေ့ဆုံဆွေးနွေးခဲ့ပါတယ်။ ၀န်ကြီးဌာနအနေနနဲ့ အိန္ဒိယမွတ်စလင် စားသောက်ဆိုင်လုပ်ငန်းရှင်များအသင်း (Presma) နဲ့လည်း ဆွေးနွေးညှိနှိုင်းမှုတွေ ထပ်မံလုပ်ဆောင်သွားမယ်လို့ ၀န်ကြီးက ပြောပါတယ်။

ဒိလိုဆောင်ရွက်မှုဟာ စားသောက်ဆိုင်တွေအနေနဲ့ နိုင်ငံခြားလုပ်သားအင်အားအပေါ် မှီခိုနေရမှုကို လျှော့ချနိုင်မှာဖြစ်သလို၊ ဒေသအစားအသောက်တွေရဲ့ အရည်အသွေးကိုလည်း ထိန်းသိမ်းနိုင်လိမ့်မယ်လို့ ၀န်ကြီးက ထည့်သွင်းပြောဆိုခဲ့ပါတယ်။

မလေးရှားနိုင်ငံ ပီနန်ပြည်နယ်အစိုးရကလည်း ပြည်နယ်အတွင်း စားသောက်ဆိုင်တွေမှာ နိုင်ငံခြားစားဖိုမှူး ခန့်ထားတာကို ၂၀၁၄ ခုနှစ်ကတည်းက တားမြစ်ခဲ့ပါတယ်။

ဒါပေမယ့် Prisma ဥက္ကဌ ပီ မူတူးဆွာမိက ၀န်ကြီးဌာနရဲ့ ဒီဆုံးဖြတ်ချက်ကို အံ့အားသင့်မိပြီး စားသောက်ဆိုင်တွေမှာ ရှုပ်ထွေးမှုတွေ ဖြစ်လာနိုင်တယ်လို့ ပြောကြားခဲ့ပါတယ်။

Presma ဥက္ကဌ အယွဘ်ခန်းကလည်း လစာ ၂၅၀၀ အထိ ပေးခဲ့ပေမယ့် မလေးရှားနိုင်ငံသားတွေဟာ စားသောက်ဆိုင်မှာ မလုပ်ချင်ကြကြောင်း၊ စားသောက်ဆိုင်တွေအတွက် ဒေသတွင်းက အလုပ်သမားရှာဖို့ ခက်ခဲကြောင်း ပြောဆိုခဲ့ပါတယ်။

Ref: CNA

ဇွန် ၁၉၊ ၂၀၁၈
M-Media

– ၀န်ကြီးချုပ်ဟောင်း နာဂျစ်ရာဇတ်ကို ငွေကြေးအလွဲသုံးစားလုပ်မှု၊ ခြစားမှုတွေအပါအ၀င် စွဲချက်များစွာနဲ့ တရားစွဲဖို့ ရှိနေတယ်လို့ မလေးရှားဝန်ကြီးချုပ် မဟာသီယာ မိုဟာမက်က ပြောကြားလိုက်ပါတယ်။

နာဂျစ်ဟာ နိုင်ငံပိုင် 1MDB လုပ်ငန်းက ငွေကြေးတွေ အလွဲသုံးစားလုပ်မှုနဲ့ စုံစမ်းစစ်ဆေးမှုကို လက်ရှိမှာ ခံနေရပါတယ်။

မဟာသီယာက အဲဒီကိစ္စနဲ့ပတ်သက်ပြီး ခိုင်မာတဲ့အမှုတစ်ခုကို စုံစမ်းစစ်ဆေးသူတွေက တည်ဆောက်ပြီးပြီလို့ Reuters သတင်းဌာနနဲ့ အင်တာဗျူးမှာ ပြောကြားခဲ့ပြီး 1MDB လုပ်ငန်းက ငွေတွေကို အလွဲသုံးစားလုပ်မှုမှာ နာဂျစ်ဟာ အဓိကအခန်းကဏ္ဍကနေ ပါဝင်နေတယ်လို့လည်း ဆိုပါတယ်။

“1MDB နဲ့ပတ်သက်ပြီး သူဟာ လုံးလုံးတာဝန်ရှိပါတယ်။ သူ့ရဲ့လက်မှတ်မပါဘဲနဲ့ ဘာမှ လုပ်လို့ မရပါဘူး။ 1MDB ပါဝင်တဲ့ သဘောတူညီချက်အားလုံးက သူ့ရဲ့လက်မှတ်တွေကို ကျွန်တော်တို့ ရထားပါပြီ။ ဒါ့ကြောင့် သူဟာ တာဝန်ရှိသူပါ”

အမေရိကန် တရားရေးဌာနက 1MDB ကနေ စုစုပေါင်း ကန်ဒေါ်လာ ၄.၅ ဘီလီယံလောက် အလွဲသုံးစား လုပ်ခံခဲ့ရပြီး အဲဒီအထဲက သန်း ၇၀၀ လောက်ဟာ နာဂျစ်ရဲ့ ကိုယ်ပိုင်ဘဏ်အကောင့်တွေထဲ ရောက်သွားတယ်လို့ ပြောကြားထားပါတယ်။

ရွေးကောက်ပွဲအနိုင်ရကာ ၀န်ကြီးချုပ်ဖြစ်လာခဲ့ပြီးတဲ့နောက် မဟာသီဟာ နာဂျစ်ကို တိုင်းပြည်အတွင်းကနေ မထွက်ခွာဖို့ တားမြစ်ခဲ့ပြီး ရဲတပ်ဖွဲ့က နာဂျစ်နဲ့ပတ်သက်တဲ့ အဆောက်အဦးတွေမှာ ၀င်ရောက်ရှာဖွေခဲ့ကြပါတယ်။ ခြစားမှုတိုက်ဖျက်ရေးကော်မရှင်ကလည်း နာဂျစ်နဲ့ သူ့ရဲ့ဇနီး ရိုစ်မာ မန်ဆူရ်တို့ကို ခေါ်ယူ စစ်ဆေး
ခဲ့ပါတယ်။

နာဂျစ်ကတော့ သူ့အနေနဲ့ ဘာအမှားမှ မလုပ်ခဲ့ဘူးလို့ ပြောကြားထားပါတယ်။

Ref: Malaysia Kini

ဇွန် ၁၂၊ ၂၀၁၈
M-Media

– တိုင်းပြည်အကြွေးတင်နေတာကို ဆပ်နိုင်ဖို့အတွက် နန်းစံသက်ကုန်ဆုံးမယ့် ၂၀၂၁ ခုနှစ်အထိ သူ့လစာနဲ့ အဆောင်အယောင် ကုန်ကျစားရိတ်တွေကနေ ၁၀ ရာခိုင်နှုန်း ဖြတ်တောက်ဖို့ မလေးရှားဘုရင် ဆူလ်တန် မိုဟာမက် ၅ က ပြောကြားလိုက်ပါတယ်။

နန်းတော်ရဲ့ ဘဏ္ဍာထိန်း ၀မ် အဟ်မဒ် ဒါလန် အဘ် အဇစ်က ဘုရင်ကြီးဟာ တိုင်းပြည်ရဲ့ အကြွေးနဲ့ စီးပွားရေးအခြေအနေတွေကို အလွန်စိုးရိမ်နေတယ်လို့ ဒီကနေ့မှာ သတင်းထောက်တွေကို ပြောကြားခဲ့တာပါ။

“Tabung Harapan Malaysia ရန်ပုံငွေထူထောင်ပြီး မလေးရှားပြည်သူတွေက ရက်ရက်ရောရော ထည့်ဝင်နေကြတာကို ဘုရင်ကြီးက အရမ်းစိတ်မကောင်းဖြစ်နေပြီး ကျေးဇူးတင်ကြောင်လည်း ပြောကြားခဲ့ပါတယ်”

ကုန်ကျစားရိတ်ကို ချွေတာဖို့အတွက် အခုနှစ် ၀ါကျွတ်အီးဒ်အထိမ်းအမှတ်ပွဲတော်ကို နန်းတော်မှာမလုပ်ဖို့ ဘုရင်မိုဟာမက်က အမိန့်ထုတ်ခဲ့ပြီး၊ အဲဒီအတွက် ကုန်ကျမယ့်ငွေတွေကို ချို့တဲ့သူတွေထံ ဝေငှသွားမယ်လို့ ဘဏ္ဍာထိန်းက ထည့်သွင်းပြောဆိုခဲ့ပါတယ်။

နိုင်ငံရဲ့အကြွေးဟာ ရင်းဂစ် ၁ ထရီလီယံ (ကန်ဒေါ်လာ ၂၅၁.၇၀ ဘီလီယံ) ရှိနေတယ်လို့ ၀န်ကြီးချုပ် မဟာသီယာမိုဟာမက်က ပြီးခဲ့တဲ့လမှာ ပြောကြားခဲ့ပြီး ဒီအတွက် ၀န်ကြီးချုပ်ဟောင်း နာဂျစ်ရာဇတ် ဦးဆောင်တဲ့ အစိုးရကို ပြစ်တင်ပြောဆိုခဲ့ပါတယ်။

မေလ ၂၃ ရက်နေ့မှာ မဟာသီက အစိုးရ၀န်ကြီးတွေရဲ့ လစာကို ၁၀ ရာခိုင်နှုန်း ဖြတ်တောက်မယ်လို့လည်း ကြေငြာခဲ့ပါတယ်။

Ref: CNA