စက်တင်ဘာ ၊ ၁၁ ၊ ၂၀၁၃
M-Media
မလေးရှားမှ တရားမဝင်လုပ်သားများ ဖမ်းဆီးရေး စီမံချက်တခုမြင်ကွင်း PHOTO: SIN CHEW DAILY
ပူထရာဂျာယာ။ ။ မလေးရှားတွင် အလုပ်လုပ်ကိုင်ရန် အရည်အသွေးပြည့်မီသည့် တရားမ၀င် မြန်မာလုပ်သားများအား အလုပ်လုပ်ကိုင် ခွင့်ရရှိအောင် တိုးမြှင့် အကူအညီပေးရေးကို မလေးရှား အစိုးရဖက်မှ သဘောတူလိုက်ပြီဖြစ်သည်။
ယမန်နေ့က မလေးရှားတွင် ပြည်ထဲရေးဝန်ကြီး ဒါတွတ် ဆရီ ဒေါက်တာ အဟ်မဒ် ဇာဟစ်ဒ် နှင့် မြန်မာနိုင်ငံ အလုပ်သမား၊ အလုပ်အကိုင်ခန့်အပ်ရေး နှင့် လူမှုဖူလုံရေးဆိုင်ရာ ၀န်ကြီး ဦးအေးမြင့်၏ တွေ့ဆုံဆွေးနွေးမှုမှ ထွက်ပေါ်လာသော ရလဒ်ဖြစ်သည်။
လုပ်ကိုင်ဆောင်ရွက်နိုင်သော နည်းလမ်းများအနက် ကွာလာလမ်ပူရှိ မြန်မာသံရုံး၌ မြန်မာလုပ်သားများ အတွက် အလုပ်လုပ်ကိုင်ခွင့်ဆိုင်ရာ စာရွက်စာတမ်းများ အပြီးအစီး ထုတ်ပေးသည့်ဌာန (One-stop Centre) အဖြစ် ဆောင်ရွက်ရန် ၀န်ကြီး အဟ်မဒ် ဇာဟစ်ဒ် မှ ခွင့်ပြုခဲ့သည်။
“ ကျွန်တော်တို့ရဲ့စီမံချက်ကို သတိထားပြီးဆောင်ရွက်နေပါတယ်။ ဘာကြောင့်လဲဆိုတော့ မြန်မာအလုပ်သမားတွေထဲမှာ UNHCR ကဒ်ကိုင်ထားသူ နဲ့ တိကျတဲ့အထောက်ရှိမကျသူ – နှစ်မျိုးနှစ်စား ရှိနေလို့ပါဘဲ။ အချို့သောနေရာကဏ္ဍတွေမှာ လုပ်သားတွေ မရှိရင် နှောင့်နှေးသွားမယ့် အဖြစ်ကို ကျွန်တော်တို့ မလိုလားပါဘူး။ လူသားချင်းစာနာ ထောက်ထားရေး နဲ့ အာဆီယံစိတ်ဓာတ်ပေါ် ရပ်တည်ရမယ့် အနေအထား တစ်ရပ်ကို ကျွန်တော်တို့ ရင်ဆိုင်ရပါတယ်။ ဒါကြောင့် လူဝင်မှုကြီးကြပ်ရေးဌာနအနေနဲ့ ဒီလုပ်သားတွေကို မှတ်ပုံတင်လို့ရအောင် ကူညီပေးနိုင်မဲ့ တရားဝင်အချက်တွေကို လေ့လာ သုံးသပ်သွားမှာဖြစ်တယ် ” ဟု ဒေါက်တာ အဟ်မဒ် ဇာဟစ်ဒ် က ဦးအေးမြင့်၏ ဆွေးနွေးညှိနှိုင်းမှုခရီးစဉ်အပြီး သတင်းစာရှင်းလင်းပွဲတစ်ရပ်၌ ပြောကြားခဲ့သည်။
မလေးရှားရှိ တရားမ၀င်ရွှေ့ပြောင်းလုပ်သားများအနက် အင်ဒိုနီးရှား၊ ဘင်္ဂလားဒေ့ရှ် ၏နောက်တွင် မြန်မာနိုင်ငံသားတို့သည် တတိယအများပြားဆုံး လူစုဖြစ်လျက်ရှိကြောင်း၊ နိုင်ငံအတွင်း မလိုလားအပ်သော နိုင်ငံခြားသားတို့အား ရှင်းလင်းသော 6P Bersepadu စီမံချက်ကာလ တစ်လျှောက်တွင် နိုင်ငံခြားသားထံမှ ငွေညှစ်ခြင်း မပြုရန် စီမံချက်တာဝန်ရှိသူတို့အား သတိပေးသည့်အကြောင်း ၄င်းမှ ထည့်သွင်းပြောဆိုသွား၏။
စက်တင်ဘာလ ၁ ရက်နေ့ကစပြီး ပြုလုပ်သော စီမံချက်ဖြင့် နိုင်ငံစုံမှ ထိန်းသိမ်းခံရသူများမှာ စုစုပေါင်း ၅၀၀၀ ကျော် ရှိနေပြီဖြစ်သည်။
“ နိုင်ငံခြားသားလုပ်သားတွေဆီကနေ အရာရှိတစ်ချို့က ငွေကြေးအမြတ်ထုတ်နေတဲ့အကြောင်း လုပ်ငန်းရှင်တွေရဲ့ အကြောင်းကြားချက်အမျိုးမျိုးကို ကျွန်တော်တို့ ရရှိကြားသိထားပါတယ်။ အဲ့ဒီအဆိုတွေရဲ့အထောက်အထား ရောက်လာယင်တော့ (အဲ့ဒီအရာရှိတွေကို) ကြီးလေးတဲ့ပြစ်ဒဏ် ချမှတ် အရေးယူသွား ရပါလိမ့်မယ် ” ဟု ဒေါက်တာ အဟ်မဒ် ဇာဟစ်ဒ်က ပြောကြားသွားခဲ့၏။
Ref: The Star Online
