ဖေဖော်ဝါရီ ၉၊ ၂၀၂၂
M-Media
-စစ်ကောင်စီက ပြဌာန်းကျင့်သုံးဖို့ ပြင်ဆင်နေတဲ့ ဆိုက်ဘာဥပဒေဟာ ပညာရေး၊ စီးပွားရေးအပါအဝင် ပြည်သူတွေရဲ့ နယ်ပယ်ပေါင်းစုံကို ထိခိုက်လာမှာဖြစ်ပြီး တစ်ခြားနိုင်ငံက အာဏာရှင်တွေ လိုက်လုပ်လာနိုင်တဲ့ အန္တရာယ်လည်း ရှိနေတယ်လို့ ကျွမ်းကျင်သူတွေက သုံးသပ်ပါတယ်။
ပြီးခဲ့တဲ့နှစ် ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း စစ်ကောင်စီဟာ Facebook လို ဆိုရှယ်မီဒီယာတွေကို ပိတ်ပင်လိုက်တာပါ။ မိုဘိုင်းဒေတာတွေကို စျေးမြှင့်ခိုင်းတာ၊ အင်တာနက်တွေ ပိတ်ပစ်တာ၊ တစ်ချို့ ဝဘ်ဆိုက်တွေကို ပိတ်ထားတာတွေ လုပ်ပြီး လူထုကို ဒစ်ဂျစ်တယ်ကမ္ဘာနဲ့ ဝေးကွာအောင် စစ်ခေါင်းဆောင်တွေက လုပ်နေသလို၊ ဆက်သွယ်ရေးကုမ္ပဏီတွေမှာလည်း ကြားဖြတ်နားထောင်နိုင်တဲ့ ကိရိယာတွေ အဓမ္မတပ်ဆင်ကာ ပြည်သူအပေါ် ချိုးဖောက်မှုပေါင်းစုံ ကျူးလွန်နေတာ ဖြစ်ပါတယ်။
မကြာခင် ပြဌာန်းဖို့ ရှိနေတဲ့ ဆိုက်ဘာဥပဒေသစ်မှာတော့ ဆိုရှယ်မီဒီယာသုံးတာကို ထောင်ဒဏ် ကျခံရနိုင်တဲ့ ဒါမှမဟုတ် ဒဏ်ငွေဆောင်ရမယ့် ရာဇဝတ်မှုတစ်ခုအဖြစ် သတ်မှတ်ထားပါတယ်။ ပြည်သူတွေဟာ ပိတ်ထားတဲ့ ဝဘ်ဆိုက်တွေကို ဝင်ရောက်ကြည့်ရှုဖို့အတွက် VPN ဆော့ဖ်ဝဲတွေကို အသုံးပြုနေပြီး စစ်ကောင်စီရဲ့ ဆိုက်ဘာ ဥပဒေမှာ VPN သုံးရင် ထောင် ၃ နှစ် ဒါမှမဟုတ် ဒဏ်ငွေ ၅ သိန်း ပြစ်ဒဏ်ချမယ်လို့ ဖော်ပြထားပါတယ်။
ဆိုက်ဘာဥပဒေကို ဖြုတ်ချခံလိုက်ရတဲ့ NLD အစိုးရလက်ထက်ကတည်းက ပြဌာန်းဖို့ ပြင်ဆင်နေတာဖြစ်ပြီး အာဏာသိမ်းစစ်ကောင်စီရဲ့ လက်ထက်မှာတော့ ဖိနှိပ်ချုပ်ချယ်တဲ့ သတ်မှတ်ချက်တွေ ပိုမိုပါဝင်လာပါတယ်။
“တစ်ခြားအာဏာရှင်နိုင်ငံတွေက ဒီဥပဒေလိုမျိုး ပြဌာန်းရင် ကောင်းမလားဆိုတဲ့အတွေး ဝင်လာနိုင်တဲ့အန္တရာယ် ရှိနေပါတယ်။ မြန်မာမှာတောင် ဒီလိုရသေးရင် ငါတို့လည်း ဒီလိုလုပ်ရမှာပေါ့ – ဆိုတာမျိုးပါ” လို့ Free Expression Myanmar အဖွဲ့က အိုလီဗာ စပန်ဆာက ပြောပါတယ်။
ဆိုရှယ်မီဒီယာအသုံးပြုမှုကို ကန့်သတ်တာ၊ ပိတ်ပင်တာတွေဟာ စီးပွားရေးအပါအဝင် ပြည်သူတွေရဲ့ နယ်ပယ်ပေါင်းစုံကို ထိခိုက်လာမှာဖြစ်ပါတယ်။ အသေးစားနဲ့ အလတ်စား စီးပွားရေးလုပ်ငန်း တော်တော်များများဟာ Facebook လို ဆိုရှယ်မီဒီယာကို မှီခိုပြီး လုပ်ကိုင်နေရသလို၊ ပညာရေး၊ ကျန်းမာရေး ဝန်ဆောင်မှုဆိုင်ရာ သတင်းအချက်အလက်တွေကလည်း ဆိုရှယ်မီဒီယာတွေကနေတဆင့် လူထုဆီကို မြန်မြန်ဆန်ဆန် ရောက်ရှိနေတာ ဖြစ်ပါတယ်။
“(ဒီလိုပိတ်ပင်တာကို) လွတ်လပ်လပ်စွာပြောဆိုမှုတစ်ခုတည်း ပိတ်ပင်ခံရတယ်လို့ ကျွန်တော်တို့ မမြင်ပါဘူး။ ဒီအခွင့်အရေး ပိတ်ပင်ခံရတာက ကြာပါပြီ။ အခုကိစ္စက ဒီဂျစ်တယ်စီးပွားရေးအပါအဝင် အခြားအလုပ်တွေပါ ရာဇဝတ်မှုဖြစ်သွားမှာပါ” လို့ ရန်ကုန်အခြေစိုက် အမည်မဖော်လိုတဲ့ ကျွမ်းကျင်သူတစ်ဦးက ပြောပါတယ်။
မြန်မာနိုင်ငံမှာ လူအများစုက Facebook လို ဆိုရှယ်မီဒီယာတွေကို အသုံးပြုတာကြောင့် စစ်ကောင်စီရဲ့ ဆိုက်ဘာဥပဒေသစ်က လူ့အဖွဲ့အစည်းတစ်ခုလုံးကို ရာဇဝတ်ကောင်တွေဖြစ်အောင် လုပ်လိုက်တာလို့ Myanmar Center for Responsible Business က ဗစ်ကီဗောင်းမန်းက မှတ်ချက်ပြုပါတယ်။
ဖိနှိပ်ချုပ်ချယ်တဲ့ ဆိုက်ဘာဥပဒေကို အာဏာသိမ်းပြီးပြီးမှာပဲ ပြဌာန်းဖို့ စစ်ကောင်စီက စီစဉ်ခဲ့တာပါ။ ဒါပေမယ့် စီးပွားရေးအသိုင်းအ၀ိုင်းက ကန့်ကွက်တာကြောင့် နောက်ဆုတ်ခဲ့တာ ဖြစ်ပါတယ်။
Ref: codastory
