News @ M-Media

Tag: mmHealthNews

  • တစ်ပတ်အတွင်း ကျန်းမာရေးသတင်းများ

    တစ်ပတ်အတွင်း ကျန်းမာရေးသတင်းများ

    ဇူလိုင် ၂၃၊ ၂၀၂၀
    M-Media

    ကိုဗစ်ကာကွယ်ဆေး လာမည့်နှစ်အတွင်းရရန် ဗီယက်နမ်ပစ်မှတ်ထား

    ဗီယက်နမ်နိုင်ငံဟာ ပြည်တွင်းမှာ ကိုဗစ်ကာကွယ်ဆေး ထုတ်လုပ်နိုင်အောင် ကြိုးစားနေပြီး တိုးတက်မှုတွေလည်း ရရှိနေတာကြောင့် ၂၀၂၁ ခုနှစ်မှာ စီးပွားဖြစ် ထုတ်လုပ်သုံးစွဲနိုင်ဖို့ စီစဉ်ထားပါတယ်။ ကာကွယ်ဆေးစမ်းသပ်ထုတ်လုပ်မှုဟာ ပုံမှန်အားဖြင့် ၅ နှစ်လောက်ကြာနိုင်ပေမယ့် ၂၀၂၁ ခုမှာ အဆင်သင့်ဖြစ်နိုင်ဖို့ ဗီယက်နမ်က အထူးစီမံကိန်းချ ဆောင်ရွက်နေတာပါ။ ကိုဗစ်ကာကွယ်ရေးလုပ်ငန်းမှာ ဗီယက်နမ်နိုင်ငံဟာ အောင်မြင်မှုရရှိထားပြီး ကူးစက်မှုလုံး၀မရှိတာ ၃ လကျော်လာခဲ့ပြီ ဖြစ်ပါတယ်။

    ဖုန်းနှင့် တီဗီကြည့်ချိန် တစ်နေ့ကို ၂ နာရီသာ ထားသင့်

    တစ်နေ့တာ တီဗီနဲ့ ဖုန်းကြည့်ချိန်ကို ၂ နာရီအောက် လျှော့ချပေးခြင်းအားဖြင့် ကင်ဆာနဲ့ နှလုံးသွေကြောကျဉ်း ရောဂါတွေလို ရောဂါမျိုး ဖြစ်ပွားမှု၊ အရွယ်မတိုင်ခင် သေဆုံးမှုကို လျှော့ချနိုင်တယ်ဆိုတာ လေ့လာမှုမှာ တွေ့ရတယ်လို့ စကော့တလန်နိုင်ငံ ဂလက်စဂိုမြို့က သုတေသနပညာရှင်တွေက ပြောကြားလိုက်ပါတယ်။ လူပေါင်း ၅ သိန်းလောက်ကို ၂ နှစ်ကြာ လေ့ခဲ့တာပါ။ အထိုင်များရင် ကျန်းမာရေးကို ထိခိုက်နိုင်ပြီး တီဗီနဲ့ ဖုန်းကြည့်ချိန်ကိုလျှော့ကာ ကျန်းမာရေး လေ့ကျင့်ခန်းတွေ ပုံမှန်လုပ်ပေးသင့်တယ်လို့လည်း သုတေသနမှာပါဝင်တဲ့ ပညာရှင်တွေက ပြောကြားခဲ့ပါတယ်။

    အောက်စဖို့ဒ်က ကိုဗစ်ကာကွယ်ဆေး အလုပ်ဖြစ်

    အင်္ဂလန်နိုင်ငံ အောက်စဖို့ဒ်တက္ကသိုလ်က ထုတ်လုပ်တဲ့ ကိုရိုနာဗိုင်းရပ်စ် ကာကွယ်ဆေးဟာ အန္တရာယ်ကင်းပြီး ကိုဗစ်တိုက်ဖျက်နိုင်တဲ့ ကိုယ်ခံအားကို ထုတ်ပေးတယ်ဆိုတာ တွေခဲ့ရပါတယ်။ လူပေါင်း တစ်ထောင်ကျော်မှာ စမ်းသပ်ပြီးတဲ့နောက် ဒီရလဒ် ထွက်လာတာပါ။ ရောဂါကို အမှန်တကယ် ကာကွယ်နိုင်မလားဆိုတာ သေချာဖို့အတွက် နောက်ထပ် ကျယ်ကျယ်ပြန့်ပြန့် စမ်းသပ်မှုတွေ လိုအပ်နေပါသေးတယ်။ ယူကေအစိုးရကတော့ ဒီကာကွယ်ဆေး သန်း ၁၀၀ ကို မှာယူထားပါတယ်။ ကိုဗစ်ဟာ ယူကေမှာ ခရစ္စမတ်အထိ ဆက်ရှိနေအုံးမယ်လို့လည်း ကျွမ်းကျင်သူတွေက သုံးသပ်ထားပါတယ်။

    Ref: BBC, The Star

  • တစ်ပတ်အတွင်း ကျန်းမာရေးသတင်းများ

    တစ်ပတ်အတွင်း ကျန်းမာရေးသတင်းများ

    ဇူလိုင် ၁၆၊ ၂၀၂၀
    M-Media

    ကိုဗစ်ကာကွယ်ဆေးအချက်အလက်များ ခိုးယူရန် ရုရှားဟက်ကာများ ကြိုးစား

    -ကိုဗစ်ကာကွယ်ဆေးအချက်အလက်တွေ ခိုးယူဖို့အတွက် ယူကေ၊ အမေရိကန်နဲ့ ကနေဒါတို့မှာရှိတဲ့ ကာကွယ်ဆေးဖော်နေတဲ့ အဖွဲ့အစည်းတွေကို ပစ်မှတ်ထားကာ ရုရှားဟက်ကာတွေက ဆိုက်ဘာတိုက်ခိုက်မှု ပြုလုပ်ခဲ့တယ်လို့ သတင်းတွေ ထွက်လာပါတယ်။

    ယူကေရဲ့ နိုင်ငံတော် ဆိုက်ဘာလုံခြုံရေးစင်တာ(NCSC)က တိုက်ခိုက်မှုကို ရုရှားထောက်လှမ်းရေးရဲ့ အစိတ်အပိုင်းတစ်ခုဖြစ်တဲ့ APT29 အဖွဲ့က ပြုလုပ်တာလို့ ပြောပါတယ်။ တိုက်ခိုက်မှုကြောင့် ကိုဗစ်ကာကွယ်ဆေး သုတေသနကို ထိခိုက်မှုမရှိဘူးလို့လည်း ဆိုပါတယ်။ ဘယ်အဖွဲ့အစည်းတွေ ဆိုက်ဘာတိုက်ခိုက်ခံရလဲဆိုတာနဲ့ ဟက်ကာတွေက ဘာတွေရသွားလဲဆိုတာကို NCSC က ထုတ်မပြောပါဘူး။

    ဟက်ကာတွေဟာ ဆော့ဖ်ဝဲယိုပေါက်တွေ၊ Malware တွေကနေတစ်ဆင့် ကွန်ပျူတာကွန်ယက်တွေထဲဝင်ရောက်ခဲ့ကြသလို၊ အသုံးပြုသူတစ်ချို့ရဲ့ Log in အချက်အလက်တွေကိုလည်း ရယူခဲ့ပါတယ်။ တိုက်ခိုက်မှုနဲ့ပတ်သက်ပြီး NCSC က အခြား ကာကွယ်ဆေးဖော်နေတဲ့ အဖွဲ့အစည်းတွေကို သတိပေးထားပါတယ်။

    ကိုဗစ်ကြောင့် ကလေးများအတွက် ကာကွယ်ဆေးထိုးမှု အစီအစဉ်များ ရပ်ဆိုင်း

    • Covid-19 ကပ်ရောဂါကြောင့် ကမ္ဘာတစ်ဝှမ်း ကလေးငယ်တွေမှာ ဝက်သက်၊ ဆုံဆို့နာ၊ ကြက်ညှာချောင်းဆိုးနဲ့ မေးခိုင်ကာကွယ်ဆေး ထိုးနှံမှုပမာဏ သိသိသာသာ ကျဆင်းသွားတယ်လို့ ကမ္ဘာ့ကျန်းမာရေးအဖွဲ့ WHO က ပြောကြားလိုက်ပါတယ်။

    ကာကွယ်ဆေးထိုးနှံမှုဟာ ပြည်သူ့ကျန်းမာရေးမှာ အရေးပါတဲ့ ဆောင်ရွက်ချက်တစ်ခု ဖြစ်ပါတယ်။

    ကိုဗစ်နောက်ဆက်တွဲ လှုပ်ရှားသွားလာမှု ကန့်သတ်တာ၊ ကျန်းမာရေးဝန်ထမ်းတွေအတွက် ကာကွယ်ရေးပစ္စည်း လုံလုံလောက်လောက် မရှိတာတွေကြောင့် အခုနှစ် ပထမ ၄ လပတ်အတွင်း ကမ္ဘာတစ်ဝှမ်းက နိုင်ငံပေါင်း ၈၀​ လောက်မှာ ကလေးငယ်တွေကို ကာကွယ်ဆေးထိုးရေး အစီအစဉ်တွေ ရပ်ဆိုင်းသွားပါတယ်။

    ကာကွယ်ဆေး မထိုးရတာကြောင့် ဝက်သက်၊ ဆုံဆို့နာ၊ ကြက်ညှာချောင်းဆိုးနဲ့ မေးခိုင်ရောဂါတွေ ကူးစက်သေဆုံးမှုကို ပိုမိုမြင်တွေ့ရလိမ့်မယ်လို့လည်း WHO က သတိပေးခဲ့ပါတယ်။

    ဆောင်းရာသီတွင် ကိုဗစ်ဒုတိယလှိုင်းကို ယူကေ ကြုံရဖွယ်ရှိနေ

    • လာမယ့်ဆောင်းရာသီ ယူကေမှာ Covid-19 ဒုတိယလှိုင်း ရိုက်ခတ်နိုင်ပြီး အဆိုးဆုံးအနေအထားမှာ လူပေါင်း တစ်သိန်းနှစ်သောင်းလောက် သေဆုံးနိုင်ဖွယ်ရှိတယ်လို့ ပညာရှင်တွေက ခန့်မှန်းထားပါတယ်။

    လက်ရှိ ယူကေမှာ ကိုဗစ်ကြောင့် ၄၄၈၃၀ ဦး သေဆုံးထားပြီးဖြစ်ပါတယ်။ ရောဂါ ပြန့်နှံ့ကူးစက်မှု အခြေအနေမကို သုံးသပ်ပြီး ယူကေ ဆေးသိပ္ပံအကယ်ဒီက ဇူလိုင်လ ၁၄ ရက်နေ့မှာ ထုတ်ပြန်ခဲ့တဲ့ အစီရင်ခံစာမှာ လာမယ့် ဆောင်းရာသီကာလအတွင်း ပြန့်နှံ့မှု ဘယ်လောက်ရှိနိုင်လဲဆိုတာ တိတိကျကျ တွက်ဆမရနိုင်ဘူးလို့ ဖော်ပြထားပါတယ်။

    အေးတဲ့ရာသီမှာ ဗိုင်းရပ်စ်ဟာ ပိုကြာကြာရှင်သန်နိုင်ပြီး၊ လူတွေဟာ အိမ်ထဲမှာပဲ အနေများတာကြောင့် ကူးစက်နိုင်ချေကလည်း ပိုမို မြင့်မားလိမ့်မယ်လို့ ဆိုပါတယ်။

    ယူကေကျန်းမာရေးဌာနအနေနဲ့ ကိုဗစ်အပြင်၊ အခြား ရာသီပေါ်ရောဂါတွေကြောင့် ဖိအားတွေများလာနိုင်ပြီး အဆိုးဆုံးအခြေအနေ မဖြစ်အောင် အခုအချိန်ကတည်းက ကြိုတင်ကာကွယ်မှုတွေ ဆောင်ရွက်ဖို့လည်း အစီရင်ခံစာမှာ ိဖော်ပြခဲ့ပါတယ်။

  • တစ်ပတ်အတွင်း ကျန်းမာရေးသတင်းများ

    တစ်ပတ်အတွင်း ကျန်းမာရေးသတင်းများ

    ဇွန် ၂၅၊ ၂၀၂၀

    M-Media

    လူမျိုးရေးခွဲခြားမှုကို ပြည်သူ့ကျန်းမာရေးပြဿနာအဖြစ် ကနေဒါ​မြို့တစ်ခု သတ်မှတ်


    Chatham-Kent မြို့မြင်ကွင်း

    ကနေဒါနိုင်ငံ အွန်တာရီယိုပြည်နယ် Chatham-Kent မြို့ရဲ့ ကျန်းမာရေးဘုတ်အဖွဲ့ဟာ လူမျိုးရေးခွဲခြားမှုကို ပြည်သူ့ကျန်းမာရေးပြဿနာအဖြစ် တစ်ညီတစ်ညွတ်တည်း သတ်မှတ်လိုက်ပါတယ်။

    လူမည်းတွေ၊ ဌာနေတိုင်းရင်းသားတွေနဲ့ လူနည်းစုတွေကို ခွဲခြားတာမျိုးကြောင့် ပြည်သူ့ကျန်းမာရေးဆောင်ရွက်မှုမှာ ဆိုးကျိုးတွေရှိတယ်လို့ ဆိုပါတယ်။

    လူမည်းတွေဟာ လူဖြူတွေထက် ဝေဒနာကို ပိုမိုခံနိုင်ရည်ရှိတယ်ဆိုတဲ့ အတွေးမျိုးတွေ ဆေးဘက်နယ်ပယ်မှာ ရှိနေတာကို ဘုတ်အဖွဲ့က ထောက်ပြခဲ့ပြီး မြို့ရဲ့ ကျန်းမာရေးပေါ်လစီတွေ၊ စီမံကိန်းတွေမှာ အားလုံး ပါဝင်နိုင်အောင် ဆောင်ရွက်ရမယ်လို့လည်း ကတိပြုခဲ့ပါတယ်။

    ယူအေအီး-တရုတ် ကိုဗစ်ကာကွယ်ဆေးစမ်းသပ်မှု တတိယအဆင့်သို့ရောက်ရှိ

    အာရပ်စော်ဘွားများပြည်ထောင်စု (ယူအေအီး) နဲ့ တရုတ်တို့ ပူးပေါင်းပြီး ကိုဗစ်လူနာတွေမှာ ကာကွယ်ဆေးတစ်မျိုး စမ်းသပ်မှုဟာ တတိယအဆင့်ကို ရောက်ရှိလာပြီ ဖြစ်ပါတယ်။

    ကာကွယ်ဆေးစမ်းသပ်ရာမှာ ပထမအဆင့်နဲ့ ဒုတိယအဆင့်ပြီးတဲ့နောက် တတိယအဆင့်မှာ လူသောင်းချီ ပါဝင်လေ့ရှိပြီး ပထမ နှစ်ကြိမ်က စမ်းသပ်မှုကို ထပ်မံအတည်ပြုရတာဖြစ်ပါတယ်။ တတိယအကြိမ်မှာ ရလဒ်ကောင်းထွက်တယ်ဆိုရင်တော့ ကာကွယ်ဆေး အောင်မြင်ပြီလို့ သတ်မှတ်ပါတယ်။

    ကမ္ဘာတစ်ဝှမ်း ကိုဗစ်လူနာတွေမှာ စမ်းသပ်နေတဲ့ ကာကွယ်ဆေး စုစုပေါင်း ၁၆ မျိုး ရှိနေပြီး နောက်ထပ် ၁၂၅ မျိုးကိုလည်း ဓာတ်ခွဲခန်းတွေမှာ စမ်းသပ်နေတယ်လို့ WHO က ထုတ်ပြန်ထားပါတယ်။

    အင်္ဂလန်နိုင်ငံ အောက်စဖို့ဒ်တက္ကသိုလ်က ကိုဗစ်ကာကွယ်ဆေးတစ်မျိုး စမ်းသပ်မှုကလည်း တတိယအဆင့်ကို ရောက်ရှိနေပြီ ဖြစ်ပါတယ်။

    ဆေးမနိုင်ကင်ဆာဝေဒနာရှင်များအတွက် ကုသနည်းတစ်ခုကို စမ်းသပ်နေ

    ကင်ဆာဆဲလ်ကြီးထွားမှုကို ရပ်တန့်စေပြီး ဆဲလ်တွေကို အလိုအလျောက် ဖာထေးစေတဲ့ ကုသနည်းကို ယူကေ ကင်ဆာသုတေသနဌာနက စတင်စမ်းသပ်ရာမှာ အောင်မြင်မှုရနေပါတယ်။

    Berzosertib လို့ အမည်ရတဲ့ဆေးနဲ့ ဓာတ်ကင်နည်းကို ပေါင်းစပ်ကုသတာဖြစ်ပြီး လက်ရှိ ပထမအဆင့် စမ်းသပ်မှုမှာ ဘယ်လိုနည်းလမ်းမျိုးနဲ့မှ ကုလို့မရတော့တဲ့ ကင်ဆာဝေဒနာရှင်အနည်းငယ်ကို ကုသပေးတာပါ။

    ဒီနည်းလမ်းကြောင့် ကင်ဆာအကြိတ်တွေ ကြီးထွားမှု ရပ်တန့်တာကို တွေ့ခဲ့ရပါတယ်။

    ပထမအဆင့်စမ်းသပ်မှုဟာ အန္တရာယ်ကင်း၊ မကင်း စစ်ဆေးတာမျိုးဖြစ်ပြီး ဒီကုသနည်း အမှန်တကယ် ထိရောက်မှု ရှိ၊ မရှိအတွက် နောက်ထပ် စမ်းသပ်စစ်ဆေးမှုတွေ လုပ်ဆောင်ရအုံးမယ်လို့ ဒီလုပ်ငန်းမှာ ပါဝင်နေတဲ့ သုတေသနပညာရှင်တွေက ပြောကြားခဲ့ပါတယ်။

  • သဘာ၀နည်းလမ်းနဲ့ ကိုယ်ခံစွမ်းအားကောင်းအောင် ဘယ်လိုလုပ်မလဲ

    သဘာ၀နည်းလမ်းနဲ့ ကိုယ်ခံစွမ်းအားကောင်းအောင် ဘယ်လိုလုပ်မလဲ

    ဧပြီ ၇၊ ၂၀၂၀
    M-Media

    -ကိုယ်ခံစွမ်းအားဆိုတာ ဘာလဲ???

    ခန္ဓာကိုယ်တွင်းက အင်မတန် ထူးခြားပြောင်မြောက်တဲ့ စွမ်းအားတစ်ခုပါ။ ကိုယ်ထဲဝင်ရောက်လာတဲ့ ဘက်တီးရီးယား၊ ဗိုင်းရပ်စ်ပိုးတွေကို တိုက်ဖျက်ပေးပြီး ကိုယ်ခန္ဓာကိုယ်ကြီး ဟန်ချက်ညီအောင် ထိန်းကျောင်းပေးတဲ့ အတွင်းအား တစ်ခုလည်းဖြစ်ပါတယ်။

    ကိုယ်ခံစွမ်းအားကနေ ထုတ်ပေးပြီး အန်တီဘာဒီ (Antibody) လို့ခေါ်တဲ့ ပရိုတိန်းဆဲလ်တွေဟာ အဖျား၊ တုပ်ကွေးတွေကို ဖြစ်စေတဲ့ ဗိုင်းရပ်စ်ပိုးတွေကို တိုက်ထုတ်ပေးပါတယ်။ ကမ္ဘာတစ်ဝှမ်း လူသန်းချီ ကူးစက်နေပြီး လူသောင်းချီ သေဆုံးတဲ့ ကိုရိုနာဗိုင်းရပ်စ်ပိုးကို ရင်ဆိုင်ဖို့အတွက်လည်း ကိုယ်ခံစွမ်းအား ကောင်းမွန်နေဖို့ လိုအပ်ပါတယ်။

    ကိုရိုနာဗိုင်းရပ်စ်ကြောင့် သေဆုံးအများစုဟာ အသက်အရွယ်ကြီးသူတွေ၊ ရောဂါအခံရှိသူတွေဖြစ်ပြီး၊ လူငယ်တွေ၊ လူလတ်ပိုင်းတွေကတော့ ပြန်လည်သက်သာ ကောင်းမွန်လာကြပါတယ်။ ဒါကိုကြည့်ခြင်းအားဖြင့် ကိုယ်ခံစွမ်းအား အားနည်းသူတွေမှာ အသက်အန္တရာယ် ပိုရှိတယ်ဆိုတာကို တွေ့ရပါတယ်။ ကိုရိုနာကြောင့် သေဆုံးမှုဟာ ပျမ်းမျှအားဖြင့် ၂ ရာခိုင်နှုန်းကနေ ၃ ရာခိုင်နှုန်းလောက်သာ ရှိတယ်လို့ ကျွမ်းကျင်သူတွေက ပြောကြားထားပါတယ်။

    ကိုရိုနာဗိုင်းရပ်စ် မကူးစက်ရေး အကောင်းဆုံး ကာကွယ်နည်းကတော့ တတ်နိုင်သမျှ အိမ်ပြင်မထွက်ပါနဲ့။ ရေများများသောက်ပါ။ တစ်နေ့ကို အနည်းဆုံး ရေ ၂ လီတာလောက် သောက်ပေးပါ။ လက်ကိုမကြာခဏဆေးပါ။

    အိမ်မှာ လွယ်လွယ်ကူကူနဲ့ လုပ်နိုင်ပြီး ကိုယ်ခံစွမ်းအားအတွက် အလွန်အကျိုးဖြစ်ထွန်းမယ့် ဆေးစွမ်းတစ်လက်ကတော့ ကြက်သွန်ဖြူ၊ လေးညှင်းပွင့်၊ ဂျင်း၊ သံပုရာနဲ့ ပျားရည်တို့ကို အနေတော် ရောစပ်ပြီး နေ့စဉ် သောက်သုံးပေးတာပါပဲ။

    ဒီ ပါဝင်ပစ္စည်းတွေမှာ ဘက်တီးရီးယားသေနိုင်စွမ်း၊ ဗိုင်းရပ်စ်ပိုး သေနိုင်စွမ်းတွေ ရှိပါတယ်။ တစ်နေ့ကို လက်ဖက်ရည်ဇွန် တစ်ဇွန်း ၄ ကြိမ်ကနေ ၆ ကြိမ်အထိ သောက်ပေးခြင်းအားဖြင့် ကိုယ်ခံစွမ်းအားကို ပိုမိုကောင်းမွန်စေပြီး ရောဂါတိုက်ခိုက်နိုင်စွမ်းလည်း မြင့်မားလာမှာဖြစ်ပါတယ်။

    စမုန်ဖြူ၊ သစ်ကြမ်းပိုးခေါက်၊ ဇီရာ၊ ပူစီနံတို့လို အရွက်တွေ၊ အစေ့အဆံတွေဟာ ဗိုင်းရပ်စ်ပိုးမွှားတွေကို သေစေနိုင်စွမ်းရှိသလို၊ သတ္ထုဓာတ်၊ သံဓာတ်၊ ဖောလစ်အက်စက်၊ ဆီလီနီယံဓာတ်တွေ၊ ဗိုက်တာမင် အေ၊ စီ၊ အီး၊ ဘီဆစ်နဲ့ ဘီတွဲတွေ ပါဝင်တယ်လို့ သုတေသနပညာရှင်တွေက ပြောကြားထားပါတယ်။ ဒီဓာတ်တွေဟာ ကိုယ်ခံအား ကောင်းမွန်ဖို့အတွက် လိုအပ်တဲ့ ဗိုက်တာမင်တွေ၊ ဓာတ်သတ္ထုတွေ ဖြစ်ပါတယ်။

    ကိုယ်ခံစွမ်းအား ကောင်းစေရေး နောက်ထပ် အရေးကြီးတဲ့ အချက်တစ်ခုက အန်တီအောက်ဆီဒန့် (antioxidant) လုံလုံလောက်လောက် ရရှိရေး ဖြစ်ပါတယ်။ အန်တီအောက်ဆီဒန့်ဟာ နှလုံးရောဂါ၊ ကင်ဆာနဲ့ အခြားရောတွေကို ဖြစ်စေတဲ့ free radical တွေရဲ့ ရန်ကနေ ဆဲလ်တွေကို ကာကွယ်ပေးသလို၊ ကူးစက်ရောဂါတွေမဖြစ်အောင်လည်း တားဆီးပေးပါတယ်။

    အန်တီအောက်ဆီးဒန့်ဟာ ခန္ဓာကိုယ်က ထုတ်ပေးတာမျိုးမဟုတ်ဘဲ အစားအစာကနေ ရရှိတာဖြစ်ပါတယ်။ အရည်ရွှမ်းတဲ့အသီးတွေ၊ အစိမ်းရောင်အရွက်တွေ၊ ငရုပ်ပွလို အသီးမျိုးတွေက အန်တီအောက်ဆီဒန့် အလွန်ကြွယ်၀တဲ့ အစားအသောက်တွေ ဖြစ်ပါတယ်။

    နိဂုံးချုပ်ရရင်တော့ ရေများများသောက်ပါ၊ အသီးအနှံနဲ့ ဟင်းသီးဟင်းရွက် များများစားပေးပါ၊ အိမ်ရေး၀၀အိပ်ပါ။ ကိုယ်ခံစွမ်းအား ကောင်းနေမှသာ ကူးစက်ရောဂါတွေကို ကာကွယ်နိုင်မှာ ဖြစ်ပါတယ်။

    Ref: Allure Vanguard

  • တစ်ပတ်အတွင်း ကျန်းမာရေးသတင်းများ

    တစ်ပတ်အတွင်း ကျန်းမာရေးသတင်းများ

    ဖေဖော်ဝါရီ ၂၇၊ ၂၀၂၀
    M-Media

    COVID-19 ကာကွယ်ဆေးကို ဧပြီလတွင် လူသား၌ စတင်စမ်းသပ်မည်

    အမေရိကန်ပြည်ထောင်စု မက်ဆာချူးဆက်ပြည်နယ်အခြေစိုက် ဆေးကုမ္ပဏီ Moderna Therapeutics က သူတို့ ဖန်တီးထုတ်လုပ်ထားတဲ့ COVID-19 ဗိုင်းရပ်စ် ကာကွယ်ဆေးကို အမေရိကန်အမျိုးသား ကျန်းမာရေးအင်စတီကျုကို (NIH) ကို ပေးပို့ထားပြီး ဧပြီလအတွင်း ပထမဆုံးအကြိမ် လူသားမှာ စမ်းသပ်တော့မှာ ဖြစ်ပါတယ်။ COVID-19 ဗိုင်းရပ်ရဲ့ ‌ဗီဇကုဒ်ကို တရုတ်ပညာရှင်တွေက ဇန်နဝါရီလ အလယ်ပိုင်းမှာ ထုတ်ပြန်ပေးခဲ့ပြီးတဲ့နောက် ၄၂ ရက်အတွင်း SARS-CoV-2 လို့ ခေါ်တဲ့ ဒီကာကွယ်ဆေးကို ထုတ်လုပ်နိုင်ခဲ့တာပါ။ လူသားမှာ စမ်းသပ်မှုကို နီဘရာစကာပြည်နယ်က ကူးစက်ရောဂါဆေးရုံမှာ ပြုလုပ်မှာဖြစ်ပြီး ဂျပန်မှာဆိုက်ကပ်ထားတဲ့ Diamond Princess ကမ္ဘာလှည့်ခရီးသွားသင်္ဘောပေါ်မှာ ဗိုင်းရပ်စ်ကူးစက်ခဲ့သူတစ်ဦးနဲ့ အခြား ကူးစက်ထားသူတစ်ချို့က စေတနာ့ဝန်ထမ်းအဖြစ် အစမ်းသပ်ခံမှာ ဖြစ်ပါတယ်။

    နာတာရှည် ချောင်းဆိုးရောဂါ ပျောက်နိုင်မည့် ဆေးဝါးသစ်တစ်ခု တွေ့ရှိ

    နာတာရှည် ချောင်းဆိုးရောဂါကို ပျောက်ကင်းစေနိုင်မယ့် ဆေးဝါးတစ်မျိုးကို အင်္ဂလန်နိုင်ငံ မန်ချက်စတာတက္ကသိုလ်က ဖန်တီးထုတ်လုပ်နိုင်ခဲ့ပြီး စမ်းသပ်ကုသမှုအတွင်း လူနာတွေမှာ ရောဂါလက္ခဏာ သိသိသာသာ ကျဆင်းတာကို တွေ့ခဲ့ရပါတယ်။ ကမ္ဘာတစ်ဝှမ်း အရွယ်ရောက်ပြီးသူတွေရဲ့ ၁၀ ရာခိုင်နှုန်းလောက်ဟာ ကျန်းကျန်းမာမာနဲ့ ရောဂါသီးသန့်မရှိဘဲ နာတာရှည်ချောင်းဆိုးဝေဒနာကို ခံစားနေရတာပါ။ Gefapixant (MK-7264) လို့ အမည်ပေးထားတဲ့ အခုဆေးဝါးနဲ့ အမျိုးသား၊ အမျိုးသမီး ၂၅၃ ဦးကို ၁၂ ပတ်ကြာ စမ်းသပ်ခဲ့ရာမှာ တိုးတက်မှုတွေ ရရှိခဲ့ပါတယ်။ နာတာရှည်ချောင်းဆိုတာကြောင့် အဆုတ်ရောဂါအပါအဝင် ကျန်းမာရေးပြဿနာများစွာကို ကြုံရတတ်ပြီး ‌အဆုတ်ကင်ဆာအထိ ဖြစ်နိုင်တယ်လို့ ကျန်းမာရေး ကျွမ်းကျင်သူတွေက သတိပေးထားပါတယ်။

    အဆင့်ကောင်းအောင် ဖိအားပေးခြင်းက ကလေးများတွင် စိတ်ရောဂါဖြစ်နိုင်

    ကျောင်းမှာ အဆင့်ကောင်းကောင်းရဖို့ ဖိအားပေးခံရတာ၊ အွန်လိုင်းစွဲလမ်းတာတွေဟာ ကလေးတွေမှာ စိတ်ပိုင်းဆိုင်ရာ ပြဿနာတွေကို ဖြစ်စေတယ်လို့ ယူ‌ကေအစိုးရရဲ့ ပညာရေးဝန်ကြီးဌာနနဲ့ ကျန်းမာရေးဝန်ကြီးဌာနတို့ ပူးပေါင်းလုပ်ဆောင်တဲ့ လေ့လာမှုတစ်ရပ်မှာ တွေ့ခဲ့ရပါတယ်။ စာသင်ကျောင်းပေါင်း ၂၈၃ ခုမှာ လေ့လာတာခဲ့တာဖြစ်ပြီး ကျောင်းတွေအနေနဲ့ ကလေးတွေ စိတ်ကျန်းမာရေးအတွက် ငွေကြေး သီးသန့်ထား သုံးစွဲသင့်တယ်လို့လည်း ပညာရှင်တွေက အကြံပြုထားပါတယ်။ ကိုယ့်အားကိုယ်ကိုးတတ်အောင် သင်ပေးတာ၊ စိတ်ခွန်အားရအောင် လုပ်ဆောင်တာ၊ မိမိကိုယ်ကိုယ် တန်ဖိုးထားတတ်အောင် သွန်သင်ပေးတာတွေက ကလေးတွေရဲ့ ခန္ဓာကိုယ်နဲ့ စိတ်စိတ်ပိုင်းဆိုင်ရာအတွက် ပိုမိုကောင်းမွန်တယ်လို့ ဆိုပါတယ်။

    Ref: Times, BBC