Tag: Myanmar Military

မတ် ၁၂၊ ၂၀၂၁
M-Media

-အာဏာသိမ်းစစ်ကောင်စီနဲ့ ကာကွယ်ရေးဆိုင်ရာ ပူးပေါင်းဆောင်ရွက်မှုတွေကို ရပ်ဆိုင်းသွားမှာဖြစ်ပြီး မြန်မာနိုင်ငံအပေါ် ပေးအပ်နေတဲ့ အကူအညီတွေကိုလည်း ပြန်လည်သုံးသပ်သွားမယ်လို့ တောင်ကိုရီးယား နိုင်ငံက ပြောကြားလိုက်ပါတယ်။

ဒီလို ဆောင်ရွက်တာဟာ စစ်ကောင်စီက ဆန္ဒပြသူတွေအပေါ် အကြမ်းဖက်နှိမ်နှင်းမှုကြောင့် ဖြစ်တယ်လို့ ဆိုပါတယ်။

“တောင်ကိုရီးယားအပါအဝင် နိုင်ငံတကာအသိုင်းအဝိုင်းက အကြိမ်ကြိမ် မေတ္တာရပ်ခံခဲ့ပေမယ့် ရဲနဲ့ စစ်တပ်ရဲ့ ကြမ်းတမ်းတဲ့လုပ်ရပ်တွေကြောင့် ထိခိုက်ခံစားရသူ အရေအတွက်က တိုးသထက် တိုးလာပါတယ်” လို့ တောင်ကိုရီးယား နိုင်ငံခြားရေးဝန်ကြီးဌာနရဲ့ ဒီနေ့ ထုတ်ပြန်ချက်မှာ ဖော်ပြထားပါတယ်။

ကာကွယ်ရေးဆိုင်ရာ အပြန်အလှန် ဆက်သွယ်ဆောင်ရွက်မှုတွေ ရပ်ဆိုင်းကာ၊ လက်နက်ရောင်းချမှုလည်း ပိတ်ပင်မှာဖြစ်သလို၊ မဟာဗျူဟာကျတဲ့ အခြား ပစ္စည်းတွေ တင်ပို့မှုကိုလည်း ကန့်သတ်သွားမယ်လို့ တောင်ကိုရီးယားက ဆိုပါတယ်။

ဒါ့အပြင် မြန်မာနိုင်ငံကို ပေးအပ်နေတဲ့ ဖွံဖြိုးရေးဆိုင်ရာ အကူအညီတွေကို ပြန်လည်သုံးသပ်သွားမယ်လို့ ကြေငြာချက်မှာ ထည့်သွင်း ဖော်ပြထားပါတယ်။

မြန်မာနိုင်ငံက အခြေအနေတွေ တိုးတက်မှု မရှိမချင်း​ တောင်ကိုရီးယားမှာရောက်နေတဲ့ မြန်မာနိုင်ငံသားတွေကို နေထိုင်ခွင့်ပေးမယ်လို့ တောင်ကိုရီးယားက ကြေငြာထားပါတယ်။

Ref: Reuters

မတ် ၁၁၊ ၂၀၂၁
M-Media

-မြန်မာနိုင်ငံက ပြဿနာမှာ တင်းမာမှုလျော့ချဖို့ အချိန်တန်ပြီလို့ ကုလဆိုင်ရာ တရုတ်သံအမတ် ကျန်းကျွင်းက ပြောကြားလိုက်ပါတယ်။

မနေ့က ကုလ လုံခြုံရေးကောင်စီ အစည်းအ၀ေးမှာ မြန်မာ့အရေးအတွက် ကြေငြာချက်တစ်စောင် ထုတ်ခဲ့ပါတယ်။ လက်ရှိ မြန်မာနိုင်ငံမှာ ဖြစ်ပေါ်နေတဲ့အခြေအနေကို အလွန်အမင်း စိုးရိမ်မိပြီး ဖမ်းဆီးထားသူတွေကို ချက်ခြင်း ပြန်လွှတ်ပေးဖို၊ ဆန္ဒပြ ပြည်သူတွေပေါ် အကြမ်းဖက်သတ်ဖြတ်မှုကို ရပ်တန့်ဖို့ အာဏာသိမ်း စစ်ကောင်စီကို ကြေငြာချက်မှာ တိုက်တွန်းထားပါတယ်။

ဗြိတိန်ကတင်သွင်းတဲ့ ကြေငြာချက်မူကြမ်းမှာ စစ်တပ်ရဲ့ အာဏာသိမ်းမှုးကို ရှုတ်ချတဲ့စာကြောင်း ပါ၀င်ပေမယ့် တရုတ်၊ ရုရှား၊ အိန္ဒိယနဲ့ ဗီယက်နမ်နိုင်ငံတွေရဲ့ ကန့်ကွက်မှုကြောင့် ဒီစာကြောင်းကို ဖြုတ်ပစ်ခဲ့ရပါတယ်။

ကုလဆိုင်ရာ တရုတ်သံအမတ် ကျန်းကျွင်းက ဆွေးနွေးညှိနှိုင်းမှုတွေလုပ်ဆောင်ဖို့ လုံခြုံရေးကောင်စီ အစည်းအ၀ေးအပြီးမှာ တိုက်တွန်းခဲ့ပါတယ်။

“တင်းမာမှုတွေလျော့ချဖို့ အချိန်တန်ပါပြီ။ သံတမန်နည်းလမ်းနဲ့ သွားရမယ့်အချိန်၊ ဆွေးနွေးညှိနှိုင်းရမယ့် အချိန်ပါ “

လုံခြုံရေးကောင်စီကြေငြာချက် ပြင်ဆင်တဲ့ကိစ္စမှာ ပါ၀င်ခဲ့တာကိုလည်း ကျန်းကျွင်းက ၀န်ခံပါတယ်။

“ကောင်စီက အဖွဲ့၀င်နိုင်ငံတွေ တစ်သံတည်းထွက်ဖို့ အရေးကြီးပါတယ်။ ကောင်စီကထုတ်ပြန်တဲ့သတင်းစကားဟာ မြန်မာနိုင်ငံက အခြေအနေ တင်းမာမှုလျော့ချရေး အထောက်အကူဖြစ်ရမှာပါ”

မြန်မာနိုင်ငံကိစ္စမှာ သက်ဆိုင်သူတွေရဲ့ အမြင်မတူမှုကို ဖွဲ့စည်းပုံအခြေခံဥပဒေနဲ့ တည်ဆဲဥပဒေဘောင်အောက်မှာ ဖြေရှင်းနိုင်ရေး နိုင်ငံတကာအသိုင်းအ၀ိုင်းက လုပ်နိုင်ကိုင်နိုင်တဲ့ ၀န်းကျင်တစ်ခု ဖန်တီးပေးသင့်တယ်လို့လည်း တရုတ်သံအမတ်က ထည့်သွင်းပြောဆိုခဲ့ပါတယ်။

“တရုတ်နိုင်ငံရဲ့ ဆွေမျိုးပေါက်ဖော် မူ၀ါဒက မြန်မာပြည်သူအားလုံးအတွက်ပါ။ သက်ဆိုင်သူတွေနဲ့ ဆက်သွယ်ပြီး ဆွေးနွေးညှိနှိုင်းပေးဖို့၊ လက်ရှိတင်းမာမှုကို လျော့ချရာမှာ အပြုသဘောဆောင်တဲ့နေရာကနေ ပါ၀င်ပေးဖို့အတွက် တရုတ်နိုင်ငံက အဆင်သင့်ရှိနေပါတယ်။ “

Ref: Reuters

မတ် ၁၂၊ ၂၀၂၁
M-Media

-ဆန္ဒပြသူတွေအပေါ် အာဏာသိမ်းစစ်ကောင်စီရဲ့ ကျူးလွန်မှုတွေဟာ လူသားထုအပေါ် ကျူးလွန်တဲ့ရာဇ၀တ်မှု (Crimes against Humanity) မြောက်ဖွယ်ရှိတယ်လို့ မြန်မာနိုင်ငံရဲ့ လူ့အခွင့်အရေးဆိုင်ရာ ကုလ အထူးကိုယ်စားလှယ် တွမ် အန်ဒရူးက ပြောကြားလိုက်ပါတယ်။

ဂျီနီဗာမှာပြုလုပ်တဲ့ လူ့အခွင့်အရေးကောင်စီ အစည်းအ၀ေးမှာ တွမ်အန်ဒရူး မနေ့က မိန့်ခွန်းပြောကြားခဲ့တာပါ။ ဖေဖော်၀ါရီ ၁ ရက် အာဏာသိမ်းပြီးနောက်ပိုင်း လူ ၇၀ လောက် အသတ်ခံခဲ့ရတယ်လို့ သူက ဆိုပါတယ်။

“တိုင်းပြည်ကို တရားမ၀င် လူသတ်အဖွဲ့က အုပ်စိုးထားတာဖြစ်ပြီး Crimes against Humanity ကိုလည်း ကျူးလွန်နေပုံပါပဲ”

Crimes against Humanity ထဲမှာ ပါ၀င်တဲ့ ပြည်သူတွေကို သတ်ဖြတ်တာ၊ ဖမ်းဆီးအကျဥ်းချထားတာ၊ နှိပ်စက်တာ၊ ညှင်းပမ်းတာတွေကို ဗိုလ်ချုပ်မှုးကြီး မင်းအောင်လှိုင် အပါအ၀င် စစ်တပ် ထိပ်ပိုင်းခေါင်းဆောင်တွေရဲ့ သဘောတူညီချက်နဲ့ လုပ်ဆောင်​နေတာဖြစ်တယ်လို့လည်း တွမ်အန်ဒရူးက ထည့်သွင်းပြောဆိုခဲ့ပါတယ်။

Crimes against Humanity ကျူးလွန်မှုရှိလားဆိုတာကို တရားရုံးက ဆုံးဖြတ်ရမှာ ဖြစ်ပေမယ့် အာဏာသိမ်းစစ်တပ်က ရာဇ၀တ်မှုတွေကို နိုင်ငံတစ်၀ှမ်းမှာ တစ်ပြိုင်နက်တည်း စီစဥ်ကျူးလွန်နေတယ်ဆိုတဲ့ အထောက်အထားတွေ ထင်ရှားတယ်လို့ ကုလအထူးကိုယ်စားလှယ်က ဆိုပါတယ်။

နိုင်ငံတကာ လူ့အခွင့်အရေးအဖွဲ့ Amnesty International ကလည်း အာဏာသိမ်းစစ်ကောင်စီဟာ ဆန္ဒပြသူတွေကို တုန့်ပြန်ရာမှာ တိုက်ပွဲသုံး ချေမှုန်းရေး လက်နက်တွေကို အသုံးပြုနေကြောင်း၊ ဆန္ဒပြမှုနဲ့သက်ဆိုင်တဲ့ ဗီဒီယို ၅၀ ကျော်လောက်ကို လေ့လာသုံးသပ်ရာမှာ လုံခြုံရေးတပ်ဖွဲ့၀င်တွေ တရားလက်လွတ် ပစ်ခတ်သတ်ဖြတ်တာကို တွေ့ရကြောင်း မနေ့က ထုတ်ပြန်ခဲ့ပါတယ်။

Ref : Reuters

မတ် ၁၁၊ ၂၀၂၁
M-Media

-လက်နက်မဲ့ဆန္ဒပြသူတွေကို တုန့်ပြန်ရာမှာ အာဏာသိမ်းစစ်ကောင်စီဟာ စစ်ပွဲသုံးနည်းစနစ်တွေကို အသုံးပြုနေတယ်လို့ နိုင်ငံတကာလူ့အခွင့်အရေးအဖွဲ့ Amnesty International က ပြောကြားလိုက်ပါတယ်။

ဒီနေ့ ဆန္ဒပြသူတွေကို လုံခြုံရေးတပ်ဖွဲ့တွေက အင်အားသုံးဖြိုခွင်းရာမှာ မြိုင်မြို့က ၆ ဦးအပါအဝင် နိုင်ငံတစ်ဝှမ်းအနည်းဆုံး ၁၈ ဦး သေဆုံးခဲ့ပါတယ်။

Amnesty International က လုံခြုံရေးတပ်ဖွဲ့တွေဟာ ဆန္ဒပြသူတွေအပေါ် အသက်သေစေလောက်တဲ့ အင်အားတွေ အသုံးပြုနေပြီး သတ်ဖြတ်မှုတော်တော်များများမှာ တရားလက်လွတ် သတ်ဖြတ်မှု မြောက်တယ်ဆိုတဲ့ အထောက်အထားတွေ တွေ့ရတယ်လို့ ပြောကြားခဲ့ပါတယ်။

“ဒါဟာ တစ်ဦးတစ်ယောက်ချင်းက ဆုံးဖြတ်ချက်အားနည်းလို့ လက်လွန်ခြေလွန် ဖြစ်သွားတာမျိုး မဟုတ်ပါဘူး။ အမြင်မှန်ရဖို့မရှိတဲ့ တပ်မှူးတွေ အလိုတူအလိုပါ ပါဝင်နေတဲ့ လူသားထုအပေါ် ကျူးလွန်တဲ့ ရာဇဝတ်မှုပါ” လို့ ပဋိပက္ခရေးရာ ကျွမ်းကျင်သူ ဒါရိုက်တာ ဂျိုအာနီ မာရီနာက ပြောပါတယ်။

Amnesty International က သူတို့ဟာ ဆန္ဒပြပွဲက ဗီဒီယို အနည်းဆုံး ၅၀ ကျော်ကို ဆန်းစစ်သုံးသပ်ခဲ့တယ်လို့ ဆိုပါတယ်။

ဆန္ဒပြသူတွေကို ဖြိုခွင်းရာမှာ အသုံးပြုတဲ့ လက်နက်တွေထဲမှာ စနိုက်ပါ၊ အပေါ့စား
စက်သေနတ်၊ ချေမှုန်းရေးရိုင်ဖယ်တွေလို ​စစ်ပွဲမှာသာ အသုံးပြုရတဲ့ လက်နက်တွေ ပါဝင်နေတယ်လို့ ပြောကြားခဲ့ပါတယ်။

ဆန္ဒပြသူတွေကို ပစ်ခတ်နှိမ်နှင်းနေတာတွေကို ချက်ခြင်းရပ်တန့်ဖို့နဲ့ ဖမ်းဆီးထားသူတွေကို ပြန်လွှတ်ပေးဖို့ Amnesty International က တိုက်တွန်းခဲ့ပါတယ်။

Ref: Nikkei Asia

မတ် ၁၀၊ ၂၀၂၁
M-Media

-တရုတ်၊ ရုရှား၊ အိန္ဒိယနဲ့ ဗီယက်နမ်တို့ရဲ့ ကန့်ကွက်မှုကြောင့် မနေ့က ကုလသမဂ္ဂ လုံခြုံရေးကောင်စီရဲ့ ထုတ်ပြန်ချက်မှာ မြန်မာစစ်တပ်ရဲ့ အာဏာသိမ်းမှုကို ရှုတ်ချတဲ့စာသားကို ဖယ်ရှားခဲ့ရပါတယ်။

ကြေငြာချက်မှာ လုံခြုံရေးကောင်စီအနေနဲ့ အခြေအနေကို အနီးကပ်စောင့်ကြည့်နေပြီး အတတ်နိုင်ဆုံး ထိန်းထိန်းသိမ်းသိမ်း ဆောင်ရွက်သွားဖို့အတွက် အာဏာသိမ်းစစ်ကောင်စီကို တိုက်တွန်းထားပါတယ်။ ဒါ့အပြင် နောက်ထပ် တုန့်ပြန်မှုတွေ လုပ်ဆောင်ဖို့ လုံခြုံရေးကောင်စီက အဆင်သင့်ရှိနေကြောင်းလည်း ကြေငြာချက်မှာ ဖော်ပြထားပါတယ်။

ဗြိတိန်ကတင်သွင်းတဲ့ ဒီကြေငြာချက်မူကြမ်းမှာ စစ်တပ်ရဲ့အာဏာသိမ်းမှုကို ရှုတ်ချကြောင်း၊ မလိုက်နာရင် အရေးယူမှုတွေလုပ်ဆောင်ဖို့ သတိပေးကြောင်း ပါဝင်ခဲ့ပေမယ့် တရုတ်၊ ရုရှား၊ အိန္ဒိယနဲ့ ဗီယက်နမ်တို့က ကန့်ကွက်ခဲ့တာကြောင့် ဒီစာသားနှစ်ခုကို ဖြုတ်တာပြင်တာတွေ လုပ်ဆောင်ခဲ့ရပါတယ်။

ဖေဖော်ဝါရီလ လုံခြုံရေးကောင်စီက ထုတ်ပြန်တဲ့ ကြေငြာချက်မှာလည်း အခြေအနေကို စိုးရိမ်မိပြီး၊ ဖမ်းဆီးထားသူတွေကို ချက်ခြင်းလွှတ်ပေးဖို့ ဖော်ပြထားပေမယ့် တရုတ်နဲ့ ရုရှားတို့ရဲ့ ကန့်ကွက်မှုကြောင့် အာဏာသိမ်းမှုကိုရှုတ်ချတဲ့စာကြောင်းကို ဖယ်ရှားပေးခဲ့ရပါတယ်။

ကုလသမဂ္ဂ ပြောရေးဆိုခွင့်ရှိသူ စတီဖနီ ဒူဂျာရစ်က အဖွဲ့ဝင်နိုင်ငံတိုင်းဟာ တစ်နိုင်ငံချင်းအလိုက်၊ အစုအဖွဲ့အလိုက် ဆောင်ရွက်သွားရမှာဖြစ်ပြီး လုံခြုံရေးကောင်စီကနေ ထိရောက်တဲ့ အသံမျိုးထွက်အောင်၊ ထိရောက်တဲ့အရေးယူမှုဖြစ်လာအောင် ဆောင်ရွက်နေတယ်လို့ ပြောကြားခဲ့ပါတယ်။

ကုလရဲ့ မြန်မာနိုင်ငံဆိုင်ရာ လူ့အခွင့်အရေး စုံစမ်းစစ်ဆေးသူနဲ့ နယူးယောက်မြို့အခြေစိုက် Human Rights Watch အဖွဲ့တို့က အာဏာသိမ်းစစ်ကောင်စီကို လက်နက်ရောင်းချမှု ပိတ်ဆို့ဖို့၊ စစ်ခေါင်းဆောင်တွေကို ဦးတည်ပြီး သီးသန့်အရေးယူမှုတွေ လုပ်ဆောင်ဖို့ တိုက်တွန်းခဲ့ပါတယ်။

ဒါပေမယ့် လုံခြုံရေးကောင်စီက သံတမန်တွေကတော့ ဗီတိုအာဏာကိုင်ထားတဲ့ တရုတ်နဲ့ ရုရှားတို့ရဲ့ ကန့်ကွက်မှုကြောင့် ဒီလိုအရေးယူမှုမျိုးကို လောလောဆယ်မှာ လုပ်ဆောင်နိုင်မှာမဟုတ်ဘူးလို့ ပြောကြားခဲ့ပါတယ်။

မနေ့ကကြေငြာချက်မှာ ဆန္ဒပြသူတွေအပေါ် စစ်ကောင်စီက အကြမ်းဖက်​ဖြိုခွင်းတာကို ပြင်းပြင်းထန်ထန် ရှုတ်ချထားပြီး လူ့အခွင့်အရေးချိုးဖောက်တာ၊ အခြေခံလွတ်လပ်ခွင့် ပိတ်ပင်တာတွေအတွက် အလွန်အမင်းစိုးရိမ်တယ်လို့ ဖော်ပြထားပါတယ်။ ဒါ့အပြင် ဖမ်းဆီးထားသူတွေကို ချက်ခြင်း ပြန်လွှတ်ပေးဖို့လည်း တိုက်တွန်းခဲ့ပါတယ်။

သံတမန်တွေက မြန်မာ့အရေးကို လုံခြုံရေးကောင်စီမှာ ဆက်လက်ဆွေးနွေးသွားဖို့ရှိတယ်လို့ ပြောကြားခဲ့ပါတယ်။

Ref: Reuters